كلام عامر غاظني و وجعني شديد و دا بفسر نظراتو لي ، ما عارفه الفكره الأخدها عني مبنيه على أي أساس! كوني اقيف مع سامر أو غيرو دا ما دليل على اني زوله ما تمام، هو في زول بعمل غلط قدام الناس؟ ما حصل مره خطر على بالي انو ممكن انفهم غلط في حاجه انا شايفاها عاديه لأني ما دسيتها من زول و لأني بالجد ما كنت بعمل في غلط فماف حاجه حتخليني اتغطغت و أضارى من الناس و نحنا اساساً كنا واقفين قريب من كل الناس فأكيد ما بنعمل في شي غلط أو بنقول في حاجه ما ياها ، حياتي كلها كانت على المكشوف و ما عندي حاجه داساها من المجتمع ، اتذكرت كلام سامر و قلت هسي اعمل شنو في الورطه دي! انا قدر ما حاولت افهمو انو انا و ريان علاقتنا مقطوعه ما قدرت و هو اصلاً ما أداني فرصه و بقى يقول لي عليك الله اتكلمي لي مع ريان ما قادر أوصل ليها، من زمان حاظراني ، قلت معناها الحل الوحيد اني انساها بس والله ما قدرت و لسه متمسك فيها و باقي عليها.....
المشكله ما هنا، المشكله الحقيقه انو ياسمين بتحبو حتى لو هي ما قالت لي انا فهمتها من خلال ونستها الكلها بقت عنو ، فـ انا واقعه في ورطه و بين نارين، ريان كانت صحبتي و ياسمين برضها صحبتي ، فما عارفه اعمل شنو في الحاله دي! .....احسن حل اني اقول لـ سامر ريان دي علاقتي معاهو ما كويسه و نحنا من زمان متخاصمين فما ح اقدر أفيدك بحاجه.....
المهم في اليوم التالي ، مشيت المدرسه و قلت احسن اكلم ياسمين بالكلام القالو لي سامر عشان هي ما تعشم فيهو ساي بس هي ما جات اتصلت عليها و عرفت إنها صحت مصدعه فما قدرت تجي ، المهم دخلت على تانيه و أديتهم الحصه ، اصلاً من اليوم داك بقيت اقري أولى و تانيه بس ، بعد ما طلعت من الحصه المديره نادتني و قالت لي خشي على ناس تالته ديل ، استغربت من كلامها لأنها هي بخشمها قالت لي تاني ما تخشي لـ ناس تالته بسبب البت الإسمها لجين ديك ....لمن شافتني مستغربه، قالت لي استاذه علياء ولدت قبل اسبوع فما حتقدر تجي المدرسه عشان كدا حتدرسيهم لحدي ما ترجع بس حاولي ما تركزي مع لجين دي و ما تشتغلي بيها، قلت ليها طيب، شلت الكتاب و مشيت عليهم، دخلت من غير ما أسلم عليهم، كتبت عنوان الدرس و إتلفت عليهم، طبعاً كانوا متفاجئين لمن شافوني، وحده قالت لي يا أستاذه الدرس دا نحنا أخدناهو، قلت ليها عارفه و ما ح أديكم حاجه جديده ح أراجع ليكم الفات ....في النهايه انا بت training ساي و احتمال لو اديتكم دروس جديده ما تفهموها و بعدين تسقطوا في الإمتحان 😏
ختيت الكتاب و قلت ليهم حنتكلم عن الإمام المهدي بشكل عام ، وحده قالت أف ياخ ....اتنهدت و قلت ليهم طيب يا سنه تالته خلونا نكون صريحين مع بعض انتوا مشكلتكم شنو؟ عندكم مشكله معاي انا ولا مع الماده؟ ...لجين قالت لي بصوت واطي الإتنين
وحده قالت لي ما عندنا مشكله معاك يا استاذه لكن التاريخ دا ماده ثغيله و ممله....و دا كان رأي باقي الفصل ، قلت ليهم بالعكس التاريخ ماده حلوه و ممتعه و دا طبعاً لو اتعاملتو معاهو كـ ونسه ....كلنا بنحب نتونس و بنحب القصص و الشمارات فإتعاملوا كدا مع التاريخ، كمثال خلونا نبدا في الدرس عشان تعرفوا الفرق ، قبل ما نبدا بالثورة المهديه ح أحكي ليكم عن حياة السودانيين في فترة الحكم التركي المصري عشان تعرفوا ليه اصلاً قامت الثورة المهديه و منو هو محمد احمد المهدي ، حياة السودانيين في فترة الحكم التركي المصري أقل ما يقال عنها مأساوية، رغم انو البلد بلدنا و الموارد حقتنا إلا انو السودانيين كانوا بيتعاملوا كـ عبيد و في ضرايب كانوا الأتراك بجمعوها من السودان بالقسوة و الشده و.......و........و....الخ ، كدا بقى عندكم خلفية عن حياة السودانيين في الفتره ديك ، و تلقائياً حتكونوا عرفتوا ليه قامت الثوره المهديه، قاطعتني طالبه و قالت لي بس يا استاذه المقالات صعبه و ما بنقدر نحفظها، قلت ليها ما تحفظي أي مقاله! لجين قالت لي كيف يعنى ما نحفظ مقالات؟ درجاتها دي بعدين بتدينا ليها انتي؟
ما رديت عليها و وجهت كلامي للطالبه السألتني، قلت ليها انتي لو فهمتي المقاله ما حتحتاجي تحفظيها، ما هو التاريخ دا كلو حكاية و المقاله ذاتها حكايه انتي بس بتطلعي منها الخلاصه أو الكلام الفهمتيهو منها ما ملزمه تكتبيها بنفس الطريقه الفي الكتاب المهم نفس معنى الكلام المكتوب ، قالت لي طيب ح احاول، في طالبه قالت لي طيب واصلي لينا يا استاذه أول مره تعجبني حصة تاريخ، عاينت لساعة تلفوني و قلت ليها الزمن ما حيكفي و انا دخلت ليكم متأخره ، بس لو لقيت حصه فاضيه بجيكم، كل العايزاهو منكم انكم تطبقوا النصايح القلتها ليكم دي و بإذن الله ما حتواجهكم مشكله تانيه في التاريخ
بكدا انتهى اليوم الدراسي و ما لقيت حصه فاضيه عشان أرجع ليهم ، قبل ما اطلع من المدرسه في طالبه كانت بتناديني لمن اتلفت عليها لقيتها دي البت القبيل سألتني عن المقالات ، وقفت ليها لحدي ما وصلتني، كانت شايله معاها شوكلاتات و شيبس، مدتهم لي و قالت لي ديل ليك، قلت ليها ما كان في داعي بس شكراً ليك ، قالت لي حصتك عجبتني شديد و آسفه على العملناهو ليك المره الفاتت، قلت ليها ما مشكله حصل خير، شلتهم منها و مشيت بيتنا و انا مببسوطه شديد ، من شدة الفرح حكيت لأبوي و أمي الحصل كلو من البدايه للنهايه، ابوي قال لي اصلهم الطلبه في البدايه بعملوا ليهم حركات بس بعدين بتعودوا خاصة لمن يلقوا الأستاذه فاهماهم و قادره تحل ليهم مشاكلهم ، قلت ليهو فعلاً.....قال لي سمح امشي اخدي راحتك و تعاليني دايرك في موضوع ضروري، عاينت لأمي و قلت ليهو بإستغراب في شنو؟ قال لي كدي امشي و تعالي ، دخلت استحميت ، صليت و فطرت و انا مستغربه أبوي عايزني في شنو؟ أكيد أول حاجه حتخطر على بال أي بت في الحاله دي إنو جاها عريس ، قلبي وجعني شديد و بكيت قبل ما اتأكد من تفكيري دا ، بس متأكده أبوي ما حيجبرني على حاجه ، المهم مشيت لـ أبوي و انا متردده لقيت معاهو سراج و أمي، قعدت و قلت ليهم خير يا جماعه ، توتري زاد و حسيت انو دقات قلبي بقت مسموعه، بقيت مشربكه أصابعي و انا عيوني على أبوي، قال لي خير ان شاء الله ، سكت مسافه بعديها قال لي معروف كل بت مصيرها تخلي بيت أبوها و كل بت في الأخر مصيرها تتزوج بإذن الله ) هنا انا اتأكدت من الشك الكان جواي ، بقيت بس منتظراهو يخلص كلامو عشان اقول ليهو ما موافقه ، قال لي ما ح أكتر ، الداير اقولو ليك انو جاك عريس و قبل أي شي خليك عارفه اننا ما حنغصبك على أي حاجه انتي ما عايزاها، و لو عندك زول فـ دا كلام تاني و.....قاطعتو و قلت ليهو بخجل لا لا يا أبوي ماف كلام زي دا ما عندي زول بس برضو ما موافقه على العرس دا، أبوي سكت و بقى يعاين لي، أمي قالت لي مستعجله مالك هسي ولد زي دا بترفض عليكم الله؟ ، أبوي قال لي زي ما قلت ما بغصبك لكن الراجل دا ود رجال و انا بشهد على اخلاقو العاليه و تربيتو الكويسه ، سراج قال لي ترفضي ليه؟ مش عارفه اسم العريس منو و اذا كويس ولا لا؟ ، انتي بترفضي على أي أساس؟ و ذاتي ما شايف سبب يخليك ترفضي، مدام ما عندك زول البخليك ترفضي شنو قولي لي؟
قلت ليهو انا رافضه الفكره دي رفض قاطع ، هسي انا ما جاهزه لأي حاجه بالشكل دا ، أبوي قال لي ما تستعجلي و فكري كويس، قلت ليهو ما محتاجه افكر مرتين يا أبوي، والله انا ما جاهزه و ما عايزا أي عرس مش قلت ما حتغصبني على حاجه؟
قال لي و عند كلامي ، مدام دا قرارك معناها حندي الولد خبر عشان ما ينتظرك ساي ، ارتحت شديد لمن أبوي قال لي كدا وقفت على حيلي عشان امشي و أول ما اتحركت سمعت أمي قالت هسي عامر دا بترفض يخواني كما البت دي غبيانه ساي و ما عارفه مصلحتها وين؟
انا هنا هبطت عديل و المشى ذاتو غلبني ، يعنى عامر هو الإتقدم لي؟ و انا رفضتو؟ رفضت عامر؟
قلبي وجعني شديد ما فضل لي إلا ارجع ليهم و اقول ليهم ليه ما قلتوا لي انو عامر هو الإتقدم لي؟ ليه من البدايه ما ذكرتوا لي اسمو؟
رجعت غرفتي و انا راسي يودي و يجيب و دموعي دي مطره بس ، دا شنو العملتو دا؟ و عامر ليه اتقدم لي مع انو ما حصل لمح لي بشي و ما حصل حسيت في اهتمام من ناحيتو بي!؟ بس تاني ما حقدر اقول ليهم موافقه بعد ما رفضتو رفض قاطع 💔
اليوم كلو بقى لي مسيخ و الأكل ذاتو غلبني ، مع العصريه كدا لبست توبي و قلت لناس البيت ماشه لـ ياسمين ، قلت امشي ابكي و احكي ليها الحصل و الوجعه البقت فيني، طلعت من بيتنا و انا بقول يا رب ما ألاقيهو يا رب ما ألاقيهو يا رب ما.....سكته لمن سمعتو قال لي والله ليك حق ترفضي ما انتي بـ ناسك!
طبعاً هو كان وراي و انا قدام و اصلاً ما كنت قادره أتلفت عليهو، ح اقول ليهو شنو يعنى؟ ما كنت عارفه إنك الإتقدمت لي و إلا كنت ح أوافق؟ أوافق حتى بعد آخر موفق حصل بيناتنا! حيقول عني شنو ؟!
ما اتلفت عليهو و مشيت و انا مستغربه هو ليه قال لي كدا و ليه اتقدم لي من الأساس؟
مشيت لـ ياسمين حكيت ليها كل شي لحدي لحظة جيتي ليها و قعدت أعزي ، قالت لي حييييا انا منك يا غبيه يا متخلفه في وحده بترفض من غير ما تعرف اسم الزول الإتقدم ليها؟ لا و كمان بتسألي نفسك اتقدم ليك ليه! ؟هسي دي عايزا ليها سؤال، أكيد بحبك يا بت الناس و لو ما كدا ماف سبب يخليهو يجي يتقدم ليك و كلامو القالو ليك قبل شويه دليل على انو بحبك و موجوع عشان انتي رفضتيهو يا غبيه!
قلت ليها يحبني شنو؟ ياخ هو ما بحبني ولا حاجه و ما حصل حسيت انو عندو لي شي، قالت لي طيب أديني سبب واحد يخليهو يتقدم ليك انتي بالذات؟ مالو عميان من بنات خالاتو و عماتو و اعمامو؟
سكت مسافه و قعدت افكري في كلامها و اتذكرت مواقف عامر معاي و ياداب قدرت افسر نظراتو لي لمن كنت ماشه مع سامر، اتذكرت المواقف كلها و ردات افعالو لحدي آخر موقف لمن كنت واقفه مع سامر جنب الميدان و هو جا اتزهج فيني و شاكلني، أكون كذابه و غبيه لو قلت ردود افعالو دي طبيعيه أو ليها تفسير تاني غير انو بحبني ، اتفاجأت شديد و اتخلعت من الحقيقه دي، معقوله عامر بحبني؟!
قلت لـ ياسمين طيب اعمل شنو انا؟ قالت لي ربعي يدينك و اقعدي ألعني في حظك مش براك سويتيها بيديك؟
قلت ليها حيييا انا من نفسي ، قالت لي خلاص ما تلومي نفسك و كلو لخير ، سكتنا على كدا و غيرنا الموضوع، قلت ليها ما سألتك بقيتي كيف؟ الصداع خفّ؟ قالت لي و كيف ما يخف و سامر بنفسو جاب لي حبوب صداع؟ 🙈
سكته مسافه بعديها قلت ليها ما عارفه ابدا ليك من وين و اقول ليك ولا لا!
قالت لي في شنو؟ قولي عادي!؟
اتنهدت و قلت ليها أمبارح سامر وقفني و طلب مني اتكلم ليهو مع ريان و أكون وساطه عشان سوء التفاهم البيناتهم ينتهي، سامر يا ياسمين ....من زمان بحب ريان أخت عامر
ياسمين سكتت و بقت تعاين لي بخلعه كدا ، حتى الكلام غلبها، حاولت تكون عاديه و قالت لي طيب ليه قلتي لي الكلام دا ؟ انا الدخلني شنو؟
قلت ليها عارفه يا ياسمين والله عارفه انك بتحبي ولد خالك دا ، عشان كدا انا حكيت ليك عشان تكوني عارفه و ما تتعشمي فيهو ساي و الموضوع يتطور ، سكتت بس دموعها عبرت عن كل الجواها ، بقيت اهديها و احنس فيها و اقول ليها كلو لخير و ان شاء الله حتلقي الأحسن منو ....قعدت معاها فتره كافيه و قلت ليها ح امشي بعد دا، مرت خالها قالت لي اقعدي شويه يا بتي، قلت ليها اتأخرت والله و المغرب ذاتو قرب يأذن ، المهم طلعت منهم و الدنيا كانت ماشه تمغرب قلت الليله سراج حيضبحني ما حصل اتأخرت للزمن دا ، لمن جيت طالعه لقيت سامر في وشي و عرفتو حيسألني عملت شنو في موضوعو و فعلاً سألني ، قلت ليهو ما عملت حاجه يا سامر لأنو انا و ريان من زمان متخاصمين و ماف أي نوع من أنواع التواصل بيناتنا، قال لي ليه مالكم مش كنتوا صحبات شديد؟ الحصل شنو بيناتكم؟
قلت ليهو الحصل كلو كان سوء تفاهم خرب علاقتك بيها و علاقتي بيها ....ريان يا سامر كانت مفتكره انو في شي بيني و بينك و ناس كتار وصلوا ليها الفكره دي و نقلوا ليها القوالات للسبب دا هي قاطعتني حتى من غير ما تفهمني الحاصل شنو، على الأقل كان تجي تواجهني احسن من ما تقاطعني و تسكت على كدا، ما عرفت بالحاصل إلا بعد فتره كويسه من انقطاعنا عن بعض ، بالرغم من انو كان مفروض اعرف منها هي بس ما حصل و سمعت من بت جيرانا، قال لي لا حولاااا ، ريان دي جنت ولا شنو ! ماف أي شي بيني و بينك ، ما عارف الخلاها تفكر كدا شنو! حتى انا ما فهمتني الحاصل، فجأه و من غير ما تنبهني قالت لي ما تجي بيتنا و الخطوبه دي انا ما عايزاها و قفلت على كدا و حظرتني و من يومها ما قادر اتكلم معاها ولو لقيتها في الشارع ما بتديني فرصه عشان اتكلم معاها، طيب انتي مش كان مفروض تتكلمي معاها و تفهميها الحاصل؟
قلت ليهو هي ما جات واجهتني و سألتني مش براها وقفت مني و ما كلفت نفسها تتأكد من صحة الكلام انا كمان ما ح أكلف نفسي و أوضح ليها الحاصل، قال لي انتن الإتنين عنيدات و كل وحده اعند من التانيه، الموضوع ما بستاهل يا مها و المشكله بسيطه محتاجه شوية توضيح و حينتهي سوء التفاهم ، قلت ليهو ما اظن انا و ريان نرجع زي ما كنا ، قال لي ربنا يصلح الحال، قلت ليهو يلا بعد دا انا ح امشي، قال لي أقدمك؟
قلت ليهو اصلاً سذاجتنا و عفويتنا دي هي سبب المشاكل الحاصله دي كلها.....بمشي براي، قال لي كلامك صح تمام يا زوله ...
المهم طلعت من بيتهم و الوقت داك المغرب أذن و الناس كانت ماشه المسجد و من ضمنهم عامر عاين لي جوه عيوني بنظره كلها ضيق و مشى من جنبي و ما قال ولا كلمه، لمن وصلت البيت لقيت سراج برضو ماشي الصلاة قال لي اصبري لي لمن أجي راجع والله إلا تطيري من البيت دا ، لمن دخلت البيت أمي قالت لي الأخرك شنو؟ قلت ليها الونسه جرت بس، أبوي قال لي لكن يا بتي كل شي ليهو زمن و حدود و الونسه دي لو قلتت تباريها ما بتخلص والله، قلت ليهو طيب تاني ما حتأخر ، قال لي ماشي الصلاة و جاي عليك الله طلعوا لي سريري دا برا، قلت ليهو طيب و ليه سراج ما انتظرك عشان تمشي معاهو؟ قال لي من قبيل شغال لي اسرع يا أبوي و انا اتأخرت ليهو عشان كدا قلت ليهو أمشي، المهم أبوي مشى و انا و أمي طلعنا ليهو سريرو برا....
طبعاً سراج لمن جا قال لـ أمي الزفته دي وينا ....مها ...يا زفته انتي تعالي هنا ، طلعت ليهو برا و ما كنت قايله انو عامر معاهو ، كان بعاين لي بنظرات بغض و ضيق شكلو شماني شديد عشان رفضتو بسبب نظراتو دي ما قدرت اسلم عليهو، و سراج الكريه شاكلني قدامو قال لي والله المغرب يقول الله أكبر ألقاك برا البيت إلا اطفشك من البلد دي ، البأخرك شنو؟ ....بتكلم معاك انا ما تعايني لي كدا ...سكته و ما اتكلمت معاهو ....غضب زياده و قال لي طرشه انتي؟ بتكلم معاك انا الأخرك شنو؟ قلت ليهو ما انتبهت على الزمن .... قال لي ماف حاجه اسمها ما انتبهت للزمن و دامك ما بتنتبهي للزمن معناها من البيت ما تطلعي، طبعاً كان بصرخ فيني بأعلى حس عندو و انا محرجه شديد من عامر الكان بعاين لي ، لمن سراج جاط شديد عامر وقف على حيلو و جا وقف قصادو و قال ليهو كفايه يا سراج كدي روق شويه و ساقو قعدو في السرير و قال ليهو خلاص هي عرفت غلطها و أكيد ما حتكررها تاني و على طول عاين لي و نظرتو دي نزلت فيني زي المويه البارده خاصة اني من غير ما انتبه كنت واقفه و سرحانه فيهو ، فنظرتو جاتني زي السهم المفاجيء ، حسيت نفسي اتجمدت في مكاني بالجلاله قدرت اتحرك و ادخل جوه و انا خاته يدي على قلبي و بحاول أهدي نفسي ، و اتنفس بصوره طبيعيه
• لا زِلتُ في محاولةِ إيجادِ نصٍ يتحدثُ عني ، يصفُ كُلَ هذا التناقُض والصمتْ واللاشيء من الأشياء .🖤
يتبع......
