البارت الأول..
گاعدين اني وزهراء ننتظر دنيا تجيب
الأكل… وصدگ شوية ودخلت
بيدها صينية الريوگ
عبارة عن بيضة بماعون وگرصة خبز
وگلاص ماي.. خلت الريوگ گدامنة
وگابلتنا وگعدت…
دنيا :اشاا اشااه الجو انجماد شلون راح
تروحين بهالمطر؟؟!!
أماني :شسوي عندي أمتحان مهم
زهراء : لبستي هواية لا تتمرضين
أماني : لا لا تخافين علية مايصيبني شي
دنيا : يلا خل ناكل بسرعة وانتي روحي لدوامج
واحنة نروح لبيت الشيخ
صفنت بوجهن ياربي شنو ذنبهن
أعمارهن ١١ سنة وكل هالحمل شايلاتة
شربت شوي ماي وگلت : اني ما أداوم اليوم هونت
انتن نامن واني اروح لبيت الشيخ!!
زهراء بحيرة : مو گلتي عندي امتحان مهم؟
جا شلون تغيبين؟ انتي روحي احنا ما عدنة شي..
دنيا:اي صح ماعدنا شي نكمل شغلنا ونرجع ننام
هزيت راسي بمعنى (أي) وحجيت :لعد خوش بس
نضفن وردن نامن واني من أجي أكمل باقي الشغل
زهراء :ان شاء الله يلا خلنا ناكل
بلعت الغصة وسكتت صرت أكل شوي شوي
وابقة امضغ بالگمة بحلگي خاطر خواتي يشبعن
انتبهت دنيا گالت بتساؤل : أماني ليش ما تاكلين؟
رديت : اني ما أشتهي الحمدلله
وگمت نكتت صدريتي
گالت زهراء : يعني شلون تروحين ع لحم بطنج تعالي اكليلج لگمة..
رديت : مو گتلجن ما أشتهي… كملن ولبسن زين لا
تتمرضن…
أخذت جنطتي وطلعت
وطلعت برا لفحني الهوا البارد رجفت
وصرت أفرك ايديني ببعض من البرد
المطر قوي أمشي وأركض حدما وصلت
للمدرسة خشمي نگص من البرد وملابسي تبللت
رحت گعدت برحلة وصرت أرجف من البرد
واكح عرفت أنشلت..
طلعت كتابي بس اباوعله بعيوني وأراجع
شوية ودخلت المعلمة وبلشت بالدرس
وانة بس أكح وأرجف انتبهتلي المعلمة
نترت :مكافي تكحكحين ترا زعجتيني مداگدر
أشرحح
تقربت مني وباوعتلي من فوگ ليجوة
ركزت نظراتها علية وگالت بنتر : بهالمطر
وجاية للمدرسة بطرگ البدي والصدرية
شنو ما تگدرين تلبسين مطرية؟
كحيت وحجيت بحنجرة مجروحة : أسفة ست
نترت : مرة ثانية لبسي ملابس وتعالي جنابج تتمرضين وتأثرين علينة... وكافي تكحين مداركز بالشرح…
ماتلبس وتگول ليش أتمرض هزت ايدها ورجعت
لناحية الصبورة تشرح
أحس عيون الطالبات كلها تشخصت علية
وگفت الدمعة بمحجر عيني طريقتها جانت مهينة
الكل صار يباوعلي ويتهامس وية اليمة
صاحت بيهم مزمجرة : مااسمعلكم صوت
الكل خنس!!
انة أماني عمري ١٢سنة
خواتي زهراء ودنيا تؤام بس ما يشابهن!!
احنا عالم فقرة ع گد حالنا ونشتغل عند بيت الشيخ
أبوي فلاح بگاعهم واني وخواتي ننظف دواوينهم
وبيوتهم
طبعاً حتى بيتنا من الشيخ
هو منطي البابا صغير وع گدنا
يگولون عندي أم بس.. ما شايفتها
أبوي من تزوج أمي جان ينتظر منها الولد
حبلت أمي وجابتني.. يگولن عماتي
بوكت الاجيت للدنيا جن القيامة قامت
امي تتباجة وأبوي، يسب ويشتم
وهاد الدنيا.. وبانيها ع راس امي
شلون تجيبلة بنية؟
الاثنين ما رايديني جانو يردون ولد
