ချို့ယွင်းကုန်စည်များ/ ခ်ိဳ႕ယြင္းကုန္စည္မ်ား（Can Ci Pin - 残次品）MM Translation

Chapter-12

(Uni)

"ဘာဖြစ်လို့လဲ?"
အစ်ကို ၄ က ရေပူများကို ပိတ်လိုက်၏။
"ကျန့်လူ... ချို့ယွင်းချက်ကို တင်ပြပါ"

"ကျန့်လူ၏ အာကာသယာဉ်ကိုယ်ထည် ပြင်းထန်စွာဖျက်ဆီးခံရ... ၃၀% ... ၆၀%... ၈၀%... သတိပေးချက်... ပျက်စီးမှုများ ဆက်လက်ဖြစ်ပေါ်နေသည်..."

အစ်ကို ၄ က စက်ရုပ်လူသား၏ အေးစက်နေသောလက်ကောက်ဝတ်ကို ဖမ်းဆွဲလိုက်လေသည်။ ရုတ်တရက် ကျန့်လူက သူ၏ အစိမ်းရောင်မျက်ဝန်းများကို ဖွင့်ကြည့်လာပေ၏။
"သခင်... ကျွန်တော် အာကာသယာဉ်ကိုယ်ထည်နဲ့ အဆက်အသွယ်ပြတ်သွားပြီ"

အစ်ကို ၄ ၏ မျက်ဝန်းများ တဒင်္ဂမျှ မှေးကျဉ်းသွားခဲ့သော်လည်း မကြာမီပင် သူ့မျက်တောင်ရှည်များကို အောက်ဘက်သို့စိုက်ချလိုက်ပြီး ဖုံးကွယ်ထားလိုက်ကာ ကျန့်လူထံမှ ရေနွေးကို လှမ်းယူလိုက်ချေသည်။ ထိုသူက ရေအချို့ကိုငှဲ့ပစ်လိုက်ပြီး ရေနွေးထဲသို့ လက်ဖက်ခြောက်တစ်ထုပ်ပစ်ထည့်လိုက်ကာ စားပွဲခုံနောက်တွင် ထိုင်နေလေ၏။

အေးချမ်းဆိတ်ငြိမ်ခြင်း၏ အငွေ့အသက်တို့ ပျံ့လွင့်နေသော ပေကျင်း- β ၏ ကောင်းကင်ယံသည်ကား အတိုင်းထက်အလွန် ကြည်လင်ပြာလဲ့နေလျက်။

"မျှော်လင့်မထားတဲ့ ကိစ္စပဲ"
အစ်ကို ၄ က တစက်စက်ကျနေသောရေများကို လက်ဆန့်တန်း၍ လှမ်းသုတ်လိုက်ပြီးနောက် လက်ချောင်းများကိုလိမ်ယှက်လျက် ရှိနေပေသည်။ ထိုသူသည် တည်တည်ငြိမ်ငြိမ်ရှိနေဆဲဖြစ်ကာ စကားကို ပုံမှန်ထက်ပင် ပို၍ခပ်နှေးနှေးပြောနေချေ၏။
"ချောက်ချားဖို့မလိုပါဘူး။ ဘာတွေဖြစ်သွားတယ်ဆိုတာကို အရင်ဆုံးခန့်မှန်းကြည့်ရအောင် --- မင်းရဲ့ကိုယ်ထည်က ဆေးလ်ဗားခံတပ်ရဲ့ မြေအောက်ထပ်ထဲမှာရှိနေတာ။ သူတို့က အဲ့ဒါကို လူမြင်ကွင်းမှာ ထုတ်ပြထားမှာတော့မဟုတ်ဘူး"

"ကျွန်တော့် စက်ရုပ်အာကာသယာဉ်ကိုယ်ထည်က သမဂ္ဂရဲ့ ထိပ်တန်းအဆင့်ပဲ။ ဘယ်လိုလက်နက်ကြီးမျိုးနဲ့ ထိပ်တိုက်တိုက်ခိုက်မှုမျိုးပဲဖြစ်ပါစေ အားလုံးကို ကြံ့ကြံ့ခံနိုင်တယ်။ ဒီထိခိုက်ပျက်စီးမှုနှုန်းအရဆိုရင် လက်နက်ကြီးတွေနဲ့ အဆက်မပြတ်တိုက်ခိုက်ခံရလို့ပဲ ... လက်နက်ကြီးတွေတပ်ဆင်ထားတဲ့ အထူးစက်ရုပ်အာကာသယာဉ် တစ်စီးမကရှိလောက်တယ်"