البارت الرابع والخمسون..
سما :- فتحت حلگي من الصدمة .. معقولة السمعتة
صح رمشت بعيوني بأندهاش وگلت بعصبية
سما :- انجبي ليش تجذبين
مها (اخت سما) :- لج وداعتج مداجذب تعالي
گالتها وجرتني من ايدي بأتجاه الشباك فتحت البردة
واشرت ع الشارع وگالت :- شوفي هاي سياراتهم بالباب ليش متصدگيني
سما :- حجيت بتلعثم كولي والله يعني همة گالو
جايين يخطبوني
مها :- اي طبعاً يالفهيمة لعد اني گلتلهم
وماما دزتني عليج تگول خلي تجي تسلم ع عمامها
سما :- يلا گلتها ومشيت بآتجاه الباب مااحس الا
مها تجرني حيل وتعيط :- وثول وين نازلة بتشيرت
كرستيانو وكفشتج طالعة جنج جنية
سما :- خليت ايدي ع حلگي وگلت ياا والله نسيت
مها :- يلا راح انزل رتبي روحج ونزلي
سما :- ماشي نزلت مها واني ارجف صار مغص ابطني مصدومة ما مصدگة رحت فتحت الكنتور
طلعت ملابس وبدلت ورحت ع الميز اشيل فرشة المكياج اريد اخلي وتوگع من ايدي من الربكة ما اعرف شصابني..
باوعت لنفسي بالمرايا أبتسمت بأنتصار
رفعت عطري المفضل رشيت منة وانتعشت
روحي .. بسيطة يا سجاد أني الك الا اطلعلك
گلب ممدشن وأشلع گلبك بموافقتي مثل ما
شلعت گلبي يلا حسيت عديم الاحساس ..!!
گلتها وشمرت شالي ع راسي ونزلت جوا
والتوتر يقرة مليون سميت بسم الله ودخلت
سلمت عليهم امة وخواتة وعمي وهو
سما :- شلونك سجاد
سجاد :- هلا بيج شلونج
سما :- ابتسمت بوجهة بخفة ورحت گعدت يم
امي وأحس نظراتة عليه واني ما اهتميتله
ولا جني اشوفة نظرة مباوعتلة..
أسوي هيج بالگوة احس عيوني تريد تشح
بنظراتها عليه وتتأملة ايام وسنين ومتمل
بس ردت اعذبة شوية وابيع ثگل براسة
مثل ما جان يسوي بية وميعبرني وكما تدين
تدان وجزاء سيئة سيئة مثلها أستاذ سجاد
حجو بالموضوع لو اني غديت طماطة
سبحان الله وطلعت خجولة هم وهذاك
اليوم طلع عندي احساس مشاعري كثرانة
ما شاء الله صايرة تطشر…!!
ابو سما :- ونعم منكم ومن أبني سجاد ولو علية
اگلك گبع واخذ بس هاي سما روح ابوها مااگدر
احجي بدون موافقتها الرأي الأول والأخير ألها
أبو سجاد :- وسما بنتنا وان شاء الله ماترفض ابن
عمها مو هيج عمو سماوي؟
سما :- رفعت راسي وانتقلت بنظراتي عليهم باوعتلة
يباوعلي بأنتضار شحيت بنظراتي منة وگلت بهدوء
انطوني مهلة افكر عمو
بسرعة باوعتلة عيونة نطن من الصدمة
لزمتني الضحكة والله يا الله عبالة ساحلة
روحي عليه ميدري مزلغة روحي وموتتها
عليه بس تعذيب الحبيب مثل اكل الزبيب..
ابو سجاد :- اكيد من حقج بنيتي
ام سجاد :- بس لتطولين علينا بجوابج
سما :- ابتسمت بوجههم وگمت وگلت
مرخصتكم ردو عليه مرخوصة خليت وطلعت
ميتة من الفرح ابتسمت كل قوتي وگمت اكمز بدون
وعي يم باب المطبخ مااحس الا بالصوت الاجاني
سجاد :- شكو تگمزين
