بنات المنشاوي 💚 الجزء الثالث

بارت ٢٣

بقلم خلود وائل 🌻
نغم بتوتر شديد : ح_ ح_ حمزاااة
اقترب حمزة بضع خطوات بحيرة وارتباك نحوها ثم توقف علي مقربه منها مردفا بدهشه : ايه ال مطلعك هنا في نص الليل وايه ال كنتي بتعمليه دة انتي هبله
نغمه بحدة : انت ال بتعمل ايه هنا وايه اصلا ال يخليك تستخبي ذي الحراميه وتتفرج عليا وكمان جاي تزعقلي
حمزة بدهشة من موقفها الهجومي : انتي جرا لمخك حاجه حراميه ايه ال استخبي ذيهم واتفرج عليكي و اه بزعقلك واطلع عينك كمان مش المفروض انك نايمه من ساعتين فاتو
نغم ببرائه لا تتلائم مع الموقف وهي تهز كتفيها : مجاليش نوم
اقترب بضع خطوات اخري مردفا باعتياديه : مجالكيش نوم تقومي تطلعي تتنططي علي السطح مش خايفه يلبسك عفريت
نغم : ربك الحفيظ انا مصليه ومحصنه نفسي بالاذكار خاف انت علي نفسك
حمزة وهو يمرر اصابعه في خصلات شعره الغير مهندمه : ال هناك دي ساندويتشات
نغم : بعينك لو دوقتهم انا عرفاك طفس
حمزة: يعني هشرب مج السحلب من غير ساندويتش تعالي بس ربنا يهديكي دة انا واقع من الجوع
انهي جملته وهو يسحب كرسي ويجلس بعدنا وضع الكوب الخاص به علي الطاوله وامسك بساندويتش وبداء بتناوله
نغم بتذمر : يابني دة أكلي انا بلاش طفاسه وبعدين انا مسمحتلكش تقعد اصلا قوم اتفضل وريني جمال خطوتك
حمزة : ايه رأيك ناخد هدنه ساعتين بس عما أكل واشرب السحلب بمزاج وافهم منك كميه المفاجأت ال بتفاجئيني بيها الفترة الأخيرة ولعلمك اصلا دة مكاني انا ال طول عمري بسهر فيه من وانا في ثانويه عامه
نغم وهي تجلس علي كرسيها : اممم الكرسي الكحيان ال هناك دة بتاعك انت
حمزة وهو ينظر ناحيه كرسي بأحدي الأركان : اه بتاعي انتي ايش فهمك بقي الكرسي بتاعي ال معاه زكريات ياما ليا ترميه كدة
نغم : ياشيخ اتلهي دة كان مليان تراب
حمزة بأعجاب وهو ينظر حوله : حلو الديكور دة عملتيه امتي شكلك كدة واخدة علي المكان
نغم وهي تمسك بكوبها وترتشف منه قليلا : من اول ماجيت وانا طلعت عاينت المكان هنا وطلعت الكرسيين والطرابيزة وظبط القعدة والكرسي بتاعك حطيتهولك هناك ذي منتا شايف ولو حبيت تطلع يبقي في الركن البعيد الهادي بتاعك بعيد عني فاهم
حمزة : قلب قاسي وجرح احساسي دة انا اخوكي بردو
احترقت من الداخل بسبب كلمته الأخيرة ثم اردفت بنبرة يشوبها الأختناق : لا مش اخويا انت ابن خالتي وانا أحل ليك
حمزة : ماشي ياستي بس انا معتبرك اختي الحنينه ال هتسيبني اققعد هنا في مكانها وهتعفو عني في باقي الطلبات ال لسه
نغم : دة بعينك
حمزة : كفايه بقي يانغم والله انتي مرمطي ال جابوني
نغم : انا لسه عملت حاجه
حمزة : ماشي .... وانتي بقي مبتخافيش تقعدي هنا لوحدك
نغم : لا خالص لما بكون قلقانه ومش جايلي نوم بطلع هنا واوقات كتير بقعد اذاكر هنا بردو بصراحه المكان هادي ومريح وفكرة أني لوحدي ومحدش شايفني غير ربنا طب دة انا مرة صليت قيام الليل هنا وفضلت اقراء قرآن وحقيقي كانت ليله من احلي ليالي عمري
حمزة بأبتسامه : بقيتي شيخه ذي محمد ولا ايه
نغم وهي تعقد حاجبيها : ايه علاقه العبد بربه بالمشيخه علي فكرة انا مش ملتزمه ذى منتا فاكر بس بجاهد مع نفسي أني اققرب من ربنا وانول رضاه وببعد عن اي فتنه ولو بسيطه
حمزة : وعلشان كدة كنتي بترقصي باليه صح
نغم بثقه:الباليه مش حرام دة فن وانا مكنتش برقص قدام حد او حتي علي معازف لو اخدت بالك دى كلمات بس وانا بتحرك معاها بأيقاع من دماغي يعني في عالم تاني لوحدي
حمزة : بس بصراحه بترقصي حلو
نغم بحدة والخجل يكسو وجنتيها : انت بني آدم مش متربي
حمزة : يابت اتهدي بقي مش كان فن الوقتي وبعدين انا مقصدش المعني القذر الىفي دماغك قصدي يعني انك محترفه ومتمكنه من الحركه انا فكرتك هتدوخي وتقعي وعلشان كدة ندهت عليكي
نغم بفرحه داخليه: خفت عليا ؟
حمزة : اكيد ياغبيه شكلك وسرعتك كانو يقلقو اصلا
نغم بأبتسامه عريضه : لا متقلقش انا خبرة
حمزة بفضول : بس انا بجد نفسي افهم انتي اذاي كدة
نغم بأستغراب : كدة ال هو ايه مش فاهمه
حمزة : يعني انتي حياتك محدودة بحكم انك بنت صعيديه لا بتخرجي ولا بتروحي اماكن عامه قصدي يعني مفيش في حياتك اختلاط بس اجتماعيه وكل الناس بتحبك وشاطرة في دراستك وبتلعبي سكيتز وعندك وفاء فظيع لصحبتك المتوفيه
نغم : الله يرحمها
حمزة مكملا بأعجاب : وفوق كل دة عندك نشاط وحيويه يهدو جبل وبترقصي باليه انا بجد مش مصدق ولا مستوعب
نغم : انا ليه حاسه بنبرة اهانه في كلامك
حمزة : والله انتي جبله ومبتحسي اصلا بقي انا قاعد امدح فيكي من الصبح ودى حاجه عمرها محصلت ولا عمري كنت اتخيلها اصلا وجايه تقوليلي حاسه بأهانه يشيخه عنك ماحسيتي
نغم : لم لسانك الطويل ياحمزة لقطعهولك
حمزة : ولن ملميتهوش
نغم : مابلاش
حمزة بغرور: ياجبل مايهزك ريح
نغم : ريح يأنبك
حمزة : اللهم طولك ياروح انا عارف والله ان في حاجه غلط من ساعه ماطلعت اهو انتي كدة نغم ال اعرفها
هدات قليلا ثم نظرت امامها متذكرة نصائح هايا ثم هتفت بنبرة ناعمه : زمان وانا عيله صغيرة تقريبا وانا عندي حوالي خمس سنين كنت بتفرج دايما علي كرتون البطله فيه باليرينا وكانت عاوزة تقدم في مدرسه للباليه و قصه طويله كدة فأنا اتعلقت بيه جدا وبقيت اققلدها وافضل اققع كل شويه وشبط جامد في أني اتلم باليه فبابا ربنا يخليهولي قلب البلد علي مدرسه باليه ملقاش فضل يدور في المركز كله والمحافظه تقريبا لحد مالقي مدربه بتعلم الاطفال الباليه وخلاها تجيلي البيت مخصوص كل يوم ومرضييش يوديني معهد وفضلت اتعلم باليه لحد مابقي عندي ١٢ وقتها بابا شاف أني كبرت علي لعب العيال دة وانا اتحرجت اطلب منه أني اكمل بس فضل عندي شغف جامد ناحيه الباليه وبقيت اتعلم حركات جديدة من اليوتيوب واتمرن مع نفسي في القصر والسطح كان انسب مكان ليا وهو مكان تعليمي لكل هواياتي
حمزة : هواياتك !!
نغم : اها انا مليانه هوايات يابني والأسكيتز بردو اتعلمته واتمرنت عليه علي السطح وابتسام الله يرحمها هي ال كانت بتشاركني الهوايه دي واتعلمناها سوا
حمزة : بجد انا معجب اوي بعلاقتكو سوا
نغم : لو كنت شفتنا مع بعض كنت هتفتكرنا اخوات مش اصحاب انا عمري متوجعت في حياتي ذي مااتوجعت علي فراقها
حمزة : هو فعلا الحادثه ال حصلتلك كانت بسببها
نغم : لا طبعا دة قدر ربنا وهي ملهاش اي ذنب انا ال اتعديت علي حرمه المقابر مش اكتر
حمزة: ليه حاسس ان فيكي حجات كتير معرفهاش
نغم بفرحه : اذاي
حمزة : يعني حاسك شيخه كدة مع انك بتشاكلي طوب الأرض
نغم : طب لم نفسك لتاني مرة ياحمزة
حمزة : انا جيت جمبك بت انتي مهبوشه
نغم بتنهيدة : انما للصبر حدود
تناول الاثنان الساندويتشات وظلو يتبادلون اطراف الحديث بمرح حتي صدع صوت آذان الفجر
حمزة وقد اتسعت عينيه دهشه : ياخبر ابيض الفجر !!!
نغم : الله اعظم والعزة والدوام لله انا مش مصدقه والله
حمزة : اذاي محستش بالوقت دة كله معاكي
نغم : لا وكمان منعستش
حمزة : يلا بينا ننزل بسرعه علشان الصلاه وكل النايمين زمانهم صحو
نغم : يلا
هبط كلاهما للأسفل ثم اتجهو لغرفهم بينما هرولت نغم للسرير مسرعه توقظ هايا
نغم : هايا هايا هايااااا
هايا بفزع : ايه ايه في ايه
نغم بسعادة عارمه : قومي احكيلك ال حصل
هايا بقلق : ايه حد حصله حاجه
نغم : قلبي قلبي ياهايا ال حصله
هايا بقلق عليها : ماله قلبك اطلبلك دكتور
نغم وهي ترتمي بجوارها : قلبي صابه العشق ياهايا وكول الليل سهران دايب في هواه
هايا بغيظ : منك لله انتي و قلبك وهواة حسبي الله ونعم الوكيل فيكو
نغم : براحه ياختي قومي وفوقي كدة احكيلك ال حصل
هايا : اسفوخس عليكي مش عاوزة اعرف اوعي من قدامي اققوم اصلي اوعي
نغم : ياهايوو استني بس اققولك
هايا وهي تهبط من السرير : كلمه كمان هضربك بالشبشب  
__________________________________________
  اشرقت شمس الصباح ومضي اليوم بسلاسه ثم انقضي وعادت الفتيات من الجامعه برفقه حمزة وبعد قليل عاد يونس من عمله ثم بدل ملابسه سريعا وغادر الفيلا بسيارته برفقه اخيه اما عن آيه وسيف فقد ارتدو ملابسهم استعدادا للخروج سويا لتستوقفهم هايا : رايحيين علي فين وسايبين هايا
سيف : مقدرش اسيب حبيبه قلب بابي لوحدها معاكي نغم لحد مانرجع واخواتك مش هيتأخرو
هايا : انا ونغم بنجهز الجنينه برا عما يونس يجي
آيه : منال تعبانه شويه هنروح نتطمن عليها ونشوف خالتك ونيجي بأذن الله
هايا : يعني هتروحو لمنال وكمان لخالتو لا دة انا لازم اجي بقي مليش دعوة
سيف : لا ياحبيبتي احنا هنتقابل عند منال
هايا : خلاص برائه المرة دى  سلمولي علي منوله وعلي النونات بتوعها
آيه : يوصل ياقلبي
_____________________________
في شقه منال كانت تجلي هناء شاردة بأحدي الغرف برفقه ورد
ورد : ايه ياهناء مالك يابنتي من ساعه ماجيتو وانتي مبلمه كدة زياد مزعلك ولا ايه
هناء : ياريت الدنيا كلها ذي زياد وحنيته ياورد
ورد : طب امال في ايه
هناء : فيروز
ورد بقلق : مالها
هناء : مطلعه عيني ودايما حابسه نفسها في اوضتها وان خرجت يبقي للشغل وبس وحتي جلساتها مع الدكتورة بتاعتها بطلت تروحها وكل يوم حالتها بتسؤ عن اليوم ال قبلها
ورد بحزن : ليه بس كدة مكانت اتحسنت وبقت كويسه
هناء : اول امبارح نزلنا مع يوسف نختار عفش شقتهم وكان يوم ما يعلم بيه الا ربنا
ورد بقلق : حصل ايه
هناء : طول الخروجه مادة بوزها مترين ومبتتكلمش وكل مايوسف يقف معاها علي جنب تسيبه وتيجي تقف وسطنا يسألها رأيك ايه تقوله ال تشوفه ال يعجبك هاته مفيش حتي ابتسامه علي وشها ذي متكون نازله غصب عنها وزي متكون ليه مهي فعلا نازله غصب عنها
ورد وهي تربت علي كتفها : طولي بالك ياهناء وحدي الله كدة
هناء بدموع : لا اله إلا الله .. انا. تعبت ياورد نفسي افرح بيها واشوفها سعيدة ومرتاحه نفسي اموت وانا متطمنه عليها
ورد : بعد الشر عنك اهدي ياهناء ايه ال بتقوليه دة
هناء : انا عارفه انها مبتحبوش بس لو تديه فرصه وتفتحله قلبها هتحبه والله هتحبه وتريح نفسها وتريحنا معاها
ورد : بلاش تضغطي عليها اكتر من كدة ياهناء انتي عارفه انها مش مرتاحه معاه يبقي شيل دة من دة يرتاح دة عن دة
هناء : يوسف بيحبها ياورد وفوق كدة هو محترم وبيصلي وهيتقي ربنا فيها وهبقي متطمنه عليها معاه واهو ابن عمتها وعارف تعبها وهيفضل جمبها
ورد : غلط تفكيرك دة كله غلط
هناء : غلط علشان بفكر بعقلي حطي نفسك مكاني هفضل ماشيه وراها لحد مايبقي عندها كام سنه فيروز مبقتش صغيرة ياورد دى عندها ٢٧ سنه
ورد : وكان فين عقلك وانتي مموته نفسك علشان عاصم يجوزك زياد ولا الحب الوقتي بقي مش مهم
هناء : الظروف تختلف ياورد
ورد : الظروف هي هي متغيرتش بس انتي ال بتضحي براحه بنتك علشان يفضل زياد ورنا كويسين مع بعض ياحبيبتي افهمي دى بنتك ومش هتتحملي تشوفيها مش مرتاحه وكلنا عارفين ان فيروز مبتحبش يوسف وانتي عارفه كويس انه عصبي ومعندوش اي طاقه للتحمل وفيروز عمرها مهتتحسن وهو مش عارف يحتويها يا هناء الاحتواء مش بس كلمه حلوة وطبطبه الاحتواء حنيه وصبر وطوله بال وابتسامه حلوة تطمن و كلام كتير اوي يشجع ويرفع المعنويات وانا مش هفهمك الكلام دة وبصراحه بنتك قالتلي بالنص كدة انها عمرها مشافت من يوسف غير سخريه واستهزاء
هناء : دة راجل وطبيعي ميكونش ليه خلق لدلعها دة
ورد : انتي عايزة تجننيني يابنتي ان مكانش يستحملها مين هيستحملها طب وافق يتجوزها ليه اصلا وهو عارف بتعبها يابنتي ال يرضي بوضع هو عارف اوله يبقي عيل لما يخلع من اخره
هناء بتنهيدة : ال يهمني مصلحتها ياورد
ورد : دي حياتها هي لو بجد عاوزة مصلحتها يبقي سانديها في اي اختيار تختارة حتي لو علي حساب خسارتك لحد تاني صدقيني الخواطر لما بتنكسر بيكون صعب اوي تتجبر تاني
هناء بأبتسامه : حاضر.... ادعيلها ربنا يهديها
طرقت منال الباب ثم دلفت
منال : ياايها القوم نرجو الغاء اجتماع القمه علشان خالتو آيه وزوجها القمر سيف برة
ورد : عيب يابنتي لو عز سمعك هتبقي حركه وحشه
منال : عزوز دة بقي قمر القمرات
ورد : شفتي الاختيار الصح عامل اذاي
هناء : الله اكبر يختي صلي على النبي هتحسدي البت
ورد بقهقهه : عليه افضل الصلاه والسلام
اتجهو سويا لمقابله سيف وآيه ثم جلسو يتسامرون
منال : علشان خاطري يابابا قوله يمكن يسمع كلامك
عز : لا يعني لا قولا واحدة يامنوله
عاصم : يابنتي عز عنده حق شغل ايه ال تنزليه ببطنك دى
عز : لا وكمان عاوزة تصوم ياعمي ينفع كدة
زياد : لا طبعا مينفعش يامنال ربنا من عليكي بتؤام ياحبيبي يبقي لازم ترتاحي في البيت شويه وكنان معاكي رخصه تفطري رمضان
منال : علي فكرة بقي شغلي برة اسهل بكتير من شغلي في البيت من تنظيف وطبيخ
عز : ياشيخة اققعدي دة انا من يوم مااتجوزتك وانتي عندك هبوط حاد ونايمه علي الكنبه ال هناك دي وانا ال بشتغل
منال : بقي كدة طب والله لخلي الاطفال ال في الحضانه يجرو وراك ياعز
عز مشاكسا : مش كفايه المس بتاعتهم ملففاني حوالين نفسي
قهقهه الجميع علي مرحهم المعتاد ثم اردفت آيه : امال فيروز مجتش معاكي ليه ياهناء
هناء : فيروز ياستي معتزله العالم بال فيه ومعتكفه في البيت
عز : الله مش الاعتكاف دة في العشرة الأواخر ولا فيروز بتاخد الثواب من بدري
منال : لا دمك خفيف تصدق
عز وهو يهندم ياقه قميصه : كلهم بيقولولي كدة
عاصم : لا وواثق من نفسه الواد
منال : شفت يابابا ولا هامه وجودك
عز : الله الله ليه بس كدة دة انت علي راسي ياابو النسب
عاصم : يابني متقوليش ياابو النسب دى تاني
ورد : ذنب ناس بتخلصه ناس
زياد بقهقهه : اه والله ياام محمد
قهقه الجميع قليلا ثم اردف سيف : متكلم محمد يروح للشباب الڤيلا يساعدهم النهاردة بيعملو كراتين رمضان
آيه : بعد اذنك ياابو فيروز لو ينفع تكلم فيروز ومحمد يعدي عليها وتروح معاه واهي تغير جو مع نغم وهايا
انهت حديثها وهي تنظر لهناء فهتفت براحه : ياريت هي ترضي
زياد : انا هكلمها واكيد هترضي هي بتعز البنات جامد
ورد بهمس لهناء : شطورة كدة خليها تفك عن نفسها
آيه بهمس: هي عامله ايه الوقتي
ورد : احسن الحمد لله
آيه : اتصالحت مع خطيبها
هناء : اه ربنا يهديهم
آيه : يارب
___________________________
عارفه والله ان البارت قصير وكمان بتأخر في التنزيل وليكم عندي بارت زيادة 💙🏃🏻‍♀️بس انتظروني هعوضكو بكرة بأذن الله ♥️ واسفه بجد اني بتأخر اليومين دول في الرد عليكو متزعلوش مني ياقمرات 💓💓😘ڤوت وكومنت بقي العوض جاي متقلقوش 🙈🔥😂😂😂😂😂