حبة مشاعر 3

لهفة البدايات الكذابه

الحب
احيانا الشعور بالحب يكون من احسن ما يمكن يوم تحب من كلبك بدون شروط مو شلون وليش وشمعنه
هذا الحب الي يطرق بابك بدون علمك من أحلى حالات الحب يوم يجيك الشعور فجأه بعد نضره أو كلمه او اعتراف يوم فجأه تحس صار اكو شخص بحياتك تهتمله وتحبه اللللله على شعور الاطمئنان الي يعيشه الشخص بهل لحضات يكون خايف ومتوتر ومخربط بس احلى شي يكون مطمن، يكون عايش، يعني بين قوسين يحس بكلشي غير...
الاغنيه كلام الحب المواقف حبات المطر ونسمات الهوى كلشي يكون إله طعم ثاني هذا مو الشعور بالحب هذا يسموه الشعور بالاطمئنان يوم تكون مطمن الشخص وحاب تكمل وياه ، يوم يغلبك شعورك وتصير تحب وتشتاك...

_البدايه

الللللللله على مشيتها وسلامها عطرها وطلتها البهيه الللللللله واني اشوفها كل يوم وهي تجي من الصبح وكلها طاقه و حيويه وشلون توزع ابتسامه قادره بيها تشلع كلبي ،
هاي هبه واحنه نشتغل سويه باذاعه اني مصور وهي مذيعة البرنامج لأخذ أراء الناس مباشرةً لحد الان اتذكر اشلون اجت هبه من جنت موظف قبلها دخلت بكل ثقه وأدب واحترام وكدرت تسرق انفاسي من اول نضره جانت الها كاريزما خاصه بيها مع انها محجت شي وجانت جايه ويه ابوها الي مدير القناة صديقه طلب منه يشغل بنته الي هستوها متخرجه لحد الان اتذكر شلون كدرت انها تخليني اعوف كل الي بأيدي واضل صافن اريد اعرف منو هاي الي جان شكلها اول مره تفوت مكان شغل وهنا صاحني المدير وجنت فرحان وكلني ثقه ورحت مشيت اتذكر اشلون عرفنه على بعض وكال هبه احمد ، احمد هبه هذا الولد من اشطر الموظفين الي عندي هو هم مثلج هل سنه تخرج بس جان يشتغل ويايه من قبل  هو احسن موظف عندي واني راح اخليج وياه وراح يعلمج شون الشغل واتمنى تتعلمين بسرعه حتى تباشرين شغلج بسرعه

اهنا حسيت روحي واحد محظوظ جان مجرد إعجاب بس كل ما تعرفت عليها وجانت تطلع احسن واحسن توظفت بالبدايه ك كاتبة نصوص بالمجله مال قناة وبعدها لأنها طورت من نفسها صارت تقدم ويايه برنامج لأخذ أراء الناس ضلينا نطلع سوه ونقدم كل شي ناجح وهاي مثل كل يوم اجي اول واحد حتى بس اشوف شلون تجي وتوزع ابتسامتها واكعد اتذكر اول يوم ولأنها شخص مميز كدرت انها تطبع كل اللحظات الحلوه أبالي وخلتني ما انسى اي لحضه وياها ظليت احبها ومهتم بس من بعيد خفت لا تروح مشاعري وتطلع متحبني واخسرها كصديقه هم ، استمرينا نشتغل ونقدم الأفضل جنه نضحك وناكل ونشرب سوه وبحكم شغلنه جنه دائما سوه ظليت ادعمها واساعدها بافكارها جانت اكثر واحسن وحده اجت للقناة تكتب نصوص غيرت فكرة الناس وطريقة الكتابه وخلتها بطريقتها كدرت تسوي ضجه حلوه وبشكل إيجابي للقناة هذا الي خله المدير يثق بيها اكثر

الطموح
كوومه ناس تلكيها خاله شي براسها نوبات حلم ونوبات وضيفه ونوبات مشروع ونوبات كليه كل شخص بينه يتمنى شي ونوبات أمنياتنا تعدي حاجز التخطيط والتصميم وتوصل مرحله توصلك للتخيل تكوم تتخيل نفسك بالمكان الي تريد توصله نوبات الظروف المشاكل و صعوبات الحياة تبعدك عن طموحك وعن امنياتك تُحبط وتمل وتضوج وتمحي كل مخططاتك بس بالنهايه وبعد كل شي تشوف نفسك بمكانك المناسب تحس بهل شعور من تنجح بالمكان الجديد والحياة الجديده لمن تبدي تشوف نفسك كدرت توصل وتكمل ، احلى شي بالدنيا من تشوف نفسك نجحت تحس بشعور حلو توصل مرحله تشوف نفسك انو انت من قوة عزمك وتقبلك لأي شي انك نجحت حتى بالاشياء الي جانت مو من اختيارك
حمد لله على الطموح والنجاح الي يوصللها الإنسان ، بأي مكان يوصله تحس من كرم رب العالمين عليك كل حياة ادسواء اختاريتها أو مختاريتها هي حياتك المناسبه...