نعتذر من كل فانز الصفحة لعدم الرد علي رسايلكم والانقطاع طول هالفترة...بس كانت عندي حالة وفاة ولد عمي اللي يرحمه توفي نتيجة حادث سير أليم ادعوله بالمغفرة.. معقب زوز صغار ربي يصبر مرته واصغويرته...
التاسعة....
والتفتت لفارس وعيونها دموع: مع السلامة يافارس مع السلامة .
فارس كان قلبه حيتقطع وهو شايف الدموع في عيون رويدة...وفجأة سمعو عياط .
الحاجة أمنة: بسم الله شن في؟؟
فارس: الصوت جاي من برا..وطلع يجري وهما وراه..
سعاد شادة حسان اللي طايح وغارق في دمه وتعيط
فارس: شن في ياخالتي شن في؟؟؟
سعاد: ولدي ياناس الحقوني ولدي
الحاجة امنة: وووه خيره الولد شن جاه
فارس قامه و حطه في سيارته وركبت معاه رويدة من قدام وطار بيه للمستشفي
رويدة تشوف لحسان وتبكي: زعما مات ؟؟؟
فارس: ماتفاوليش عليه حيكون بخير ان شاء الله
رويدة: بسرعة يافارس بسرعة
فارس: حاضر مانبيش نجري هلبا علي خاطره
شويا ووصلو للمستشفي ونزله فارس وحطه ع الباريلا ودخلوه للعمليات بسرعة
رويدة واقفة وتبكي...وفارس حوايجه كلهم دم..قرب من رويدة: خلاص يادودة حيكون كويس اني متأكد
ارتمت رويدة في حضنه وتبكي...فارس قعد يمسح علي شعرها: تي خلاص ساد
رويدة ضايقتها ريحة الدم في حوايج فارس وبعدت عليه وحطت ايدها علي فمها بترجع.. ..
فارس: خيرك بسم الله
امشت رويدة تجري للحمامات...وفارس واقف ومتفاجأ...
طلعت رويدة وجت قعمزت ع الكراسي وجنبها فارس: خيرك دودة تعبانة؟؟؟
رويدة ارتبكت: لا لا من ريحة الدم بس
وهما قاعدين يتكلمو جاهم الدكتور: لو سمحتو المريض محتاح دم؟؟؟
فارس: اني خودو مني لو فصيلتي تمشي معاه؟؟
رويدة: حتي اني خودو مني
فارس: اسكتي انتي ياخدو عينك..
الدكتور: بسرعة لو سمحت
قلع فارس جاكيته وعطاها لرويدة: امسكي تو نجي أني
رويدة ابتسمت: باه
فارس خش مع الدكتور علي جية صالح وخالد...
صالح: شن في يارويدة شن قال الدكتور
رويدة: اهدأ ياخالي دخلوه العمليات وقالو مستحقين دم بس
خالد: باهي هو شن عنده بالضبط
رويدة: مانعرفش يابابا والله مانعرف
طلع فارس وهو شاد إيده...امشاله صالح يجري: حسان خيره يافارس شن فيه؟؟؟
فارس: في العمليات ياخالي تو يطمنونا عليه
خالد: لاحول ولاقوة الا بالله ... ربك يستر
قعدو يستنو تقريبا ساعة وحسان تحت العملية وتليفون فارس ماوقفش بكل... كل مرة يتصلو بيه من الحوش يبو يطمنو علي حسان..
طلع الدكتور: الحمد لله ع سلامته ياجماعة
صالح: يعني ولدي كويس يادكتور
الدكتور: الحمد لله في رصاصتين في الكتف وحدة منهم تعبتنا شويا بس طلعناها وتوا حالته مستقرة
خالد: رصاص؟؟؟ منين جي الرصاص؟؟
الدكتور: مفروض اني نسألكم
صالح: هالفرخ هاذا بيهبلني ديما بمشاكله
خالد: غير ادعي توا ينوض اصحيح وبعدين نفهمو منه الموضوع
صالح: ان شاء الله يارب
خالد: اسمع يافارس انت خود رويدة وروح بيها وغير حوايجك وبعدين تعالا...
فارس: حاضر ياخالي...هيا دودة
رويدة: بنقعد خلي نطمن علي حسان قبل...
فارس شدها من إيدها: هيا روحي بعدين نتصل بيك نطمنك وين بتقعدي اهني بين الرجالة...هيا تحركي قدامي
طلعت رويدة مع فارس وركبت معاه السيارة.. رويدة كانت طول الطريق وجها جيهة الشباك تبي تتفادي تشوف لفارس..
فارس وقف السيارة...
رويدة:علاش وقفت اهني؟؟
فارس: نحس في راسي دايخ شويا
رويدة خافت: خيرك فروسة ؟؟؟ أكيدة من ً
سحب الدم
فارس ابتسم وميل راسه جيهة رويدة:استاحشتها منك فرووسة تعرفي
رويدة تحشمت: هات عطيني المفتاح تو نسوق أني
فارس: لا لا خليني نستغل هالدقيقتين معاك
رويدة نزلتله الكرسي: باه غير اتكي شويا لين تصحصح..
فارس: ماعلقتيش علي وجهي والعملية اللي درتها
رويدة: فرحتلك من قلبي..تقدر توا تبدا حياة جديدة وتنسي الماضي
فارس: انتي الماضي والحاضر والمستقبل يادودة ..والعملية درتها بس علي خاطرك لانك ديما تقوليلي ديرها
رويدة نزلت راسها: انت تبي الوضع هادا يافارس بينا ..
فارس قام راسه: انتي عارفة شن اللي نبيه يادودة...بس معاش نبي نجرحك اكثر من هكي
رويدة في خاطرها تبي تقوله خلاص انسيت كل شي وسامحتك...خاطرها تقوله ان ثمرة حبهم قاعدة داخلها...خاطرها تقوله هيا نبدو حياة جديدة...بس كرامتها ماتسمحش..نزلت راسها وسكتت
فارس تنهد: براحتك عمري ماحنجبرك علي شي
رويدة:توجعت بعد العملية هلبا؟؟؟
فارس:الوجع اللي اهني اكثر...وحط إيده علي قلبه...كنت مفتقدك انتي دون كل الناس كنتي واقفة معايا في جميع مراحل حياتي...وفي الظرف هاذا بالدات تمنيتك تكوني جنبي بجد
رويدة عيونها دمعو ونزلت دمعة علي خدها...مسحها فارس باطراف صوابعه: خلاص ياقلبي والله مانتحمل نشوف دمعة من عينك والله
رويدة تبكي: روح بيا فارس روح بيا
فارس: حاااضر بس ساد من الدموع...
&&&&&&&&&&&&&&&&
حط فارس رويدة قدام الحوش وامشي للفندق غير حوايجه ورجع للمستشفي
فارس: هاشنو ياخالي فاق حسان؟؟
صالح: مازال يااوليدي قاعد تحت تأثير البنج فارس: خير ان شاء الله
خالد: زعما من دار فيه هكي وعلاش؟؟
صالح: الله أعلم...بس والله هالمرة معاد بنفوتله ضروري نتصرف معاه تصرف حازم الولد بيضيع من بين إيديا من استهتاره
فارس: ربي يهديه غير توا ينوضلنا بالسلامة وكله ساهل...
الدكتور: فاق المريض وخشله المحقق يبي يستفسر منه ع سبب اللي صارله
صالح: باه نقدر نشوفه
الدكتور: يطلع المحقق وعادي تقدرو تشوفوه بس ياريت ماتكثروش معاه الدوة
فارس: ان شاء الله مشكور يادكتور.
طلع الشرطي: انتم أهل حسان؟؟
صالح: اي أني بوه وهاذا عمه وهاذا ولد عمته
الشرطي: هو عنده مشاكل مع حد
صالح: علاش هو شن قالك؟؟
الشرطي: قال انه ماشافش من رمي عليه وماعنداش مشاكل مع اي شخص
صالح قعد يشوف لخالد: أه...اي ماعنده مشاكل مع الناس
الشرطي:معقولة.. اوكي براحتكم حنسجلو البلاغ ضد مجهول ولو توصلنا لشي نبلغوك
صالح: مشكور جدا وبارك الله فيك
الشرطي: وفيك بارك الله...وامشي
خشو لحسان اللي تفاجأ من منظر فارس وكيف تغير والجروح اللي في وجه تقريبا مش باينة
صالح: انت ياولد امتي بتبطل عمايلك اللي ادير فيهم
خالد: مش وقته توا ياصالح مش وقته
فارس: الحمد لله ع سلامتك ياحسان
حسان قلب وجه للجيهة الثانية وماردش...صالح عصب: رد عليه ياناكر الجميل لولاه هو كنت متت... لولا فارس ماتبرع بدمه كنت توا جيفة
فارس: خلاص ياخالي حصل خير ومادام حسان كويس وحالته استقرت اعذزني اني بنمشي نرتاح في الفندق شوي
صالح: براحتك يااوليدي...ومشكور علي كل اللي درته
فارس: معاش تقول هكي ياخالي... حسان خويا
خالد: ربي يكملك بعقلك يااوليدي
خش عليهم الدكتور: ها طمني ياحسان كيف حالك توا
حسان: باهي أحسن
صالح: شن يطلع اليوم يادكتور؟؟
الدكتور: لا لا غدوة ان شاء الله كان ماتعبش ومافيش مشاكل نكتبله خروج
&&&&&&&&&&&&&&&&
بعد المغرب ناض فارس زي المخلوع لانه من اول ماروح من المستشفي رقد من التعب وماحسش بنفسه..مد إيده لنقاله اللي مرمي في جنبه لقاه معبي مكالمات فائته وفي منهم من رويدة
قعمز واتصل برويدة:سامحيني يادودة ماشفتش اتصالك كنت راقد
رويدة: رعشتني عليك قلت علاش مايردش؟؟
فارس: أسف حبيبتي بس رقدت من التعب
رويدة تلكمست من كلمة حبيبتي وسكتت
فارس: ألووووو..دودة؟؟؟
رويدة: احم احم نعم
فارس: وين قاعدين في المستشفي؟؟
رويدة: اي جينا للزيارة
فارس: خلاص تو نبدل ونجيكم غاديكا..
رويدة: باهي...وسوق بشويا
فارس ابتسم: حاضر انتي تؤمري...غير فارس حوايجه ونزل بسرعة
في المستشفي كانت رويدة مقعمزة في المقهي هي وسارة وأميرة بعد ماشافو حسان واطمنو عليه.. الحاجة أمنة وانتصار وسعاد كانو فوق معاه.....
رويدة كانت تعبانة شويا وتحس في كبدها زاهقة ومش طايقة حد..
شويا ووصل فارس ركب لدار حسان وقعمز يهدرز مع حناه وخواله...وبعدين سأل علي رويدة واستأذن نزل..
أميرة اول ماشافت فارس ارتبكت لان من يوم اللي صار في الفاتحة معاش تلاقو...
فارس: السلام عليكم
البنات: عليكم السلام
فارس تجاهل أميرة نهائيا وقرب من رويدة: خيرك دودة علاش وجهك مولي أصفر نحس فيك تعبانة
رويدة: أه....لا غير مش واكلة شي من الصبح
فارس: وعلاش؟؟؟ نوضي معايا نمشو ناكلو حاجة
سارة مع غمزة عين باه واحني شن يصير فينا نقعدو نمصو في الليم
فارس: ههههههههه تو نبعتلك كيلو ليم شفشي مع حد
سارة: هههههههه باهي يافيرو باه
أميرة: اني مانبي شي..بنمشي نشوف حسونة... وامشت وخلتهم
فارس ولاعبرها: هيا نوضي رويدة خلي نمشو لمكان هادي ناكلو ونهدرزو شوي ونرجعك بعدين للحوش شن رايك
رويدة: باه راجي نركب نقول لبابا
قرب منها فارس وشوشلها في وذنها: اني راجلك يابنت شن بناكلك
رويدة ابتسمت...وسارة قرنت حواجبها: هيييي شن تقولو
فارس: ههههه كلام كبار مادخلكش...خلاص قولي لخالي رويدة وفارس طلعو وبعدين تو يروح بيها
سارة: اووووكي
وقف فارس علي مطعم سمك وخدي وجبة منه وامشي بالسيارة جيهة البحر وقفها قريب من الشط...
رويدة:شن هالهبال بحر في الليل
فارس: اي نحبه في اي وقت... تعرفي اكثر حاجتين نحبهم في هالدنيا هما قدامي توا البحر وانتي
رويدة وجها تحمرط وتحاول تغير الموضوع: هيا عطينا خلي ناكلو متت من الشر
فارس: هههههههه باهي يامفجوعة ...وفعلا من اول مافتح فارس الوجبة رويدة طاحت فيها ماكلة تقول مفجوعة فعلا وفارس يشوفلها بااستغراب عمرها ماكانت رويدة تاكل بالطريقة هاذي
فارس: انتي علي فكرة فيك حاجة
رويدة قريب غصت: شنو ؟؟؟
فارس: مانعرفش نحس فيك داسة عليا حاجة وهالحاجة باينة في عيونك
رويدةارتبكت : كول كان بتاكل أحسن مانكمله عليك
فارس: عادي كليتي انتي كأني كليت...وفتح الباب ونزل
رويدة: وين بتمشي يامهبول
فارس: خاطري بنعوم ههههههههه..ودار طافو في البحر
رويدة نزلت تجري وراه: فارس اطلع اطلع الجو صقع تو تمرض اطلع بلاهبال زايد
فارس: تعالي خوديلك طافو الجو مش عادي هههههههه... وقعد فارس يعوم ومبسوط وفجأة معاش سمع صوت رويدة لما لف وشافها لقاها طايحة ع الشط: ههههههه بلاش جو يادودة نوضي مش حنطلع لين انتي تجي..هيااااا يادودة خير مانمرض هياااااا ..... فارس حس بخوف لما رويدة ماردتش عليه وحس ان الموضوع جد. طلع يجري : دودة ردي عليا شن جاك...رويدة!!!!!!
قامها بين إيده وهو بيموت خوف عليها...فكر يرفعها للحوش بس حوايجه كانت مبلولة وحتي حوايج رويدة انبلت معاه...فمن غير تفكير ارفعها للفندق اللي نازل فيه وركبها لداره بسرعة..حطها ع السرير: رويدة رويدة شن صارلك دودة نوضي ماتخوفنيش عليك
فتحت رويدة عيونها وكانت شبه دايخة: ماما
فارس ضمها: خوفتيني عليك ياقلبي
رويدة رجعت غمضت عيونها وماردتش كأنها كانت مش مستوعبة اللي حواليها
فارس ناض غير حوايجه وطلع بيجاما ليه وغير حوايج رويدة اللي كانت مش حاسة بشي...
وكانت فرحة فارس لاتوصف ان رويدة في جنبه ومن الفرحة ضمها ليه ورقد.....
&&&&&&&&&&&&&&&&&&
في الصبح...
فتحت رويدة عيونها وحست بحد وراها ولاف إيده عليها وعلي بطنها....عيطت بأعلي صوت وبعدت عليه
ناض فارس مخلوع وقعد يحك في شعره: خيرك يادودة وقفتي قلبي
رويدة: انت شن إدير اهني وأني وين؟؟؟ اييييييه خطفتني يافارس
فارس: هههههههههه اي خطفتك
رويدة تشوف لحوايجها: شن درت فيا؟؟؟
فارس: هههههههه مرتي انتي كان ماتعرفيش
رويدة حطت إيدها علي فمها: فااااارس
فارس مع غمزة عين: نعموش ياعيون فارس
رويدة: شن درت؟؟؟
فارس مع ضحكة خباثة: مادرت شي عاقل أني...
رويدة ضرباته بالمخدة : خزي عليك نوض روح بيا ياحشمة اكيدة يقولو وين امشو
فارس: خلينا مازال شوي والله ماشبعت منك
رويدة رمت المخدة عليه وخشت للحمام: مولي قليل أدب يافارس
فارس: ههههههههه ورحمة بوي مادرت حاجة ياناس علاش الظلم توا هي
رويدة سكرت الباب وهي تضحك: مهبوووول...باه حوايجي وين؟؟؟
فارس: خليك بالبيجاما تو ننزل نجيبلك أحلي حوايج ونجي
رويدة: غير أعبى وشن يقولو عليا في الحوش طالعة بحوايج ورجعت بغيرهم
فارس قرب من باب الحمام اتكي عليه: انتي يابنت تحسسي فيا اني خاطفك فعلا...انتي مرتي عارفة شن معني مرتي
رويدة خبطت الباب: فارس بعد ع الباب وبرا جيبيلي حوايجي
فارس: شن هالتوحش هاذا...باهي تو ننزل نجيبهم بعتهم للمغسلة تحت
رويدة: بسرعة نراجي فيك مش تعطل عليا
نزل فارس جاب الحوايج ووصي علي فطور وركب...
مد الحوايج لرويدة اللي فتحت الحمام وطلعت إيدها خدتهم وسكرت الباب بسرعة ..
فارس: هههههههههه ...هيا تعالي افطري
طلعت رويدة وهي تلبس في وشاحها: هيا نوض بسرعة روح بيا
فارس: باه غير افطري ونهدرزو
رويدة: نفطرو غاديكا هيا...
فارس: دودة خيرك عارفين انك قاعدة مع راجلك
رويدة: فارس هيااااااا
فارس: اوووووف ياربي ع النكد.... وخدي مفاتيح السيارة ونزل
وصلو قدام الحوش... ولقو حسان كيف مروح من المستشفي..
فارس: شفتي ماحد لاهي بيك...ولادورك حد
فتحت رويدة باب السيارة ونزلت... ولحقها فارس
الحاجة أمنة تضحك: رويدة وين كنتي شغلتينا عليك
رويدة انحرجت وخدودها احمرو: أ أ أ........وكان الجو بارد شويا.... صالح: هيا خشو لداخل صقع
فارس: أني اعذروني بنمشي مشغول شوي
الحاجة أمنة: والله مانعرفك الا خاش تفطر معانا
فارس: حاضر يااحنينة
سارة: رويدة وين كنتي؟؟
رويدة: اسكتي وتعالي معايا نجهزو الفطور... وفي طريقها خدت جاكت أميرة ولبستها اللي كانت كيف امروحة من الجامعة
أميرة خشت للمطبخ وحاطة إيدها في نصها: رويدة؟؟؟؟ امس وين امشيتي ماما سألت عليك
رويدة: اوووووف سكري فمك خلاص...وامشي جيبي زيت من دار الخزين
اميرة: مادخلنيش بنركب نغير حوايجي
رويدة: باه انتلفي امشي.....وطلعت رويدة بتجيب الزيت استغربت لما سمعت حد يخبط علي باب الحوش الخارجي وطلعت بتفتح...
وفجأة اثنين غمولها فمها وحطوها في السيارة من ورا وطارو بيها.....وكان الموقف علي جية اريج اللي كانت بتطمن علي رويدة لانها طول الليل تتصل بيها وماتردش.... اريج: حييييه رويدة!!!!!!.... خشت تجري لداخل تعيط وتندب
انتصار: خيرك يااريج شن في؟؟؟
اريج تبكي وكلامها مش مفهوم: رويدة رويدة
جي فارس يجري بعد سمع العياط واسم رويدة: شن في علاش تبكو ؟؟؟
اريج: اثنين خطفو رويدة ورفعوها معاهم
فارس: انتي شن تقولي 0_0
