اسكربتات ᥫ᭡

هالة أحمد♡.

'' وَعلي العهدِ بَقينَا ..💛! ''

'' كان دايما سؤال يُلح عليا ! ، ليه علاقة الصداقة بين الولد والبنت حرام ؟ ، فيه بنات كتير بتلاقي أكتر حد يفهمها هو صاحب ولد ، وفي الواقع إن الصداقات دي أغلبها بتنجح وكل طرف بيرتاح ويستفيد مع الطرف التاني يبقي ليه حرام ؟ وإيه الغلط في كدة ؟ هو ذنبي إني لقيت ولد يفهمني مش بنت ؟ إيه المشكلة ، والحقيقة إني لما دورت وبحثت إكتشفت إن المشكلة إن مافيش ولد بيعتبر أي بنت صاحبته ودايما بيفكر فيها تفكير تاني خالص بعيد عن الصداقة ، كان فيه فيديو شوفته مرة صدفة عاليوتيوب ، كان عبارة عن واحد ماشي في الشارع وبيسأل الرجالة هل فعلا ممكن يكون فيه صداقة بين الولد والبنت ؟ وإجابة كل راجل إنه لأ ! ، رغم إن كلهم قالوا إن لهم صحاب بنات ..بس مافيش حد فيهم بيبص لصاحبته علي إنها صاحبته وبس ! ، وتفكيرهم في البنات دول بينحصر في الجِنس ، لحد ماياخدوا اللي هما عايزينه ويرتاحوا ..يابيفضلوا دايما بيفكروا في كدة لحد مايحصل فعليا ! ، المُصدم بالنسبالي في الفيديو إن الرجالة دول أجانب ، الأجانب اللي بنقول إن تفكيرهم متحضر يبقي دا تفكيرهم في الصداقة بين الولد والبنت ؟ ، ااه لو دوّرنا هنلاقي مبرر اللي هو إن دي مجتمعات غربية بعيدة عن الدين والأخلاق ، أما في مجتمعنا الشرقي المسلم مافيش كدة ! ، طب ماهو مادام إحنا مسلمين دا أكبر دليل إن ماينفعش أصلا الصداقة دي ، وعلي فكرة الدين مابيتجزأش ، فيه ناس بتعمل بالدين وفيه ناس لأ ! ، يعني دا مش مبرر لتفكير الأجانب في البنات اللي بيصاحبوهم ، عشان كدة الحمد لله أولاً وأخيراً إننا مسلمين ، والإسلام حافظ علينا حتي من مجرد التفكير المسيئ لينا والمهين ! ، عشان كدة حرّم النظرة وأمرنا بغض البصر عشان مانتفتنش ، وأغلب علاقات الصداقة بتتطور لحب وإرتباط وإستنزاف مشاعر عالفاضي و90 % من العلاقات دي بتفشل وتكسر القلب ، حتي لو العلاقة وصلت للجواز ..إزاي أقدر أكوّن علاقة وأكمل فيها وربنا مش مبارك فيها من البداية ، أنا هستريح إزاي ؟ ، ربنا سبحانه وتعالي خلقنا في الأصل غاليين ، وغاليين جدا كمان ، يبقي هستريح إزاي وأنا كل مادي برخّص نفسي ؟
سؤال ..
تفتكر / ي لو معاك / ى جوهرة أو حتة ألماظ ، لأي درجة هتحافظ عليها ؟ ..''

- إزيك ياست هدير ؟
= إيه دا زينب ؟ ، إيه اللي جابك ؟
- ياربي عليكي قليلة الذوق طول عمرك جتك القرف
= بضحك : طب تعالي إقعدي
- قعدنا ، قوليلي بقا مالِك إنتي كويسة ؟
= ااه كويسة الحمد لله
- بجد ؟ أصل لما كلمتك إمبارح ماحستش كدة ، وكمان البوست اللي نزلتيه عن صداقة الولد والبنت دا قلقني ، هو عبدالرحمن كلمك وزعلك ؟
= بضيق : يووه ، هو أنا كل مازعل أو أضايق شوية تقولوا عبدالرحمن السبب ؟ فيه إيه ؟
- يعني زعلانة أهو
= أيوة ياستي إرتاحتي ؟
- مين بقا اللي مزعلك ؟
= عبدالرحمن !
- لا واضح فعلا إننا دايما بنتبّلي علي عبدالرحمن ، طب زعلك في إيه ؟ وإيه اللي خلاه يكلمك أصلا ؟
= عايزني أشتغل معاه
- نعم ؟ مش هو كان رافض إنك تشتغلي أصلا ؟ إيه اللي جد ؟ وبعدين هتشتغلي معاه إيه وهو في محافظة وانتي في محافظة
= مش شغل بمعني شغل يعني وأروح وآجي وكدة ، هو طلب مني بما إن صفحتي كبيرة وعليها متابعين كتير ، إني أسوّقله الهدوم اللي بيعملوها في المصنع بتاعه هو وباباه وكدة عشان هو ناوي يفتح محل يبقي ليه لوحده بعيدا عن شغل باباه ، وهيبقي ليا نسبة
- طب حلو ، إيه بقا اللي ضايقك في الموضوع ؟
= اللي ضايقني إنه قالي إن اللي هيتعامل معايا سلمي السكرتيرة بتاعته ، وبصراحة دمي فار وبينتله من طريقة كلامي إني متضايقة ومش حابة من البداية وجودها أصلا ، بس هو مابيرتحش للشغل مع الرجالة ! ، وشايف إن الشغل مع البنات وإن يكونله سكرتيرة بنت دا هيحمي شغله أكتر ، وبصراحة هي فعلا كدة وبتمشيله حاجات كتير في شغله ، بس أنا بتضايق ..بغير عليه ، وأوقات كتير لما بنبقي بنتكلم ألاقيه بيقولي ثواني هرد علي سلمي وهارجعلك ..ماتتحرق سلمي ، مين دي اللي يسيبني عشانها حتي لو عشان شغل
- عشان كدة نزلتي البوست بتاع الصداقة دا ؟
= لا البوست مالوش علاقة خالص باللي حصل بيني وبين عبدالرحمن ، دا بوست عادي بقول فيه رأيي ووجهة نظري
- غريبة أوي إنتي ياهدير ، مع إنك مابتعمليش أي حاجة من اللي كتبتيها
= تاني يازينب ؟
- ماهو إنتي ماتقوليش حاجة إنتي مابتعمليهاش ! ، '' يَا أَيُّهَا الَّذِينَ آمَنُوا لِمَ تَقُولُونَ مَا لَا تَفْعَلُونَ * كَبُرَ مَقْتًا عِنْدَ اللَّهِ أَنْ تَقُولُوا مَا لَا تَفْعَلُونَ '' ، يعني الأوْلي تنصحي نفسك وتعملي بكلامك وبعدين تكتبي بوست وتنصحي بيه الناس ، إنتي عارفة الرسول صلي الله عليه وسلم قال '' يُجَاءُ بِالرَّجُلِ يَوْمَ الْقِيَامَةِ فَيُلْقَى فِي النَّارِ فَتَنْدَلِقُ أَقْتَابُهُ – يعني أمعاءه - فِي النَّارِ فَيَدُورُ كَمَا يَدُورُ الْحِمَارُ بِرَحَاهُ ، فَيَجْتَمِعُ أَهْلُ النَّارِ عَلَيْهِ فَيَقُولُونَ : أَيْ فُلَانُ مَا شَأْنُكَ أَلَيْسَ كُنْتَ تَأْمُرُنَا بِالْمَعْرُوفِ وَتَنْهَانَا عَنْ الْمُنْكَرِ ؟ قَالَ : كُنْتُ آمُرُكُمْ بِالْمَعْرُوفِ وَلَا آتِيهِ وَأَنْهَاكُمْ عَنْ الْمُنْكَرِ وَآتِيهِ '' ، يبقي ليه تعملي كدة ؟
= خلصتي خلاص ؟
- ااه خلصت
= طيب اسمعيني ، أنا عارفة إن كلامي مع عبدالرحمن غلط ..مليون في المية غلط ! ، بس إحنا بشر يازينب وبنغلط إحنا مش ملاك ، وإنتي عارفة كويس أوي إني بحاول وأنا كل مرة اللي بقفل كلام معاه وهو كل مرة اللي بيفتح الكلام وبيبقي لسبب ، بس كدا
- هو إيه اللي بس دي ؟ مانتوا كل مرة بتفتحوا كلام بتفضلوا تتكلموا أيام وأيام لحد ماربنا يفرجها بقا وترجعوا تقفلوا كلام من تاني
= المهم إن إحنا بنقفل الكلام كل مرة يازينب ، في الآخر بتوب وأرجع وبعمل الصح
- وبترجعي تعملي الغلط من تاني ! ، ياهدير أنا خايفة عليكي لاتُفتني بالذنب لحد مايطبع علي قلبك وماتحسيش بحاجة بعد كدة ، لا تحسي بالندم ولا غيره ، وتغرقوا إنتوا الإتنين في بير ماحدش فيكوا يعرف يطلّع التاني
= مش للدرجادي يازينب ، إن شاء الله عمرنا ماهنوصل للمرحلة دي ، وإن شاء الله هيجي وقت وهنقفل الكلام خالص ، ودي إن شاء الله هتبقي أخر مرة
- مانتي كل مرة بتقولي دي آخر مرة ، ومابتبقاش ! ..وألاقيكي جاية تقوليلي عبدالرحمن كلمني ، بصي أنا مقتنعة بشخص عبدالرحمن جدا علي حد كلامك عليه ، وإنه شخص مسئول ومحترم ودايما في ضهر باباه ومسئول عن إخواته وبيأدي فرض ربنا كويس أوي وعاجبني فيه إن الصلاة عنده خط أحمر ، كل دا حلو وحلو أوي لشاب ماكملش ال 23 سنة ، دا يزيده مكانة ..لكن اللي مش حلو إني بحس إنه مش هامه يحافظ عليكي ولا علي سمعتك وعلي حتي علي شكلك قدام نفسك وكل مرة يدخل بكلمك بحجة شكل ولانك ضعيفة بتستسلمي لدا كل مرة ، ودا غلط