My Heart, My Home (Geoff Sandoval) - Drop-dead Playboys Series #1 - BATCH 2

Chapter 8

"GIO!" tawag ni Geoff sa kaibigan. Ikinagulat niya ang pagkakakita niya rito sa bahay niya ngunit ang mas ikinagulat niya ay makitang pangko nito si Ella. Nang masulyapan niya ang folding stair at ang duster sa sahig ay nahulaan na niya kung ano ang nangyari.

Kapwa napatingin sa kanya ang dalawa.

"Hey, man," nakangising bati ni Gio.

"Know what? You can actually put her down," he mocked. Hindi niya nagustuhan ang klase ng ngisi nito.

Ibinaba nito si Ella. Kaagad na lumapit sa kanya ang dalaga. Lumapad ang pagkakangisi ni Gio. Pinalipat-lipat pa nito ang tingin sa kanilang dalawa.

"Paano mo nalaman ang papunta rito?"

"I researched," nakakalokong sagot nito.

"Seriously now, sinong nagsabi sa 'yo kung paano ang pumunta rito?"

"Si Lynette." May dinukot itong papel mula sa bulsa ng jacket nito.

Hindi na nito kailangan pang bulatlatin ang papel dahil alam niyang sketched map iyon ng patungo sa bahay na iyon. Gumawa kasi siya ng photocopy ng sketched map na ibinigay ng abugado ng kanyang lolo at iniwan iyon sa kanyang silid sa bahay. Alam niyang doon nakuha ni Lynette ang mapa na siyang ibinigay nito kay Gio.

"Nagtaka kasi ako kung bakit ayaw mo akong papuntahin rito." Tinapunan nito ng malisyosong tingin si Ella. "Kaya naman pala... Ang plastic mo, pare. Bakit sa phone sinabi mong walang babae rito? So, you're trying out some pretty provincial girls for a change, huh? At gusto mo pang ilihim sa akin."

Napasulyap siya kay Ella. "Iwan mo muna kami, Ella." Baka kung ano pa ang marinig nito mula sa bibig ng kaibigan niya.

"Nice meeting you, Ella," pahabol nito sa dalaga. Lumingon naman si Ella at bahagyang yumukod rito. Pagkatapos ay nagpatuloy na sa pagbaba ng hagdan.

Tinapik siya ni Gio sa balikat. "You're naughty, man. Mukhang seventeen years old pa lang iyon, ah. Menor de edad pa. Kaya mo ba gustong itago sa akin? Nag-aalala ka na baka isuplong kita sa pulis sa salang child abuse? Why, man. You know I'm always at your side." Luminga-linga ito sa paligid. "Mayroon ka pa bang ibang cute at seksing probinsiyana na itinatago rito? Minsan kasi nakakasawa na rin ang mga wild na babae. I haven't tried dating a shy rural girl. Now's the time to try."

Na-amuse man sa kalokohan nito ay hindi niya ipinahalata. "Back off, Gio. Hindi ko minomolestiya si Ella. Wala kaming relasyon at hindi siya seventeen. Twenty-three na siya. Caretaker siya ng bahay na ito."

Lumarawan ang tila pagkabigla sa mukha nito. "Oh, man... What have you been doing with yourself here? Were you trying to commit suicide by not getting laid for a month just because of your grandfather's last will? Pare, just try using a rope or jumping from a skyscraper. O kaya magpakain ka sa sawa o magpasagasa ka sa ten-wheeler. 'Wag lang ganyan. Pare naman oh. Karumal-dumal ang mamatay sa paraang iniisip mo."

Hindi niya napigilan ang mapangisi sa kalokohan nito. "You better go back to Manila. Your overactive testosterones will just all die here."

"Ella is cute," nakangising sabi nito.

"'Wag mong gagalawin si Ella."

"Because she's yours?"

Hindi niya pinansin ang panunukso nito. "Because she's off-limits. Disente siyang babae. Kaya sana huwag mo siyang pag-interesan at paandaran ng mga kalokohan mo. Mumultuhin ka ng lola niya kapag ginawan mo siya ng hindi maganda." Napangiti siya sa huling nasabi.

"Ano? Anong multo?"

Hindi na niya pinansin ang tanong nito. "Paano ka nga pala nakapasok rito nang hindi namin nalalaman?"