عيناك والماضي

بارت 7

أغويته بالوصل حتى نلتهُ
‏فأتاك قلبي مؤمناً لا يسألُ
‏ثم من بعد الدلال فجعتَهُ
‏وجعلته عظةً لمن لا يعقلُ
‏أتذكر العهد الذي لي قلتهُ
‏"الغدرُ بين قلوبِنا لا يُقبلُ"
‏ها أنت أهملت الفؤاد وخُنتَهُ
‏للهِ ذنبُك ! أمثلُ قلبِي يُهمَلُ؟

صباح الخير .

......................................

سمر ......

رفعت راسي شفت يوسف گدامي وعيونه ع ايمان راح ياكلها اكل وهي كلش مو يمه جاي تاكل بالموطه وتحجي ويه خاله .

بس ألي صدمني اميره منين تعرفه ؟

باوعت عليها وحجيت :

ها ؟ شكو ؟

ضربت گصتها وحجت :

ولج شبيج مفهيه شوفي هذاك شلون راح ياكل امون اكل .

وضحكت رديت :

ي ويعني شنسويله .

عفست وجها وردت :

ولج انتي مو رحتي وياها للدوام ما شفتي هناك .

رديت :

ها مدري يمكن ما ركزت بالطلاب .

: ي انتي ما ركزتي لانج مفهيه وكلشي ماكو انه ركزت هذا طالب وياها من العام حسيته يفتر وراها وهي مخلصتها عليه زميل ما زميل .

: شنو رايحه وياها العام .

: ي غير چنت خامس اصلا رحت وياها اكثر من ٣ مرات عاد صدك وناسه الجامعه يلا يمته انه افتك من المدرسه و اصير جامعه و الله يصير عندي معجبين وطلاب يركضون وينتظرون نظره مني .

: ي مضل شي حب كلها كم شهر .

: ي الله كريم . ........ ولج مكدر اريد اگول لامون علي بس ماما گاعده بيناتنه شلون اگلها واذا گمت گعدت مناك ماما راح تسال شكو ما تفكنه اذا ما تعرف شكو .

: ي گعدي راحه .

ضحكت :

ي من نرجع للبيت ننصب عليها.

ضحكت وياها :

والله عليج افكار انتي .

: ي حب انه احب الوناسه والضحك قابل النكد مثلج .

: رحم الله والديج هذا الطلع وياج انه احب النكد .

: قابل مكذبه .

باوعتلها بنص عين :

لا العفو  انتي وين والكذب وين .

ضحكت بتكبر وانه اهز ايدي عليها .

شوي ورجعنه للبيت واميرة استلمت امون :

ولج امون تدرين منو شفت هناك .

ردت امون وهي مالها خلك :

منو ؟

: حزري .