" نورس"
كنت لاحقة بيسان وعايزه اعرف هي ماشة وين في وقت متاخر زي ده .. قبل اتلفت شمالي و المح زليخة ماشة و بتتلفت وراها .. وقفت مكاني وراقبتها بعيوني .. لمحت واحد من ورا ماشي قدامها .. سرعت خطواتي اشوف وشه بس لفت انتباهي النور جا من ناحية بيسان وهي بتخش اظلم مكان في الغابة !!.
مكان منخفض شديد تحسه حفرة .. اشجارة واخده شكل دائري و شكلها نفسه غريب ..رجعت خطوة و اتخبيت ورا شجرة عشان ما تشوفني .. النور كان صادر من جهة يدها ، كانت ماسكة حجر ابيض مضيء! .. عقدت حواجبي في استغراب و ركزت في الحاتعمله .. وقفت في نص دايرة عملتها هي بالحجر الفي يدها .. رفعت يدينها فوق و حركتهم يمين و شمال حسب راسها ما بتجه زي العندها دستور ! .. شوية وقفت و قعدت في الارض على رجولها وهي متجه اتجاه شجرة كبيرة .. فروعة عالية و متشابكة .. اوراقها عريضة نازله كأنها طرح .. بيسان كررت نفس الحركات لكن المرة دي في الارض .. عادة الكرة بسرعة للمرة الاخيرة قبل توقف فجأة و تحني راسها ويدينها اللي لا يزالوا في الارض .. نططتا عيوني لمن شوفت جزع الشجرة بتفتح كأنه باب و يطلع منه راجل طويل لابس احمر ، شعره ابيض طويل مظفر .. لحيته واصله بطنه .. لابس كمية سلاسل خرزية وودِعْ في رقبته ..شايل عصاية فيها شكل عين ضرب بيها الارض طلعت غبار و غمام ما قدرت اشوف شي بعده .. حاولت اقرب لكن كان في طاقة غريبة منعتني .. الرؤية بدت توضح شوية شوية وانا شايفة بيسان إتعرت قدامه الا من ملابسها الداخلية .. و بتعمل في نفس الحركاات العملتها قبيل و بتتمايل و تضرب على صدرها كأنها سكرانه .. اتلفتت اتجاهي و قعدت على ركبها اول ما لاحظت لبياض عيونها الاسود فجأة اترعبت و جريت .. خفت منها و من الاصوات الغريبة البقيت بسمعها في المكان ..!
جريت باقصى ما عندي وانا خاته يديني في أذآني من قوة الاصوات .. قللت سرعتي لمن بعدت عن المكان المرعب داك .. كنت لسه في الغابة ما طلعت منها .. اتلفت حواليني افتش في طريقة اطلع بيها من هنا .. قلبي اتقبض و حسيت بعدم راحة وانا بتلفت زي مروحة العريشة .. حسيت بيد في كتفي اتلفت بخلعة لقيته ظافر الوقفني بيدو واشر لي : اهدي ، اهدي اخدي نفس
شلت نفس و اتلفت ناحية المكان الفب بيسان ورجعت بصري في ظافر تاني
ظافر: مالك في شنو ؟ و جيتي هنا ليه الوقت متاخر !
= انا طلعت اشم هوا ، انت شنو الجابك هنا في الوقت ده !
ابتسم خفيف : كمان طلعت اشم هوا
عاين ناحية المكان الكنت بعاين في و رجع بصره لي : طيب ، الطريق من هنا " اشر ناحيته" شكلك ضيعتيهُ
هزيت راسي و مشيت ناحية أشر لي .. كنت حامشي فعلاً لو ماجا على بالي انه كمل لجوة ! كنت مترددة الحقهُ ولا اكمل طريقي ؟ عاينت ليهُ وهو ماشي اتجاه الطريق الكانت ماشة في زليخة قبيل .. ما قدرت ارجع و لحقته .. فجأة قلل سرعت خطواته وقف ، قللت سرعتي انا التانية ..
