ချို့ယွင်းကုန်စည်များ/ ခ်ိဳ႕ယြင္းကုန္စည္မ်ား（Can Ci Pin - 残次品）MM Translation

Chapter-6

(Uni)

ငါးမိနစ်အကြာတွင် ဖုတ်အလောင်းကောင်တစ်ကောင်ကဲ့သို့ ပျင်းပျင်းရိရိအသံနှင့် ဂျက်ဇ်ဂီတတေးသွားမှာ အရက်ပုန်းဆိုင်ထဲတွင် နောက်တစ်ကြိမ်ပျံ့လွင့်လာပြန်လေ၏။ လုံးဝကိုသတိလစ်နေဆဲဖြစ်သော Spider သည်ကား စားပွဲခုံခြေထောက်တစ်ဖက်တွင် လျှပ်စစ်စီးနေသည့်သတ္ထုဝိုင်ယာတစ်ချောင်းဖြင့် တုပ်နှောင်ခံထားရကာ စောစောလေးကမှ 'အိပ်ပျော်နေသော လူချောလေး' ပုံစံသို့ ပြန်သွားတော့မည့် ကျောင်းအုပ်ဆရာကမူ ဘားကောင်တာတွင် ပြန်ထိုင်နေပေသည်။

အစိမ်းရောင်ပုတ်သင်ညိုမှာ ကျန့်လူ၏ပခုံးထက်တွင် ပလတ်စတစ်အလှဆင်ပစ္စည်းတစ်ခုအလား မလှုပ်မယှက်ငြိမ်သက်နေပေ၏။

လုပိရှင်တစ်ယောက် သူ့လက်ချောင်းများကို ပုတ်သင်ညို၏ကျောရိုးတစ်လျှောက် အလိုအလျောက်ပွတ်သပ်မိသွားပြီးနောက် ပုတ်သင်ညိုက အနည်းငယ်မျှပင် စိတ်အနှောင့်အယှက်ဖြစ်သွားပုံမရသော်လည်း သူ့အနေဖြင့် ထိုအထိအတွေ့ကို ကြောက်လန့်မိချေသည်။

"ဒီလိုသတ္တဝါကြီးကို မွေးရတာ ဘာကပျော်ဖို့ကောင်းလို့လဲဆိုတာကို ငါ့ကိုရှင်းပြနိုင်မယ့် တစ်ယောက်ယောက်လောက်များ ရှိကြလား?"
လုက ကျောချမ်းစွာဖြင့် မေးလိုက်၏။

"တွားသွားသတ္တဝါတွေမှာ ရှည်လျားတဲ့သမိုင်းကြောင်း ပိုင်ဆိုင်ထားကြပါတယ်ခင်ဗျာ"
ကျန့်လူက သူ့ကို ပြည့်စုံခိုင်လုံသောအကြောင်းပြချက်ဖြင့် ပြန်ဖြေလေသည်။
"ပြီးတော့ အဲ့သတ္တဝါတွေက ရှေးကျပြီး ဆန်းကြယ်တာကြောင့်မို့လို့ ကမ္ဘာဟောင်းခေတ်တည်းက အစပြုတည်ရှိခဲ့ကြတဲ့ စိတ်ကူးယာဉ်ပုံဖော်မှုတွေထဲက နတ်ဘုရားတွေ မိစ္ဆာတွေရဲ့ အသွင်သဏ္ဌာန်တွေအတွက် အခြေခံဖြစ်ခဲ့ကြပါတယ်။ ပြီးတော့ တွေ့ရတဲ့အတိုင်းပါပဲ... အင်မတန် တိတ်ဆိတ်ငြိမ်သက်ကြတဲ့အပြင် အရမ်းကိုလှပခမ်းနားတဲ့ အမြဲတမ်းပြောင်းလဲနေတဲ့အပူချိန်မျိုးရှိကြသလို လည်ပတ်နေတဲ့ သက်ရှိသံလိုက်စက်ကွင်းတစ်ခုလည်း ရှိသေးတယ်။ ဒီသတ္တဝါဟာ ရှုပ်ထွေးပေမယ့် ထူးခြားတဲ့သက်ရှိတစ်မျိုးဖြစ်ရုံသာမက အသက်ဝင်လာတဲ့ ရှေးဟောင်းရတနာတစ်ပါးလိုမျိုး စွဲမက်စရာကောင်းလှပါတယ်"