الرابعة
خالد شاف لبنته رويدة وحس انه احرجها...لانه بحكم رويدة قريبة من فارس توقع ان فارس يطلبها هي...
الحاجة امنه بتلطف الجو: ههههههه حتي انت ياخالد ترفس
فارس: رويدة زي اوخيتي ياخالي
خالد: اي اي عارف عارف دوخت شوي
رويدة حست موقفها بايخ وخصوصا كل واحد يرقع من جيهة وناضت: خلي نمشي ناخد قهوة راسي امصدع
انتصار: اوكي وشوفي اختك وبنت عمك بالمرة
حسان طبعا من بعد ماسمع الكلام طلع برا وقعد يرحي علي فارس ماتوقعش يطلب اميرة بالسرعة هاذي قبل مايوصل حسان للي مخططله...وكانت في حاجة ثانية مضايقة حسان ومش فاهمها ....
طلعت اميرة وسارة من الحمام حشاكم ورجعو قعمزو ع الطاولة...خالد: اميرة ولد عمتك طالب ايدك شن رايك
اميرة تقول من صب عليها سطل امية مصقعة تجمدت في مكانها: اه
فارس يشوفلها ويبتسم... واميرة تشوفله ومتفاجأة
الحاجة امنة: عاد بسم الله اعطو البنية وقت تفكر طول هكي
سعاد: اي ياعمتي عندك حق خلوها تفكر
خالد: اوكي زي ماتبي يام
صالح: هي توا خلي نكملو طريقنا...والموضوع هاذا نأجلوه لين انروحو من المزرعة
وطلعو للسيارات برا....ولقو رويدة مقعمزة في سيارة بوها...يعني ماتبيش تركب مع فارس....الحاجة امنه فهمت رويدة وركبت هي مع فارس...
فارس: شفتي دودة سيبتني وامشت
الحاجة امنة: زي ما انت سيبتها
فارس استغرب: مافهمتش
الحاجة امنة: خلاص هيا اطلع وقت علينا...وسكتت شويا....غريبة ماقتليش علي موضوع اميرة
فارس: بصراحة تحشمت منك يااحنينة..
الحاجة امنة: وعادي شن فيها... مادابيا نفرح بيك قبل مانموت
فارس: بعيد الشر عليك يااحنينة ماتقوليش هكي
الحاجة امنة: بس مفروض شاورتني قبل ماتكلم خالك
فارس: شاورت دودة يااحنينة تبي الحق قبل
الحاجة امنه: اييييييه شاورتها؟؟؟
فارس: اي شن فيها...اصلا ديما اسراري عندها
الحاجة امنة: ربي يهديك يافارس ياريتك كلمتني قبل
فارس: وعلاش
الحاجة امنة: لا شي سلامتك....ماقدرتش تقوله ان رويدة تحبه لان ماتبيش تسبب حساسية بين الخوات وفارس...علي الرغم رويدة مش معترفة لحناها بشي...بس هي فاهمتها...
&&&&&&&&&&&&&&&&&&
وصلو العيلة كلها للمزرعة وكان الحاج عياد ومرته واولاده وكناينه يستنو فيهم وكان احفاده كلهم صغار في العمر ..خشو النساويين لداخل والرجالة قعمزو يجهزو في عدة الشواء لان الحاج عياد ذابحلهم
كانت المزرعة كبيرة وفيها خيرات ماشاء الله...وفيها استراحة فيها دارين كبار وكل دار بحمامها...وحدة خدوها النساويين ووحدة الرجالة..
تغدو وهدرزو النساويين ع عيلة الحاج عياد...ورويدة كانت تقول مش معاهم طول الوقت سارحة وتتنهد...واميرة كانت حتي هيا تفكر في طلب فارس وكيف بتتصرف
رويدة:نستأذن بنطلع نشم هواء
مرت عياد: اهو تو يطلعو معاك حد من صغار ولدي بالك تضيعي بروحك
طلعت رويدة ومعاها بنوته اصغيرة حفيدة الحاج عياد....
حسان بعت مسج لاميرة عشان تطلعله لبرا وانه يبيها في موضوع مهم...
اميرة: نعم؟؟
حسان: شفتي الاعور شن يبي؟؟
اميرة:قصدك ع طلب الزواج
حسان: امالا علي قهرتك
اميرة طارتلها: اي شفت وبنوافق
حسان: قهرتك مش توافقي
اميرة: وعلاش انت شن حارقك...ع الاقل بعد يتزوجني فلوسه تولي فلوسي وتقدر تحصل اللي تبيه
حسان:انتي تستعبطي يااميرة والا عبيطة من ربي
اميرة بعصبية: لا عبيطة لابطيخ... انت علاش ترحي نتزوج اللي يعجبني...اميرة كانت شاكة في مشاعر حسان تجاهها الفترة الاخيرة وتبي تحرقله اعصابه وتشوف لو شكها في محله
حسان: قسما بالله نقتلك ونقتله كان تتزوجيه كان يقول فيها وعيونه كلهم شرار..
اميرة: باهي علاش؟؟؟
حسان: هكي يانعبي اني وياك ينقعدو منتفين مع بعض ....تعبي بروحك لا
اميرة: قصدك لهاذا السبب بس رافض نتزوجه
حسان: اي اكيد امالا شن بيكون السبب
اميرة: اوكي ياحسان يصير خير.....وامشت خشت لداخل وهي ترحي ومش شايفة حد قدامها
رويدة كانت تتمشي هي والبنوتة في المزرعة بعدين قعمزت هي وياها في جنب حظيرة البط والحمام والعصافير ..
البنوتة: انتي من سماك؟؟
رويدة: اسمي رويدة ياعسولة
فارس: اسمها دودة
التفتت رويدة لما سمعت صوت فارس ولقاته واقف وحاط ايديه في جيوبه.. قلبت وجها علي طول كأنها ماتبيش تشوفه
جي فارس وقعمز في جنبها...وقعد يقرصلها في ايديها يناشب فيها وهي شادة ضحكتها
البنوتة حطت ايدها علي وجه فارس في مكان الندبة: خيره وجهك هكي؟؟
فارس: طحت عليه
البنوته: يوجع فيك هلبا
فارس: ههههههههه لا لا مايوجعش فيا
البنوته: انت من سماك؟؟
فارس:هههههههه اسمي فروسة وقعد يشوف لرويدة
البنوته: باه....وقعدت تلعب بالتراب في جنبهم
فارس: حلوة المزرعة صح؟؟؟ وطلع دخانه وقعد يدخن
رويدة: اي ماشاء الله كبيرة.... وخدت الدخان من بين شفايفه: مش قتلك بطله هالسم الهاري
فارس:ههههههههههه باهي.... تعرفي نفكر بناخد مزرعة كبيرة وبنبي فيها حوش خصوصا توا بعد فكرت نستقر وبنتزوج
رويدة: فارس نسألك؟؟؟
ضربها فارس علي جبهتها: معاش تقولي فارس
رويدة: احييي...تي باهي فروسة نسألك
فارس: أسألي يادودة
رويدة: كيف عرفت روحك تحب اميرة؟؟
فارس: اممممممم خلي نفكر....بصراحة نحس فيها مرحة وطيوبة وزي الاطفال وتصرفاتها وحركاتها الطفولية شدوني ليها...ومع الايام ارتحتلها...نحس فيها حاجات غريبة يعني مش زيك انتي عاقلة ورازنة هههههههه نحس فيها مهبولة.بس نوع الهبال الحلو والقريب للقلب
رويدة حاولت تخبي دموعها: ربي يهنيك معاها
فارس: خلي توافق قبل...نحس في روحي متوتر خايف ترفضني
رويدة: وعلاش شن ناقصك؟؟؟
فارس: عارف ماناقصني شي ماديا...بس كشكل انتي شايفة بروحك
رويدة: ماتخليش تفكيرك محدود للدرجة هاذي... ماكنتش نعرفك هكي..من امتي الشكل ليه اهمية....اني شخصيا اخر شي يهمني الشكل...المهم نحصل واحد يحبني ويحتويني ومانبي شي
فارس: ياحظه فعلا اللي بيطيح فيك يادودة
رويدة لفت وجها الجيهة الثانية وحاسة خلاص انها بتبكي فناضت: اني بنمشي اكيدة يبونا غاديكا...هيا حبيبتي خلي نمشو
فارس: خيرك قاعدين نهدرزو
رويدة:لا لا خلاص هي سلام....خدت البنوته من ايدها وامشت
&&&&&&&&&&&&&&&&&&
جهزو النساويين السلطات والرجالة كملو الشواء وحطو الغدي وتغدو...
مرت عياد: ماشاء الله علي ابنياتك ياانتصار تقول عسل ربي يحفظهم
انتصار: الله يسلمك تسلمي...بس سارة بنت سلفي مش ابنيتي بناويتي رويدة واميرة
سعاد: سارة ابنيتي أني
مرت عياد: اها....ماشاء الله عليهن كلهن
الحاجة امنة: ابنيات ولادي تقول عسل ياحنة وياسعد اللي بيطيح فيهن ...وتغمز لحفيداتها فرحانة بيهن
بعد كملو الغدي والهدرزة ضمو النساويين الحوسة وبعدين خشو رقدو شويا
في العشية ناضو النساويين ووتو عالة الشاهي وقعمزو يهدرزو....وامشو البنات سارة ورويدة واميرة بيتمشو في المزرعة... كان في شجر لوز قعمزو تحتهم ويهدرزو ويضحكو
جاهم حسان من بعيد: شن اللفام قريب ينشركو من الضحك عاجبكم الجو
سارة: اكيدة اهو غيرنا جو خير من الحبس...وماتطلعيش وماتمشيش
حسان: تعرفي يابنت انتي داسلك طريحة لين بنكسرلك عظامك علي طولة لسانك
رويدة: امالا تبي عمي يدقدقك والله تحط ايدك عليها يوريك
حسان: هالدراه كبد بعشر لسانات... ندويلها كلمة ترد بعشرة
اميرة كانت قالبة وجها للجيهة الثانية وماتبيش تشوف لحسان بكل طايرتلها منه..
حسان: وانتي الثانية علاش قالبة اخليقتك
اميرة: مادخلكش فيا
حسان: كية انتي الثانية ع طولة هاللسان معاش تتحشمو.رودي كان عندك رصيد ابعتيلي بنكلم الكبيدة وكان يقول فيها ويشوف لاميرة كأنه يبي يحرقها
رويدة: تليفوني مش معايا... بعدين نبعتلك
سارة: فارس فارس...تعالا احني اهني
حسان: ياقردة تو نوريك عليها شن بنديرو بيه هالهم
رويدة: احترم نفسك ياحسان وبلاقلة ادب
حسان: ترا اطلعي من راسي فكيني
قرب منهم فارس: السلام عليكم
كلهم الا حسان: وعليكم السلام
اميرة وقفت لما شافت فارس: فارس خطرها بنقولك اني موافقة نتزوجك يافارس .... وقعدت تشوف لحسان بتشفي
حسان ورويدة:0_0
فارس ابتسم ومش عارف شن ايدير من الفرحة: بجد اميرة؟؟؟
اميرة: اي جد
رويدة كانت زي المسبوهة تشوف لفارس وخلاص وكأنه شي ثمين وخلاص ضاع منها...
حسان: هههههههههههه الوحش والحسناء
رويدة: حسان ساد شن هاللسان اللي عندك
حسان: مادخلكش فيا وسكري فمك
فارس ماتحملش حسان يعيط علي رويدة: حسان ماتعليش صوتك عليها
حسان بأستهزاء: لا والله وانت شن دخلك يا...... والا خليني ساكت
رويدة شداته من ايده: حسان امشي من اهني وفكنا منك
دفها حسان بقوة وجت رويدة طايحة: مانيش ماشي...وفارس ماتحملش فنط علي حسان وبدا يتعافر هو وياه
رويدة: حيييييه شن هبلت انتي وياه
سارة طارت تجري بتنادي بوها وعمها....واميرة واقفة وخايفة ورويدة تحاول تفكهم بس ماقدرتش ..
جي خالد وصالح فكوهم من بعض بالسيف وكل واحد محصل ضربات علي وجه...
صالح: شن انكلبتو والاشنو هنا تتعاركو قدام الناس؟؟؟
خالد: خيرك يافارس قبل نعرفك عاقل
رويدة: حسان طول لسانه علي فارس يابابا
حسان: اسكتي انتي اصلا ديما ادافعي عليه
صالح: سكر فمك وتو يبانلك علي ادير فيه.
خالد: علي شنو تتعاركو؟؟؟
فارس: اميرة قالت انها موافقة عليا ياخالي ناض حسان يلقح
خالد التفت لاميرة: حقا موافقة علي ولد عمتك يابنت
اميرة: اه.....معاش عرفت شن تقول ونزلت راسها اي موافقة
حسان كان يغز علي سنونه وكان عارف ان اميرة وافقت عشان بس تقهره...ورويدة كانت واقفة بعيد عليهم ودموعها في عيونها...علي حبها اللي ضاع من بين ايديها
صالح: توا تركب لسيارتك وتروح والله ماعاد قاعد فيها
حسان: بس يابوي
صالح بعصبية: ماتناقشش توا قتلك اني
&&&&&&&&&&&&&&&&&&&
وفات باقي النهار في المزرعة ...وروح حسان علي طول بعد ماحلفله بوه... والصبح بدري روحو العيلة ورويدة كانت امصدعة ومرهقة لانها طول الليل مارقدتش....ركبت مع بوها بدون لاسلام لاكلام...واتقسمو الباقي بين السيارتين....
وصلو للحوش رويدة غيرت حوايجها وركبت في سيارتها وامشت لشغلها لانها كانت تبي تهرب من جو الحوش..
رويدة: صباح الخير
اريج متفاجأة من شكل رويدة: صباح النور... خيره وجهك هكي
رويدة: مرهقة شويا...اطلبيلي قهوة
اريج: اوكي تو نمشي انديرها بروحي وتحكيلي شن فيك؟؟؟
نحت رويدة نظاراتها وقعدت تبكي... خشت عليها اريج وحضنتها وهي ساكتة لانها عارفة شن فيها
رويدة: نحس في روحي مقهورة ياروجي كيف بنتحمل نشوف حبيبي مع اختي كيف والله مش قادرة نتخيل الموضوع
اريج: باه اعترفيله بحبك وريحي راسك
رويدة: مانقدرش... امس طلبها رسمي واميرة وافقت
اريج: شنوووو؟؟؟؟ والله هالفارس حسه كسرلي رقبتي معقولة اعمي للدرجه هاذي وماحسش بحبك ليه
رويدة: فارس لقي في اميرة اللي مالقاشي فيا يااريج
اريج: خرفي شن اللي بيلقاه فيها ومش فيك...انتي طيوبة واحنينة وفارس عندك بالدنيا وتخافي عليه اكثر من نفسك ...شن مازال يبي؟؟؟
رويدة: اتاري في بعض الشباب هالشي مش مهم عندهم...العقل والرزانة ماتشدهمش زي الهبال والطيش...ومعيارهم للحب غير ...شكلي اني وانتي تفكيرنا دقة قديمة
اريج: فارس اعمي بجد اعمي
رويدة: بنطلعه من قلبي يااريج.بنطلعه خلاص هو بيولي راجل اختي...لازم ننساه... وهي قعدة تتكلم رن تليفونها وكان فارس... فسكرت عليه بالحمرا وزادت في البكي
&&&&&&&&&&&&&&&&&&
وفات اسبوع وفارس طلب اميرة رسمي من خاله....واميرة معاش قدرت ترجع في كلمتها وحسان قريب يطير لانه فارس بياخد منه اميرة واخيرا حس بحبه ليها بس ماقدرش يدير شي لانه بوه حيقتله لو حاول يفركش الموضوع...
رويدة كانت تبعد علي فارس بشويا بشويا بالرغم من انه كان بينجن لانها تغيرت معاه...بس كان يحساب ان في حد في حياتها عشان هكي بعدت عليه وهالشي كان مضايقه...
اميرة مقعمزة في الجنان علي خشت فارس من برا....ولماشافها قرب جيهتها: السلام عليكم
اميرة: وعليكم السلام
فارس قعمز ع الكرسي: اميرة امتي تبي نديرو البيان؟؟
اميرة" ياعليك دراه كبد كيف بندير ياربي شكلي تورطت معاه"
فارس: اميرة نكلم فيك؟؟
اميرة: مانعرفش خلي نأجلوها
فارس: وعلاش التأجيل...اني واتي من كل شي وكان ع قرايتك حنخليك تكملي
اميرة: هكي خلينا نأجلو وخلاص
فارس تنهد: باه... في حوش مرة رسمته مع رويدة وعجبني شن رايك نوريهولك ولو عجبك حنشري قطعة ارض ونجيب مقاول ونبدا نبني فيه
اميرة" اوووووف عليك نفخ": خلاص يافارس قتلك اجلها وامشت وسيباته
فارس: خيرها هاذي تعامل فيا هكي...
ركبت اميرة لحوشهم وخلوقها ضايقة... فتحت الدار وارتمت ع السرير: اوووووف
رويدة كانت مقعمزة عندها شوي شغل ع اللاب توب : خيرك تنفخي
اميرة: فارس ينق عليا يبي انديرو البيان بسرعة
رويدة ايديها جمدو ع الكيبورد...اميرة: علاش مستعجل مش عارفة
رويدة في خاطرها" انسيه يارويدة انسيه انسيه انسيه"
اميرة: رودي حايرة شوري عليا؟؟؟
رويدة:اه....شن قلتي
اميرة: زعما تصرفي كان صح لما وافقت..
رويدة شافت لاختها باستغراب: علاش انتي مش مقتنعة بيه
اميرة: اه...لا لا مقتنعة... وطلعت من الدار
ضرب تليفون رويدة وكان فارس ماردتش عليه وهي تكابر...بعتلها مسج" دودة محتاجك يادودة"
رويدة خافت ان فارس يكون فيه شي وزي المجنونة نزلت لحوش حناها...وخشت لداره بدون حتي ماتخبط لقاته مقعمز ع السرير وحاط ايديه علي راسه
رويدة: فارس خيرك؟؟؟
فارس رفع راسه لما شافها وابتسم: شي مستاحشك
رويدة تحشمت: خزي عليك انت وطروحك وجت بتطلع شدها من ايدها: دودة حرام عليك علاش متغيرة عليا
رويدة ارتبكت : حتي انت يافارس شن بيغيرني عليك يعني
فارس: لا متغيرة..قبل ديما تسألي عليا وحاس بيك جنبي... اما توا لا
رويدة: بصراحة نبيك تاخد علي قلتي...خصوصا عاد قريب تتزوج شن بنقعدلك ديما هههههههه" كانت تضحك وقلبها بيتقطع من داخل"
فارس: حتي لو تزوجت يادودة انتي غير..حقا خاطرها ع الزواج...تذكري الحوش اللي مرا درناه نبي ناخده منك قلت لاميرة عليها وبنبنيهولها
رويدة فتحت عيونها علي وسعهم تقول عطاها كف...وبهستيرية: انت شنو انت شنو ماتحسش حرام عليك يااخي حرام عليك وطلعت تجري من الدار وفارس مستغرب ومش فاهم شي....رويدة " معقولة يافارس الحوش اللي كنت نحلم نكون فيه اني وياك حتي هوا بتاخده مني زي حبك معقووولة"
حسان اتصل بأميرة: ايوه يافرخة
اميرة: نعم شن تبي؟
حسان: دبري راسك فركشي الموضوع انتي وهالاعور احسنلك يااميرة
اميرة: وعلاش انت شن دخلك
حسان: لاني.... لاني....لاني نحبك يافرخة باهي نحبك...ومانتحملش هالوحش ياخدك مني
اميرة.........
حسان: ردي عليا
اميرة: شن بنقول ؟؟؟
حسان: مادخلنيش فيك والله تاخديه نقتلك يااميرة
اميرة: شن هالحب العنيف متاعك هاذا
حسان: هاذا اللي عندي كان عاجبك
اميرة ابتسمت فرحانة ان حسان اخيرا اعترف بحبه...بس اتذكرت فارس وكيف بترفضه بعد ماقالت لبوها موافقة
&&&&&&&&&&&&&&&&&&
حدد فارس موعد البيان مع خاله ....واتفقو يخلوه بيان وفاتحة بالمرة
رويدة في الصبح تجهز في روحها للعمل حست بدوخة بسيطة فقعمزت شويا لين مشت الدوخة وبعدين كملت باقي لبسها وطلعت
انتصار: رويدة تعالي افطري
رويدة: ماخاطريش ياماما تو نفطر في العمل
خالد: حقا بعد غدوة بنقرو فاتحتك اختك ان شاء الله اتفقت اني وفارس...لو في حاجة ناقصة قوليلي عليها انتي وامك من توا
رويدة نزلت راسها بحزن: اوكي حاضر...
ركبت رويدة سيارتها وحاسة بغصة في قلبها شافها فارس طالعة بيلحق عليها ماقدرش...بعتلها مسج" صباح الخير يادودة"
رويدة شافت المسج و رمت النقال علي طول ايدها وكملت سواقتها... وفجأة حست بغمامة علي عيونها درست ع اليمين ومعاش قدرت تقيم راسها والدنيا ظلمت في عيونها وغابت عن الوعي...
فاقت رويدة وهي في المستشفي وفارس جنبها ومتوتر وخايف
رويدة: أني وين؟؟؟
فارس: ماتخافيش شكلك تعبتي شويا...وغبتي عن الوعي فواحد من اللي لقوك اتصلو باخر رقم وكان اني فكلموني....ومعاش نندري علي روحي لين وصلت فيك وجبتك اهني المستشفي
رويدة: كلمت بابا وماما؟؟؟
فارس: لا والله نتصل بيهم
رويدة: لا خلاص ماترعشهم ....شن قال الدكتور
فارس: قالو بيديرولك شوي تحاليل...وصورة ع الراس عشان يطمنو
رويدة: اوكي
ودارو لرويدة الصورة والتحاليل وقاله الدكتور ان النتيجة حتطلع بعد يومين...
روح فارس برويدة معاه في السيارة.وكانت متكية ع الكرسي : شن نجيبلك حاجة تاكليها دودة؟؟؟
رويدة: ماخاطريش
فارس: عشان خاطر فروسة باه
رويدة ابتسمت: باه.....وقف فارس علي مطعم وجابلها هامبورغا وعصير... عطاهولها وهي قعدت تاكل وهو يشوفلها ومبتسم
رويدة انتبهتله: خيرك تشوفلي هكي ؟؟؟
فارس: هههههههه شي يادودة...هيا خلي نروحو
&&&&&&&&&&&&&&&&&&
بعد يومين جي يوم قراية الفاتحة وخالد وصالح عزمو ناسهم واحبابهم....وكانت لمة كبيرة
رويدة عزمت صاحبتها اريج تبي حد يوقف جنبها ويواسيها في اليوم هاذا بالذات
كانت الفاتحة تحت في حوش الحاجة امنة واللمة كلها عندها....
رويدة كانت تجهز مع امها ومرت عمها وصاحبتها وكانت اريج معاهم هي وسارة .
اريج: ربي حيعوضك خير صدقيني رودي
رويدة ماردتش ولاكلمة وكانت توتي وتجهز وهي ساكتة تقول تبكشت... وكانت من الصبح وهي ساكتة
خالد: هيا وين الغدي خلي يتغدو والشيخ يكتب العقد
الحاجة امنة: هيا يابنات بسرعة خفو روحكم
طلعو المقاعد للتريس وتغدو...ووقت بيقرو الفاتحة طلب الشيخ ضروري بيسمع موافقة العروس
انتصار: اركبي نادي اختك يارويدة..
ركبت رويدة هي واريج وقلبو الدنيا ومالقو حد... كل اللي لقوه رسالة مسيبتها اميرة علي سريرها
نزلت اميرة تجري وعطت الرسالة لبوها اللي يستني في اميرة عشان يخش هو وياها للشيخ... فتحها وقراها" بابا سامحني والله مانقدر نتزوجه اصلا اني،مانحباش ولانقدر نعيش معاه ولانطيقه وكانت موافقتي عليه غلط في غلط ومس عارفة شن جاني...بابا ماتخافش عليا امشيت مع حسان "
خالد خبط راسه : حي ع العار حي ع العار هالبنت بتواطي راسي
فارس جي بيشوف خاله علاش طول : هيا ياخالي الشيخ يستني واستغرب لما شاف الكل متوتر... شاف الورقة في ايد خاله وقراها وانصدم صدمة عمره....كان متفاجئ ومصدوم كأنه يحلم في حلم مرعب ويتمني حد يصحيه منه
قعمز ع الكرسي لان رجليه معاش حملوه وفجأة ضرب تليفونه....وكان دكتور رويدة: ايوه يااستاذ فارس للاسف الانسة رويدة طلع عندها ورم خبيث في راسها
فارس توسعت عيونه وقعد يشوف لرويدة والتليفون علي وذنه: 0_0
