اسكربتات ᥫ᭡

#سارة_طارق_صابر ᥫ᭡

__يا ماما والله حرام عليكم.
__يا بنتي وأنا فـ أيدي إيه أعمله؟
__على الأقل كنتِ قوليلي.
__أقولك وأبوكِ يكسر دماغي صح؟
__لاء ، تضحكوا عليا وتجبوني الصعيد على أساس جايين نحضر فرح، ويطلع الموضوع في عريس.
__يا بنتي أقعدي معاه وشوفيه وبعدين أتكلمي.
__يا ماما هو أنا مشكلتي فـ العريس، ولا مشكلتي في أنكم لغيتوا رأي ومتفقين على كل حاجة وجايبني أتجوز.
__أنا معرفش بقى كلمي أنتِ أبوكِ أتصرفي معاه.

أحنا عايشين في اسكندرية، وبابا فجأة قالنا أننا هنروح نحضر فرح أمينة بنت عمي.

عمي ده اللي أحنا عمرنا ما سمعنا عنه لا هو ولا عيلته، هو أينعم أحنا عارفين إن أصل بابا من الصعيد وإن كل عيلته هناك، بس عمرنا لا رحنالهم ولا حد منهم جالنا.

وعشان كدا كنت شاكة في الموضوع ومش مرتاحة، وكل شكي أتأكد لما جينا هنا ولقيتهم بيتكلموا على أساس أني عروسة أبنهم يونس.

كنت قاعدة فـ أوضتي لما سمعت صوت خبط، ولما فتحت كانت أمينة.

__أنتِ غضبانة علينا ولا إيه يا ست وَنَس؟
__وهغضب عليكم ليه بس؟
__أمال مبتخرجيش من أوضتك ولا بتنزلي تقعدي معانا.
__عشان مش متعودة على الجو وكدا.
__لاء لازم تتعودي، أنتِ بكرا بعد الجواز هتعيشي هنا على طول.

حسيت كأن جردل مية سقعة أدلق فوق دماغي لما سمعت كلامها.

__قصدك إيه؟

كانت مستغربة من سؤالِ ومع ذالك ردت عليا.

__لما تتجوزي أنتِ ويونس هتعيشوا هنا.

مكنتش عارفة أرد عليها أقولها إيه، بس كان عندي أحساس بالقهر والعجز مالي قلبي، حتى أختيار شريك حياتي مليش رأي فيه...

__سرحتي فـ إيه؟
__ولا حاجة معاكِ.
__طب إيه رأيك تنزلي تقعدي معانا النهاردة.
__إن شاء الله.

مكنش قدامي حل تاني غير إني أنزل أقعد معاهم تحت، بس شكرت ربنا لما ملقتش غير الستات قاعدين.

__مالك يا بنتي شكلك زعلان ليه؟

كانت مرات عمي وأم يونس، أتكلمت معايا لما شافتني ساكتة ومش متفاعلة معاهم.

__لاء ابدًا مش زعلانة.
__لو حد مزعلك قوليلي وأنا هخلي يونس يكسرلك دماغه.

حسيت بالدفا من كلامها وأدد إيه هي ست لطيفة.

__يعني لو حد زعلني هتكسروا دماغه.
__ده يونس يقتلهولك يا ست البنات.

قلبي أتنفض لما سمعت صوت ورانا.

__ويونس نفسه يا أم يونس لو زعلها نقتله.

لما لفيت كان شاب عادي زي شباب المدينة، لابس بنطالون وقميص ومربي دقنه، ملامحه كانت مريحة وحادة، وعيونه اللي مسروقة من فنجان القهوة؛ اللي رمت نبضة غريبة فـ قلبي.