"نور"
نورس والشيخ زايد وصلوا قبل عمر و حيدر يطلعوا .. الشيخ زايد انضم لعمر وحيدر و مشوا يستكشفوا المكان .. فضلنا نحنا التلاتة ، انا و نورس طلعنا نصطاد سمك من البحر عشان نطبخه ليهم بعد يجو .. البحر كان شبه فاضي من الناس ، نورس شالت سنارة من واحد من الصيادين و حبت تخوض التجربة كالعادة اما انا فكتفيت بالمراقبة .. ما اتوفقت في انها تصطاد فضلت تحاول لغاية كل الصيادين مشوا ما فضل غيرها هي و الصياد اللي اكتفى من محاولاتها الفاشلة .. ساب ليها السنارة و حكاية خمسة سمكات كدة و مشى ..
= حاتعملي عشاء ده تاني خلينا نمشي
نورس: اصبري يمكن اصطاد شي
= اقتنعي ياخي وارح ، الناس مستنياني جعانة حاولي بكرة
نورس : بس دقيقة
= نورس ما وقت عباطك ! زليخة مستنيانا براها ما ظريفة نخليها الوقت ده كلو بس عشان تحققي رغبتك في الصيد ! جاين نصطاد شي ناكله ما جاين نتعلم !!
نورس بزعل لفت حبل السنارة و شالت الجردل و اتحركت .. رجعنا و هي طول الطريق ساكته ،لمن وصلنا لقينا زليخة خاته ليهم الاكل ..
نورس : لقيتو الاكل وين ؟
زليخة : جابوهو معاهم و الحمدلله انهم جابو والا كان لغاية هسا منتظرين
نورس عاينت ليها بطرف عين : فرق بين اللقمه الجاهز و البتتعبي و تشقي عليها !
حيدر : شخصيًا كدة بفضل الجاهزة " مد يدو شال قطعة من الاكل المختوت قدامه على الارض" .. انضمينا للجماعة و قعدنا في الارض شكل دايرة تحت الشجرة الطويلة .. اول مرة من سنين طويلة اقعد في لمة زي دي
الشيخ زايد : دايمة ياجماعة
الكل بصوت واحد : آمين
نورس : اها مافي جديد ؟
الشيخ زايد : لغاية اللحظة ماف ! عملنا جولة استكشافية في المدينة ما قدرنا نصل لقصر الملك بسبب الحراسة ..
عمر : حياتهم بدائية ، معقولة في ناس في القرن الواحد و عشرين و تلفونات ما عندهم ! مش في التلفون بس لاا ديل منفصلين تمامًا عن العالم الخارجي .. لا تلفزيون ولا اعلام كانهم عايشين في كوكب تاني ما معانا في نفس الكوكب !
الشيخ زايد : الموقع الجغرافي هو السبب ! فرق بين اللي قادر يصل للتكنولوجيا و الحضارة و اللي لسه مغموص في البدايات اللي لقى عليها أهله !
عمر : سبحان الله كأننا رجعنا بالزمن 30 سنة ورا !
حيدر رفع يده من الاكل و عاين بعيد : دي الثغرة الخشوا لينا بيها الاجانب قبل ما يتفقوا علينا و يطعنونا في نص ظهرنا
نورس : نحنا الاديناهم فرصة لينا نصيب من اللوم برضو
حيدر : مهما كان نصيبنا ما زيهم ! مافي سبب على وجهه البسيطة ببرر القتل و العنفوان
