الثانية.....
في الليل مقعمزة رويدة ع اللاب توب عندها شوية خرائط ترسم فيهم...
اميرة: رويدة بنسألك.... فارس ولد عمتي ديما يحكيلك انتي واسراره عندك ..نبي نسألك فارس حب من قبل ؟؟؟
رويدة: لا مااعتقدش كان هاذا قالي وعلاش تسألي؟؟؟
اميرة: لا شي... شن حرام نسألو يعني... وقعدت تقلب في نقالها وتفسفس
رويدة: بس حسان هالزوفري هاذا قداش كسرلي رقبتي مش عارفة شن اللي جايه علي فارس..ديما يغلط معاه بالكلام
اميرة: حتي فارس ديما يحسس فيه انه ولا حاجة فرحان بفلوسه ويتجكتر عليه...
رويدة: كان مانعرفش فارس نقولك كلامك حق...غير انتي ادافعي ع سي حسان عشان جايك علي قيس سنيناتك وديما تخططي انتي وياه في المصايب
اميرة: عاد تو اللي بيقول كلمة حق يطلع غالط
رويدة: حق شنو يعطك بق...فارس علي فلوسه في حياته ماقصر مع حد ولاعمره بين انه حالته احسن من حالتنا احني وعمي وافضل مثال عايش معانا اهني مع ان يقدر بفلوسه يشري احلا فيلا في اي مكان في العالم لو يبي مش غير ليبيا
اميرة: ااااخ كان يعطيني فلوسه بس ندير بيهم اللي مايندار
رويدة: انتي اصلا ديما تفكيرك محدود وتفكري في الجكترة والشري والتبزعيق علي خاطر بس تقهري صاحباتك وهالشلة اللي مصاحبتيها
اميرة: نقولك كملي كملي شغلك..وحطت السماعات في وذانها وشغلت اغاني وكملت تفسفيسها
خشلها حسان ع الخاص: اووويا
اميرة: نعم
حسان: عطك جلم يقص لسانك...ها شن صار؟؟؟
اميرة: في شنو؟؟؟؟
حسان: تستعبطي يااميرة..علي حسان هالطروح...
اميرة: ياحسان فكني منه هالموضوع تربح..
حسان: باه خلاص براحتك...بس مادام للدرجة هاذي ماتحبيش الغلط معناها غير يروح عمي نقوله علي عمايلك وخلي يربيك من اول وجديد...
اميرة: باهي خلاص ياهم..موافقة بس بشرط اول ماتحصل اللي تبيه بنفركش الموضوع راه
حسان: تي تعجبيني ياميرو ياعسل...خلاص
وراسك اول مانحصلو تفتوفة باهية نفوتوه
سكرت اميرة الفيس ورمت نقالها ع السرير: اوووووف ياعليك هم
رويدة: خير بلاك؟؟.
اميرة: مافي شي.... عندي درس في الانجلش مش فاهمته بننزل لفارس يفهموهولي
رويدة: اشيه اشيه من امتي إسمه فارس عندك...
اميرة: حيرتينا معاك كان قلنا فارس ووه وكان قلنا حاجة ثانية وووه....تو نجي بننزل نشوفه..... وخدت اميرة مذكرتها ونزلت
فارس كان مقعمز في الصالة مكسد ع التلفزيون وحناه في جنبه تهدرز عليه..
اميرة: السلام عليكم
فارس: وعليكم السلام
الحاجة أمنه: شن هالريح اللي دفاتك علينا ياكبدي
اميرة: حرام عليك يااحنينة علاش تظلمي فيا بس... وجت وقعمزت جنب فارس...فيرو عندي درس مش فاهمته تساعدني فيه
فارس استغرب اول مرة اميرة تقوله فيرو..واصلا اميرة من طول عمرها لاتحتك فيه ولا تكلم فيه: حاضر درس شنو؟؟؟
اميرة قربت منه: اهو ماقدرتش نفهمه بكل
قعد فارس يشرح في الدرس لاميرة وهي دروحها مش فاهمة...
الحاجة أمنة: حسني انعست خلي نمشي نرقد
فارس: تصبحي علي خير احنينة
اميرة بدلع :فيرو قداش عاجبتني انجليزتك حاجة صح
فارس ارتبك : احم احم مشكورة
اميرة: والله بجد نتكلم...شكلي ماكنتش نعرفك كويس
فارس: اه..اي اي صحيتي
اميرة: فارس تعرف اني ماعنديش رقم تليفونك حاجة غريبة صح؟؟ وانت ولد عمتي
فارس: يمكن ماصارتش حاجة احتجتيني فيها
اميرة: باه ممكن تعطيهولي.... يمكن نحتاجك في المستقبل
فارس: اوكي مافيش مشكلة وعطاها رقمه
اميرة ناضت بعد خزنت الرقم:تانكيو فيرو بجد... مع غمزة عين...وركبت أميرة لحوشهم وفي خاطرها" ووه عليا يخوف بجد...ربي يعيني علي مابلاني"
رويدة:ها شنو فهمتي ياحنة
اميرة: اي فيرو فهموهولي
رويدة: فيرو؟؟؟؟؟؟؟؟؟ سبحان مغير الاحوال
&&&&&&&&&&&&&&&&&&&&&&&&&&
في الصبح رويدة اتصلت بأريج وطلبت منا تاخدلها اجازة علي خاطر امصدعة شويا....اميرة: سلامتك دودي خلاص اني تو نقول لفيرو يوصلني .....تأنقت ولبست وكانت ريحة بارفانها واصلة لاخر الشارع .....هي سلامات ياحبي
رويدة:ربي يدوم عليك هالعقل وخلاص
نزلت اميرة تجري لحوش حناها عشان تلحق علي فارس......فارس كان كيف بيركب لسيارته ناداته: صباح الخيرات فيرو...مع ابتساامة
فارس:صباح النور
اميرة:معليش ممكن نتعبك معايا اليوم وتوصلني للجامعة
فارس: ولايهمك مافيش مشكلة....ركبو للسيارة وفتح فارس ع الاذاعة كالعادة يسمع في فيروز
اميرة:الله قداش كل مرة نكتشف فيك حاجة جديدة يافارس
فارس: مافهمتش
اميرة:قصدي انت رومانسي بجد انك تحب فيروز ع الصبح
فارس ارتبك وخش في بعضه: حقا رويدة وينها؟؟؟
اميرة:مريضة شويا قالت
فارس:سلامتها خيرها؟؟؟
اميرة:مانعرفش قالت امصدعة شوي
وصل فارس اميرة لجامعتها وامشي للشركة واول ماوصل طول اتصل برويدة:ها يادودة سلامتك قالو مريضة
رويدة:الله يسلمك امصدعة بس
فارس: باه اسمعي ساعة تانية نجيك ونطلعو نغيرو جو ع الشط شن رايك
رويدة:لا لا مافيش داعي خديت بنادول تو نولي كويسة
فارس: بدون نقاش جهزي روحك وتو نجيك
حسان يكلم في اميرة:ها ميرو بشريني
اميرة:خلاص ياحسان ماتقعدش تزن عليا لما يصير شي نقولك
حسان:اوكي نستني في التطورات....
اميرة: اوووف يارربي درهلي كبدي هالهم
فاتو ساعتين وكمل فارس شغله ع السريع وامشي لرويدة لقاها واتية تراجي فيه..
ركبت رويدة السيارة: تو مش كان كملت شغلك خير
فارس:معاش تقولي هالكلام انتي اوخيتي يادودة اللي ماجابتاش أمي
رويدة حست بشعور غريب من كلمة فارس وضايقتها لسبب هي مش عارفاته...وحاولت ماتبينش:هههههههههههههههههههههه باهي ياخويا
وكيف بيطلع بالسيارة اتصلت بيه اميرة: فيروووووو
فارس: اهلا اميرة شن كملتي؟
اميرة:اي كملت شن تجيني؟
فارس:اوكي شوي ثاني نكون عندك...
رويدة:هاذي اميرة كلماتك..
فارس: اي كملت وتبيني نروح بيا.....خلي نفوتو عليها ناخدوها معانا
رويدة استغربت من امتي اميرة اطيق فارس اصلا عشان تاخد رقم تليفونه وتكلمه....وصلو لجامعة أميرة وكانت واقفة تستني في فارس واستغربت لما شافت رويدة
اميرة: بسم الله مش مريضة
فارس:اني زنيت عليها وخليتها تطلع .....بنمشو نغيرو جو ع الشط
اميرة: الله حلو بكل خاطري فيه حتي اني
فارس:خلاص تمام ندهورو مع بعض
وصلو للشط وقعمزو ع الرملة .....اميرة نحت كندرتها و تنت سروالها وخشت تجري للمية:ووووووه ياسلام وتلعب وتنط
فارس يشوفلها ويبتسم: تعرفي يارويدة اميرة اختك شكلها كويسة بس اني كنت متجنبها وخايف اني نتكلم و نهدرز معاها...شكلي واخد عليها فكرة غلط
رويدة: اه اي اي
اميرة: فيرووو تعالا المية تهبل
فارس تفاجأ: نعم
اميرة: تعال تعال فيرو
فارس: اوكي......ومشي واميرة قعدت ترش عليه في المية وفارس في الاول واقف ويشوفلها بعدين قعد حتي هو يرش عليها ويضحك
رويدة تشوفلهم ومستغربة من اختها وفي نفس الوقت كأنا غايرة منها علي فارس" لا لا يارويدة شن هالافكار فارس زي خويا وباهي اللي اميرة تغيرت معاه مفروض هالموضوع يفرحني مش العكس
روحو للحوش بعد الظهر .....بعد ماطلب فارس وجبات وتغدو في البحر ...اميرة شدت إيد فارس: شكرا فيرو علي تغييرة الجو كان وقت حلو بجد
فارس تحشم ووجه تحمرط...مش متعود بنت تعامله هكي: العفو ماعنديش فيه جميل
رويدة : نستأذنكم
فارس:اذنك معاك دودة
ركبت رويدة وهي طايرتلها من اميرة : شن ياانسة أميرة من امتي صحبة انتي وفارس علي شنو ناوية بالضبط؟؟
اميرة:ولد عمتي واكتشفت اني كنت غبية اني ماكنتش قريبة منه من قبل شن حرام؟؟؟
رويدة:باهي كان هاذا اللي في راسك اووكي
اميرة:ماتخافيش هاذا بس اللي في راسي
&&&&&&&&&&&&&&&&&&&&&&&&&&
في الليل نزلت رويدة للحديقة تحت كان عندها شوي شغل تشتغل فيه ع اللاب....وكانت منغمسة في الشغل لين طب عليها فارس...
فارس:وووووووه شن اديري؟؟.
رويدة:ووووووه خلعتني فروسة خيرك
فارس: هههههههههههههههههههههههه اسف بس شن اديري
رويدة:نرسم في مخطط حوش
فارس: ماشاء الله الحوش لمنو
رويدة: مش لحد بس هكي حابة نرسم حوش من تصميمي ونشوف كيف يطلع
فارس: باه ترا وريني نساعدك..............وقعمز فارس يساعد فيها وعلي ديري باب من اهني وزيدي دار من اهني كملو الحوش
رويدة: طلع يهبل تعرف
فارس: ها شفتي فروووسة وافكاره
رويدة: ههههههههههه خف علينا شويا...وهدرزو فاارس ورويدة مع بعض كالعادة ضحك وبصارة وحاسين بالراحة التامة مع بعض
حسان: سارة سارة انتي يابنت
سارة:نعم شن تبي؟؟؟
حسان: كان عندك رصيد ابعتيلي
سارة: عندي راس زوز اجني
حسان: خلاص ابعتيهولي ماعندك مااديري بيهم
سارة: والله
حسان فك منها النقال وبعث الرصيد.....سارة: تي والله غير مايروح بابا علي ادير فيه ياحسان باهي
حسان: اقلبي زومتك عندي تليفون مهم..... امشت سارة وهي تبرطم وحسان اتصل باميرة
اميرة: نعم شن تبي؟
حسان: وخيرك تتكلمي هكي من غير نفس
اميرة: حسان شن تبي بنرقد ورايا جامعة
حسان: شن اليوم قالو الاعور هيج بيكم ع البحر
اميرة: اي مش انت هكي تبي
حسان: اي اكيد...بس راك تنسي راه كله لعبة ...
اميرة:وانت شن يهمك اذا لعبة او لا انت اللي تبيه بتوصله وخلاص
حسان: طيح سعدك ماتحلميش انك في يوم تحبيه بجد او تحبي غيره ..
اميرة: ياعيني وشن علاقتك انت
حسان: لاني لاني.......لاني ولد عمك
اميرة:باهي من الاخير شن تبي توا
حسان: محتاج فلوس...ديري اي موقف للمتوحش وخودي منه مبلغ
اميرة:باهي
حسان: غدوة ضروي نبيهم
اميرة : تي باهي قلنا
&&&&&&&&&&&&&&&&&&&&&&&&&
ومشت الايام يوم ورا يوم واميرة كل مرة تزيد تعلق فارس فيها اكثر بمواقفها وطروحها...لعند فارس ماتعود عليها وبدا يحس ناحيتها بشعور غريب .....وطبعا كانت اميرة تسل منه في الفلوس كل مرة بسبلة وحجة
ورويدة كان مضايقها تصرفات اختها مع فارس واللي مضايقها اكثر ان فارس بدا يتعلق بااميرة بطريقة غير تعلقه بيها
رويدة مقعمزة في المكتب وسارحة في فنجان قهوتها اللي برد ومازال ماشرباته...اريج: هييييي وين امشيتي
رويدة انتبهت لروحها: ها نعم
اريج: خيرك رويدة ليك كم يوم مش عاجبتيني راه
رويدة: لا مافيا شي
اريج: عليا اني يعني....خيره فارس فيه شي
رويدة شافتلها باستغراب: واش معني فارس يعني
اريج: عارفتك مافي شي يضايقك الا حاجة تكون تخص فارس
رويدة تنهدت: مانعرفش حايرة وشعوري متخلبط
اريج: انتي تحبيه يارويدة بس تكابري ....كلامك عليه وتصرفاتك معاه كل شي قول انك تحبيه وتموتي فيه
رويدة سكتت..وضرب نقالها وكان فارس: ايوه دودة فاضية نفوت عليك نطلعو لشي مكان نبيك في موضوع ضروري
رويدة: موضوع شنو خوفتني
فارس: تو نجيك ونمشو لمكان نتكلمو فيه
رويدة: اوكي حاضر نراجي فيك....وسكرت
اريج: اشيه اعويناتك لين ضحكو بعد كلمك فروووسة وتبي تقنعيني مش حب
رويدة: فكيني منك توا شافت لروحها في المراية وبخت بارفانها اللي يحبه فارس ..........
شويا وجي فارس ونزلتله رويدة ومشو قعمزو في مقهي....رويدة: ها شن مناسبة العزيمة الحلوة
فارس كان مرتبك شوي: ههههههههههههههههههه باهي غير خلي نطلبو حاجة قبل
رويدة: وقت عليا ع العمل...اطلب حاجة وخشلي طول في الموضوع
فارس: اوووكي...طلب اثنين عصير فرش ....احم احم ...........نبي نعترفلك بشي خطير
رويدة: بسم الله شنو
فارس: تبي الصراحة ليا فترة حاسس بشعور غريب اتجاه شخص وفكرت كويس وقلبتها في راسي واكتشفت انه حب
رويدة تفاجأت وفي خاطرها" اخيرا حسيت بحبي يافارس اخيرا...الحمد لله ياربي جبرت بخاطري...وخليت الشخص اللي نحبه ونموت في يحس بيا اخيرا"
فارس: وين امشيتي يادودة
رويدة: هههههههههههههه معاك معاك
فارس: بصراحة اني نحب...............................وقطع عليم القارصون جاب العصير
رويدة" توا وقتك وااااو"....فارس: مشكوووور
رويدة: بااااه شن قلت
فارس: بدون لف ودوران نحب اميرة اختك ونبي نتقدملها .......وكانت كلمة فارس هاذي مع اغنية اصعب حب كانو حاطينها في المقهي ومقطع" أقوي عذااب لما دمعوك تنزل منك قدام عينو مايشوفهاش...اقوي عذاااب كل ماتيجي تقولو بحبك يسكت قلبك مايقولهاش"
رويدة...................................................................................
