جنة عابد

٧

#جنه_عابد

بقلمي ..#wared_wa

قرائة ممتعة ..💗
.
.
.

جنه: صحيت ورفعت راسي من حضنه بكسل  والغرفة باردة وضوء خفيف من الشباك داخل للغرفة رجعت راسي بحضنه وبقيت اتأمل ملامحه نايم بعمق عنده رموش طويلة وخشمه لايق على ملامحه لا هو كبير ولا صغير وشاربه اللي معطي له جمال ولا شعرة زايدة مرتب ترتيب
فتح عيونه وهي ناعسة فززني وشفت ابتسامته

عابد: صاحية تتأملين وجهي لهالدرجة انا حلو؟
ابتسمت بخجل وعطيته ظهري
عابد : الساعة كم هالحين ؟

فتح جواله وبين علو صوته اثر التفاجآ
- الساعة ١١ فاتني الفجر لاحول ولا قوة الا بالله

قام وهو يروح يتوضى وانا رجعت راسي للمخده والاجواء تساعد عالنوم نمت بدون ماحسيت بنفسي

فزيت وانا اسمع دقة الباب بطريقة مزعجة قمت وانا مستغربة عابد معه مفتاح فتحت الباب وانا اشوف مره لابسة عبايتها والغطى على وجهها ومدرعمه عندي
عرفتها زينب

زينب : خير ياعروس نايمه للعصر الدلع هذا مايمشي هني حالك من حالي ومن اليوم عليك الطبخ انا عندي عيال وبيت وانتي ماوراك شي انزلي بيت حماتك وتلقين عندها كل شي وابدي بالطبخ قبل يجي عمي وعابد

نزلت وتركتني سرحانه وش فيها انهدت كلامها كله مره وحدة ماتركت لي مجال

تنهدت ورجعت للغرفة اشوف الساعة ١ونص الظهر حتى ماتهنيت بالنومه

خذيت ثوب بلون بني طويل وساتر وربطت شعري لبست عباتي ونزلت لبيت عمتي

شفتها بالصاله وبيدها ثوب وجالسه تخيط فيه

جنه : السلام عليكم ياعمه
منيره : هلا هلا يمه وعليكم السلام

لابسه نظاراتها وعاقده حاجبها
- توك صحيتي؟
- اي والحين بجهز الغدى

- الساعة ٢ اي غدا يمه الرجال على جيه وينهي زينب ليه ماطبخت للحين ؟
سكتت مدري وش اقولها
انفتح الباب ودخل عمي وراه عابد

ابو عابد: السلام عليكم
- وعليكم السلام
- هاه جهزتم الغدى ؟

دخلت زينب وهي شايلة سعد
- السلام عليكم ، يلا جنه خل نحط الغدى

منيره : اي غدى ماطبختي انتي اليوم لويش
- وانا كل يوم علي الطبخ والبيت والعيال والعروس تنام للظهر حلوه هذي

عابد : زيننب قصري صوتك
ابو عابد : روح يبه جيب غدا من اي مطعم قريب

خذا مفاتيحه وخرج وزينب رفعت صوتها متقصدة تسمعه
- اي عيني عشان ماتبي تتعب الهانم تجيب من بره ولا على ايامي ماتحبون اكل المطاعم