الليل كلو ما قدرت أنوم و بقيت اتقلب يمكن و شمال ، حاسس الغرفه دي ما سايعاني من شدة الفرحه و السعاده الحاسي بيها ، بقدر الحزن و الضيق الكنت حاسي بيهو قبيل الصباح لأني ما شفتها بقدر السعاده الغامراني حالياً، كل ما أغمض عيوني بتذكرها....ياداب لقيت تفسير لتصرفاتها البتحصل لمن أكون قريب منها ، ليه ما خطر على بالي التفسير دا؟ خجلها و توترها لمن تشوفني كان خير دليل على إنها بتحبني زي ما انا بحبها ، يبقى ما لازم أضيق زمن عايزها بأسرع وقت تكون قدام عيوني و تشاركني نفس الغرفه.....تشاركني عمري الباقي ❤️
_________________________
طبعاً اليوم البعديهو كان يوم سبت بمعني انو ما عندي دوام في المدرسه ، صحيت مبسوطه شديد و كل ما اتذكر أمبارح بتجيني رعشه و بقعد اتبسم براي لمن أمي شكت فيني قالت لي غيتو انتي دي الليله ما طبيعيه يا في واحد غاشيك يا لفحك شيطان ياهن حالتين ما بتطلعي منهن و الله يكضب الشينه ، قلت ليها غيتو في البيت دا الواحد ما يحاول يعدل مزاجو براهو و لازم يصحى مكشر عشان يبين ليكم انو طبيعي صح؟
المهم طول اليوم بقيت نشيطه و مبسوطه و اشتغلت شغل البيت كلو من غير ما أزهج و أمل و أمي دي تعاين لي ساي و اقول "غيتو الجاتك تختاك " قلت ليها هسي لو دخلت نمت و ما اشتغلت ليك تقولي عني كسلانه و تقعدي تعمل مقارنات بيني و بين بنات الجيران!.....و استمر اليوم بالشكل دا ، بعد ما صليت العصر اتذكرت ياسمين قلت هسي حالتها حتكون حاله لازم امشي ليها، لمن كلمت أمي قالت لي انتي ما بتفتري من المشي الكتير دا؟ و بعدين ياسمين دي ما تجيك هي إلا تمشي ليها انتي؟
أبوي قال ليها خليها تمشي بس أوعك تتأخري ، سراج لو جا و لقاك ماف ماف زول بحجزو منك ، خليك عارفه ، قلت ليهو حاضر ما ح اتأخر ، لبست توبي و طلعت مشيت مسافه كويسه من البيت فجأه لقيت عامر قدامي ، كان قاعد جنب حيطه و بتكلم بالتلفون و هو مبسوط! ، اتغظت شديد منو و قلت يا ربي بتكلم مع منو؟
غطيت وشي كويس و جيت ماره بجنبو من غير ما اتكلم معاهو و انا متوتره شديد و حاسه نفسي زي عارضة الأزياء ، جاني صوت ضحكتو و هو بقول لي ، ماشه لـ صحبتك ؟
إتلفت عليهو و قلت ليهو لا ماشه لـ سامر ، قال لي عليك الله سلمي عليهو ، قلت ليهو حاضر و مشيت و انا الشمار حارقني عايزا اعرف كان بتكلم مع منو ، طبعاً بيت ناس سامر كان جايط شديد و اهلهم لسه موجودين و في ناس كانوا بجهزوا في نفسهم شكلهم راجعين الليله ، المهم سلمت على خالتو نعمات يلي هي أم سامر و باركت ليها لأنو امبارح و مع زحمة الناس ما قدرت أوصل ليها ، سألتها عن ياسمين ، قالت لي ياسمين رجعت بيتهم قبيل ، قلت ليها يعنى اهلها رجعوا من السفر؟
قالت لي غيتو قالوا راجعين و هي مشت تشوف بيتهم و تنضفو بس لحدي الآن ما جات ، قلت ليها اها طيب ، طلعت منهم و انا بتصل على ياسمين بس هي ما كانت بترد علي ، خفت تعمل حاجه في نفسها مع زعلتها ديك، بقيت اتصل و اتصل بس ماف رد و ماف طريقه امشي بيها زي الزمن دا لـ بيتهم في نوباتيا ، قلت ما مشكله بكرا بلقاها في المدرسه و اذا ما جات ح امشي ليها في بيتهم لأنو اقرب من هناك ، طبعاً عامر كان في قعدتو ديك كأنو منتظرني ، قلت تاني ح اضطر أجي ماره بجنبو ، الفكره براها خلت قلبي يشتغل دلوكه و رجليني يطاقشو مع بعض ، لمن جيت ماره بجنبو قعد يضحك و قال لي اذا من هسي بتتوتري و بتخجلي كدا بعدين وقت الأكشن و الكتمه الجد جد حتعملي شنو؟
شكلي بقى زي الزول الكشحوا فيهو مويه بارده ، ما كنت عايزا أرد بس الكلام الزي دا و الفي نص الشارع بزعجني شديد ، حسيتو زيو و زي الأولاد الصايعين البقعدوا يشاغلوا في البنات و يقولوا كلام خارم بارم ، عامر دا آخر واحد ممكن اتوقع منو كلام زي دا و في الشارع كمان! بالجد خلعني و صدمني فيهو ، هسي لو سراج أو أي زول تاني سمع كلامو دا حيقول شنو! ما عارفه هل الموضوع كان عادي ولا لا بس التصرف ما عجبني ....إتلفت عليهو و اكتفيت بإني اقول ليهو : "احسن تحترم نفسك و الشارع الإنت فيهو "
قلت ليهو كدا و ما انتظرتو يتكلم و اساساً ما عاينت ليهو في وشو ، دخلت البيت و انا مضايقه شديد ، بين عايزا أبكي و ما أبكي ، عامر دا انا كنت بشوفو حاجه مقدسه و ما حصل شفتو شاغل بت في الشارع و ما حصل شفتو رفع عينو و عاين لبنات جوا مارين جنبو و قعد يشاغلهم ، صح انا لمن جيت ماره بجنبو المره الأول اتكلمت معاهو عادي بس دا ما معناهو انو يقول لي كلام زي دا في الشارع ، على الأقل لو ما محترمني انا كان يحترم نفسو و الناس الفي الشارع ، انا كل ما اتمادى في حبي ليهو و أحس انو ببادلني في الشعور دايماً بعمل تصرف بقلب بيهو الموازين كلها، لحدي أمبارح كنا كويسين شديد لو ما هو قال القالو ، في فرق بين جملة "هسي امشي لأمك لحدي ما أجي اخطفك منها " و بين جملة "اذا من هسي بتتوتري و بتخجلي كدا وقت الأكشن و الكتمه الجد جد حتعملي شنو " ، الجمله الأولى حسيتها طاهره و عفويه و حسيتني بشعور لطيف و حلو عكس جملتو التانيه الحسيتني بالقذاره ، معقول عامر الزول الواعي و العندو هيبه و المختلفه عن كل أولاد الحي يقول كلام زي دا؟ و لي انا كمان؟ كأني حاجه رخيصه و جات ماره بجنبو؟ بالجد تصرفو على قدر ما ضايقني على قدر ما هز صورتو قدامي 💔
__________________________
