العاشرة والأخيرة
فارس: انتي شن تقولي 0_0
اريج تعيط: الحقوها بسرعة الحقوها
انتصار تندب علي بنتها والحاجة أمنة رجليها معاش رفعوها وقعمزت وتخبط علي رجليها .. وخالد قريب يطلع من عقله
فارس يدور جاي وغادي مش عارف شن يدير: باه غير اهدي واوصفيلي اشكالهم او السيارة اللي راكبينها
اريج: مانعرفش مانعرفش ماركزتش...راجي السيارة تقريبا كاميري كحلة
حسان: كاميري!!!!
فارس: تعرفهم؟؟؟ تي تكلم تعرفهم
حسان:أ أ أ.........
فارس قرب منه وشده مع قميصه: تكلم ياحسان تكلم
الحاجة أمنة: بشويا علي ولد خالك كيف طالع من المستشفي
صالح: حسان بتتكلم والا نعرف كيف نخليك تتكلم ياولد
حسان: هاذم جماعة يبو مني فلوس...وتقريبا هما اللي رمو عليا بس ماتوقعتش يخطفو حد
فارس: تعرف مكانهم؟؟؟ تعرف وين نلقاهم؟؟
حسان مرتبك: لا لا كنا نسهرو مع بعض بس فارس: تي كيف ماتعرفهمش ؟؟؟ ياحسان رفعو مرتي ياراجل قولي شن تعرف عليهم
صالح عصب: تكلم ياكلب اصلا جميع مايجينا من مصايب من تحت راسك
حسان خايف من بوه: كنا نسهرو مع بعض في مزرعة هاذا الي نعرفه عليهم
فارس: باه كيف تعرفت عليهم؟؟
حسان: عرفني عليهم ولد صاحبي
فارس: باه تعرف حوشه الولد هاذا
حسان: اي نعرف
فارس: باه شن تراجي نوض تحرك قدامي وريهولي
وطلع خالد وصالح ... وفارس كيف المجنون ركب في السيارة وحسان معاه
قربت اريج من المرش جيهة فارس وخبطت عليه...
فارس: نعم يااريج
اريج: فارس بنقولك حاجة....رويدة حامل راه
فارس توسعو عيونه وفتح الباب ونزل: شن هو؟؟؟
اريج: اي هيا ماتبيش تقولك كانت... بس اني بنقولك عشان تنقدها هي والبيبي
فارس قعد يخبط ع السيارة: تي علاش يارويدة علاش ماقولتي بس
اريج تبكي: بالله عليك رجعها يافارس
فارس: ماتخافيش بأذن نرجع مرتي وولدي لحضني ماتخافيش.
سطرب فارس بالسيارة وطلع... وطلعو وراه خواله في سيارتهم بيمشو للمركز يقدمو بلاغ...
فارس: ربي يهديك ياحسان شفت نهاية الطريق اللي ماشيها وين ترفع...
حسان امنزل راسه وخلاص: ماكنتش نحساب توصل بيهم لدرجة الخطف
فارس: باه هما شنو كويسين والا كيف نظامهم بالضبط؟؟ يعني ممكن يؤذوها رويدة؟؟؟
حسان ارتبك: أه.... لا لا هما غير يبو يضغطو عليا بس عشان ندفعلهم
فارس: هما قداش يبو منك؟؟؟
حسان: 5000 دينار
فارس: وهاذم علي خاطر شنو يبوهم منك؟؟
حسان: شوية أشغال
فارس: أشغال ياحسان عليا أني هالكلام...والله كان يسمعك خالي انك خاش علي جو الحبوب والسكير يذبحك
حسان: أ أ...أني حر
فارس:شن حر ؟؟؟ هاذم وصلو فيا وفي مرتي... باهي وينه حوش صاحبك؟؟
حسان: خود يمينك واول شارع بعد الجزيرة...
وصلو قدام الحوش ونزل فارس خبط ع الباب وسأل ع الولد طلع بوه لازه من الحوش من مشاكله مع الناس...
ركب فارس ويخبط ع الدومان: توا كيف الحل كيف بنوصلولهم بس
حسان: عندي رقمه تو نتصل بيه
فارس: هيا بسرعة شن قاعد تستني
اتصل حسان وطلع الرقم غير مستعمل...وفارس كان حينجن لانه كان الخيط الوحيد اللي ممكن يوصله ليهم...
فارس: كيف الحل توا ياناس مرتي ضاعت من إيدي والا كيف
وهما قاعدين يتكلمو ضرب نقال حسان وكان رقم غريب...ورد حسان: أيوه
المتصل: اهلا ياسونسن شن توا بتحط عقلك في راسك وبتجيب الفلوس بعد ماخطفنا حبيبة القلب
حسان: تو نوري عمك ياكلب كيف تتجرأ وتخطف بنت عمي ياكلب تو نوريك
فارس خدي منه التليفون بسرعة: ألو ايوه ايوه أني راجلها اللي خطفوتها حنعطيكم اللي تبوه بس رجعهولي
المتصل: راجلها؟؟؟ تي انت شن تخرف
فارس: بالله عليك خلينا نتفاهمو واللي تبيه يصير
المتصل:اني نبي حسان مش انت... وسكر
فارس: الووو..الوووو...رد عليا....وعاود عليه لقي الرقم مقفل..رمي التليفون علي طول يده: الحقير هاذا
حسان: خلاص يافارس أهدا شوي...بس شكله كان يبي يخطف أميرة مش رويدة
فارس: وشن عرفك انت
حسان: قالي حبيبة القلب وهو عارفني نحب أميرة
فارس فنص فيه لان فهم علاش أميرة رفضاته توا وحسان فهم نظرته وارتبك: أ أ...خلي نمشو للحوش توا واكيد حيتصل مرة ثانية مادام يبي فلوسه
فارس: قسما بالله يمسو منها حتي شعرة نقتلهم ونقتلك ياحسان لانك سبب المصايب
حسان: اووووف تي باهي خلاص غير خلينا توا نروحو عشان نعرفو كيف نتصرفو
&&&&&&&&&&&&&&&&
في الحوش كانت الاجواء متوترة ع الاخر..روح حسان وفارس...
الحاجة أمنة: شن صار معاكم يافارس؟؟
فارس: والله مافهمت حاجة يااحنينة.كلمو حسان ومافهمت شي
صالح: شن قالولكم ؟؟
حسان: يابوي هما يبو مني فلوس وخطفو رويدة يحسابوها أميرة ع أساس بيضغطو عليا
صالح: ياعطك بلية..غير نتمو من الموضوع هاذا ياحسان وكان ماربيتك من اول وجديد مانكونش صالح
فارس: المهم توا رويدة كيف بنوصلولها
حسان: اكيدة حيرجعو يتصلو بس تمنيتك ماقلتش انك تعطيهم اللي يبوه هكي بيطمعو
فارس: واني عند كلمتي نعطيهم اللي يبوه غير يرجعولي مرتي بس
انتصار: ياناري يابنيتي زعما شن صاير فيك ياكبدي
الحاجة أمنة: ساد ياانتصار ماتزيدناش علي مابينا ...باه ياخالد شن صار معاكم في الشرطة
خالد: قالو ضروري يفوتو 24 ساعة عشان تقدمو بلاغ
الحاجة أمنة: شرطة عيني وقهرتي...يعني يقتلو الواحد ويقطعوه عشان يتحركو...
فارس طلع لبرا حاس روحه مخنوق وقعمز ع كرسي في الجنان وإيديه علي راسه ويخمم
طلعت اريج تبكي: ان شاء الله تكون كويسة يافارس ماتخافش
فارس قام راسه: كان يصير فيها شي حنموت يااريج والله نموت... بعدين من امتي هيا حامل وعلاش ماقالتش؟؟؟
اريج: هي اكتشفت الموضوع يوم ماجيت انت بتودعها عشان بتسافر
فارس خبط راسه: قداش اني غبي وكل مرة نزيد نجرحها اكثر واكثر
اريج: معليش ان شاء الله حتعوضها علي كل اللي فات
فارس:اكيد...غير ان شاء الله مايديرولها شي هي او البيبي... مع انها مفروض كانت تقولي علي حملها لولا اللي صار مع حسان كنت سافرت بدون مانعرف
سارة تجري: اتصلو اتصلو يافارس
فارس خش يجري ووراه سارة واريج....
حسان: راه حتندم علي ادير فيه خليك راجل وواجهني اني مش تخطف النساوين
المتصل: مازال عندك عين انت وتتكلم...اني كلامي مش معاك عطيني راجل العسولة نتفاهم معاه
حسان: تي باهي ياكلب تو صيروني نحصل عليك
فارس: تي هات عطيني نكلمه ياراجل...وخدي التليفون من إيد حسان: نعم شن طلباتك قتلك اللي تبيه حاضر
المتصل: انت فارس؟؟؟
فارس استغرب: اي
المتصل: كم تدفع في العسولة مرتك عشان نرجعهولك
فارس: اللي تبيه
المتصل: هي بصراحة تستاهل ياراجل...مرتك طرف من الاخير
فارس يغز علي سنونه: تعرف تمس شعرة بس من راسها نعدمك
المتصل: هههههههههه غير وسع بالك
فارس: من الاخير كم تبي
المتصل: نص مليون
فارس: اوكي...واني مستعد امتي وكيف؟؟
المتصل: معقولة توافق بالسهولة هاذي.. معناها بنزيد المبلغ
فارس: شن انت شكلك مش ناوي تجيبها لبر
المتصل: توتوتوتوتوتو ...بلاش تتطاول أحسن مانزعلو الحلوة اللي معانا..
فارس عصب: ورحمة بوي قتلك تقرب منها نقتلك فاهم والا لا
المتصل: هههههههههههه...وسكر التليفون
فارس: رد ياكلب رد....
خالد: شن صار؟؟؟
فارس: يبي نص مليون
صالح: شن هو؟؟؟؟
خالد: غير يحلم
فارس: مستعد ندفع زيهم عشر مرات غير ترجعلي رويدة ياخالي......وطلع فارس متعفلق ركب في سيارته وقعد يدور في الشوارع...اخر شي درس قدام البحر وقعد يبكي ويشهق زي الطفل...لين خداه النوم ورقد
&&&&&&&&&&&&&&&&&
في الصبح فتح فارس عيونه علي رنة تليفونه: الو
رويدة تبكي: فارس تعالالي بالله عليك
فارس: دودة حبي انتي بخير حبيبتي ردي عليا
رويدة: اي كويسة بس طلعني من اهني
فارس: حاضر حاضر...دارولك شي حبي قولي
المتصل: هههههههه لحد الان مازال...بس لو ماسرعتش روحك مانضمنش جماعتي راه...مرتك حلوة والحكاية جفاف عندنا
فارس يخبط بأيده ع الدومان: تي انت شن تبي مش قلت فلوس خلاص قولي امتي وكيف ونجيبهولك وتم الموضوع
المتصل: خلاص بعد العصر تجيب المبلغ وتحطه في أكياس كناسة وترميهم جنب مكب الكناسة اللي في نهاية شارع ******* وتتوكل...
فارس: باه ومرتي؟؟؟
المتصل: لو لقينا الفلوس تمام ...وبعد نتأكد منهم نتصل بيك ونقولك وين تلقاها
فارس: وباه شن يضمني إنك حتوفي بوعدك..
المتصل: هاذا اللي عندي وهي سلامات كان ماتبيش
فارس: لا لا لا خلاص اتفقنا زي ماتبي
المتصل: خلاص تعجبني اول ماتحط الفلوس رن عليا ع الرقم هاذا واني حنقولك ع الباقي...وماادخلش لاشرطة لاغيره في الموضوع كان تبي تشوف مرتك من جديد
فارس: حاضر مش حنقول لحد بس والله لو ماوفيت بوعدك نجيبك نجيبك
المتصل: ههههههههههههه
سكر فارس منهم وامشي للمصرف طول سحب المبلغ وحطه في اربع كياس زي ماطلبو..
اتصل بيه خالد: ايوه فارس تعالا عشان نمشو للمركز نقدمو البلاغ
فارس: لا لا ياخالي الموضوع حنكمله بروحي وطلع الشرطة من الموضوع
خالد: تي كيف يافارس؟؟
فارس: بالله عليك ياخالي خليني نحلها
خالد تنهد: باهي زي ماتبي المهم خبرنا بشن بصير معاك اني قاعد علي نار راه...
فارس: حاضر ان شاء الله..قعد فارس يستني علي نار لعند وقت العصر...
مع العصر...خدي فارس الاكياس وحطهم وين مااتفقو ورن علي الخاطف وبعد ع المكان وقعد يراجي..
فاتت تقريبا ساعة وماصار شي...فارس عاود اتصل بنفس الرقم لقاه مقفل...عصب وطارتله حس ان الخاطف ضحك عليه وخدي الفلوس وهرب...
فارس: هالواطي الواطي...كيف اندير توا شكله رجع في كلامه..رويدة ضاعت مني ضاعت..ان شاء الله الخطة تنجح يارب. شويا وضرب تليفونه: ايوه الو
اريج: رويدة رويدة رجعت يافارس
فارس: نعم؟؟ تي كيف؟؟ وينها توا؟؟
اريج: تعالا للحوش بسرعة
فارس: هي مسافة الطريق وجاي....ودور فارس السيارة وماحسش بروحه كيف وصل قدام الحوش نزل من السيارة وخلاها والعة وفتح الباب وخش يجري...
لقي رويدة متعنقة أمها وحناها تمسح علي شعرها وسارة وأميرة في جنبها
فارس اول ماشافها تنهد: دودة
رويدة دموعها في عيونها: فروووسة
فارس قرن حواجبه و من غير وعي شدها من أيدها ودخلها لداره...
انتصار: استني فارس........
الحاجة أمنة: خليهم ياانتصار
سكر فارس الباب وسندها ع الحيط: علاش دسيتي عليا انك حامل
رويدة: أ أ.......... انت من قالك؟؟
فارس: اللي قالي قالي...علاش داسة عليا يعني لولا اللي صار كنت سافرت توا بدون مانعرف ان حيكون عندي ولد او بنت
رويدة: ماهو انت......
فارس.عصب : أني شنو يارويدة
رويدة: وانت هاذا اللي يهمك يعني مايهمكش شن صار فيا؟؟؟
فارس: انتي هكي رايك يعني
رويدة: هالشي واضح من كلامك...قول حتي الحمد لله ع السلامة فالح تسأل ع البيبي بس
فارس: لانك قهرتيني لما دسيتي عليا
رويدة دفاته: بعد عليا اصلا انت طول عمرك مش رح تتغير ولا تحس بيا..... وطلعت تجري ركبت لحوشهم وسكرت عليها الدار
فارس:واااااو....وطلع...
الحاجة أمنة: بسم الله الكريم غير خليها توصل زين البنت وبعدين زعلها
فارس مضايق: ماكانش قصدي يااحنينة بس هي عفلقتني
الحاجة أمنة: تو مرتك كانت بين أيدين ناس مايعلم بيهم كان ربي شن كانو ناويين يديرو فيها وبدل ماتستحمدلها ع السلامة وتواسيها تزعلها ..
فارس:مرات نتصرف في تصرفات غبية يااحنينة..واااو باهي كيف بنراضيها توا....
الحاجة أمنة: ياحليلي منك انت وخلاص
ركب فارس لرويدة وحاول يفتح الباب لقاه مسكر: افتحي يادودة نبي نقولك حاجة
رويدة تبكي: إمشي معاش نبي نسمع منك شي..وطلقني يافارس طلقني
فارس: طلاق عينك الحولة..أفتحي الباب خير مانكسره
رويدة: لا وكان ماتمشيش من اهني نحذف روحي من الشباك يافارس..
فارس: عارفك مجنونة واديريها.. باه أفتحي نبي ولدي مانبيكش أنتي..عندي كلام بنقولوهوله
رويدة ابتسمت ودموعها علي خدها: أمشي من اهني قتلك
فارس: حبي أسف والله أسف
رويدة ماردتش عليه ودفنت راسها تحت المخدة وتبكي..
نزل فارس طايرتله وكيف بيركب للسيارة ناداه حسان...وكانت معاه أميرة
فارس التفت: نعم
حسان: فارس سامحني علي كل شي صار بينا
فارس: انت خويا ياحسان ماتقولش هالكلام...
أميرة: سامحني يافارس
فارس: الله يسامحك..بس نبي نعرف علاش درتي فيا هكي
أميرة نزلت راسها:الشيطان اعوذ بالله منه
فارس: صح انتي جرحتيني جرح كبير ياأميرة...بس نشكر ربي اني هالجرح كان زي الكف بالنسبة ليا وخلاني ننتبه للناس اللي يحبوني بجد.. ورويدة حاليا عندي بالدنيا وقلبي ليها هي وبس..
أميرة: ربي يهنيكم...المهم مانبيش تكرهني او تحقد عليا من فضلك..اني غلطت ومعترفة بغلطتي
فارس فتح باب السيارة وكيف بيركب: اوكي مسامحك..بس عندي شرط نبيك تقدميلي خدمة
أميرة: حاضر اللي تبيه حاضر..
&&&&&&&&&&&&&&&
ناضت رويدة مع المغرب بعد مارقدت نوم عميق من التعب وماحست بشي..لقت روحها في دار كبيرة كلها ورد... قعمزت وهي مستغربة لقت جنبها ورقة فتحتها: "المرة هاذي اي خطفتك... وماتحاوليش تعيطي ولا اتعبي روحك مش حيسمعك حد...تبي توصليلي تبعي الخريطة...التوقيع فروووسة😜😜😜😜 "
رويدة ابتسمت: والله مهبووول...طلعت رويدة من الدار وهي اتبع في الخريطة اللي مرسومة ع الرسالة.. وكانت مستغربة ومبهورة من جمال الحوش اللي هيا فيه. قعدت تمشي خطوة بخطوة لعند وقفت قدام دار فتحتها ولقتها غرفة بيبي حلوة وكان لونها وردي في وردي وتجنن ومأثثة بأحلي الاثاث...
وقفت رويدة وهي مبتسمة فجأة حد غمضلها عيونها...
رويدة: حول حول اني زعلانة
لفها فارس ليه: عارف يادودة أني أسف
رويدة: كرهتها هالكلمة منك
فارس: نوعدك معاش تسمعيها...بس بجد سامحيني ياقلبي
رويدة: مشكلتي مانقدرش نزعل منك
فارس: نحبك
رويدة: حبيتك ونحبك...وحبك أصعب حب
فارس: نوعدك يادودة نعوضك علي كل لحظة زعلتك فيها ..وضمها ليه وحضنها بكل قوته
رويدة قعدت تبكي... وفارس يهدي فيها: خلاص حبي خلاص
رويدة تمسح في دموعها: باه من قالك بنوته ؟؟
فارس: هكي عندي احساس انك حتجيبيلي شينة زيك
رويدة خبطاته علي كتفه: بلاش برادة
فارس قرب منها: خطرها ع البرادة.. تعالي جاي بنقولك حاجة.. وقامها بين إيديه وركب بيها للدار
رويدة: فرروووسة نزلني بنتصل بماما اكيدة مشغولة عليا نزلني
فارس: هههههههههه تو نتصلو بيها بعدين.اصلا احنينة وأميرة عندهم علم بكل شي..وتو يقولولها انتي وين قاعدة..
