مع اني كنت واثق من حتة إنها حترفض بس اضايقت شديد لمن أبوها قال لي رفضت ، ساعتها اتأكدت انها رفضتني عشان سامر الـ 24 ساعه بتمشي ليهو في بيتهم، زعلت شديد و اضايقت و دا كان واضح في ملامحي و نظراتي ليها ، لمن شفتها ماشه بيت ناس سامر غصب عني اتكلمت و قلت ليها: ليك حق ترفضي ما انتي بناسك! كنت متوقع منها تفسير....توضيح...بس هي سكتت و جوابها وصلني ، ياريتها اتكلمت و قالت لي ايوه انا بناسي عشان كدا رفضتك ، مع انو مفروض انا اكتفي بالحاصل دا كلو و اعرف الإجابه من سكوتها بس برضو كنت متمنيها تتكلم و تأكد لي الكلام دا عشان اقدر اقنع قلبي و ازيل الشك الجواي ، بعد الرفض دا مفروض اشيلها من بالي و اتخطاها بس دي الحاجه الوحيده الغلبتني ، و كل مره بتجدد وجعي و ضيقي لمن أشوفها جايه من بيت ناس سامر زي ما حصل قبيل لمن كنت ماشي أصلي المغرب، استغربت و في نفس الوقت زهجت من البتعملو دا! المأخرها للزمن دا شنو؟ و اساساً هي بتمشي ليهم ليه و أهلها موقفهم شنو؟
لمن سراج شاكلها و قعد يصرخ في وشها ما إدّخلت اصلاً دا الكنت عايز اقولو ليها و سراج كأنو عبر عني و فشاني بس لمن كترها و حسيتها حتبكي ما قدرت اسكت ، فوقفت قصاد سراج و هديتو بعد ما اتكلمت معاهو رفعت راسي لقيتها بتعاين لي بنظرات ما قدرت افهمها ، اول ما انتبهت اني شفتها اتوترت و اتخلعت و دخلت جوه...
_________________
اليوم كان يوم جمعه ، جاتنا ياسمين بفطورها ، بعد ما فطرنا و عملت ليهم الجبنه أمي قالت لي أمشي لـ ناس إنصاف ديل بتها ولدت قبل يومين و انتي ما مشيتي ليهم قالت لي بتك بقت كعبه و ما بتجينا، قلت ليها عليك الله ! ولدت متين و غريبه ما سمعت ! قالت لي خلاص هسي دي امشي ليها و سوقي معاك ياسمين ، بعد مسافه قلت ليها طيب ، ياسمين قالت لي ديل منو كمان؟
قلت ليها ديل جيرانا الفاتحين علينا.....قالت لي طيب ارح ليهم ، قلت ليها بس دا بيت ناس ريان برضو! خالتو إنصاف هي أم عامر و ريان ...سكتت مسافه بعديها قالت لي ما مشكله ارح ليهم ، المره دي لبست عبايه و مشينا ليهم، فتح لينا الباب حمودي ، كان فرحان شديد و بقول لينا ماما اشترت لينا بت صغيرونه ، ضحكنا على كلامو و دخلنا ليهم جوه، كانو معاها نسوان و الغرفه مليانه عشان كدا سلمنا و باركنا ليها و قعدنا بره ، طبعاً اتفاجأت لمن شفت سمر جايه مع ريان ، لكزت ياسمين و قلت ليها عايني بت خالك الشماره ، قالت لي غريبه الجابها شنو؟ ....و البت المعاها دي ريان؟
قلت ليها آيي، سكتت و بقت تعاين لـ ريان لحدي ما جاتنا و سلمت علينا بطرف أصابعها، سمر سلمت علينا و قعدت معانا، قالت لـ ياسمين ما قلتي لي انك جايه هنا؟ ياسمين قالت ليها انتي ذاتك ما كلمتيني و اساساً انا ما بعرفهم جيت مع مها ، شويه كدا و خالتو إنصاف جات سلمت علينا و لامتني شديد ، قالت لي بقيتي كعبه و بيتنا دي ما بجيبك ليهو إلا الشديد القوى ، قلت ليها والله مشغوليات بس، قالت لي بري ما سمعنا بمشغوليات بتوقف الناس من بعض ، ما مشغوليات لكن انتي أبيتينا عديييل عشان كدا رفضتي ولدي ، بقيت اعاين ليها و انا مخلوعه ما عرفت اقول ليها شنو فـسكت 💔
ريان جات شايله معاها صينية عصير، قدمتو لينا و هي صاره وشها و قعدت ، أمها عاينت لي و عاينت ليها، قالت ليها انت مالك مع مها يا ريان؟ الحاصل عليكن شنو يا بناتي! ما كنتوا زي السمنه على العسل فجأه كدا وقفتو من بعض! ....في شنو يا مها؟ لأنو ريان دي انا قدر ما حاولت اعرف منها المشكله البيناتكم شنو ما ورتني!
قلت ليها دا البحصل لمن الزول يسمع كلام الناس ، الحصل كان سوء تفاهم و هي ما جات سألتني و فهمتني الحاصل براها وقفت مني و انا والله لو جات حكت لي كنت وضحت ليها بس بما انها فضلت تسكت انا كمان اكتفيت بالسكوت و ما شفت انو في داعي أوضح ليها مدام هي أصلاً صدقت الإنقال ليها عني.....ريان كانت منططه عيونها و خايفه اني أحكي لأمها سبب المشكله، خالتو إنصاف قالت لي أجي دا كلام شنو كمان؟ كلام شنو الصدقتو عنك البت دي؟
قلت ليها خلي الموضوع بيناتنا يا خالتو إنصاف، قالت لي سمح ما بسألكن عن السبب و ما عايزا اعرف لكن في اللحظه دي و في قعدتكن دي تتصالحن و تخلن الزعل و ترجعن زي ما كنتن ، قلت ليها انا ما زعلانه منها و اساساً نسيت الموضوع بس المشكله فيها هي ، كان عندها خيارين و هي فضلت تسكت و تلومني على حاجه انا ما عملتها بعد دا هي حره و انا ما ملزمه أراضيها و أبرر ليها ، قالت لي غيتو انا كلمتكن و الليله يا مها ما بتطلعي من بيتنا إلا تتصالحي مع ريان ....كلنا بقينا ساكتين و أمها واقفه منتظرانا و شغاله لينا اسمعن الكلام يا بناتي....لمن ما ردينا عليها سمعتها بتقول عامر يا عامر ...
هنا قلبي وقف و رجع يدق بسرعه ، شربكت اصابعي و بقيت متوتره شديد و دقات قلبي بتزيد مع كل خطوه منو لحدي ما وصلنا و قال ليها ايوه يا أمي ، قالت ليهو عليك الله اتكلم مع البنات ديل غلبني عديل ، قال ليها منو؟
قالت ليهو مها و ريان متخاصمات ليهن شهور و هسي لمن قلت ليهن اتصالحن ما سمعن كلامي ، كدي اتكلم معاهن يا ولدي...
طبعاً انا كنت منزله راسي و ما قادره أخت عيني في عينو ، عامر عاين لينا الإتنين و قال لينا سبب المشكله شنو؟
ماف وحده فينا ردت عليهو ، كرر لينا السؤال دا تلات مرات و في الآخر قال لينا بنهره بتكلم معاكن انا!؟
كلنا اتخلعنا و خوفنا من نبرة صوتو دي ، ريان قالت ليهو هي الغلطانه ما انا! و هي عارفه السبب ، قلت ليها ايوه عارفاهو و السبب بايخ شديد لو كان جيتي و حكيتي لي ما كنا وصلنا للحاله دي ، قالت لي و انتي لو كان ما طلعتي غداره و عملتي العملتيهو برضو ما كنا وصلنا للحاله دي!
عامر قال ليها هي عملت شنو؟
الإتنين سكتنا و أصلاً مستحيل نحكي ليهو ، من غير ما أعاين ليهو قلت ليهو احسن الموضوع يكون بيني و بينها! عاين لي مسافه و سكت ، قلت لـ ريان مع اني ما مجبوره ابرر ليك بس ح أقول ليك إني ما عملت أي حاجه من الفي بالك و خلي الوصلوا ليك الكلام دا ينفعوك ، قالت لي بإنفعال و انتي خلي.......ينفعك ، يا خاينه يا غداره، بتعملي نفسك مسكينه و انتي شيطان اخرص و....
سكتت لمن عامر هرشها بصوت عالي و قال ليها رياااان!
زعلت لأنو هرشها قدامنا فطوالي قامت مننا و هي بتبكي، عاينت لـ ياسمين و طوالي وقفت على حيلي و هي وقفت وراي، خالتو انصاف قالت لي كدي اقعدي يا بتي و فهمونا الحاصل ، ما رديت عليها و طوالي طلعت من بيتهم و وراي ياسمين ، لمن دخلنا البيت ياسمين قالت لي تستاهل عجبني ليها، شفتي عامر بحبك كيف و هرش أختو عشانك ، ما كان ترفضيهو يا مها 🙈💜
بس مشكلتك معاها شنو؟ قلت ليها قالت في شي بيني و بين سامر و بنات الحي هم الوصلوا ليها الفكره دي و على راسهم سمر بت خالك ، سكتت مسافه بعديها قالت لي عشان كدا هي اختلفت مع سامر و عشان كدا هو كان بحنسك عشان انتي تتكلمي معاها؟ قلت ليها ايوه، قالت لي طيب لو انتي و هي ما كنتوا متشاكلين هل كنتي حتتكلمي معاها و تكوني واسطه ليهو ؟
قلت ليها لو انا و هي ما كنا متشاكلين معناها هي و هو برضو ما كانوا حيكونوا متشاكلين فـ بالتالي سامر ما حيكون محتاج لأي واسطه ، قالت لي انتي شايفه انو ريان مناسبه ليهو؟ احسن انا ولا ريان؟
قلت ليها اصلاً دا ما سؤال تسأليهو ، سامر عارف نفسو عايز منو و منو المناسبه ليهو و انا ما لي دخل في اختياراتو ، قالت لي افهم من كلامك انو لو اختار ريان ما عندك مانع و ما حتزعلي علي؟
قلت ليها كيف ما ح أزعل عليك؟ بس زعلي ما حيفيد بشي و اصلاً سامر هو حر في حياتو لا انا لا انتي بنقدر نجبرو على حاجه صح؟
قالت لي ممكن تعملي حاجه وحده عشاني؟ قلت ليها بإستغراب شنو هي؟
قالت لي عايزاك تقولي لـ سامر ياسمين بتحبك أو لمحي ليهو، المهم خليهو يعرف إني بحبو ، قلت ليها جنيتي يا ياسمين ، مستحيل اعمل كدا! و مستحيل سامر يغير قرارو اذا عرف انك بتحبيهو بالعكس معاملتو معاك حتتغير و حيخت ألف حاجز عشان يمنعك تتعشمي فيهو، قالت لي ما حتعملي كدا عشاني صح؟ ....كويس يا زوله
قالت لي كدا و طوالي طلعت من الغرفه ماشه على باب الشارع لحقتها و بقيت احاول افهمها بس هي ما ردت علي و طلعت ، لحقتها تاني و قلت ليها عليك الله يا ياسمين ما تزعلي مني، سامر حيقول عني شنو،! هو طلب مني اتكلم ليهو مع ريان بخصوص انو عايز يعرسها امشي و اجي اقول ليهو ياسمين بتحبك! عشان تجيهو فكرة اني ما عايزاهو يعرس ريان؟
قالت لي معناها انتي عايزاهو يعرس ريان! قالت ليها اخخ منك يا ياسمين افهمك كيف بس؟! قالت لي فهمت المفروض افهمو و عرفت انتي واقفه في صف منو، قالت كدا و مشت خلتني واقفه جنب الباب، قبل ما أدخل و اقفل الباب، ما عارفه ليه بس عاينت يميني، من بعيد لمحت سمر واقفه مع عامر ، اتغظت شديد و النار ولعت جواي ، الموقفها معاهو شنو؟ عايزا منو شنو كمان؟ عاينت ليهم مسافه بعديها دخلت و قفلت الباب بزهج كدا
____________________________
لي زمن بسأل ريان عن سبب المشكله البينها و بين مها بس ما كانت بتديني جواب كافي ، ليهم شهور منقطعين عن بعض، لمن أمي نادتني و طلبت مني اتكلم معاهم قلت دي فرصه عشان اعرف شنو الوقفهم من بعض الشهور دي كلها لأنها حاجه بتحير والله، يعني فجأه كدا وقفوا من بعض من غير ما يفهمونا حاجه، لمن سألتهم و كررت ليهم السؤال و ما لقيت جواب، اضايقت من سكوتهم و عرفت انو سبب المشكله كبير ما بايخ زي ما قالت مها ، لمن بدوا يتكلموا مع بعض ركزت في كلامهم عشان افهم المشكله شنو، بقيت واقف عند جملة ريان لمن قالت ليها: و انتي خلي....ينفعك ، قصدها شنو أو قصدها منو؟ ؟
لمن ريان جاطت و بقت تنبذ فيها ما قدرت اسكت و أخليها تسمعها الكلام دا كلو، مع اني ما حصل رفعت صوتي على ريان أو هرشتها قدام زول بس المره دي و من غير ما حس لقيت نفسي بهرشها ، زعلت مني و قامت دخلت جوه، و مها برضو ما قعدت و مشت بيتهم، مشيت لـ ريان لقيتها بتبكي مسحت ليها دموعها و اعتذرت منها بس كعادتها ما بترضى بالساهل ، جاتني فكرة اني اشتري ليها حاجه بتحبها ، فـ اتذكرت انها بتعشق الباسطه، عشان كدا طلعت من البيت و مشيت لـ الحلواني الجنبنا، لمن كنت راجع لقيت اخت سامر تقريباً اسمها سمر جايه من الدكان، قلت ليها أمي رسلتك ولا شنو؟ (لأني قبل شويه خليتها في بيتنا ) قالت لي لا هي ما رسلتني بس لقيت انو ماف سكر عشان كدا جيت اشتريهو ، قلت ليها غريبه السكر متين خلص! قالت لي ما عارفه احتمال كان موجود في مكان بس انا ما فتشت كويس، طلعت قروش و قلت ليها دي حقت السكر، قالت لي لا والله ما بشيلها عادي ما فيها شي، بالغصب مسكتها القروش و أول ما اتحركت من جنبها قالت لي عامر!
إتلفت عليها و قلت ليها ايوه! سكتت مسافه بعديها قالت لي ما عارفه اقول ليك ولا لا ، بس ما تفهمني غلط ، قلت ليها احكي سامعك!
قالت لي ما كنت تشاكل اختك بسبب مها، صدقني مها هي الغلطانه و العملتو ماف صديقه بتعملو ، قلت ليها بإستغراب عملت شنو هي؟
قالت لي واضح انو ما عندك علم.....سامر أخوي كان ناوي يخطب أختك حتى انو كلم أمي و أبوي و كنا ناويين نجيكم في البيت و نطلبها منكم رسمي ، بس مها دخلت بيناتهم ، و بقت تعمل حركات لـ سامر عشان يخلي أختك و كل ما تشوفو في مكان بتمشي عليهو و كل الناس شاهده على عمايلها و وصلوا الحقيقه دي لـ ريان و هي فصلتها منهم الإتنين و قالت لـ سامر ما تجي بيتنا و الخطوبه دي ما حتحصل و كلو بسبب مها ، بعد الشهور دي كلها سامر ما شال الفكره من راسو و كل مره بقول يجي يتقدم ليها بس خايف هي ترفض بسبب الحصل بيناتهم هو ما عارف ليه ريان شاكلتو و قالت ليهو ما تجي تخطبني و ما عارف انو مها هي السبب عشان كدا قبل أيام قال لـ مها عايزك تتكلمي لي مع ريان و تعرفي لي منها هي الحاصل شنو و ليه فجأه غيرت رأيها ....مها بعد ما قال ليها كدا بقت تعمل حركاتها الزمان ديك و بقت 24 ساعه في بيتنا بس عشان تشوف سامر و تتونس معاهو و نهاي ما فاتحت ريان في الكلام القالو ليها سامر لأنها ما عايزاهو يخطب ريان ، رغم عمايلها دي كلها ريان ما حصل فضحتها و شهرت بيها و براك شفت دا قبيل لمن ما رضت تحكي ليك الحاصل مع انها ما غلطانه ، دا العايزاك تعرفو أختك مسكينه و ما بتغلط على زول لكن مها عكسها تماماً ما عارفه هي عايزا شنو من سامر أخوي ، بس متأكده انها رفضتك عشانو، مع انو هو ما بحبها و ما عندو ليها حاجه لكن البت لصقه و حالفه ما تخليهو 💔
ما يؤلم الشجرة ليس الفأس ما يؤلمها حقاً ان يد الفأس من خشبها 💔
يتبع.....
