اسكريبت ديني

💙💙

-نمتي على صوت مين امبارح يا رنا؟
-نمت على صوت إسلام صبحي وهو بيقرأ سورة الشعراء وإنتِ؟
-أنا نمت على سورة البقرة بصوت مشاري راشد وإنتِ يا ياسمين؟
-أنا نمت على صوت أحمد العجمي
-كنت راكبة الأتوبيس ورايحة الكلية وسمعت تلات بنات بيتكلموا مع بعض وبيسألوا بعض عن القيام والفجر ودي كانت من ضمن أسئلتهم لبعض
-نزلت روحت الكلية ودخلت حضرت محاضراتي وكان يوم عادي بس مُتعب أوي خصوصاً إني عندي النهاردة سيكشن رسم وده لوحده ٤ ساعات وأنا واقفة وبرسم أصل أنا عملت فيها استرونج وقولتلهم لااااااا مش داخلة إلا هندسة وشوحت بإيدي كدة
-خلصت اليوم وما صدقت إني وصلت البيت أخيرًا عايزة أنام ومش قادرة حرفيًا بس خلصت المذاكرة الأول وعلى ما خلصت كنا بقينا العشا دخلت علشان أنام مش عارفة أنام مع إني مُرهقة جداً جداً ومحتاجة أنام بس مش عارفة النوم مبيجيش وفضلت لساعات مش عارفة أنام، فكرت أنزل أجيب منوم من الصيدلية بس أنا حتى مش قادرة أقوم تاني
-افتكرت الموقف اللي حصل النهاردة في الأتوبيس وافتكرت البنت وهي بتقول لصاحبتها أنا نمت على صوت إسلام صبحي وهو بيقرأ الشعراء جربت أسمعه يمكن أنام فتحت الساوند وبحثت عن إسلام صبحي لأني أصلا معرفهوش وجبت سورة الشعراء وحطيت الهاند فري في ودني وبدأت أسمع
-صوت رهيب ما شاء الله، نبرة صوت فيها سكينة رهيبة جداً صوت مش موجود في الأغاني حاجة كدة تودي الإنسان في عالم تاني خالص
-نبرة صوت إسلام صبحي وهو بيقول "ولا تُخزني يوم يُبعثون" تزلزل القلب، الحتة دي من حلاوتها عيدتها تاني ونمت قبل ما السورة تخلص
-صحيت تاني يوم حاسة براحة إحساس إنك تنام وإنت بتسمع قرآن ده إحساس جميل أوي
-نزلت للكلية وجيت أحط الهاند فري وأشغل ميوزك لقيت الفون اشتغل على سورة الشعراء علشان وقف عليها امبارح، مش معقول هقلب القرآن علشان أجيب موسيقى فضلت أسمعها لحد ما وصلت الكلية
-كنت كل يوم أشغل سورة الشعراء بصوت إسلام صبحي وأنام عليها والوضع استمر كدة ٣ أسابيع، لحد ما في يوم كنت ماشية وسمعت السورة شغالة جوه محل فلقيت نفسي بكمل معاها
-ابتسمت ووقف مكاني
قولت لنفسي: أنا حفظتها! أنا حفظت السورة فعلاً
-روحت وأنا سعيدة جداً وقررت هشغل سورة تانية غير الشعراء علشان أحفظها كمان، وكنت كل ما أحفظ سورة أبدأ في سورة تانية بقى القرآن صديقي
-وأول خطوة خادتها إني بطلت أغاني بعد ما سمعت حد بيقول لو القرآن كان دخل قلبك كان طرد الأغاني لكن مفيش حاجة اسمها بسمع أغاني وبسمع قرآن عادي؛ لأن الضدان لا يجتمعان
- شهرين عدوا كنت حفظت الشعراء والحاقة والمزمل
وقولت في نفسي طب ازاي أكون حافظة قرآن وأنا مش بصلي! بدأت أصلى وأصحى للفجر وأواظب على القيام، القيام والفجر لذة لا يُعادلها أي لذة في الدنيا
-فرحانة جداً بنفسي وبالتغيير ده
-في يوم وأنا بسمع سورة جديدة وكانت سورة النور وقفت على آية "وليضربنَّ بخمُرهنَّ على جيوبهن" بحثت عنها
لقيت تفسير الجلالين : {وَلْيَضْرِبْنَ بِخُمُرِهِنَّ عَلَىٰ جُيُوبِهِنَّ } أي يسترن الرؤوس والأعناق والصدور بالمقانع.

• تفسير الطبري : (وليلقين خمرهن وهى جمع خمار على جيوبهن ، يسترن بذلك شعورهن وأعناقهن وقرطهن)

• تفسير القرطبي : وهيئة ذلك أن تضرب المرأة بخمارها علي جيبها لتستر صدرها.
-يعني بالإجماع منهم كلهم إن حجاب الشعر لازم يكون طويل مغطي الصدر فطولت الطرحة بتاعتي وبقيت بلفها لفة ساترة من قدام
-عدى كذا أسبوع وأنا بعمل الطرحة كدة بس قولت لنفسي هو أنا ازاي مطولة الطرحة ولابسة بنطلون مش راكبة خالص يعني مع بعضها
فقررت ألغي البناطيل وبقى لبسي كله فساتين، وبعدها لبست الخمار علشان ساتر أكتر من الطرحة الطويلة
-كل ده حصل بسبب حفظي وقرآتي للقرآن وتدبر آياته، القرآن هذبني وغير حياتي وفعلاً اللي يبحث في معانيه ويطبقها حياته هتتغير تماماً
-دخلت معهد قراءات وبدأت أخد قراءات القرآن علشان أقرأه صح
-ودلوقتي أنا خاتمة القرآن ومُجازة في أحكام التجويد ومنتقبة ومازلت بدرس وكل يوم بدعي للتلات بنات اللي كانوا راكبين ورايا، وحقيقي إحنا ازاي كنا غافلين عن القرآن وبنتعامل معاه إنه أكسجين صناعي نلجأ ليه في وقت الضيق بس، القرآن ده حاجة جميلة جداً يكفي إن أهل القرآن هم أهل الله وخاصته
-لما غيرت لبسي ولبست الخمار بعده النقاب واجهت انتقادات وكلام سخيف وكانوا بيضايقوني جداً بكلامهم ومبعرفش أرد عليهم
افتكرت قول الله:-
=ولقد نعلم أنكَ يضيقُ صدرك بما يقولون فسبح بحمد ربك وكن من الساجدين

-لما بحزن جداً وملاقيش حد أشكيله حزني
بفتكر قول الله:-
=قال إنما أشكو بثي وحزني إلى الله

-لما أكون مخنوقة أوي من غير سبب
بفتكر قوله تعالى:-
=ومن أعرض عن ذكري فإن له معيشة ضنكا
-وفعلاً القرآن فيه رد على كل سؤال جوانا، وهداية لحيرتنا وسكينة لقلوبنا

🌸دي قصه حقيقه حصلت مع أقرب الناس ليا 🌸

" كُن من الذاكرين 🌸.

- سُبحان الله ❄.
- الحمدلله🍃 .
- لا إله إلا الله🌿 .
- اللهُ أكبر🍁 .
- سُبحان الله و بحمدهِ 🍥.
- سُبحان الله العظيم 🌱.
- استغفر الله و أتوبُ إليهِ💎 .
- لا حول و لا قوة إلا بالله💟 .
- اللهُم صلِ على نبينا محمد 💕.
- لا اله الا انتَ سبحانك💗.
- اني كنت من الظالمين🌱.
- حسبي الله لا اله الا هو 🌿.
-عليه توكلت وهو رب العرش العظيم،🎇.