بنات المنشاوي 💚 الجزء الثالث

بارت ٥١

بقلم خلود وائل 🌻
اشرقت شمس صباح اليوم التالي وهو اليوم الملئ بالكثير من الاحداث التي ستغير مجري حياه البعض ومنهم نغم التي هبطت للأسفل وغادرت للجامعه برفقه حمزة الذي يرمقها بنظرات تحمل الأعجاب وقليل من المشاحنه مما فعلته أمس
نغم : مالك بتبصلي كدة ليه من ورا النضارة
حمزة وهو ينظر للطريق امامه : انا كلمتك يابنتي
نغم : ماشي خد راحتك
حمزة : مش عايز اصدمك بس راحتي قاعدة جمبي اهي وواخدة تروح الامتحان
نغم بفرحه داخليه شديدة : مش واخد بالك انك عايش الدور اوي وممكن تحبني بجد
حمزة بأبتسامه جانبيه: وهفضل اعيش الدور واحبك حب تاني فوق الحب ال بحبهولك بس انتي تصدقيني
نغم بخجل : ابتديت اصدقك
حمزة : امم ياشيخه يعني انتي مش ميته في دباديبي
نغم : ايه ياعم انت فاكر نفسك تامر حسني
حمزة : لا طبعا انا احلي منه
نغم : طب نتكلم بعقل شويه
حمزة : ياريت
نغم : هستناك النهاردة في المكان بتاعنا محتاجه اتكلم معاك في موضوع مهم
حمزة بسعادة : طب متقولي انا سامعك
نغم : لا مش هينفع الوقتي انا اصلا متوترة من الامتحان خليها بليل لما ترجع من شغلك
حمزة : انا احتمال أتأخر النهاردة اديني فكرة عن الموضوع ال عوزاني فيه
نغم : لا خليها مفاجئه
حمزة بابتسامه: ال تشوفيه
دقائق وتوقف بها امام الجامعه وهبطت من السيارة ثم دلفت للداخل بينما لم يغادر هو حتي اختفي اثرها من مرمي رؤيته
____________________________________
امام باب السجن ووسط حراسته المشددة كان يقف جلال وبرفقته الكثير من الحراس والعربات الفارهه ينتظر خروج فراج فاليوم هو موعد خروجه من سجنه الذي دام لسنوات طويله وهاهو الباب يفتح وهو يدلف من الداخل ويخطو اولي خطواته ببرود وقسوة تملاء ملامحه
جلال وهو يفتح ذراعيه : كفارة ياباشا
فراج : اهلا ياجلال
جلال : اتفضل يافراج بيه ارتاح في عربيتك
دلف فراج لداخل سيارته الفارهه وجلس بجوارة جلال وانطلق بهم السائق وتبعهم الحراس بالسيارات الاخري
فراج : وصلت لحد فين دلوك
جلال : كله ماشي في التمام والمظبوط انا مش عايزك تشيل هم حاجه انت بس تقعد تتفرج
فراج: ظبت الورقات ؟
جلال : هو انا تلميذ ياباشا عيب منك الكلام دة .. انت الوقتي تشرف قصرك وترتاح ومن بكرة تروح تحرق قلب ابن الحديدي
فراج بحقد : لاه دلوك
جلال بتعجب : طب مش ترتاح الأول
فراج : راحتي في شوفته مكسور وراكع تحت رجلي
جلال بقهقه شريرة للسائق : اطلع بينا علي مصر
فراج بتوعد : هانت ياآيه
______________________________
علي الهاتف 📱📱
يونس بأنفعال : مش فاهم هتفضلي تنيميني كدة لحد امتي
فيروز بحزن : انت بتزعقلي ليه يايونس
يونس بضيق من انفعاله : انا مبزعقش بس انتي ال مش عايزة تفاتحي بباكي في موضوعنا مع انك اخدتي وقت بما فيه الكفاية
فيروز : لسه مش لاقيه فرصه مناسبه
يونس : خلاص أكلمه انا
فيروز : في ايه يايونس انت بتعاملني كدة ليه
يونس : بعاملك اذاي مش فاهم
فيروز بحزن : طيب خلاص براحتك مع السلامه
يونس : استني هنا بقي انا سايب ال ورايا وال قدامي وبكلمك وانتي تقوليلي مع السلامه
فيروز بأنفعال : عاوزني اعمل ايه منا مش فاهمه انت اتقلبت عليا ليه كدة
يونس : علشان شفته بيبصلك امبارح ياهانم ومرفعش عنيه من عليكي وانا وقفت مكاني ذي الغبي ومقدرتش افهمه انك تخصيني ومش من حق اي حد يبصلك اصلا
فيروز بعدم استدراك لما يرمي اليه : هو مين دة ال بيبصلي
يونس بغيرة عمياء : ال كان خطيبك
فيروز بتعجب : انت بتغير عليا
يونس : متصطبحي يافيروز انني شيفاني سوسن ولا ايه امال بغير علي حمزة اخويا
فيروز بضحكه ناعمه: طب انا ذنبي ايه هو ولا في دماغي اصلا انا مش شايفه غيرك
يونس : بس هو شايفك ولسه عندة امل فيكي وهيفضل كدة طول ماانا مأخدتش خطوة رسمي وحضرتك نايمه في الخط وشكلي هفضل مستني كتير
فيروز : يونس احنا مبقلناش اسبوع راجعين من البلد بجد انت بتضغط عليا اديني فرصه امهد لماما حتي
يونس بتنهيدة : متطوليش يافيروزة علشان صبري ليه حدود وبصراحه اتعداها معاكي
فيروز : كتير عليا الحب دة علي فكرة
يونس : لو بأيدي كنت خبيتك جوة قلبي وخليته يحكيلك كل ال شايله ليكي لكن هعمل ايه حكم الست فيروز
فيروز: وفيروز بتحكم عليك انك تروح تشوف شغلك ومتفكرش فيها اكتر من كدة علشان غلط عليك
يونس: غصب عني ومهما حاولت أنتي في تفكيري كل دقيقه وثانيه و صورتك وانتي بتضحكي ومكسوفه هي ال بتهون عليا تعب اليوم كله
فيروز : ربنا يخليك ليا
يونس : ربنا يديم نعمه وجودك في دنيتي طول العمر
فيروز : يارب... سلام بقي بدل ماتتاخد مخالفه
يونس : ماشي لازم اشوفك قريب علشان بجد مش عارف اشتغل
فيروز : هتشوفني وانت بتقراء فاتحتنا
يونس وهو يغمض عينيه بتخيل لتلك اللحظه : بأذن الله ياقلبي
اغلق الخط معها ثم عاد لمزاوله عمله وبعد قليل دلف حمزة لمكتبه وجلس برفقته
يونس : وصلت لحاجه
حمزة بجديه : انا جاي من الشؤون وقسم الحسابات عليك علي طول احنا موقفنا سليم مفيش غلطه واحدة وتيم عمل اتصالاته مع حبايبه ال في المينا
يونس : ها وبعدين
حمزة : لا دة البعدين فيه كتير اوي بص ياسيدي في محامي اسمه جلال صفوان قنديل مدعوم من طرف مجهول ماديا تمام
يونس : دخله ايه الراجل ده بموضوعنا
حمزة : هو دة موضوعنا اصلا الراجل دة هو ال معطل شغلنا وبيعمل مشاكل في كل شحنات الشركه سواء استيراد او تصدير بطرق ملتويه يعني متقدم في المجموعه بتاعتنا شكاوي بالهبل ان الفاكهه والخضار غير مطابقه للمواصفات القياسية وانها مسرطنه و و و وو وخد من هنا لبكرة بلاغات دة غير انه بيدفع مبالغ مهوله لتعطيل خروجها ودخولها المينا وبالتالي اسمنا وسمعتنا تتدمر في السوق
يونس : ومين الطرف المجهول وعرفت اذاي ان في حد وراه
حمزة : ابوك عمل اتصالاته هو كمان وسأل عن المحامي دة وطلع انه مجرد واسطه وال مشغلينه كبار رجال الأعمال في البلد وبعد البحث والتدقيق مفيش حد منهم ليه عداوة معانا يبقي الطرف ال بيدعمه ماديا مجهول لأنه ميقدرش انه يعطل كم الشحنات دى وهو محامب يعني بالعقل كدة مش وارث ملايين من جدته في سويسرا يايونس
يونس : وعمك سامر عرف الكلام دة
حمزة : في اجتماع بعد صلاه العصر لرؤساء الأقسام واعضاء مجلس الإدارة وهنشوف ايه ال هيحصل
يونس : تمام
حمزة : انا هرجع مكتبي ورايا شغل متلتل ونتقابل في الإجتماع
يونس : ماشي
غادر حمزة مكتب اخيه متجها نحو مكتبه ليستوقفه صوت حنين تناديه من خلفه
حنين : حمزة .. حمزة استني
التفت لها وتوقف لتلحق به
حنين : دورت عليك في مكتبك قالولي انك في الشوؤن روحت هناك قالولي مشيت
حمزة : عاوزة حاجه
حنين : اه عاوزة اتكلم معاك ضروري
حمزة : بعدين ياحنين مش فاضي الوقتي
حنين بأصرار : فضيلي نفسك انت لازم تسمعني ونتكلم سوا امتر من كدة مش هينفع اجري وراك واتحايل عليك علشان نقعد سوا نتكلم
حمزة : انتي شايفه دة وقته ولا مكانه !
حنين: علشان خاطري ياحمزة مش هاخد من وقتك دقيقتين صدقني وحياه الصحوبيه ال بينا سنين الدراسه كلها
زفر حمزة بضيق ثم غادر برفقتها متجهين نحو كافتيريا الشركه وجلسو سويا وسط انظار الجميع المصوبه نحوهم
حنين بابتسامه: لما قلتلك عشان خاطري انت رفضت تيجي لكن لما خلفتك صحوبيتنا جيت
حمزة : عاوزة توصلي لأيه مش فاهم ؟
حنين : تبقي كارثه لو مفهمتش قصدي
حمزة : حنين انا مفياش دماغ لدلع البنات دة اخلصي
حنين : انا مبتدلعش خالص بس الكلام ال هقوله دة كان المفروض اني اققوله من زمان
حمزة : وهو ايه الكلام دة بقي
حنين وهي ترمقه بهدوء : حمزة انا بحلك من اي ارتباط او التزام ناحيتي ومكتفيه اننا نبقي اخوات مش حتي اصحاب او زمايل في الشغل
حمزة بذهول : انتي بتتكلمي جد
اومئت برأسها ايجابا ثم اردفت: نغم بتحبك ياحمزة وانا شوفت الحب دة في عنيها ليك اول مرة قعدت معاها وساعتها شفت نفسي صغيرة اوي قدام كلامها واني رخصت نفسي لما ارتبط بيك او بغيرك بأسم بكراش عليك او معجبه بيك او اي مسمي بنلعب علي نفسنا بيه وبردو شفت حبها في عنيك من زمان اوي بس كدبت نفسي مع كل مرة بتحكيلي عنها وعن جنانها وأكلها الحلو ال بتعمله علشانك مخصوص ومقالبها الرخمه ال بتخليك عاوز تقتلها .. انت بتحبها من زمان ياحمزة بس مش واخد بالك واسمحلي أي الفت نظرك للحب دة علشان هي تستاهلك اكتر مني
حمزة بصدمه شديدة: ايه ال انتي بتقوليه دة ياحنين انتي بوعيك ؟
حنين : ايوة طبعا ! فين المشكله بكلامي
حمزة : يعني انتي عارفه ان واحدة بتحب خطيبك وشاكه ان خطيبك بيحبها وكمان بتطلبي منه يتجوزها ويسيبك ؟!
حنين : طالما دة الصح وطالما انا احساسي ناحيتك ميجيش جمب احساسها حاجه يبقي دة ال المفروض يكون
حمزة : انا بجد مش قادر اصدقك يعني مفيش نفسنه بنات وتحاربي علشان خطيبك ولا دة من حقي انا وكدة
حنين بضحكه خفيفه: ولما اعمل كدة ونتحوز ونخلف ومنبقاش مرتاحين سوا بسبب العند وسؤ الاختيار يبقي الحل ايه ساعتها
حمزة : نظرة مستقبليه فظيعه
حنين : دة الصح صدقني وبجد بستغلط اي بنت تبقي عارفه ان خطيبها بيحب غيرها وتكمل معاه وقال ايه هيحبني مع الأيام
حمزة : مكنتش اعرف انك عاقله كدة ياحنين
حنين بصدق وفرحه : بتمني انكو تعزموني علي فرحكو
حمزة ممازحا : ونسمي اول بنت علي اسمك
حنين ممازحه : لا كدة نغم تقتلك رسمي
حمزة : 😂😂😂 ربنا يراضيكي ياحنين انا بجد مش عارف ارد اققول ايه
حنين : قول لا إله إلا الله وروح اعترفلها بحبك ومتضيعش وقت
حمزة : مين قالك اي ضيع وقت منا روحت قولتلها بس رجعتني متهزق ايد ورا وايد قدام
حنين بمرح : بتخوني ياحمزة
حمزة : بت انتي عامله ذيها وهرموناتك بتهب عليكي
حنين : لا ابدا انا بهزر معاك
حمزة : ربنا يسعدك ويفرح قلبك ذي مافرحتيني
حنين : يارب
حمزة : انا هستأذن اروح مكتبي علشان الحق اخلص ال ورايا قبل معاد خروج نغم
حنين بابتسامه: ربنا معاك
_____________________________________
بغرفه محمد كان يستعد للخروج بل للسفر بحثا عن دليل للوصول للمدعو لطفي بينما طرقت والدته الباب ودلفت
ورد بتعجب: رايح فين يامحمد
محمد : تعالي ياماما
دلفت ورد بقلق ثم توقفت امام ابنها مردفه : انت هتمشي وتسيبني انت كمان
محمد وهو يضمها بحنو : اهدي ياحبيبتي انا عنري مهسيبك هو انا ليا غيرك
ورد بدموع ناعمه : خليك في البيت يامحمد انا خايفه عليك انت ال باقيلي انت واختك في غياب ابوك
محمد : استغفري ربنا ياماما ليه مسلمه نفسك لوساوس الشيطان قل لن يصيبنا الا ماكتب الله لنا
ورد : ونعم بالله بس انا مش عيزاك تنزل الشغل علي الاققل اليومين دول خليك حواليا انا مطمنه بوجودك
جلس محمد علي الاريكه واجلس والدته بجوارة ثم ابتسم هاتفا : ممكن العيون الحلوة دى متعيطش وتزعلني تاني
ورد وهي تمحو دموعها : انا عاوزة اشوف بباك
محمد : لا انا هجبهولك لحد هنا
ورد بفرحه : بجد ... اذاي يامحمد
محمد : عمي سيف كلمني وقالي انه بعت جاب البواب بتاع الفيلا ال كنت قابلت فيها لطفي كام مرة وفضل يسأله عنه لطفي لحد ماطلع منه بحبه معلومات كدة و طلب مني اسافر المنيا بلد الراجل دة وهدور عليه هناك او علي اي طريق يوصلني ليه
ورد : المنيا !! هتسافر المنيا لوحدك والوقتي
محمد : معايا ربنا خير حافظ اتطمني عليا ياماما ومتخافيش عز معاكي هنا لو احتاجتي اي حاجه وانا هكلمك كل ساعه اطمنك عليا
ورد بقلق : بس انا خايفه عليك
محمد بتنهيدة : ياماما انا مش هقعد متكتف واسيب بابا يضيع ظلم انا هدور علي لطفي دة لحد مااجيبه ولو في اخر الدنيا ولولا ان عمي سيف عندة مشاكل في شغله كنت اخدت يونس معايا
ورد : ربنا يستر طريقك ياحبيبي ويكفيك شر ولاد الحرام وتروح وتيجي بالسلامه
محمد : اللهم آمين قومي بينا نروح لمنال علشان اسلم عليها قبل ماامشي
ورد : حاضر
كانت تجلس منال شاردة بغرفتها وعلي سريرها وجسدها يغزوة قليلا من الألم وبجوارها يجلس عز يعبث بهاتفه قليلا
منال : عز
انتبه لها واغلق هاتفه ثم هتف بلهفه : قلبه
منال وهي تبتلع غصه بحلقها : انا اسفه
عز بدون فهم : علي ايه ياحبيبتي
منال بأنكسار : انا أسفه علشان معرفتش احافظ علي ولادنا وسبتهم يموتو وي ______
قاطعها عز بجلوسه بجوارها علي السرير وهو يهتف : اششششش ولا كلمه انتي هتخبطي في الكلام ولا ايه
منال ببكاء : كان نفسي اولدهم ونفرح بيهم
عز باعين دامعه : ياعبيطه دول باب لينا للجنه وبكرة هنجيب غيرهم كتير
منال : لا انا مش هحمل تاني علشان انا ام غير مسؤوله ومش هعرف احمي ولادي في بطني
عز ببكاء هو الاخر : بس بقي بلاش كلامك ال بيوجع دة بمرة هتحملي ونجيب سوا دسته عيال ونكبرهم ونفرح بيهم سوا
منال : طلقني ياعز
اتسعت عيني عز بصدمه ثم هتف بمحاوله اتزان : ربنا يهديكي ياحبيبتي
منال بصراخ آلام بطنها : انت شايفني مجنونه انا بقولك طلقني طلقني ياعز
احتضنها عز وهو يبكي مرددا : باس ياحبيبتي انتي مش مجنونه انتي روحي وحته من قلبي
منال بصراخ باكي : ااااه ياولادي ااااه كان نفسي اشوفهم انت حرمتني منهم
عز : حقك عليا بس متعيطيش علشان خاطري ربنا هيكرمنا بغيرهم
منال بصراخ : ابعد عني
دلف محمد ووالدته مهرولين للغرفه علي اثر صرخات منال
ورد : في ايه .. ايه ال حصل ياعز
دفعته منال عنها ثم هتفت بصراخ : طلقني انا بكرهك انت حرمتني من ولادي ذيهم بالظبط انت سبتهم يضربوني واخدت مني ولادي وحرمتني منهم انا بكرهك بكرهكو كلكو
اتجهت ورد نحو منال وحاولت احتوائها لكنها صرخت بوجهها
محمد : خليكي بعيد عنها ياماما .. منال بصيلي
منال ببكاء : انا بكرهكو كلكو بكرهكو
محمد بصياح : بصيلي قولتلك
منال : ولادي راحو مني يامحمد اتحرمت منهم
محمد بفؤاد يتهشم لحديث اخته : ولادك عند ربنا في حفظه ورعايته وال انتي بتعمليه دة اعتراض على قضاء الله
منال ببكاء : اشمعنا ولادي انا مكل الامهات بتولد وولادهم بيعيشو
محمد : دة أمر ربنا واحنا راضيين بيه وانتي لازم ترضي ال بتعمليه دة غلط صدقيني يامنال انتي مش احسن من سيدنا الحبيب المصطفى صلى الله عليه وسلم ربنا ابتلاه بوفاه ابنائه في حياته ومع ذلك صبر انتي لازم تقتدي بحبيبك النبي
منال ببكاء وصوت واهن : كان نفسي اشوفهم يامحمد
محمد : فرق توقيت والله كلنا هنروح معاهم وهنقابل رب كريم وهناك هما هيشفعولك عند ربنا وهتشوفيهم
منال بحرقه: يارب راضي قلبي يارب
اتجه عز نحوها ببطئ ثم احتضنها بحنو وظل يهدهدها حتي غفت
ورد : الحمد لله نامت
محمد : كتر خيرها ياماما بجد كتر خيرها ربنا يصبرها
عز : انا خايف عليها اوي يامحمد وبعد ال حصل من شويه بفكر اعرضها علي دكتورة نفسيه
ورد : لما تشد حيلها بأذن الله تعمل كدة علشان الموضوع هيطول ويأثر عليها
___________________________________________
عادت نغم للمنزل وبدلت ملابسها وجلست كعادتها برفقه هايا بغرفتهم حتي حل المساء
نغم : بتعملي ايه
هايا : بكلم ريم
نغم : يابنتي اقطعي مع البت دى بقي
هايا :اه منك انتي
نغم وهي تهز كتفيها : انا غلطانه
هايا : قومي نعمل ايس كوفي الجو حر اوي
نغم : انزلي اعملي انتي وخليكي جدعه
هايا : مقولتليش ناويه تعملي ايه النهاردة
نغم : هييح ناويه بالصلاه على النبي كدة اققوله اني بحبه من واحنا عيال صغيرة واعمله مج سحلب  معتبر
هايا : يارومانسي انت
نغم : علشان تعرفي بس اني حنينه وبفكر في راحته بس هو ال عندة حول في المشاعر وبيشرب سحلب في الصيف
هايا : لسانك فيه حته صغننه قاد كدهو عاوزة تتقص
نغم : لا عادي مش بتوجعني
هايا : ماشي ربنا يهديكو ومسمعش صوتكو وانتو بتموتو بعض علي السطح يكش تطلعي اختيارة الاول ونخلص
نغم بمشاكسه : في الواقع كنت أظن اني خيار احدهم الاول لكن في الحقيقه هطلع خيار مخلل
هايا بقهقهه : تصدقي هو دة تمامك
نغم : بقي كدة
القت نغم بوسادة صغيرة بوجه هايا وضحكت كلاهما ثم. هبطو للاسفل متجهين للمطبخ اعدو اكواب من القهوة المثلجه وكوب من عصير الفراوله ل آيه ثم اتجهو للحديقه وجلسو برفقتها يمرحون وبعد فترة اتحهت نحوهم احدي الخادمات وهتفت قائله
الخادمه : مدام آيه في ظابط برة وبيسأل عن الانسه هايا
تبدلت ملامح الجميع للتعجب والقلق ثم نهضو جميعا متجهين للداخل
آيه : خليكو هنا متدخلوش غير لما اشوف في ايه واطلبو سيف يجي فورا
هايا : تليفوناتنا فوق يامامي
آيه : خلاص خليكي هنا
نغم : لا ياخالتو احنا مش هنسيبك لوحدك
اتجهت آيه للداخل وهي تشعر بالقلق البالغ وخلفها بقليل الفتاتات وماان وقعت بنظرها علي الظابط حتي شعرت بالارتباك ولكن الكارثه الكبري كانت حين رأت من يقف بجوارة ليتصلب جسدها وتتجمد الدماء بأوردتها ويفر الاكسچين من رئتيها
الظابط : مين فيكم هايا سيف صالح الحديدي
جلال المحامي وهو يشير ناحيه هايا : دى ياحضرة الظابط
الضابط : مدام هايا زوج حضرتك وجهلك انذار بالطاعه واحنا جايين ننفذة
_________________________________
حاسه التفاعل مش عاجبني سيكا 🙈 توقعات بقي علشان اشوف نسيتوني ولا لا 😅❤️❤️❤️❤️❤️