بقيت امشي لـ ياسمين في بيت خالها عابدين لحدي ما التلات أيام بتاعة العزى خلصت و هي و أمها رجعوا بيتهم ، أما بالنسبه لـ عامر بقيت ما بشوفو كتير و لو اتلاقينا بقول لي السلام عليكم و بمشي حتى الصباح لمن يشوفني طالعه ما بقول لي تعالي أوصلك ، الموضوع أكل معاي جنبه و دواخلي جاطت شديد و بقيت ما فاهمه التناقض الأنا فيهو دا ، بقيت بزهج من غير سبب و بضايق من اتفه الأسباب و كلو بسببو ، المهم ياسمين أمها و أبوها سافروا لـ بتهم العلى وشك الولاده في السعوديه و منها عندهم نيه يعمّروا ، فخلوا ياسمين تقعد مع ناس خالها عابدين ، اصلاً خالها دا عندو ولدين و بت وحده اسمها سمر قدرنا كدا ماف علاقه بيني و بينها لأنها قواله و بتاعة شمارات و هي من البنات القالوا لـ ريان في شي بيني و بين سامر و وسوسوا ليها عشان كدا لا بطيقها لا هي بطيقني و كما سامر دا أخوها السلام دا ما كنت بديهو ليها ، المهم مشيت لـ ياسمين هناك ، طبعاً سمر دي لو جات قعدت تتونس معانا معناها في شمار عايزا تتأكد منو أو تنقلوا مننا عشان كدا عاملين حسابنا منها، جات قعدت معانا فلما ما قلنا حاجه مهمه قامت مننا، ياسمين قالت لي انتي الفتره دي مالك حاساك ما طبيعيه؟
قلت ليها ماف حاجه ، قالت لي لا والله في حاجه ، قلت ليها بإنفعال عامر ما ليهو علاقه بالحاجه دي ....طبعاً ما كنت منتبه على نفسي لمن قلت كدا ، ضحكت و قالت لي "الفي قلبك بغلبك" و براك جبتي سيرة عامر معناها لازم تحكي لي ، قلت ليها احكي ليك شنو اساساً و ماف حاجه بتتحكي ، قالت لي انتي مضايقه من شنو؟ عامر ضايقك في شنو؟
قلت ليها ما عارفه يا ياسمين والله ما عارفه و قعدت أبكي، قالت لي بسم الله يا مها مالك ، ما رديت عليها و واصلت في بكاي ، بعد ما سكت قالت لي انتي بتحبيهو صح؟
ما رديت عليها، قالت لي اتكلمي عشان اعرف المشكله شنو، بتحبيهو يا مها اعترفي بتحبيهو صح؟
قلت ليها و حتفرق في شنو يعني و هو اساساً ما شغال بي، قالت لي اخيراً ياخ! اصلاً من اليوم الوصلك فيهو شكيت انو في شي بينكم لأنو قبليها بكم يوم كدا برضو وصلك بس ما سألتك، يومها حاولت استفزك و اعرف اذا انتي بتحبيهو ولا لا عشان كدا قلت ليك خليهو لي طيب و اكون بكذب عليك لو قلت ليك اني ما شفت الغيره و الضيق في عيونك بعد كلامي داك.....آيي نعم عامر برضو عاجبني لأنو سمح و وجيه لكن بتنازل عنو عشانك 😂😂🤣🤣
قلت ليها الشغله ما بيدي ولا بيدك و ما بنقدر نبني أحلامنا على زول ما خاتينا في حساباتو و نتعشم على الفاضي ، قالت لي انتي شنو المخليك تفكري كدا؟ ما معروف يمكـ.....قاطعتها و قلت ليها ولا يمكن ولا حاجه، اصلاً عامر كدا ما عندو شغله بالمواضيع دي و اساساً ما بفكر فيها ، قالت لي لكن هو كذا مره وصلك! قلت ليها و يعنى؟! ما انا بس هو أي زول بعرفو و لقاهو في طريقو بوصلو معاهو بغض النظر عن هو علاقتو بيهو كيف، سكتت مسافه بعدها قالت لي حتعملي شنو طيب؟! حتقعدي تكتئبي و تتباكي كدا؟
قلت ليها اعمل شنو يعني؟ ما عندي حل غير اني احاول أبعد عنو لحدي ما اشيلو من بالي و أنزع الإحساس الجواي اتجاهو....
بعد يومين من الكلام دا بالعصر كدا ، أمي رسلتني لـ وحده اسمها عواطف عشان أديها قروش الصندوق و هي ساكنه جنب دكان مُبشر ما بعرفها معرفه شديده كدا ، المهم مشيت و أديتها القروش ، لمن جيت ماره بجنب الدكان سمعت أصوات همس مع انو الدكان مقفول ، قلت احتمال بتخيل ساي بس تاني سمعت أصوات ما مفهومه ، عاينت مسافه للدكان و كنت ح أرجع بس شفت "لعبه " واقعه جنب الدكان ، لمن عاينت كويس اكتشفت انو الدكان ما مطبول بس الباب مقفول ، اترددت اخش ولا لا ، قلت احتمال في شافع جوه و يمكن انجرح ولا حصلت عليهو حاجه عشان كدا سمعت الأصوات القبل شويه دي ...دفرت الباب و بعديها وقفت مسافه و انا ما قادره أستوعب الشايفاهو قدامي ، بقيت زي الزول الوقعت فيهو صاعقه ، فقدت المنطق عديل لا قدرت اتحرك لا قدرت اتكلم ، الشافعه قامت و جات جاريه علي و هي بتبكي يمكن عمرها 4 أو 5 سنوات كانت بتقول لي قلت ليهو ما تقلع لي هدومي ، ماما حتشاكلني و....و... ، هي بتتكلم معاي و انا الكلام كلو ما راضي يخش راسي و عيني من مُبشر القذر العفن ما شلتها ، بس دموعي الوحيده القدرت تعبر عن الحسيت بيهو ، بعد مسافه لساني اتحرك و قدرت اقول ليهو و انا بصرخ فيهو دا شنو الكنت ناوي تعملو دا يا حيوان انت!؟
كان مخلوع و ما قادر يقول كلمه ، بقيت انبذ فيهو و اشاكلو، قلت ليها بالجد حرام عليك الكنت حتعملو في الشافعه دي ياخ انت بنى آدم؟ معقوله شافعه قدر بتك تفكر فيها بالطريقه القذره دي يا وحش يا كلب يا مقرف انت؟
وقف على حيلو و هو متوتر قال لي ما تفهميني غلط يا مها والله براها قلعت هدومها قالت عندها حمو النيل ، قلت ليها امشي بيـ......ما خليتو يكمل و طوالي ضربتو كف لمن يدي وجعتني ، قلت ليهو كلامك دا بتغش بيهو منو انت ؟حمو اليفسخك ان شاء الله، ياخ اخجل اخجل من نفسك يا حيوان ، الله لا كسبك و حسبي الله فيك و في مغتصبين و متحرشين الأطفال الزيك ، ربنا يحرقكم و يقطعكم حته حته و يمحيكم من وجه الكره الأرضيه ، سبب البلاوي دا كلها انتوا ، الزيك ديل هم الدمروا حياة بنات كتيره و زرعوا جواهم الخوف و خلوهم مشوهين نفسياً، الله ينتقم منك و يدمرك و.....
_جود!
كلنا اتلفتنا على مصدر الصوت ، كانت مره واقفه و بتعاين بخلعه للشافعه الجنبي ، البت طوالي جرت ليها و قالت ليها هو القلع لي هدومي ، قلت ليهو ماما حتشاكلني قال لي ما بكلم أمك...
المره بقت تعاين لينا بخلعه ، قعدت على الأرض و ختت يدينها في راسها و هي بتقول لا حول ولا قوة إلا بالله ، حسبي الله و نعم الوكيل ، شويه كدا وقفت على حيلها و عيونها مليانه غضب و دموع ، شالت أقرب حاجه لقتها قدامها و جرت على مُبشر و بقت تضرب فيهو و تنبذو و تضربو بكل القوه و القهره الجواها، لمن راسو بقى عباره عن جروح و دم و هو لسه مصر يكذب و شغال ليها دقيقه افهمك الموضوع ، شلت الهدوم و لبست الشافعه ، أمها ضربت مُبشر لمن وقع في السرير بعديها بقت تكفت في نفسها و خشت في حاله تانيه ، أما انا ما عرفت اعمل شنو لأني مخلوعه و أول مره اتخت في موقف زي دا ، بعد مسافه المره مسحت دموعها بتوبها و ساقت بتها و كانت حتطلع بس رجعت و قالت لي عليك الله ما تكلمي زول ، هزيت ليها براسي بس و انا مستغربه من كلامها دا!
ساقت بتها و مشت سريع سريع عشان ماف زول يشوفها، كنت ح أطلع بس مُبشر ناداني، لمن اتلفت عليهو كان خاتي يدينو في راسو و قال لي اسعفيني قبل ما أموت، قلت ليهو و فيها شنو يعني لو مُت؟ مالك خايف من الموت؟
قال لي و هو بحاول يحرك لسانو ، عليك الله اسعفيني....ما.....ما قادر اشوف حاجه و حاسي الدنيا لافه بي.....ما.....
ما كمل كلامو و طوالي اغمى عليهو ، ما عارفه هل اغمى عليهو ولا مات بس العارفاهو اني خفت شديد حتى الحركه غلبتني و الدم اتجمد في شراييني ، لمن استوعبت الحاصل و الورطه الأنا فيها ما عرفت اعمل شنو، اجري أخليهو ولا اسعفو ....طيب اسعفو كيف لو طلع هو اصلاً ميت! ....لو قربت منو ح أكون ورطه نفسي أكتر ، فـ كـ انسانه اول مره يحصل قدامها حاجه زي دي و أول مره تخاف للدرجه دي و عقلها يقيف عن التفكير الحل الوحيد الجاني هو اني اجري و أخليهو و فعلاً دا الحصل، بقيت جاريه و انا ما عارفه شارع بيتنا على وين ، فجأه كدا الدنيا اتقلبت فوق راسي بقيت ما عارفه الشرق من الغرب و الشمال من الجنوب ، بقيت جاريه بس ما عارفه نفسي ماشه على وين لحدي ما حسيت بزول جراني من يدي و كان بقول لي : بسم االله في شنو يا مها؟ مالك يا بت؟
و انا من شدة الخوف ما عارفاهو منو كل الكنت شايفاهو قدامي مُبشر و هو واقع في السرير و ملابسو كلها دم ، الزول الواقف قدامي بقى يقول لي كدي استهدي بالله يا بت الناس ، في شنو؟....مالك انتي؟.....مها يا بت بتكلم معاك انا ...
يمكن بعد مسافه ، انتبهت ليهو ، عاينت ليهو و انا لسه بشهق من البكى و الكلام غالبني ، قال لي روقي شويه و احكي لي الحاصل شنو؟
بقيت احاول ألقط أنفاسي عشان اقدر اتكلم.....قلت ليهو سامر...هناك....الدكان....الدكان
قال لي فيهو شنو الدكان و قصدك دكان منو انتي ، اتكلمي؟ ....قلت ليهو الشرطه حتجي و ح يتهموني انا، والله ما هبشتو والله ما قربت منو....
سامر بقى مخلوع من كلامي و هو ما قدر يعرف الحاصل، قال لي كدي تعالي ، ساقني على جنبه كدا تحت شجره بعيده شويه عن الناس ، قال لي اهدي شويه و براحه براحه أحكي لي الحصل ، والله خوفه ساي و في لحظة عدم استيعاب حكيت ليهو الحصل كلو من البدايه للنهايه دفعه واحده ، مع انو المره قالت لي ما تكلمي زول بس كلامي القلتو دا كلو ما جايبه ليهو خبر ، سامر سكت مسافه بعدها قال لي امسحي دموعك و امشي بيتكم خلي الموضوع علي....قعدت أبكي و قلت ليهو بيتنا ذاتو ما عارفاهو بوين ، قال لي تعالي طيب ، هو كان ماشي قدامي و انا وراهو عشان الناس ما تنتبه لينا و يقعدوا يتكلموا و يألفوا على كيفهم ، لمن قربنا لـ بيتنا، قال لي بشكلك دا ح تخلعي أهلك ، اذا حابه ممكن اخش معاك و احكي ليهم ، قلت ليهو لا لا ما تحكي ليهم....ما عارفه ليه كنت خايفه من حتة انو اهلي يعرفو مع إنهم في الآخر مصيرهم يعرفوا بس كنت خايفه شديد ، و سامر دا ذاتو لو ما كنت تحت تأثير الصدمه و الخوف ما كنت حكيت ليهو ، يعنى لو قابلني بعد الحصل بنص ساعه أو ساعه ما كنت كلمتو ، قلت ليهو حتعمل شنو؟حيحصل شنو لو هو مات؟ قال لي ما تخافي و ذاتو ما اظن يكون مات بسبب الضرب دا ، اطمني و خشي بيتكم ، مسحت دموعي و أول ما إتلفت عشان امشي بيتنا لمحت عامر واقف و بعاين لينا ، سامر سلم عليهو من بعيد و على طول مشى سريع على دكان مُبشر ، عامر بس قعد يعاين لي بنظره ما قدرت أفسرها ، ما اتكلمت معاهو و طوالي دخلت بيتنا ، أمي قالت لي مالك اتأخرتي كدا؟ أول ما ركزت في ملامحي قالت لي بسم الله مالك؟ ....في شنو يا بتي ....اتكلمي...
بكون كذبت لو قلت قدرت أمسك نفسي و دموعي ، بقيت واقفه قصادها و ببكي بس ، و أمي خلاص اعصابها باظت و بقت مخلوعه و شغاله لي مالك يا بت اتكلمي ، على حس صوتها دا ابوي و سراج جوا و بقوا مستغربين و مخلوعين من بُكاي ، أبوي قال لـ أمي مالا؟
قالت ليهو ما عارفه والله ، جاتني بالحاله دي ، سراج أخوي جا وقف قدامي و قال لي في شنو ما تبوظي لينا اعصابنا مالك يا مها؟
بعد مسافه حكيت ليهم الحصل حتى لمن لقيت سامر و حكيت ليهو ، سراج طوالي طلع من البيت ، شكلو ماشي دكان مُبشر ، أمي جاطت و قالت لي انتي الوداك تدخلي الدكان شنو و وقت شفتي المره بتضرب فيهو و دممتو عديل البوقفك شنو؟ دا ما زمن زول يساعد فيهو زول، الزمن العلينا دا لو شفت زول بضبح زول قدامك عديل خشمك ما تفكوا و عليك بنفسك ، براك بتجيبي المصايب لنفسك هسي الراجل دا لو مات حتتجرجري مع الشرطه و ما بعيده المره تسويها فيك انتي ، هي بتتكلم و انا بزيد زياده في البكى، أبوي قال ليها بنهره خلاص اسكتي و هي ما غلطانه أي زول ضميرو صاحي كان عمل العملتو لو هي ما دخلت الدكان كنتي عارفه حيحصل شنو للشافعه المسكينه ديك صح؟ الزي مُبشر ديل مفروض يشنقوهم في ميدان عام عشان يكونوا عبره و عظه لـ أشباهم من الحيوانات ، أبوي قال كدا و طلع من البيت و واضح انو ماشي يلحقهم و انا و أمي قاعدين على اعصابنا متوقعين في أي لحظه يجينا خبر إنو مُبشر مات ، يمكن بعد ساعه كدا ، أبوي جا داخل و وراهو سامر و سراج أخوي و وشوشهم ما كانت بتبشر بالخير ، من شفتهم اتوقعت الحصل و زي ما بقولو الكتاب بعرفوهو من عنوانو ، أبوي ناداني في المظله حقتهم كانوا قاعدين هم التلاته و كل واحد معالم وشو بتوحي لي بالحصل ، أبوي قال لي ما عايز أكتر لكن الراجل دا مات 💔
"عادتي السيئة أنني دائما أرى نهاية الأشياء منذ بدايتها و مع ذلك أكمل الطريق حتى أخره لأتأكد من "ذكاء غبائي."
يتبع.....
