#شغفها_حُبًا
ح 15
نوكوميس"فتاة القمر".
طلعت ساجده ورا أمها اللي كانت تخبط تعيط ؛ بحكم انه حوش سيف قريب منهم هلبا ف كان صوت الرصاص اللي يطلق في الهواء واضح جداً.
ساجده فتحت الشباك حاولت تشوف بس مافيه شي؛
نوريه بصوت عالي: صكري الشباك لا تجي فيك حاجه توا
ساجده خدت وشاحها وركبت للسطح بينما كانت نوريه تعيط عليها عشان ماتركبش.
وقفت ساجده ف إذا سيارة مُراد واقفه وكان هوا اللي يضرب في الهواء ويقول ممكن كانت ردة فعله سيئه بسبب؛حرارة الموقف انه يكون ليك صاحب وثقت فيه اكثر حتى من خوك يدير هكي؛وممكن البعض منكم ح يقول كيف مراد صدق بسرعه بدون حتى دليل لما يكون الاخ او الاب واثق في بنته مش ح يهزه شيء خصوصي لما تكون الثقه في محلها؛ لكن صدق انه إلياس ممكن يدير هكي الانه هوا ببساطه دار الاسوء مع مراد كم من مره حاول يقتله !؟
ساجده حطت يدها على فمها مانعه دموعها من النزول ؛ولما لمحها مراد من فوق وجت عينها في عينه كانت النضره منه زي اللي كان مجروح وقدر يشفي جرحه؛ ولكن الاثر يقعد .
طلع سيف مخلوع من اللي يسمعع فيه في اللحظه اللي وقف فيها مراد ؛ أما سيف مكانش في باله انه ممكن يدير ولده شيء؛ كان مفكر انه جاي على خاطر ساجده.
سيف:شن قصتك إنت ياولد كل شويه جاينا بسلاحك وسياراتك!
مراد شد سيف من سوريته:ولدك وين؟
سيف بخوف:شن تبي فيه؟
مراد كرر سوؤاله بنبره مخيفه ف قال:قتلك ولدك وين!؟
وقبل ما يتكلم سيف ركن إلياس سيارته ونزل وهوا مافيش في باله شك نهائياً بخصوص الموضوع .
ف لتفت مراد لما سمع صوت السياره وسيب سيف،
إلياس: يا ساتر شن فيه؟
مراد ضربه على وجهه: كل خير،..
طاح إلياس ع الأرض ف شده مراد مره تانيه وماهيا الا ثواني حتى كانو جبريل وعصام ملتمين عليهم .. بينما الياس كان يمسح في الدم من وجهه ومراد شاده من تشيرته..
مراد بعصبيه حتى عروق رقبته كانو واضحات: وفرت عليا نضرب مشوار لي عندك.
جبريل: سيب الولد وقلنا خيركم؟
تكلم مراد وعيونه في إلياس: لا مافيه شيء؛ غير اللي نحسابوه خو طلع خاين ،ولا شنو؟
سيف: لا حول الله شن جاي في الشارع والجيران يسمعوا فينا .
دف مراد الياس لي داخل الحوش وسط الصور يعني: مدامكم خايفين من الجيران خلي نخشوا الداخل..
أنهى كلامه ونزل في الياس ضربه ؛ف لا إلياس قدر يدافع عن نفسه ولا جبريل ولا عصام ولا سيف قدروا يوقفوا مراد؛مش مُبالغه لكن مش الانه مراد كان قوي وعضلات وجسم صلب ماقدروش يوقفوه ؛ في حرارة الموقف ؛ والأم اللي مش ح يتحول لي ضعف ح يتحول لي قوه ملتمسه بضعف بتخليك شخص تاني؛ بتخلي أضعف شخص يتحول أقوى.
نزلت ساجده تجري من الدروج؛ف تلقتها امها اللي قالت بخوف: شن ركبك يامنجوها فوق..
خشت مرام في نص حتى تقول:مراد متعك طايح في ولد عمك ضرب قريب يقتله وعمامي مش قادرين يوقفوه ؛ توا كلمتني يقين قالتلي.
شافتلها نوريه بغضب تكلمت:عجبك هكي؟
ساجده: اكيده الياس داير حاجه غلط كان هذا مراد مايتعدا على حد.
نوريه خبطت على رجليها: قاعده دافعي عليه؟ ساحرينك انتي ولا مش بعقلك؟ غبيه ولا تستغبي دارنا العار الناس كلها تتكلم فينا مشيت للعرس واللي يشبح خليقتي يسألني شن القصه وكيف تعطو بنتكم لي واحد مجرم يابنت سودتي وجوهنا اعقلي تربحي واخطي روحك مش ناقصنا جيناك بالهدوء ما مشيتي جيناك بالاعصاب ما مشيتي كيف نجيك ها؟
شافتلها ساجده وتكلمت بثقه: آخر همي الناس شن يقولو؛ ونقُص يدي من الوريد الا الوريد لو مكانش الياس غالط غلطه كبيره.
كملت كلامها ف ركبت كن الدروج متجها لي دارها
نوريه بصوت عالي: الياس مافيش زيه باحترامه راجل وسيد التريس يامعفنه.
مرام هزت براسها: فاتتني المحاضره في جرت الهم هذا
نوريه: بري بري جيبيلي دواي بتقتلني اختكم بتجلطني.
مرام: صبر وخلاص منكم ... وامشت حتى تجيب لي امها دواء.
