كريم بعد كده راح لشهد و قالها كل حاجة حصلت في القسم و انه مسامحها و مش هيخون ثقتها فيه و هي فرحت جداً و شكرته و حست ان دي الاشارة اللي هتخليها تبقى انسانه احسن. اما بقى ناجي فا اعتذر على كل حاجة عملها في كريم و اميرة و وعدهم انه هيتعالج نفسياً و هيبقى انسان احسن و اميرة قالتله انت لو اتعالج ممكن يرجعوا لبعض و ده كان دايماً حافز لناجي عشان هو نفسه يرجعلها و شاف انه كان غبي جداً لما طلقها و مش عارف هو كان بيعمل ايه.
ناجي بعد كده قعد مع كريم و قال قد ايه هو ندمان على قسوته معاه و انه عمره ما هيمد ايده عليه تاني و شكره جداً على صبره و تحمله العنف بالمنظر ده مع انه كان ممكن يبلغ البوليس بكل بساطة بس كريم مهانش عليه. بعديها ناجي طلق شهد و اداها مبلغ كويس عشان تبني حياتها صح من غير نصب ولا احتيال و رد اميرة .العلاقة بين ناجي و اخوه رجعت قوية من تاني و بقيم يسافروا مع بعض و يخرجوا مع بعض عيلة. كريم و مريم بدأوا يتقربوا من بعض اكتر و ناجي و اميرة لاحظوا الموضوع ده.
كريم و احمد رجعوا يشوفوا بعض تاني و كريم كان بيحكيله بالتفصيل عن اللي حصل في الفترة اللي كان مختفي فيها ورجع تاني مع اصحابه و اتفقوا انهم عايزين يبتدوا شغل بقى في الشركة اللي هيعملوها. بدءوا يدوروا و يعملوا ابحاث و يكلموا ناس و يقابلوا ناس عشان كل حاجة تبقى سليمة و يبقوا مطمنين على فلوسهم و على مشروعهم. كل واحد فيهم ساهم بمبلغ معين عشان يبنوا الشركة مع بعض و اتفقوا ان مافيش حد غريب هيدخل بينهم.
مرت الايام و الشهور و كريم راح يطلب ايد مريم بنت عمه من ابوها و اتخطبوا و كانت من احلى الفترات اللي في حياة كريم. حبها من كل قلبه و كان بيجيبلها كل اللي نفسها فيه حتى لو ماطلبتش هو كان بيحس بيها. و بعديها بسنة اتجوزوا و كريم كان شغال في الشركة بتاعته هو اصحابه . ظروفه المادية كانت ممتازة (بصراحة عمه ماكنش يحلم بعريس زيه لبنته). كريم دايماً كان بيتواصل مع شهد عشان يحسسها انه مش ناسيها و هي الحمدلله اشتغلت و بقى مستواها الاجتماعي كويس جداً و قادرة تصرف على امها و تعليم اخوها اللي دخل كلية الطب.
ناجي رجع لشغله تاني و عشان هو كان مشهور اول ما رجع زباينه جاتله كالعادة على عكس توقعه كان فاكر ان الناس هتنساه و هيروحوا لدكاترة تانيين غيره. اميرة درست الدكتوراه و بقيت دكتورة في الجامعة و ناجي و كريم كانوا فخورين بيها جداً و هي كمان كانت فخورة بيهم.
بعد سنة كريم جاب بنت و سماها سلمى كانت زي القمر زيه و زي مامتها. ناجي و اميرة فرحتهم كانت ماتتوصفش لما شافوا حفديتهم من ابنهم الوحيد. اسرة كريم كانت اسرة جميلة لكن زي اي اسرة مابتخلاش من الخناقات و المشاكل بس المهم انهم بيحبوا بعض و الخناقات ماتأثرش فيهم ولا في حبهم لبعض.
************************************
كريم ممكن يكون انت او انتي ، بس في قصة كريم هو قدر يستحمل مع انه اتحط في ظروف كانت ممكن تخليه ينتحر او يفكر في الانتحار لكنه دايماً كان عنده صبر و احتمال. يمكن حياتك مش احسن حاجة ، يمكن عندك ظروف و مشاكل كتيرة بس افتكر دايماً ان كل حاجة بتنتهي و خلي عند ثقة في رب العالمين اللي مش هيسيبك لوحدك.
"ما ضاقت الا اما فُرجت"
أنت تقرأ
البحث عن حياة
General Fictionكريم ولد عايش مع اهله و مبسوط و كل الناس كانت بتحبه ، بس في يوم حصلت مشاكل شديدة بين الاب و الام و انفصلوا تماماً و حياة كريم كلها اتلخبطت و ابوه اتحول لانسان عدواني خصوصاً بعد وفاة امه (جدة كريم) و معاملته اتغيرت مع ابنه و مراته كأنه كان متخفي...
