ချို့ယွင်းကုန်စည်များ/ ခ်ိဳ႕ယြင္းကုန္စည္မ်ား（Can Ci Pin - 残次品）MM Translation

Chapter-5

(Uni)

"ကျွန်တော်တို့ ကြားလိုက်ရတဲ့စကားတွေအရဆိုရင် အဆိပ်အသိုက်အမြုံနဲ့ အာကာသဓားပြတွေကြားမှာ ကြီးမားတဲ့ဆက်နွယ်မှုတစ်ခုရှိနေတယ်ဆိုတာ ထင်ရှားနေတယ်"
ကျန့်လူက ဆိုလေသည်။

အစ်ကို၄ ကမူ ခြေချိတ်ထိုင်လျက် ကားမှန်ပြတင်းအပြင်ကိုသာ ကြည့်နေ၏။ အပြင်ဘက်မှ လည်ပတ်လှုပ်ရှားနေသော အာကာသဟင်းလင်းပြင်မှာ အလွန်မူးနောက်သွားစေနိုင်ကာ စက္ကန့်အနည်းငယ်မျှကြည့်နေမိမည်ဆိုလျှင်ပင် အော့အန်သွားရလောက်အောင်စွမ်းနိုင်သော်လည်း အစ်ကို၄ ကား အတော်လေးကျင့်သားရနေချေပြီ။ ကျန့်လူစကားဆုံးသွားပြီးသည့်တိုင် သူက စကားတစ်ခွန်းမျှမဆိုဘဲရှိပေသည်။

ထိုတိတ်ဆိတ်နေသောအချိန်အတွင်းတွင် ကျန့်လူမှာ တစ်စုံတစ်ခုကို ရုတ်တရက်အမှတ်ရသွားကာ သူ့ကိုယ်သူ အမှားပြင်ဆင်လိုက်၏။
"တောင်းပန်ပါတယ်သခင်။ ကျွန်တော့် အခြေခံဝေါဟာရစာရင်းရဲ့ အဲ့အပိုင်းက ခုထိ update မလုပ်ရသေးလို့ပါ"

ကြယ်စုများသမဂ္ဂ ဓားပြတိုက်ဖျက်ရေးဥပဒေထဲရှိ စကားစုတစ်ခုအရ တရားဝင်မှတ်ပုံတင်မထားသော လက်နက်ကိုင်အဖွဲ့အစည်းတိုင်းမှာ အာကာသဓားပြအဖွဲ့တစ်ခုဖြစ်လေသည်။ သဘာဝကျစွာပင် Black Hole သည်လည်း ထိုအဖွဲ့များထဲတွင် အပါအဝင်ဖြစ်ချေ၏။

"ပြန်ရောက်ရင် အဲ့ပုတ်သင်ညိုကို ရှင်းပစ်လိုက်စမ်းပါကွာ။ အဲ့အစား ကြက်တူရွေးတစ်ကောင်သာ မွေးလိုက်"
အစ်ကို၄ က ဆိုလေသည်။
"ကြက်တူရွေးဆိုရင် မင်းရဲ့ ဓားပြဆိုတဲ့ပုံရိပ်နဲ့ လိုက်ဖက်သွားတာပေါ့"

ကျန့်လူလည်း သူ၏ ကျယ်ပြန့်လှသော database* ကြီးထဲတွင် ကမ္ဘာဟောင်းကာလမှ ကာတွန်းပုံတစ်ပုံရှာတွေ့သွားကာ - ခက်ထန်လှသောမျက်နှာထားရှိသည့် ပင်လယ်ဓားပြတစ်ယောက်နှင့် ထိုသူ့ပခုံးထက်ရှိ ထိုသူနှင့်ထပ်တူထပ်မျှ မျက်နှာထားတင်းမာလှသော ကြက်တူရွေးတစ်ကောင်တို့ ဖြစ်ပေ၏။
[database - အချက်အလက်တွေကို စနစ်တကျခွဲခြမ်းစိတ်ဖြာပြီး စီစဉ်သိမ်းဆည်းထားတဲ့နေရာကိုခေါ်တဲ့ IT အ‌ခေါ်အဝေါ်တစ်ခုပါ။ ဒီစာလုံးအပါအဝင် science တို့၊ IT တို့မှာသုံးတဲ့ တချို့စာလုံးတွေက ချောချောမွေ့မွေ့နဲ့ မြန်မာမှုပြုနိုင်ဖို့က သိပ်အဆင်မပြေတာကြောင့် Eng စာလုံးအတိုင်း တိုက်ရိုက်ပဲသုံးသွားပါမယ်နော်]