عيناك والماضي

بارت 6

الكَوْنُ عَيْنَاك ولا شَمسُ ولا قَمَرُ
والرّوضُ خَدّاك لا غُصْنٌ ولا ثَمر
وأنْت في دَوحة الأحلامِ أُغْنية
يشدو بِها الحُبّ ، لا نَايٌ ولا وَترُ.

صباح الخير .

...............................

مسار .......

مرت ال١٥ يوم خلصت واخيرا كولش اتعذبت بيها كمية المشاكل بين خاله ريم والجده .
ورنا ع كولشي تصف ويه امها لا تنطي الحق حقه ولا تنطي الباطل حقه شنو تكول امها هذا هو خلاص .
روان ألي تصحى شوي وترجع تعتزل هاي هم ما اعرف شوضعها وهذول كلهم بجهه وياسر بجهه ثانيه ع كولشي هو و خاله ريم لازم يتعاركون رغم هو يجي بالليل ويطلع الصبح بس لازم يتعاركون اذا ما عاركته خاله ريم اول ما يدخل البيت ، بنص الليل تدفر باب شقته وتدخل تتعارك ويا ع شنو ما اعرف ليش ما اعرف يحيى حذرني منهم واني دا احاول ابتعد ع الكل واتجنب المشاكل قدر الامكان .

اليوم حينزل يحيى ما اعرف لازم اكون سعيده او شنو بالظبط احساسي ما اعرفه بس گعدت من وقت اليوم لبست لبس محتشم ومرتب ونزلت جوا شفت الجده امل گاعده بالصالون ابتسمت بوجهي وكال :

يا هلا بهل الصباح .

ابتسمت ورحت بست راسها :

هلا بيج ماما .

: گاعده تنتظرين يحيى من الصبح .

: ي .

: الله يخليكم لبعض ويوفقكم ان شاء الله .

: امين .

بقيت گاعده شوي بعدين سالتها اذا متريگه او اسويلها ريوگ گالت :

سويلي بس چاي انتظر يحيى اكل ويا مشتاقتله .

ويه حجايتها نزل ياسر كالعاده ابتسم باستهزاء وطلع بس لو اعرف هذا شوضعه لا هو عدو ولا هو صديق .

رحت سويت الچاي لماما امل هي گالت هيج اصيحلها مثل زوجي المحروس .

گعدنه سوا شربنه چاي ونزلت خاله ريم گعدت وحطت رجل ع رجل وحجت بابتسامه :

يلا مسار حبيبتي بعد اليوم ينزل زوجج هسه شوي وما تكولين الا وصل گومي نظفي البيت ورتبي وسويله ريوك هنوب سوي غدا بعد راحت عليج صارلج اسبوعين عدنه .

ابتسمت و گتلها :

ان شاء .

ورحت سويت الگالت علي بس ألي اكتشفته انو شغل البيت كولش متعب من قبل اني وسمر ماما ماتخلينه نشيل العود من الارض تگول انتو بس اتدللوا علي ومن نكلها نريد نساعدج تكول انتو كم وحده حتى ما ادللكم فديتج ماما كولش اشتاقيتلج .

خلصت تنظيف ورحت للمطبخ اسوي الريوگ للمحروس وسبحان الله بس ذكرت اسمه سمعت صوته يسلم ع ماما امل ما اعرف شنو شعوري واحساسي بساعتها ما اعرف لازم افرح او شنو بالضبط يوم واحد ع زواجنه وراح حتى ما لحگت اتعود علي او شي .