مر أسبوع فيهو ما شفت عامر و لا حتى لمحتو بالغلط ، بقيت زي الرايحه لي حاجه، صاح انا بتوتر و بتهرب منو بس برضو عايزا أشوفو ان شاء الله من بعيد ساي ، في يوم جمعه كدا جاتني ياسمين، فرحت شديد بجيتها دي ، قالت لي جينا لـ ناس خالي عابدين و قلت أجي اشوفك ، قلت ليها عابدين محجوب؟ أبو ناس سامر؟
قالت لي آيي بتعرفيهو صح؟ ساكنين في الحي التاني، قلت ليها آيي بعرفهم بس اتفاجأت انهم أهلك ما حصل جبتي لي سيرتهم! قالت لي آيي لأنو ما حصلت مناسبه، المهم مشيت عملت ليها الشاي و أمي جات سلمت عليها و طلعت ، قعدنا نتونس كدا لحدي الساعه 5 مسا، بعديها أمها اتصلت عليها و قالت ليها تعالي نحنا حنمشي بعد دا ، ياسمين قالت لي دي أمي قالت اجي حنرجع البيت بعد دا، قلت ليها ما شبعت منك والله كنت عايزاك تقعدي اطول فتره معاي، قالت لي يا زوله نحنا بنشوف بعض يومياً عدا الجمعه و السبت ، نسيتي اننا بنقرِي في مدرسه وحده 😂؟ المره دي تعاليني انتي في بيتنا و خلي الإفترى ما معقوله الزمن كلو أجيك انا و انتي لا! ، قلت ليها ان شاء الله بجيك يوم ، المهم طلعت معاها عشان اقدمها و مفروض حدي يكون باب الشارع بس الونسه جرت و الكلام جاب الكلام و مشيت معاها مسافه كدا لحدي الميدان ، اثناء ما نحنا بنتكلم كدا، جانا سامر و شكلو ماشي يلعب كوره في الميدان، وقف سلم علينا و قال لينا بإستغراب انتوا بتعرفوا بعض؟ عاين لـ ياسمين و قال ليها مها دي صحبتك القلتي ماشه ليها؟ قالت ليهو آيي ، قلت ليهو اتخيل! انا ذاتي اتفاجأت لمن عرفت انك ولد خالها مع انو هي صحبتي من أيام الجامعه بس أول مره اعرف انكم أهلها! قال لي بالجد دي مفاجأه و اجمل مفاجأه كمان و شنو يا زوله انتي مختفيه كدا لا حس لا خبر ؟
قلت ليهو والله انا موجوده لكن انت العامل اخفاء ظهور ، قال لي مشغوليات مشغوليات والله، قلت ليهو ربنا يسهل ، المهم اتونس معانا شويه كدا و مشى و انا ذاتي ح ارجع بعد دا ، ودعت ياسمين و مشيت منها، قبل ما أصل بيتنا عامر ظهر قدامي و اظنو ذاتو ماشي الميدان ، شوفتو وقفت لي قلبي حسيت نفسي لي سنه ما شفتو ما بس اسبوع، جاني شعور حلو خلاص ما قادره أوصفو بس الأكيد انو الفرحه كانت ظاهره علي ، قلت ليهو بالهفه ما قدرت أخفيها عامر كيفك؟
قال لي تمام و طوالي اتحرك من جنبي ، اقسم بالله ندمني على سؤالي، دي كانت أول مره أبادر فيها و اسأل عن زول هو متجاهلني أو اصلاً ما شايفني ، بس الغلط غلطي أكيد هو فهمني غلط و أكيد قال عني بت خفيفه و قليلة أدب عشان كدا قطعها معاي ، احتقرت نفسي شديد و قلت انا ما كدا ، من متين يا مها بتجري ورا ولد و من متين بتتبسطي لمن تشوفي ولد!؟ انا ما كنت كدا بس ما عارفه الحاصل لي شنو! و مع عامر تحديداً ....رجعت البيت و انا لسه بفكر في التغير الحصل لي ، قعدت مع نفسي و راجعت الفات كلو ، لمره وحده بس كنت صريحه مع نفسي و لأول مره اعترفت بيني و بين نفسي....اني بحبو.....ايوه بحب عامر ، بس هو أكيد ما ببادلني نفس الإحساس و دا واضح من تصرفاتو ، بالجد يعني انا مهما كنت بحبو و ما قادره امنع نفسي أو اتحكم في احاسيسي برضو ما ح أصغر نفسي مقابل ولا شي ، مدام هو ما عايز يشوفني و ما عايز أي كلام معاي اذاً انا ذاتي ما ح اقلل من نفسي قدامو ، شكلو التغير المفاجئ دا عندهم وراثه في الأسره ، اول شي اختو ريان و تاني شي هو ، بس على كيفهم 💔
فوق الأسبوع دا مروا أسبوعين و انا عامر دا عديل بقيت لا بتكلم معاهو لا عندي بيهو شغله ، لو شفتو قدامي بعمل نفسي ما شايفاهو ، المهم يوم كنت طالعه من بيتنا و ماشه على الموقف ، شفت رجاء واقفه جنب باب بيتهم صبحت عليها و كنت ح امشي بس شفتها مقلقه كدا ، قلت ليها خير مالك مقلقه كدا؟
قالت لي من قبيل رسلت حمودي للدكان و لـ هسي ما جا الولد خوفني عليهو ، طبعاً هي حامل و اظن في الشهر السابع أو التامن عشان كدا قلت ليها طيب ح اشوفو ليك، قالت لي كدا بنأخرك ، قلت ليها لا لا ما بتأخر الزمن لسه بدري ، خليتها واقفه و مشيت لدكان مصطفى و كالعاده لقيتو نايم ، قلت معناها حمودي مشى دكان مُبشر ، مشيت ليهو هناك ، لمن شفتو قلت ليهو حمودي أمك من قبيل بتفتش عليك سريع امشي ليها، قال لي دقيقه خليهو يديني بسكويت و لبن بدره ، مُبشر قال لي مالك ما بتسلمي يا مها! طبعاً استغربت هو عرف اسمي من وين! و انا اساساً ما قاعده أجي دكانو دا، طبيعي انا اعرف اسمو لأنو بتاع دكان و اسمو بكون متداول بين الناس بس هو عرف اسمي من وين؟
قلت ليهو بقرف كدا كنت مستعجله ، قال لي ما مشكله المهم انتي كيف؟
قلت ليهو عليك الله يا مُبشر مشي الولد دا لأنو أمو منتظراهو ، قال لي طلباتك أوامر ، أدى حمودي اللبن و البسكويت و هو طوالي طلع كنت طالعه وراهو بس مُبشر وقفني ، قلت ليهو في شنو؟
قال لي عايز اسألك البيت الجنبكم داك سيدو ما عايز يأجرو؟
قلت ليهو ما عارفه ، قال لي عليك الله اسأليهو لي عندي ناس قرايبي قالوا لي فتش لينا بيت و زي ما عارفه في الزمن دا صعب الواحد يلقى ليهو بيت كويس و.....قبل ما يقول حرف واحد زياده عامر جا داخل و معاهو حمودي، بعد اسبوعين دي اول مره اشوفو فيها و اول مره اقدر أخت عيني في عينو بس في غضون ثواني زحيت عيوني منو و انا ما قادره اتحكم في نفسي و في الأحاسيس البتجيني بعد كل مره اشوفو فيها ، حسيت نفسي مفضوحه قدامو ، افتكرتو حيسلم علي بس ما قال ولا شي غير يا مُبشر هاك أديني اتنين بسكويت زياده ، و انا طوالي اتحركت من جنبو لمن وصلت باب الدكان مُبشر قال لي ما تنسي موضوعنا يا مها ، هزيت ليهو راسي و طلعت منهم....
____________________________
