أول ما أبوي فتح الباب اتفاجأت بـ الطالبه لجين و معاها مره كدا أظن دي أمها و واحد أطنو أخوها ، من غير ما تسلم قالت لـ بتها دي؟ و أشرت علي ، بتها قالت ليها و هي بتبكي آيي دي هي، أمها ولا اتفاهمت طوالي نطت فيني و بقت تقول لي ليه تضربي بتي كدا ، خليتي جسمها كلو محمر والله ما أخليك و نفس العملتيهو فيها انا بعملو فيك ، بقيت اتصارع معاها عشان افك نفسي منها و افهمها الحصل لأني ما غلطانه بس هي ما أدتني فرصه، أمي و أبوي بقوا يجروا فيها و هي مصره ما تفكني ، أبوي قال ليها احترمي نفسك و ما تخليني اتصرف تصرف لا بليق بي لا بليق بيك ، الولد المعاها ادخل و جراها من يدها قال ليها بنهره كدا فاتن! اهدي شويه ، قالت ليهو أهدى كيف! ما شايف جسم بتي عامل كيف! ؟حرقت قلبها بالدق الله يحرقها، أمي طوالي قالت ليها الله يحرقك انتي دي و بتك، كمان جايه بيتنا و عايزا تدقي بتي؟ هسي انا كان مسكتك و دفنتك في ارضك دي في زول بقدر يسألني؟ المره قالت ليها وجعك صح؟ الما رضيتيهو لـ بتك انا ذاتي ما برضاهو لـ بتي، أبوي قال ليها عارفه بتك دي انضربت ليه ولا جايه جاريه ساي؟
قالت ليهو بغض النظر عن هي عملت شنو ماف أي زول بحق ليهو يرفع يدو عليها ، هو انا أمها ما قعد اضربها تجي التافهه دي تضربها لي!
أمي قالت ليها تافهه في عينك ان شاء الله و بتك دي مدام ما عايزا يضربوها ليك قعديها في بيتك و جيبي ليها معلم في البيت لكن طول ما هي في المدرسه تنضرب زيها و زي أي طالب ، المره قالت ليها بتي ما زي أي طالب عشان تنضرب ، عاينت لي و قالت لي الله يقدرك تاني ارفعي يدك عليها ، اقسم بالله اخليك تعفني في السجن و هسي كما أخوي دا و معلمات المدرسه كان زمنك دا في السجن ، و الغلط ذاتو غلط المديره الخلتك تعملي الخدمه في مدرستها ، قلت ليها انا ما غلطانه و ما بتك براها الإنضربت ، هدي قدامك اسأليها الحصل شنو و اسأليها عن البتعمل فيهو، قالت لي هي حره تعمل البعجبها، قلت ليها و انا ذاتي حره و بعمل البعجبني و هدي قدامك و قدام بتك والله العظيم تاني تكرر العملتو الخرطوش ما حيقيف منها، صرخت فيني و بقت تهددني حتى انها كانت على وشك انها تضربني بس أخوها مسكها مني ، على حس أصواتنا العاليه دي ، الجيران اتلموا و منهم عامر و أمو و اختو ريان ، عامر جا و قال لينا خير يا جماعه في شنو؟
أم لجين رفعت أصبعها علي و قالت لي انا حذرتك و الله يقدرك تمدي يدك عليها تاني عشان أرجعها ليك مكسوره ، ساقت بتها و مشت ، و الولد بقى واقف ، قال لينا معليش يا جماعه و حقكم علي اختي شويه عصبيه و ما بترضى ببتها ، أبوي قال ليهو ماف زول برضى بجناهو لكن دا ما اسلوب تتكلم بيهو مع الناس و دي ما طريقه تجي بيها بيوت الناس، الولد قال ليهو معليش يا عمي امسحها لي في وشي، عاين لي و قال لي آسفين شديد يا أستاذه، ما رديت عليهو دخلت جوه و انا بالجلاله ماسكه دموعي، ما حصل اتعرضت لموقف زي دا ، سامعه أبوي بقول، اتفضلوا خشوا جوه يا جماعه، شويه كدا أمي جات خاشه مع خالتو إنصاف ، ريان شكلها رجعت بيتهم و أمي بتنبذ ساي في أم لجين مع انها ما عارفه الحاصل شنو ، قالت لي المره المجنتره دي مالا معاك و بتها عملت ليك شنو؟.......حكيت ليهم الحصل خالتو إنصاف قالت لي اصلك ما غلطانه و بتها دي قليلة أدب ساي و كيف ما تكون قليلة أدب اذا امها ذاتا مره مطموسه و عايزا ليها دقه ....و بقوا هم الإتنين ينبذوا فيها ضحكوني والله رغم الضيق الكان جواي بسبب الحصل ، ابوي جا اتكلم معاي شويه كدا و قال لي اصلك ما تخافي منها و بتها دي كان غلطت تاني دقيها زيها و زي أي طالبه.......زي الساعه 8 مساء كدا اتصلت علي ياسمين و قالت لي قبيل اتصلت عليك كذا مره ما رديتي علي و تاني ما رجعت ليك لأنو مشيت لجدي في المستشفى زي ما عارفه ، في أم طالبه جاتك في البيت صح؟ قلت ليها ايوه ، قالت لي طبعاً المره جات المدرسه نهاية اليوم تنبح و تصرخ من باب الشارع لحدي ما وصلت مكتب المديره و كانت بتفتش عليك شاكلت المديره و المعلمات و قالت ليه بتها تنضرب ، قالت ليهم وروني ساكنه وين و إلا كلكم تلقوا نفسكم في السجن و دا ما بكلفني غير مكالمه وحده ، المديره قدر ما حاولت تهديها و تتفاهم معاها المره بتفور زياده، قالت ليهم عايزا اتفاهم مع الأستاذه دي وصفوا لي بيتها، في وحده من المعلمات اظنها بتعرف المره دي وصفت ليها بيتكم عشان كدا انا اتصلت عليك عشان أديك خبر بس انتي ما رديتي ، حصل شنو لمن جاتكم في البيت؟
حكيت ليها الحصل كلو، قالت لي المره الفقر دي الظاهر عليها ما هينه يا مها فالأحسن تكوني بعيده عن بتها، غيتو من شكلها واضح انها قادره و وراها ناس كبار، عشان كدا حاولي ما تختي راسك بـ راس بتها ....قلت ليها غريبه! امبارح القريبه دي كنتي بتقولي لي ما تسكتي للطلبه و تبقي مسكينه هسي الجد شنو؟
قالت لي هسي الوضع اختلف، شوفة عيني يا مها المره دي خطيره حتى طريقة تهديدها لينا و للمديره كانت طريقة تهديد زول قادر و واثق من كل حرف بقولو عشان كدا أبعدي عنها دي نصيحتي ليك......المهم اتكلمنا شويه و قفلنا على كدا
في اليوم البعديهو أمي من الصباح شغاله تقول لي لو المره ديك جاتك في المدرسه بس اتصلي علينا عشان نمرمطها ليك أوعك تسكتي ليها، ضحكت و قلت ليها طيب ، أول ما طلعت لمحت عامر برضو كان طالع ، اقسم بالله أول ما شفتو قلبي اشتغل دلوكه و ما عرفت اقبل وين ، طول الأسابيع الفاتت كنت بتجنبو و لمن امر بجنبو بعمل نفسي ما شايفاهو بس المره دي ماف مهرب فإضطريت أقول ليهو صباح الخير و امشي من غير ما انتظر ردو ، مشيت سريع سريع لحدي ما بعدت عنو ما وقفت إلا لمن عربيتو وقفت قدامي ، فتح الباب و من غير ما يعاين لي قال لي اركبي، قلت ليهو ماف داعـ.....قاطعني و قال لي قلت ليك اركبي ، المشكله انو ناس الشارع بعاينوا لينا و انا حاسه نفسي محرجه من النظرات دي ، ركبت ورا و قفلت الباب و انا بصعوبه بقيت اتنفس و يديني بقوا باردات ، أبداً ما حاولت اعاين ليهو لأني اساساً ما ح اقدر ، كنت بعاين بالشباك و انا مشربكه اصابعي مع بعض كأني بحاول أدفيهم بسبب البرد الحاسه بيهو ، قال لي امبارح الحصل شنو بالضبط؟
كلامو معاي وترني ، اذا انا ما قادره اعاين ليهو فكيف ح اتكلم معاهو! ضغطت شديد على اصابعي و قلت ليهو من غير ما أتلفت عليهو دي أم طالبه و.........الخ ، قال لي بتها غلطانه و هي المفروض توريها الصح من الغلط و ما مفروض تقيف معاها و تشجعها على الغلط ، قلت ليهو دا المفروض ، بعد شويه كدا لمحت سامر قدامنا و كان بأشر لـ عامر عشان يقيف ليهو، اتنفست بأريحيه كدا و انا بقول في سري اخيراً حيكون معانا زول ، عامر وقف ليهو بس حسيتو زي الإضايق ، سامر ركب و سلم عليهو و قال ليهو وينك يا زول! عامر قال ليهو مشغول مع جري الدنيا دي، سامر قال ليهو ربنا يسهل ، سامر عاين لي كدا و قال لي اووو مها ما انتبهت ليك والله كيفك ، قلت ليهو كويسه انت كيف؟ قال لي الحمدلله تمام ، المهم طول الطريق سامر كان بتكلم معاي و انا ياداب حسيت بإرتياح لأنو سامر خفف توتري الكان بحصل بوجود عامر ، بعد مسافه كدا سامر قال لـ عامر اقيف لي هنا ، وقف ليهو نزل و قال ليهو مشكور يا الحبيب و قال لي مع السلامه ، قلت ليهو الله يسلمك ، عامر بعديها ساق العربيه بأقصى سرعه و المره دي نهاي ما اتكلم معاي ، حسب الفهمتو انو عامر اضايق عشان سامر ركب في عربيتو، يمكن هو ما بحب زول يركب عربيتو من غير ما هو يقول ليهو تعال أوصلك زي ما عمل معاي ، قلت يلا احسن نصل سريع عشان اعصابي المشدوده دي ذاتها ترخي شويه ، وصلني جنب المدرسه أول ما نزلت هو طوالي اتحرك من غير ما يقول حاجه ، قلت دا واحد منفسن ساي و بتاع حالات ، وقفت جنب باب المدرسه أخدت نفس عميق و دخلت وسط نظرات ما قدرت افسرها غير إنها نظرات ساخره من الطالبات و على راسهم لجين، كانت واقفه و مربعه يدينها و بتعاين لي و بتضحك ، ما اشتغلت بيها و واصلت طريقي، ياسمين جات سلمت علي و قالت لي سجمك المديره من قبيل بتسأل عنك امشي ليها، دخلت ليها في المكتب صبحت عليها ردت علي و قالت لي اقعدي، بعد ما قعدت قالت لي بغض النظر عن الحصل أمبارح و بغض النظر عن كونك طلعتي من المدرسه قبل الدوام يخلص و من غير ما تكلمي زول ، لجين دي تاني ما تقربي منها، قلت ليها بس....قالت لي عارفاها لئيمه و قبلك كتار من المعلمات شكوا منها ، لو عايزا تكملي خدمتك دي اعملي نفسك عميانه و طرشه ، أمها دي زوله ما هينه و عادي ممكن ترمينا كلنا في السجن و تتهمنا بحاجات نحنا بريئين منها عشان كدا اعملي حسابك و إلا ح اضطر أنهي خدمتك في مدرستي ، هزيت ليها راسي بس و طلعت منها حتى الطابور ما حضرتو معاهم ، زهجت و اضايقت شديد ، المهم بعد ما دخلوا الفصل ، المديره قالت لي ما تمشي لـ تالته ديل ، امشي درسي لي أولى أو تانيه ، قلت ليها طيب، دخلت لـ سنه أولى ثانوي ، درستهم من غير نفس و طلعت منهم ، ساعة الفطور ، كنت قاعده في الإستراحه، جاتني ياسمين و اتكلمت معاي في نفس الموضوع، قلت ليها خلاص اقفلي السيره دي لأني بالجد تعبت منها! قالت لي خلاص ح اقفل الموضوع دا و افتح معاك موضوع....منو داك الجابك قبيل بعربيتو؟
قلت ليها بس عامله زي الصقر مراقبه الناس، شفتيهو كيف انتي؟ ضحكت و قالت لي الباب كان فاتح ، احكي لي السمح و الوجيه دا منو مع اني ما شفتو كويس ؟
قلت ليها دا عامر ولد جيرانا ، قالت لي الله! حتى اسمو حلو زيو 😭❤️
سكتت مسافه و بعديها قالت لي ماف بينك و بينو حاجه كدا ولا كدا؟ قلت ليها حاجة شنو مجنونه انتي؟ قال لي تعالي اوصلك و جيت معاهو و بس! قالت لي اهدي اهدي كان مجرد سؤال مالك منفعله كدا؟
بعدين كما عاجبك خليهو لي انا بقدر عليهو مع اني مستغربه انو بالوجاهة دي كيف ما عاجبك! في احتمالين يا إما انتي انسانه غبيه و متخلفه يا إما عندك زول ، قلت ليها زول في عينك ياخ ، قالت لي معناها غبيه و متخلفه بس ما مشكله انا موجوده و مستحيل اضيق حاجه نضيفه زي ولد جيرانكم دا من اليوم ح أصبها في بيتكم ،
اضايقت شديد لمن هي قالت كدا بس ما بقدر اقول ليها حاجه و عامر اساساً ما شغال بي ، المهم كملت يومي و ما ح اقول كان عادي ، من جهه كنت مضايقه من الكلام القالتو ياسمين و من جهه تانيه من الحركات البتعملها لي لجين، لامه ليها كذا بنت كدا و كل ما تشوفني بتخليهم يضحكوا بصوت عالي! لا و كمان معاها تعليقات زي عامله طرحتها كيف و عبايتها كلها طبشير و كلام بالشكل دا ! و انا ساكته و مستحمله دا كلو و بقول معليش دي بت صغيره ما أخت راسي براسها و احسن أطنشها ، في نهاية اليوم مشيت صليت و شلت شنطتي و طلعت ، طبعاً ياسمين طلعت من قبيل عشان جدها مرقد في المستشفى ، لمن طلعت من المدرسه لمحت لجين واقفه ليها مع ولد و كان مقرب منها شديد ، اترددت امشي عليهم ولا لا ، في الآخر مشيت خليتهم و قلت ما عندي بيها شغله اذا هي جوه المدرسه اعترضت و قالت ما يدقوها و أمها ذاتا اعترضت فما بالكم لمن تكون خارج المدرسه! أكيد اول حاجه حتقولها لي ما عندك بي شغله اصلاً هي قاعده على الهبشه بس ، لمن رجعت البيت ، لقيت فيهو أمي بس ، قالت لي أبوك و سراج مشوا البكى بتاع ناس عابدين محجوب طبعاً دا خال ياسمين و أبو سامر ، قلت ليها بخلعه المات ليهم منو؟
قالت لي عندهم جدهم مرقد في المستشفى اتوفى قبيل، قلت ليها ربنا يرحمو ، دا جد ياسمين صحبتي، أمي قالت لي عليك الله! قلت ليها والله جد انا ذاتي ما كنت عارفه بس في جيتها الآخيره عرفت منها لأنها جات لناس خالها عابدين ، قالت لي خلاص انا ماشه عليهم من قبيل كنت منتظراك عشان ما تجي تلقي البيت فاضي، قلت ليها انتظريني ماشه معاك ، جريت غيرت العبايه و لبست توب و اتشطفت و مشيت مع أمي ، طبعاً ناسهم كتار مبالغه و عربات ما تديك الدرب ، قبل ما ندخل لـ جوه جينا مارين جنب عامر أمي وقفت تسلم عليهو و انا عملت نفسي ما شايفاهو و طوالي مشيت و دخلت جوه ، بقيت افتش على ياسمين لحدي ما لقيتها أديتا الفاتحه هي و باقي أهلها، قالت لي ارح نمشي فوق هنا في جوطه و كواريك و انا صدعت عديل ، قلت ليها طيب ، المهم مشينا قعدنا فوق و هي واضح انها متأثره بوفاة جدها دا لأنها قعدت تحكي لي عنو لحدي ما بقت تبكي، بقيت اهدي فيها و احاول اخفف عنها، قعدت معاها لحدي العصر و بعديها قلت ليها ح امشي بعد دا ، انتوا حتقعدوا هنا ولا حترجعوا بيتكم؟ قالت لي انا و أمي حنقعد التلات أيام هنا لأنو ناس البلد حيجوا ، قلت ليها طيب بجي عليك بكرا ....
المهم فتشت على امي لما ما لقيتا قلت معناها رجعت البيت لمن طلعت الشارع لقيت سامر سلمت عليهو و عزيتو و اتحركت من جنبو لمن مشيت قدام شويه لمحت عامر كانت بتكلم بالتلفون و المره دي أكيد حيشوفني و ما ح اقدر اعمل نفسي ما شايفاهو ، قلت برضو ح اعمل كدا ، كمكمت وشي بالتوب و جيت ماره بجنبو لمن اتجاوزتو بخطوات بسيطه سمعتو قال لي ماف داعي لحركاتك البايخه دي ، بقيت زي الصبت فيني مطره لا عرفت اقيف ولا عرفت أواصل و أطنش كلامو ، اتلفت عليهو و من غير ما انزل التوب قلت ليهو معاي انا؟
قال لي في زول غيرك بعمل حركات بايخه و ماف داعي ليها ؟ قلت ليهو هسي انا عملت شنو؟
قال لي امشي امشي عليك الله و واصلي البتعملي فيهو ، ولا كذبت طوالي مشيت و اساساً الوقفه معاهو بحد ذاتها بتعمل لي جلطه و هبوط ، دخلت بيتنا و انا خاته يدي على قلبي ، بس ما فاهمه قصدو شنو و ليه هو قال لي كدا و ليه كان مضايق؟
_______________________
بعد الأسابيع دي كلها ، اليوم شفتها لمن كانت طالعه من بيتهم ، بس لو كانت هي بتركز معاي و بتعاين لي في عيوني كان قدرت تشوف لهفتي عليها و شوقي ليها بس هي دايماً بتتجاهلني ، حتى كلامها معاي بحسو بطلع منها بالغصب ، بكره شعور اني فارض نفسي على زول أو مقتحم حياتو و بحاول احشر نفسي بالغصب فيها، انا ما حصل جريت ورا بت و ما حصل أديت بت غيرها الإهتمام دا كلو و هي قابلتو بـ التجاهل ، كوني ما قادر اتحكم في نفسي و مشاعري ليها و اوقف كل الحاسي بيهو اتجاها دا واحد من الحاجات الخلتني أكره نفسي! من متين انا بجري ورا بت و من متين بحاول ألفت نظرها!
المهم هي صبحت علي و مشت من غير ما تنتظرني ارد عليها ، قلت على كيفها، ركبت عربيتي و اتحركت بس لمن جيت ماري بجنبها ما قدرت اتجاوزها فوقفت قدامها و قلت ليها اركبي ، حاولت ترفض بس قاطعتها و كررت ليها نفس الكلمه و المره دي بالجد لو كان رفضت ما كنت ح امنعها، بس اتفاجأت لمن هي ركبت، و في الآخر فهمت انها ركبت بسبب الناس الكانت بتعاين لينا، أول ما اتحركت فتحت ليها سيرة موضوع امبارح رغم اني عارف الحصل بس عايز اسمع صوتها ، مش قلت ليكم ما بقدر أمنع نفسي منها؟! مش المفروض اكون ساكت و أوصلها و خلاص!؟
هي حكت لي الحصل بس بإختصار شديد كأنها مجبوره تتكلم ، بعدها و فجأه كدا ظهر سامر في وشي و كان بأشر لي عشان اقيف ليهو ، و ما قدرت اعمل نفسي ما شايفو و ما قدرت اخفي ضيقي الكان واضح في معالم وشي ، طول الطريق كان بتكلم معاها و انا لو علي انزلو و اقول ليهو شوف ليك زول غيري يوصلك ، ما صدقت متين نزل و مشينا من دونو و رغم ذلك الضيق و الزهج الدخل فيني ما طلع حتى بعد ما هو نزل ، سقت العربيه بأقصى سرعه و ما اتكلمت معاها تاني وصلتها المدرسه و اتحركت ، مشيت شغلي و انا ما فاهم حاجه و حاسي أموري كلها جايطه، و كنت حاسي نفسي ما تمام عشان كدا رجعت البيت استحميت و صليت الضهر و كنت ح أنوم بس الحاج قال لي عابدين دا أبوهو اتوفى ارح نمشي ليهم ، خليت تعبي و ارهاقي على جنب و مشيت معاهو، هو دخل الصيوان و انا وقفت بعيد لأني كنت بتكلم مع زول ، بالصدفه شفتها هي و أمها، أبداً ما اتوقعتها تجي لأني ما شايف انو عندها علاقه بالناس ديل! أمها سلمت علي و هي غطت وشها و دخلت جوه ، حركتها ضايقتني شديد ، المهم الحاج رجع و قال لي خليك مع الناس ديل لو احتجاجوا حاجه، قلت ليهو ما بتوصيني يا أبوي، قال لي الله يرضى عليك و فعلاً انت ما محتاج توصيه ، بعد شويه تاني جاني اتصال ، مشيت بعيد لأنو الأصوات عاليه ، لمحتها جايه ماشه علي ، شافتني و شفتها و اتوقعتها حتسلم لأننا شفنا بعض بس لسه مصره! غطت وشها و اتجاوزتني من غير كلام لا سلام ، انهيت مكالمتي و قلت ليها حركاتك البايخه دي ماف داعي ليها، اتلفتت و قالت لي معاي انا؟
عامله نفسها ما عملت حاجه و ما منتبه لـ عمايلها دي، قلت ليها بغيظ:
في زول غيرك بعمل حركات بايخه و ماف داعي ليها ؟ قالت لي هسي انا عملت شنو؟
قلت ليها امشي امشي عليك الله و واصلي البتعملي فيهو دا ، و في الحقيقة انا قلت ليها كدا لأني شايف كذا شاب كانوا بعاينوا ليها و اساساً الشارع كلو رجال فالأحسن انها تمشي بيتهم....
بس بعديها انا لمت نفسي و قلت اساساً ما كان اتكلم معاها و خليها تعمل البريحها و المره دي بالجد انا قنعت منها و ما منتظر منها اي شي كل العايزو اني اقدر اشيلها من بالي و ارتاح و دا الح أجبر نفسي عليهو...
هناك شخص وقع في حبك ومازلت لا تعرفه، هناك شخص مهوووس بإبتسامتك ولم يخبرك بعد ، هناك شخص يتحقق من ملفك الشخصي كل يوم وتعتقد أنك دائمًا يتم تجاهلك ، هناك شخص يقوم بحفظ صورك المبهجة من أجل رؤيتها كل يوم ولم تعرف عنها أبدًا ، فهناك شخص يذكرك دائمًا في صلاته دون أن يخبرك "♥️♥️♥️
يتبع......
