الأولي....
نعيمة: وووووووه عليا شكلي بنجيب يامصباح
مصباح: بسم الله عليك باهي باه غير بشويا ماتخافيش خلي انوض فارس خلي نرفعوه لحوش حناه..ونرفعك للمستشفي
نعيمة: باه جيبلي شنطة البيبي اه اه ياربي ساعدني
امشي مصباح نوض فارس وخدي شنطة البيبي ونزل نعيمة بشويا للسيارة... ركبو في السيارة وكان عياط نعيمة قالب الدنيا ومصباح مش عارف شن يدير ويجري بالسيارة علي اخر سرعة.وفجأة ومن غير ماينتبه مصباح كان في طانطة في الجيهة المقابلة وحتي هيا مسرعة وطاااااااااااف......
في المستشفي...
الحاجة أمنة مقعمزة وتخبط علي رجليها : ياناري يابنيتي ياناري زعما شن صار فيهم؟؟؟
خالد: يام وسعي بالك ان شاء الله خير
الحاجة أمنة: يارب يارب
طلع الدكتور ومشاله خالد يجري:طمنا يادكتور
الدكتور: للاسف الام ماتت هي وجنينها والاب حتي هوا...مانجاش الا ولدهم الصغير محصل ضربة في وجه وعينه لكن حالته مستقرة...
خالد: لاحول ولاقوة الا بالله.... لاحول ولاقوة الا بالله العلي العظيم
الحاجة أمنه ركزت في ملامح خالد من بعيد وعرفت انه في شي...فامشت تجري: خيرها بنتي خيرها
خالد ودمعته في عينه: ادعيلها بالرحمة يام ادعيلها
الحاجة أمنة: ووووووه عليا وووووووه ياناري اصغيرة ياناري ياابنيتي
خالد شد ضم أمه ومعاش قدر يتحمل نزلو دمعوه ع المأساة اللي طاحت علي روسهم....والحاجة أمنة تقطع وتريش وحالتها حالة...
روح خالد بأمه من المستشفي وهي في حالة ثانية بنتها الوحيدة توفت هي وراجلها وحاسة بالدنيا كلها ظلام ....حوش وتسكر .اتصل خالد بخوه صالح عشان يمشو للمستشفي ويكملو اجراءات الدفن وغيره...
في الحوش....
ركبو الخيم والناس عبو الحوش... الحاجة أمنة مغمي عليها وارتفعلها السكر جابولها الدكتور للحوش وعطاها بعض المنومات عشان تقدر ترقد وترتاح...
انتصار: لاحول ولاقوة الا بالله عليك غبارة وطاحت ع روسنا
سعاد قعمزت بصعوبة علي خاطر في شهورها الاخيرة من الحمل: ربي يعينها عمتي... نعيمة كانت اعويناتها اللي تشوف بيهم...قداش وجعتني نعيمة مسكينة قداش كانت فرحانة علي خاطر قالولها بتجيك ابنية...
انتصار: أميرة..رويدة...تعالو اهني ماتطلعوش لبرا...رويدة جيبي أختك ياماما.... ياحليلي منهم هالبنات بيهبلوني
سعاد: ربي يحفظهم ياربي ياريتني حتي اني جوني بنات... والله حسان بردع عشرة ولاد بيهبلني
