البارت الثامنوالعشرين....
خفت عليه حيل وخفت اخسرة..
حسيت لازم اعيش وانطي فرصة لنفسي
من حقي اعيش واتجاوز مخاوفي
سميت بسم الله وردت " ربي اطلب منك الاستعانة"
تشجعت وضغطت ع الاتصال بقة يدگ
وية كل دگة گلبي يدگ قوي.. واني اترقب
ردة طول هوايا الرنة وما رد.. اخير شي فصلتة
وقفلت الموبايل... وگعدت اتنفس من حلگي بقوة
احس شي بداخلي ديتحطم.. شي بداخلي دينهار
اريد اعيط اصيح بكل صوتي اريد ابجي افرغ همي
اريد اليفهم شبية..
اتخبط بمتاهات هالحياة حايرة بأمري، حايرة بزماني
شي بداخلي يأبى البعد والفراق
وشي بداخلي متلهف للحظة اللقاء
زهور شبابي دتذبل يوم بعد يوم
واوراقها تصفر كالورد وتتيبس..
إحساس يتغلب ع كل مشاعري ويكون بمقدمتها
احساسي خايفة وقلقة..
ما أريد انجب أطفال واتركهم يتعذبون ع الأيادي
وما اريد اخضع لقساوة جنس آدم ماريد اعيش
العشته لاطفالي واكرر الكرة مرة ثانية..
گمت من مكاني صعدت ع السطح
احس الارض بوسعها مدتكفيني وتضايقني
الهوا بكبرة مديملي رئتي...
جانت دنيا غروب والشمس شارفت ع المغيب
گعدت ع غراض مكسرة وقديمة ورفعت راسي للسماء.. أطلب العون من ربي اطلب يرشدني ع
الطريق الصحيح.. نزلت دموعي بضعف وأنكسار وندم...
واحس عبراتي تخنگني ابلع الأولى وتخنگني
الثانية... لا عندي اب يسندني ولا ام ترشدني
واخواتي البيهن كافيهن.. أصلا احس اخدش
نفسي اذا حاولت البوح والفضفضة لاحد..
ورب العز تعبانة وادري الغلط راكبني من فوگ لتحت بس فكرة غياب سعد من حياتي ترعبني وتبعث
بفؤادي الهلع والخوف....
هو أماني من الكل جان مخاوفي
هو نجاتي من الكل جان هلاكي...
أذن الاذان مسحت دموعي ونزلت جوا توضيت
وصليت وتوجهت لربي يريح گلبي ويهديني
للطريق الصح ويختارلي الافضل... فزيت ع عيطة
زبيدة
:- انهجم بيتج على الديانة گومي بساع حضري الاكل ابوج راح يجي شنحطلة ياكل
رديت ببرود :- ومتحضرينا انتي شناقصج ايد لو رجل
زبيدة :- لج تگومين لو اعرف شتصرف حجايتين مني لابوج اخلي يطردج من البيت ويشمرج بالشارع عبالج غشيمة وماادري بيت عمج طاردينج من عرامتج ووكاحتج
زهراء:- هي هي اوكفي شنو طارديني انتي منيلج هالحجي منين تجيبينة؟
:- ما يحتاج احد يگلي السالفة واضحة مثل وضوح الشمس وهسه گومي احسن ما اوريج الما تحبين تشوفينة
طلعت ورگعت الباب شديت ع نفسي وغمصت عيوني قوي.. لفيت سجادتي وگمت من مكاني
واحس زهراء القوية الصلبة تفتت وتبخرت
وحلت محلها زهراء التتاذة من الهوا ويجرحها
كلشي...
طلعت للمطبخ لگيتها مطلعة بصل وطماطة وبتيتة
گعدت اقلي بيهم حتى لروحهم ما ياكلون اكلة زينة
عفية بشر هلگد بخيل. والمن يحضي يجمعون بهالفلوس تاليتنا كلنا جوا التراب هي الدنيا هم تسوة
واحد يبخل حتى ع نفسة بيها؟! والله ماأدري شنو تفكيرهم هالشاكر ومرتة..
