✨If I got an escape again,I'll be still your side✨(System)

Arc : 1.8

Unicode

Arc:1.8

ပိုင်လီရှန်း ထိုအိမ်သို့ ယခုအကြိမ်လာရောက်ခြင်းမှာ သုံးကြိမ်မြောက်ပင်ရှိပြီဖြစ်သည်။ပထမဦးဆုံးအကြိမ်ကား မြေခွေးဘဝဖြစ်ရောက်လာခဲ့၍ ကျန်နှစ်ကြိမ်မှာမူ လူသားအသွင်ဖြင့်ရောက်လာခဲ့ခြင်းပင်ဖြစ်ပေသည်။ထိုအိမ်သို့ ပိုင်လီရှန်းရောက်ခဲ့သော်လည်း အိမ်တံခါးရှိအစေခံများက စားသောက်ဆိုင်ရှိရာသို့သာ သွားရန်ပြောသဖြင့် ထိုနေရာသို့စိတ်ပေါက်ပေါက်ဖြင့်သာ ထွက်လာခဲ့လေသည်။

"ကျစ် လူသားတွေလိုလမ်းလျှောက်ရတာ ပျင်းဖို့ကောင်းလိုက်တာကွာ"

ရှည်လျားသောလမ်းများအား ကြည့်လိုက်ပြီးနောက် စိတ်ပျက်စွာညည်းညူလိုက်ခြင်းပင်။သူ့သဘောတိုင်းသာဆိုပါက လေပေါ်ကနေသွားလျှင် ခနလေးပင်ဖြစ်ပေသည်။သို့သော် ပိုင်လီရှန်းတစ်ယောက် လူသားကဲ့သို့ဟန်ဆောင်ထားသဖြင့် လူလိုပင် သွားလာရမည်ဖြစ်သည်။ပိုဆိုးသည်က သူသည် လီအိမ်တော်ငှားရမ်းထားသော ကချေသည်တစ်ဦးဖြစ်သည့်အတွက် သိုင်းလောကသားကဲ့သို့ ပြုမူနေ၍မရခဲ့ပေ။မည်မျှပင်တွေးနေခဲ့သည်မသိ ပိုင်လီရှန်းတစ်ယောက် စားသောက်ဆိုင်၏တံခါးဝရှေ့ပင်ရောက်နေခဲ့ပြီဖြစ်သည်။

ပိုင်လီရှန်း ထိုသို့ရောက်ရောက်ချင်းမှာပင် ကြားလိုက်ရသည့်အသံနှင့်အတူ စားသောက်ဆိုင်၏အလယ်စင်မြင့်ထက်၌ မိန်းမပျိုတစ်ဦးက ပျော့ပြောင်းစွာကခုန်နေသည်အားမြင်လိုက်ရသည်။ထိုမိန်းမပျို၏ကဟန်ဆိုဟန်များက လှပသေသပ်သော်လည်း ပိုင်လီရှန်းအား မယှဥ်နိုင်ခဲ့ချေ။ပိုင်လီရှန်း မခို့တရို့ပြုံးလိုက်ခြင်းနှင့်အတူ အထဲသို့ တန်းဝင်သွားတော့သည်။

သီဆိုဖျော်ဖြေလို့အပြီး လက်ခုပ်သံများက ထိုမိန်းမပျိုလေးအား အောင်မြင်မှုဆောင်ကျဥ်းပေးနေသယောင်။ပိုင်လီရှန်းသည်လည်း လက်ခုပ်တီးလျက်ပင် ထိုမိန်းမပျိုလေးအား အားပေးခဲ့သည်။သို့သော် ထိုမိန်းမပျိုသည်လည်း ပိုင်လီရှန်းအားမြင်လိုက်ခြင်းနှင့်အတူ ပြုံးနေသောမျက်နှာကား မဲ့သွားခဲ့တော့သည်။ထိုမိန်းမပျို၏မျက်နှာမဲ့သွားခြင်းအား ပိုင်လီရှန်း မြင်လိုက်သော်လည်း လစ်လျူရှုလျက် လီအိမ်တော်သခင်ကြီးဆီသို့ ဦးတည်ထွက်ခွာသွားခဲ့သည်။