بعد ما كريم خرج من المستشفى راح يقعد مع اميرة عنده جده و جدته و ناجي في الحجز بيحاول يشوف محامي بعد ما شهد شهدت عليه في القسم انه ضرب ابنه و كان هيموته و فضلت قاعدة في الفيلا بتصرف في فلوس ناجي براحتها و بتجيب اصحابها و تعملهم حفلات. الوضع فضل مستقر كده لحد ما كريم و اميرة فكروا في فكرة عشان يخلصوا بيها من شهد و يشوفوا محامي شاطر لناجي يطلعه من القضية اللي عليه و يتعالج نفسياً.
النقاش في الخطة مشي كالآتي :
"احنا عايزين نشوف طريقة نخلص بيها من شهد من غير ماتحس" قال كريم
"لازم نعملها فخ دي مش سهلة" قالت اميرة
"انا عندي فكرة اعتقد انها كويسة" قال كريم
"ايه قول" قالت اميرة
"انا حاسس ان شهد معجبة بيا ، كانت بتتعامل معايا بطريقة غريبة و بتلمسني بطريقة غريبة برضه" قال كريم
"عملت فيك ايه الحيوانة دي !" قالت اميرة
"لا ماتقلقيش انا مادتهاش فرصة ، بس ممكن اديها فرصة و اوهمها ان انا معجب بيها فا هي تثق فيا و تعترفلي بكل حاجة و انا هسجل اللي هي هتقوله و اروح بيه القسم" قال كريم
"فكرة حلوة بس هتاخد وقت و ابوك الوقت مش في صالحه" قالت اميرة
"ماتقلقيش انا ابتديت انفذ الخطة اساساً" قال كريم
"امتى و ازاي وانت مابتخرجش من البيت اصلاً" قالت اميرة
"كنت بكتبلها على الواتس بصي كده" قال كريم و فتح الواتس على الموبايل ، المحادثة كانت كالآتي :
كريم : سيبك من اللي عملته في المستشفى بس انا بجد بشكرك انك انقذتيني و بلغتي البوليس.🥰🥰
شهد : شوفت بقى خلصتك من ابوك ازاي ، عشان تعرف ان انا طيبة و بحبك.😏
كريم : وانا كمان بحبك بس ماجتش فرصة عشان اقولك ، بابا كان ممكن يحس و يسود عيشتنا.🤦🏻♂️
شهد : بجد !! اخص عليك انا كنت فاكراك بتكرهني ، طيب ايه مش هنتقابل؟.💃🏻
كريم : هو في حد يكره القمر ده برضه؟ هحاول اشوف ميعاد بس عشان ماما ماتحسش بحاجة.😌
شهد : قولها انك نازل اي حتة مع صحابك و تعالى😉
كريم : اشطا ياحبي هنتقابل قريب ، هتوحشيني🥺♥️
اميرة قريت المحادثة كلها و هي غيرانة على ابنها جداً من شهد و مش مصدقة سذاجتها.
"لا برافو عليك يا ولا بس انا خايفة لاتكون بتلعب عليك انت كمان" قالت اميرة
"ماتقلقيش انا هاخد بالي و مش هحسسها بحاجة" قال كريم . بدأ كريم في تنفيذ الخطة و كان بينزل يقابل شهد و كان بيجيبلها هدايا و بيفسحها .
جه اليوم اللي المفروض كريم هيخلي شهد تعترف فيه بكل حاجة ، خرجوا مع بعض كالعادة و وداها المكان اللي كان بيتقابلوا هي و ناجي فيه. و ابتدت الليلة :
"ايه يا حبيبتي هتطلبي ايه؟" سأل كريم بالطف.
"اطلبلي زيك وخلاص" قالت شهد و هي مبسوطة و بتفكر انها كده خلاص نجحت في خطتها.
"انا هطلب فيليه و ويسكي" قال كريم
"خلاص ماشي" قالت شهد ، كريم نده على الجارسون و طلب طلبه و بعدها بنص ساعة جاله الاكل و اكل هو و شهد و كانوا مبسوطين بس كريم كان عمال يسألها بذكاء لحد ما نطقت بكل حاجة و هي مش حسه.
"انا عندي اخ صغير و ابونا مات واحنا صغيرين و سابنا احنا و امي مالناش حد ، هي راحت اتجوزت واحد قذر كان بيعاملني انا و اخويا بطريقة زبالة و كان بيضربنا و هي مش موجودة بس كنا ساكتين عشان امي و كمان هو كان بيصرف علينا لحد ما قررنا في يوم اننا هنسرق فلوسه و هنهرب من البيت و نروح نأجر مكان و انا هشتغل اي حاجة عشان اجيب فلوس و ساعتها كان عندي ١٦ سنة و اخويا ١٣ سنة . كنت بخدم في البيوت ، اتبهدلت و امي مافكرتش حتى تدور علينا و فضلنا كده لحد ما بقيت ٢٣ سنة و اتخرجت من الكلية التجارة و اشتغلت بشهادتي و الدنيا كانت ماشية على قدنا لحد ما اكتشفت ان جوز امي اتسجن و عليه ديون كتير فا اضطريت اني اشتغل اكتر من شغلانة انا و اخويا عشان نفسنا وعلى امي كمان. و انا و هو قررنا اننا هننصب على الناس الاغنية و ناخد فلوسهم ، كنا شاطرين اوي و عملنا آلافات بس امي ماكانتش تعرف حاجة. و في يوم قابلت ابوك الدكتور ناجي كا واحدة من الستات اللي بتعمل عمليات تجميل واللي خبر طلاقه كان في الجرايد و المجلات و قولت اني هنصب عليه و اوقعه زي اللي قبليه بس لما شوفتك الخطة اتغيرت ، اُعجبت بيك من اول ما شوفتك و قولت هوقعك انت كمان و نتجوز بس انت ماكنتش مديني فرصة من الاول بس فرحت لما لقيتك معجب بيا و بتدور عليا. صدقني احنا هنكسب لو فضلنا مع بعض و سيبك من ابوك و امك انا هعملك كل حاجة ترضيك و هنسيك الايام السوداء اللي شوفتها مع ابوك".
كريم سجل كل الكلام ده بموبايله وهو متردد و كان في جزء جواه متعاطف مع قصة شهد بس في ناس كتير زيها و مافكروش ينصبوا او يسرقوا غيرهم. كان بيحاول يبان انه متأثر عشان ماتحسش بحاجة وبعديها وصلها الفيلا و روح البيت عند امه و كان شكله متضايق بسبب انها وثقت فيه و قالتله كل حاجة و في الآخر هو هيفضحها. كان حاسس انها بتحبه بجد بس كده هو وضعه مع اهله هيبقى صعب .اميرة اول ما شافته سألته عمل ايه قالها "تمام زي ما اتفقنا" و سكت و طلع اوضته، فضل طول الليل مش عارف ينام بسبب تأنيب الضمير و المفروض انه تاني يوم يروح يقدم الحاجات دي في النيابة عشان تتمسك و الكل يعرف انها مجرمة و نصابة.
شهد مش نصابة بس اتحطت في ظروف صعبة ولا ناجي شخص وحش لكن موت والدته كانت حاجة مصيرية بالنسبة له لانه ضيع عمره في الشغل و العمليات و السفر برا و الدراسة و ماكنش بيقعد مع امه و ماشبعش منها و كمان ابوه كان متوفي و امه عاشت لوحدها و نادراً ماكان بيشوفها هو او اخوه اللي من ساعة موت امهم ماسألش عليهم ولا راحلهم زيارة. ساعات في ناس بنبقى عايشين على حِسها و احنا مش حاسين ، وجودهم بيربطنا ببعض و من غيرهم بنتفرق و بنتحول لاوحش نسخة مننا.
أنت تقرأ
البحث عن حياة
Ficción Generalكريم ولد عايش مع اهله و مبسوط و كل الناس كانت بتحبه ، بس في يوم حصلت مشاكل شديدة بين الاب و الام و انفصلوا تماماً و حياة كريم كلها اتلخبطت و ابوه اتحول لانسان عدواني خصوصاً بعد وفاة امه (جدة كريم) و معاملته اتغيرت مع ابنه و مراته كأنه كان متخفي...
