منية في الخاطر

١

من نواتج قطعة النت😂🖤

العاشرة والثلاث وعشرون دقيقة..

الجو حلوو والدنيا رايقة نظراً لأنو العيال ف مدراسهم والرجال مشو لي اشغالهم..

السما مغيمة زي عادتها في الشهور دي..

ونسمة الهوا باردة زي عادتها في مدينتي دي..

قرية عادية زي باقي قُرى كسلا..بس بميزها جبل توتيل الواقف في ضهرها كأنو حايمها..

في المطبخ..

زحيت صاج الكسرة وختيت محلو حلة الملاح عشان اسخنو..

قطعتا البصلة والطمامة وكبيت ليهم ملح وشمار وختيتهم في الصينية من غير ما اصوطهم..

ختيت الملاحة الفيها الشطة والملح وبديت اطبّق الكسرة اختها في اطراف الصينية..

سمعتا صوت حبوبة بتكورك:نوشة يا بتي جيبي الفطور د حبوبي تمن ساعة من بلعتهن

قلتا ليها بي صوت انا شايفاهو عالي لكين هو واطي:سمح جبتو

طفيت النار تحت الملاح وكبيتو في الصحن الكبير القاعد في نص الصينية..

ختيت فيهو الكسرة وشلتا الصينية وطلعتا..

قبل اصل العريشة القاعدة فيها حبوبة 

جارتنا كوركت لي:نوووشة..ي حجة بخيييتة

قلتا ليها:ايوة ي خالتو رقية

قال لي:امسكي

قلتا ليها:سمح النخت الصينية دي

دخلتا العريشة ختيت الصينية في التربيزة الخاتها حبوبة قدامها..

وقربتا ليها الابريق عشان تغسل يدينها..

طلعتا بالزقاق الورا العريشة..وقفتا تحت الحيطة

وقلتا:ايوة ي خالتو رقية

سمعتا صوت كرعينها كأنها جاية علي الحيطة وبتقول لي:امسكي الفطير د

طلعت في الحيطة:امس عشيت بيهو عمك عادل وكنتو نايمين..قلتا امدو ليكم تفطرو بيهو

شلتو منها:يديك العافية م بتقصري

نزلت:الله يعافيك ي بتي

رجعتا بالزقاق للعريشة..

ختيتو في الصينية وقلتا:مدتو خالتو رقية قالت دوقو

حبوبة:سمح..امشي صحي ود عمك داك

مسحتا يديني في التوب وانا بقول:سمح

المرة دي طلعتا بالباب عديل..