البحث عن حياة

الفصل الاول

كريم و مدام اميرة علي و الدكتور ناجي الحداد ، اسرة مصرية غنية مكونة من ٣ افراد. و كانوا عايشين في فيلا كبيرة . كريم كان الابن الوحيد لمدام اميرة و دكتور ناجي. مدام اميرة كانت سيدة ناجحة في شغلها جداً كا مترجمة و عارفة توازن بين الشغل و البيت و ابنها و الحقيقة انها كانت بتحب ابنها كريم اكتر من اي حد في الدنيا هو كان كل حياتها. كريم لو جاله دور برد بسيط هي كانت بتبقى خايفة عليه جداً. اما بقى استاذ ناجي فا كان دكتور جراحة تجميل مشهور جداً في مصر و الناس كانت بتجيله من بلاد بعيدة عشان بس يكشفوا عنده.

دكتور ناجي كان بيحب مراته جداً و كانوا دايماً بيتحسدوا من الناس بسبب انهم محافظين على التفاهم و الحب اللي بينهم حتى بعد سنين جواز. كريم بقى كان غيرهم كلهم لا كان عايز يبقى دكتور زي ابوه ولا مترجم زي امه. كان نفسه يبقى صاحب business ، يعمل شركة كبيرة بإسمه. ابوه دايماً كان بيحاول يحببه في العلوم و الطب بس كريم كان بيرفض و مش بيلاقي نفسه في الحاجات العلمية ، عمره ما فهم الكيمياء و لا حبها مثلاً. و كبر و هو حلمه انه يعمل شركة كبيرة و يخلي ناس كتير تشتغل معاه.

اميرة كانت بتسيب كريم على راحته و كانت بتخليه يحاول يكتشف نفسه. هو كان دايماً اقرب حد لمامته و كان ابشع كابوس في حياته ان يحصلها اي حاجة وحشة. دكتور ناجي صحيح كان طيب و بيحب مراته و ابنه بس دايماً كان بيحس ان كريم متدلع زيادة من مامته مع ان اللي بيحصل معاه ده بيحصل مع اي حد في سنه.

مرة كريم و هو عنده ٦ سنين باباه اخدهم عشان يخرجهم في مكان حلو في مصر الجديدة. بعد ما وصلوا المكان و هما ماشيين في الشارع كان في محل آيس كريم في الشارع "انا عايز آيس كريم !" قال كريم ، "حاضر يا حبيبي هجيبلك" قالت اميرة "تجبيله ايه يا اميرة ! الولد هيتخن و اصحابه هيضايقوه في المدرسة !" قال ناجي ، كريم بصله بحزن "يضايقوه ليه بس يا ناجي ! هو نفسه في آيس كريم مش هيحصل حاجة لو اكل انهارده" قالت اميرة ، "براحتك بس انا خايف على مصلحته" قال ناجي ،

"ها يا حبيبي عايز آيس كريم ايه؟" سألت اميرة "عايزه شيكولاتة يا ماما" قال كريم ، "هاتيله واحده صغيرة بس" قال ناجي "حاضر ، هو اصلاً مش هيقدر ياكل واحدة كبيرة" قالت اميرة . ناجي اداها الفلوس و هي راحت تجيب الآيس كريم. كريم اكله و كان مبسوط اوي عشان مامته جابتله آيس كريم.

لما نتيجة كريم طلعت في الاعدادية جاب ٩٤٪؜ ، اميرة كانت فرحانة جداً بس ناجي كان ليه رأي تاني "مجموعك حلو يا كريم بس كان في احسن" قال ناجي ، كريم اتضايق و مقالش حاجة "كل واحد ليه مقدرة ، هو قدر يجيب ٩٤٪؜ في غيره قدر يجيب اعلى و غيره ماقدرش يجيب ٩٠٪؜ حتى" قالت اميرة. ناجي اخدها على جنب و قالها "يا حبيبتي انا بقول كده عشان انا عايز اشوفه دايماً في القمة و يبقى احسن حد في الدنيا" اميرة قالتله "ايوه بس مش لازم تحسسه انه اقل من غيره ، ممكن تكون دي القمة بالنسبة له" ناجي قالها "دايماً بتغلبيني بحكمتك".