" نور "
بعد رجعت لجسمي ما كنت قادرة اشوف اي شي .. بيسان و حيدر طمنوني انو ده طبيعي و بصري حايرجع مع الوقت .. قبل نتهنى بفرحتنا سمعت اصوات طلق نار و بيسان فورًا جرتني وانا مشيت معاها من غير ما افهم شي .. كل الفهمتهُ من كلامهم ان هزبر هجم علينا تاني و عرف مكانا !.
سمعت اصوات الكر والفر الحصل بين الطرفين ، اعتمدت على إذني في انها تطمني عنهم .. كل ما يتكلم واحد او اسمع صوته بإن من الضرب بطمن انه لسه عايش .. لغاية ما سكتت الاصوات حواليني بشكل مفاجىء .. يد بيسان الكانت ماسكاني اختفت و احساسي بالحركة الحواليني قلت .. اتلفت في حيرة حواليني متمنية امسك يد بيسان تاني او اسمع اي صوت .. الظلام بدا ياخد لون رمادي .. صوره مشوشة بدت تظهر للمشهد قدامي .. استمر الوضع مشوش لغاية ما حسيت باصابع بتلمس يدي .. دي كانت المرة الاولى احس بحركة الاصابع واضحة كدة من لما فقدت جسدي .. عاينت لصورة الشخص القدامي الكانت مشوشة في البداية .. سمعت صوت حيدر بصرخ " داغر " اتلفت اتجاه الصوت .. واول صورة واضحة افتح عيني عليها كانت جسد داغر المُدمى وهو بقع في الارض .. نططتا عيوني لمن شوفت كمية الجنود الماسكين حيدر و بضربوا فيه .. اتلفت لبيسان وقبل ما افحص المكان كويس وانا بفتش فيها .. يدي اتجرت بقوة عاينت للمصدر كان هزبر !.
ماسكني من يدي بقوة و بحركة سريعة جدعني لواحد من الجنود ..شالني من نصي ختاني في كتفه و جرا بي و هزبر وراهو .. حاولت اقاومه ما قدرت كان اضخم و اقوى مني بمراحل وانا اضعف من اني الوي يدو حتى .. غرزت اسناني في كتفه عسى ولعل توجعه و يرميني .. كمل و لا كانه في نملة عضتو ! كل العربات الكانت واقفة برا عجلاتهم اتنفست بما فيهم عربيتنا الجينا فيها .. كان واضح على هزبر و الراجل الشايلني الدهشة و الاستغراب ..واضح انو في طرف تالت كان حاضر و مشرف على كل الحصل .. الراجل ختاني في الارض بعد ما ربط يديني لورا بشال الصوف الابسهُ و لزاني اتجاه هزبر المسكني كانه ماسك كورة .. الراجل مشى اتجاه واحدة من العربات فتح الشنطة و طلع لستك .. و عمل نفس الشي من بقية العربات الواقفة التبع هزبر .. هزبر كان بكورك في و بسعجله ، قبل تظهر نورس من بين التلال راكبة حصان احمر و ظافر من وراها شايل حجر كبير في يده رماهُ في راس راجل هزبر اللي جا اتجاهنا ووقع ارض .. نورس كوركت لي باسمي و مدت لي يدها .. ما كنت قادرة امد ليها يديني وقفت حصانها في وش هزبر .. الحصان رفع رجلينهُ و ضرب هزبر في وشو ضربه قوية وقعته ارض .. نورس مسكتني بيدينها الاتنين و ختتني قدامها .. ضربت الحصان برجولها عشان يسرع ..في ظرف ثواني نحنا كنا على بعد تلاتة امتار من المكان الفيهُ هزبر !.
سرعة الحصان تسابق سرعة الريح كان سريع لدرجة طلعنا من شلال النور في دقايق معدودة .. نورس ساعدتني افك الشال من يديني ، اشرت ليها باصبعي اتجاه الشلال
= لازم نرجع داغر مات و حيدر و بيسان براهم
نورس : ما تخافي عليهم ، ظافر مشى ليهم
