روايه: الجريمه والعذاب

البارت التاسع عشر

#روايه_الجريمه_والعذاب
.............

إلك
للشوگ
لحچاياتك الترفات
للشاطي العشگ ميه
و أرد بالتعب
چف
وفجر
وگلوب
واتحمل واگومن بية مابية

غازي ثجيل

..................

بعد الي صار ضليت مُلخبطه ماعرف شنو اسوي التحق جرهم وجنت خايفه عليه لدرجه غير مُتوقعه چنت انتظر ولو مُكالمه منه بس ماكو جانت الاوضاع خطره كُلش لحد نهايه سنه ٢٠١٤ واحنا نسمع بقتل وسلب ونهم وسبايا ومنسمع اي كلمه عن الجيش غير دايروحون اعداد فائضه من الجيش وداعش جانت مسيطره على المناطق كل يوم گلبي يوگع الف مره

لحد ما اجوي اخواني وچانت بالنسبه الي والامي الضربه القاضيه

علي ، راح نتطوع اني وحسين وحسن

امي لطمت على وجهها حيل
ام تمر ، يبوووو ولكم نو تتطوعون داتشوفون شدايصير شوفو على جثتي اموت وتدوسون على جثتي يلا تروحون تتطوعون

حسين ، يمه لا تحاولين ويانه احنا مقررين بس دانخبركم

ام تمر ، يببوووووو يبووو ولجج تمرهه داتشوفين اخوانج شدايسووننن بيههن يريدون يموتونييييي

تحجي وتضرب على وجهه وهم ماتحرك الهم كُل ساكن

علي ، يمه لا تعبين نفسج ولا تتعبينه احنا عگب باچر ملتحقين دعيلنه بدال ما تنوحين

جانت طريقه كلامهم كُلها قسوه حسيتهم رجعوا القديمين الي بلگوه خلصنه منهم

ضلت امي تنوح وراسها هاج عليها وتبجي وتصلي

اني ماعرف شسوي طلعت عدة الرسم وبديت ارسم ماچنت مركزه بالس دارسه بس لازمه فحم ودارسم

صحيت باوعت الرسمه كلها سواد وخطوط مو منظمه

تمر ، يوووووهه هسه شنو هاي وكتها

شگيتها وشمرتها بالزبل

عدت الايام والتحقوا اخواني والاوضاع كل ماجالها تخوفنه اكثر

كاعدين العصر ودانباع اخبار كالعاده ندگت الباب رحت فتحتها طلعت بيت جوارينه

بعد سلام وكلام حجت ام سعد

ام سعد ، ولج خيه ام علي متدرين غير ذاك الأسبوع جابوا كرار شهيد

ام تمر ، دخيلك ربي الطف بينه ولا تفجعنى

ام سعد ، امين يارب العالمين خظيه ابن اخويه صارلها شهر لا حس ولا خبر ومندري بي ميت لو عايش وامه داتلعوب مثل السمچه المزوهره

ام تمر ، يايمه الله يبرد كلبها وگلب كل الامهات ياربي

قربت الاستكان يم حلگها اخذت كمع
ام سعد ، صدُك خيه ماجن تمر طولت بخطوبتها حيصيرلها سنه ونص مو يمه