منية في الخاطر

٧

بعد مرور عدة اسابيع.. 

ابتسمتا وانا بسمع في امونة بتحكي لي عن حياتها بالتلفون.. 

ختمت كلامها ب:غايتو كنتا ناوية اتنشن واتزهج لكين حسام واهلو م ادوني فرصة

ضحكتا:كويس طيب..الله د ما كريم

ضحكت:خالي هاشم زاتو بي جيتو فرفش لي شوية..هسي اخبارو شنو؟!

انا:كويس والله..وصل ونزل شغل طوالي

امونة:يحليلو..ربنا يوفقو ي رب

انا:اللهم امييين

سكتنا.. 

تاني سألتني:انتي م عايزة توريني مالك؟! 

انا:مالي هسي

امونة:مايلة ي نووشة..ما ياكي..صوت م عاجبني الليلة

قلتا ليها:مف شي..صوتي ياهو صوتو

سكتت مساافة:سمح..الله يكضب الشينة

ضحكتا:والله ماف شي

امونة:سمح..حسام بعد د بجي..بقوم استحما وكد

انا:سمح..يلا 

امونة:لي بكرة ان شاء الله

انا:ان شاء الله

قفلتا الخط وانا بتنهد.. 

ختيت التلفون في السرير قدامي.. 

ونزلتا راسي وانا بتذكر في الحصل امبارح.. 

بعد فطرنا واحمد شرب الشاي وطلع.. 

حبوبة نادتني.. 

قعدتا قدامها في السرير وقلتا ليها:ايوة ي حبوبة

عاينت لي مسااافة بعدها قالت:ماجد ولد بخيتة القاعدين في حلة فوق د شافك في العرس وقال دايرك

قلبي بدا يدق.. 

عاينتا ليها من غير اي تعابير.. 

مسكت يدي:كلمتني مرتين من بعد العرس وانا كنتا دايرة اموّت الموضوع قبل يصل الرجال

عقدتا حواجبي وانا بسمع فيها.. 

تمت كلامها:لكين خال الولد لاقى عمك امبارح و طلبك منو..وعمك اكيد ح يوري ابوك د لو ما كان وراهو هسي

حركتا عيوني بين عيونها وانا ببلع ريقي..

غمتت لي يدي بين يدينها وهي بتقول:انا عارفة الفي بالك ي بتي..عارفة قليبك م برضي بي غيرو..عشان كد قولي دايرة وقت افكر 

الدموع بدت تتجمع في عيوني.. 

حبوبة:لكين موضوعك د لسه عليهو..زمان كنتي بترفضي العرسان ساي لكين بعد د بت عمتك عرست والدور عليكي..ابوكي وعمك بعد د ح يفتحو عيونهم عليكي..قولي ليهم بفكر وبستخير وبعد فترة قولي استخرتا وم ارتحتا للموضوع