رومنتيكا ®(دردشات دينية)

إمامى

- أنتي بتعملي إيه ؟
: بعدل الكرسي ..

- كرسي لإيه !!
: عشان نصلي التراويح ..

- ليه أتكسحتي ؟
: لا عشان جوزي بيخلص المصحف في الركعه الواحده ..

- صوتي حلو وبحب أقرا ومابحسش بنفسي ..
: عبد الباسط أتفضل صلي .

- طب ماتقعديش ع الكرسي ..
: حاضر .

- ومتتاوبيش عشان بتنعسيني ..
: حاضر .

- وماتسرحيش بالله عليكي ..
: حاضر .

- وماتقعديش نص ساعه استراحه بين كل ركعتين ..
: والله بأصلي العشا وبأنام .

- خلاص خلاص ، هبدأ صلاه اهو ..

" بعد خمس دقايق "

-  يا بنتي انتي سمعاني ؟
: المغرب أذن ؟

- مغرب إيه ، قومي بس .
: حصل إيه !

- أنا يادوبك سجدت بيكي  .
: وبعدين ؟

- لقيتك فرشتي ع السجاده بجسمك كلو .
: طب أنام بس نص ساعه وهقوم أكمل صلا .

- أنتي وعدتيني هتلتزمي عارف إني بضغط عليكي بس عشان الجنه تستاهل .
: دا كان كلام إنفعالي ، كمل انت صلاتك .

- والله لأنتي مصليه ورايا ال ١١ ركعه كاملين .
: دا انت شاطر وبتعرف تحلف ..

- أه طالما أنتي بالأهمال دا .
: طب قومني بس عشان نعرف نتخانق ..

- لا أتخانقي وانتي مكانك عشان اعرف أغلبك ..
: أنا شقيانه م الصبح وجسمي همدان ومش قدرالك .

- هصلي بأيات صغيره .
: وناخد استراحه نص ساعه بين كل ركعتين ..

- حاضر .
: وماتجملش صوتك عشان بنعس بسببه ..

- حاضر .
: وتطول في السجود ع قد ماتقدر ..

- أشمعنا ، بتدعي كتير ؟
: اه اه بدعي ، طول انت في السجود بس ..

- حاضر .
: وتسبني أحكيلك وجهه نظري بعد الصلاه في الموضوع الي اتخانقنا عليه من شهر ونص ..

- حاضر .
: ومتصحنيش بدري ..

- أنتي بتصحي ع الضهر ..
: بدري ، وتفتح التليفزيون ……

- دا شكل الموضوع مطول وانتي بتستغليني ، روحي نامي ..
: براحتك انت الخسران .

" بعد دقيقه "

- واقفه ورايا ليه ؟
: بص قدامك وأبدا صلاه ..
- حاضر