"الوصية يا كريم !" قال صوت في ودن كريم . كريم صحي من النوم مفزوع بيبص يمين و شمال، مين اللي قال كده؟ ماحدش معاه في الاوضه. كريم قام عشان يفتح الباب بس لما راح يفتحه لقاه مش راضي يتفتح ، افتكر انه محبوس في الاوضة فا راح عشان يغسل وشه و سنانه و يستنى لحد اما ابوه يتكرم و يفتحله الباب. بعد ما عمل كل حاجة فضل قاعد على السرير يفكر في اللي سمعه و هو نايم.
كريم فضل سرحان و قاعد وقت طويل يفكر ، الوقت كان بيعدي ببطء رهيب و كل ده ناجي مافتحلوش الباب. طيب و بعدين؟ ده حتى موبايله مش معاه عشان يسليه ، المشكلة ان كريم بدأ يجوع و هو اصلاً مأكلش حاجة من ساعة اللي حصل في الخروجة. دماغه عماله تفكر ، طيب هيوصل لمامته ازاي؟ ،هل ابوه هيسمحله يشوف امه؟ طيب ايه اللي هيحصل تاني؟. كان نايم على ضهره و باصص للسقف و سرحان. حاول انه يفتح التليفزيون شوية يشوف اي فيلم و بيقلب في القنوات لحد مالقى فيلم بيحبه ، كان فيلم حب البنات قعد يتفرج عليه و هو مستمتع.
طيب و بعدين؟ الفيلم خلص ، مافيش حاجة تاني تتعمل . كريم كان نفسه ياكل اوي و لما بيعطش كان بيشرب من حنفية حوض الحمام اللي في اوضته . فجأة و هو قاعد سمع صوت خطوات رايحة جاية فا افتكر ان ابوه بيدور على المفتاح عشان يحرره من السجن اللي هو فيه فضل مستني و مركز مع الصوت اوي و بعدين حس في النص ان صوت الخطوات اتغير ، مابقاش صوت شبشب البيت عادي لا ده صوت جزمة. ماكنش فاهم ايه اللي بيحصل خالص بس امله في الخروج بدأ يقل.
بعد التركيز ده كله خمن ان ابوه لبس و نزل و سابه محبوس بعد ما سمع باب الفيلا بيتقفل و هنا كريم بدأ يحس بالزُل و الاهانة ، ده لو مربي كلب مش هيحبسه كده و يسيبه من غير اكل و لا حتى كباية مياه. كريم حتى ماكنش عارف الساعة كام فا قال يخش يستحمى يمكن الوقت يعدي اسرع و هو بياخد دوش. بالفعل دخل عشان يستحمى و حاول يطول في الحمام على قد ما يقدر.
بعديها خرج و سرح شعره و لبس بيجامته و فضل قاعد و استمر على الحال ده لساعات طويلة لدرجة انه حس ان ابوه نسيه محبوس و مشي. الوقت بدأ يبان انه متأخر لان كريم كان حاسس انه نعسان ، سمع باب الفيلا بيتفتح و نفس الخطوات تاني بس المرة دي الخطوات كانت عماله تقرب تقرب لحد ما بقيت قريبة منه اوي و بعدين بعدت و دخلت الاوضة اللي جنبه و بعد شوية الخطوات قربت تاني و كريم سمع صوت المفتاح و ناجي بيحطه في الباب عشان يفتحه.
و فعلاً ناجي فتح الباب و اتفاجئ لما لقى كريم قاعد ورا الباب مستنيه يفتح "انت قاعد عند الباب بتعمل ايه؟" سأل ناجي بصوت هادي على غير العادة "ك-كنت مستنيك تفتحلي" قال كريم و هو بيقوم من على الارض و بيبعد عن ابوه "اتربيت ولا لسه؟" سأل ناجي ، كريم بصله باستغراب "ب-بصراحة يا بابا انا مش فاهم انا غلطت في ايه و ليه اتعاقبت" قال كريم و هو خايف من رد فعل ابوه و عمال يرجع ورا و يبعد عنه.
ناجي بصله و ماكنش عارف يرد بس حاول يقول اي حاجة "عشان تتعلم ترد عليا لما اتصل" قال ناجي "انا آسف والله مش عمل كده تاني هو بس صوت الموسيقى و الاغاني كان عالي فا ماكنتش عارف اسمع الموبايل" قال كريم "خلاص انتهينا ، تعالى خد موبايلك" قال ناجي و كريم راح عشان ياخد موبايله فعلاً بس كان مزهول و مش عارف ايه اللي غير سلوك ابوه فجأة و نزل راح فين و رجع بالهدوء ده؟
كريم اخد موبايله و لما فتحه لقى اصحابه كتير اوي متصلين بيه و باعتينله رسايل عايزين يعرفوا هو راح فين و ليه اختفى و مابيردش. فجأة كريم و هو بيبص في الموبايل ابوه حضنه ، كريم اتخض جداً . ناجي بقاله كتير اوي ماحضنهوش كل اللي بيعمله انه يضربه و يتمناله الموت ، كريم هو كمان حضن ابوه. بعد اما حضنوا بعض كريم اتجرأ "ب-بابا هو انت روحت فين من شوية؟" سأل كريم "هتعرف كل حاجة بعدين" قال ناجي.
كريم استغرب شوية من الرد بس سكت عشان ابوه مايقلبش عليه و يضربه "انت اكيد جعان و ماكلتش حاجة من الصبح صح؟" سأل ناجي و كريم كان في زهول عشان اول مرة من فترة طويلة يحس ان ناجي مهتم بيه "ايوه" قال كريم بإختصار "شوف تحب تاكل ايه و هجيبلهولك" قال ناجي ، كريم ماقدرش يمنع نفسه "بابا هو انت كويس ؟" سأل كريم "اه انا كويس قدامك اهه في ايه" قال ناجي "متأكد؟" سأل كريم "في ايه يا كريم مانا قدامك اهه يابني شايفني بشد في شعري؟!" رد ناجي.
"بص يا بابا هو عموماً انا هاكل اي حاجة مش مهم" قال كريم "طيب حيث كده بقى انا هجيبلك اكلة حلوه عشان جوعتك طول النهار و نكدت عليك امبارح" قال ناجي "لا يا بابا ماتقولش كده انت تعمل اللي انت عايزه انشالله تموتني" قال كريم "يا سلام ؟! لا ماتخافش مش هموتك ، يلا روح اوضتك بقى ولا جهزلنا السفرة على ما اطلب الاكل" قال ناجي . كريم راح يجهز السفرة و هو مبسوط و مستعجب في نفس الوقت ، هو ايه اللي حصل لابوه فجأة .. هما بدلوه في الشارع ؟ ولا هو كل ده بيهلوس من كتر الجوع ؟ تغيير غريب و مفاجئ و مش مُبرر.
أنت تقرأ
البحث عن حياة
General Fictionكريم ولد عايش مع اهله و مبسوط و كل الناس كانت بتحبه ، بس في يوم حصلت مشاكل شديدة بين الاب و الام و انفصلوا تماماً و حياة كريم كلها اتلخبطت و ابوه اتحول لانسان عدواني خصوصاً بعد وفاة امه (جدة كريم) و معاملته اتغيرت مع ابنه و مراته كأنه كان متخفي...
