اسكربتات ᥫ᭡

هالة أحمد♡.(٢)

( 2 )

= انا هموت يا يحيى

" دموعي نزلت لما قالت كدة، قلبي واجعني "

- لا عشان خاطري ماتقوليش الكلام اللي يوجع دا، انتِ كويسة
= لو مُت صلّي عليا في الجامع!

" اتصدمت! جامع؟! "

- انتِ مسلمة؟ مسلمة يا ماريا؟

" غمضت عنيها وبدأت تخرّف وتقول:

= ماتزعلش مني يا بابا، كنت بحبه، كنت فاكرة انّي اما ابقى مسلمة هضايقك عشان ماجوزتنيش له! بس انا لقيت نفسي! الدين دا هو الصح! اتكسر قلبي بس ربنا هداني لدينه، كنت بحبه ما تزعلش مني، ماوافقتِش ليه طيب؟ مش بإيدي انه مسلم! سامحني عشان خاطري

" وغابت عن الوعي بعدها، اتلجّمت من كلامها!! ماريا؟ ماريا اللي حبّت مسلمة؟ ومسلمة كمان؟ خدتها في حضني وكنت بعيط وبتأوّه .. ااه يا ماريا، اتغذبتي كتير.

وصلنا المستشفى! ودخلت بيها الطوارئ وخدوها مني، كان قلبي واجعني عليها ومش متطمن، عمر كان جمبي وماسابنيش، اتفاجئت لما شُفت ابو يحيى جه! ومعاه واحد بيسنّده، رُحتله وقُلتله:

- ايه اللي جابك بس؟
= ماجيش ازاي بس؟ ماقدِرتش اسيبَك
- انتَ تعبان ومش مستحمل
= فداك يا حبيبي، لو ماوقِفتش انا جمبك مين اللي هيقف؟

" وحط ايده على خدّي وقال:

= دا انتَ ابني يا يحيى

" اترميت في حضنه ونزلت دموعي، وهو قعد يطبطب عليا، كنت خايف اوي، طِلع الدكتور من عندها وقالنّا:

- كان عندها ارتفاع في ضغط الدم سبّبلها نزيف في المخ
= بصدمة: ايه؟ ليه؟ دي كانت كويسة
- غالبًا اعراضه مش بتظهر بشكل كبير، ممكن تكون دوخة بسيطة، او ترجيع .. وحاجات تانية

" كنت واقف مصدوم، سألته:

= طب هي عاملة ايه دلوقتي؟
- للاسف دخلِت في غيبوبة، وربنا يستر

" ومشي من قدامنا، بصيت لابو يحيى وانا بعيط وقُلتله:

- هتموت! هتموت وهتسيبني! اتخطفِت مني
= بحزن: يابني ماتقولش كدة، ماتفّولش على اختك
- ببكاء: قلبها حاسس، انا خايف اوي
= دا ابتلاء صعب لازم تبقى قدّه احسِن الظن في الله!
- يارب .. يارب

" قعدت ادعي ربنا وبتمنى ظني يخيب، قعدنا ساعتين بدعي ربنا تفوق وتبقى كويسة، لكن للاسف ماحصلش، فجأة لقينا حركة غريبة وناس بتجري لاوضتها، خمس دقايق والدكتور طِلع قال:

- البقاء لله

" رجلي ماشالتنيش ووقعت في الارض وانهرت من العياط، قلبي ما يستحمِلش، الّا هي! استحمل اي حاجة وفراق اي حد الّا هي، فراق ابويا كان هيّن عن فراقها، دخلت الاوضة اشوفها، ماستحملتش اشوف وشها متغطّي، سبحت الغطا وبوست راسها وايديها واخدتها في حضني "