اسكربتات ᥫ᭡

#Salma_khaled ᥫ᭡

-نور، انا مش هقدر افهمك الي انا حاسس بيه، سيبيني دلوقتي.
ردت عليا نور بعصبيه"انا مراتك، هفهمك.. اتكلم بس .
اترددت اقولها الي مخوفني ولا لا،
-نكمل كلامنا بعدين.
ردت بحزن -انا فهماك يا عُمر، انا كمان جوايا نفس الخوف الي جواك ده .

قفلت السكه ف وشي، وانا قعدت على الكنبه جوايا حيرة كبيرة وهاجس او خوف كبير ملازمني،
عيوبي كتير وانا كـ انسان لازم اتعامل مع عيوبي واتحملها لكن ايه ذنب انسانه تانيه تتحمل عيوبي دي، مش يمكن عيوبي دي تتعبها ومتخليهاش طيقاني بعد حبها ليا، هييجي يوم وتدرك انها مش هتقدر تتحملني، هي تستحق فعلاً الاحسن مني.

افتكرت مواقف ليا وانا صُغير لما ماما كانت تخيرني ما بين اي حاجتين

-عُمر يا حبيبي تعالى .
جيت جري وقولت بفرحه-نعم يا ماما
بصتلي بحنان- تاكل مهلبيه ولا رُز بلبن؟
اتحمست اوي وسكت ثواني.. الصراحة الثواني طوِّلت، قعدت افكر اني بحبهم هما الاتنين اوي، الرز بلبن بأكله كل مرة.. اممم اكله كمان المرادي بقى، خلاص تمام.. لا لا انا ممكن اجرب المهلبيه المرادي اصلها حلوة زين لما بيدوَّقني من طبقه بتبقى حلوة، يوووه.
-عُمر؟
فوقت من تفكيري ورديت بتردد-م. ممكن رز بلبن يا ماما، انتِ هتاكلي ايه؟
-مهلبيه يا حبيبي.
ابتسمت بتردد- ممكن ابقى ادوق من طبقك؟
-اكيد يا عمور.

رجعت من الذكرى، مواقف كتير زي دي مع ماما ومع بابا واخواتي، لحد دلوقتي فاكر لما بابا زعق فيا وقال جملة بنرفزه لسه معلقه معايا لحد النهارده
-انت هتفضل كده طول عمرك مبتعرفش تختار حاجة ف حياتك ملكش رأي خالص معندكش شخصيه، حقيقي انا تعبت معاك جداً يا بني.

يمكن لما كبرت بقيت اهدى شويه وبختار اسرع شويه لكن لسه التردد ملازمني بردو ف اوقات مينفعش تبقى فيها تردد نهائي.

موبايلي كان بيرن بصيت على التليفون لقيته احمد صاحبي
-عُمر، عامل ايه يا صاحبي.
رديت عليه- الحمدلله يا احمد، انت ايه اخبارك واخبار مريم.
-احنا كويسين الحمدلله، وبما انك جبت سيرة مريم فـ هخشلك ف الموضوع علطول.
-ايه الحكايه؟
-احنا عازمينك انت و نور بكرة ف مطعم بره.
رديت عليه بتنهيده- مش هينفع يا احمد، انا ونور شادِّين سوا.
-كده بقيت  مُصِر انكم تيجوا هنستناكم بكرة الساعه ٣ العصر،  هبعتلك اللوكيشن، سلام يا عمور.
-سلام يا احمد.

لو ينفع الانسان يبطل خوف يكون ف زرار كده بمجرد ضغطة يبطل يخاف.. يخاف من مُستقبل، يخاف من الموت، يخاف من البُعد، ويخاف من الفراق و. و .و ، الخوف بيتعبنا بيخلي الحياه اصعب، بيخلينا منجازفش منجربش الي ييجي ف بالنا، لكن على حالي فـ الخوف من أن نور متتقبلش عيبي ده وتكتشف انها وقعت ف انسان مليان عيوب منها انه متردد يمكن ميكونش له شخصيه على رأي بابا، صحيح انا مش شايف اني مليش شخصيه لكن الكلام هزِّني من جوه، انا ممكن فعلاً مكونش ليا شخصيه؟