اسكربتات ᥫ᭡

#هالة_أحمد

'' الصُحبة .. 💛 ''

'' أَحَسِبَ النَّاسُ أَنْ يُتْرَكُوا أَنْ يَقُولُوا آمَنَّا وَهُمْ لا يُفْتَنُونَ وَلَقَدْ فَتَنَّا الَّذِينَ مِنْ قَبْلِهِمْ فَلَيَعْلَمَنَّ اللَّهُ الَّذِينَ صَدَقُوا وَلَيَعْلَمَنَّ الْكَاذِبِينَ ''

'' آخر مادة في آخر سنة دراسية في حياتي، كنت مبسوط جدًا .. مش مصدق انّي خلاص خلصت تعليم، وبكرة آخر امتحان .. بصيت لاصحابي اللي قاعد معاهم في السكن، كنت انا وعبدالله قاعدين على سرير، ومحمود وعامر قاعدين على السرير اللي قصادنا، قُلتلهم: 

- خِلصت يا جماعة

'' بصولي كلهم، ورد عامر وقال:

= خِلصت يا مصطفى
- والله مش مصدّق .. رحلة خمس سنين صيدلة خلصت خلاص
= عبدالله: الايام دي هتوحشني والله، والشقة دي كمان

'' رِجعت بذكرياتي لورا، وافتكرت أول سنة في الجامعة لما جيت انا وعبدالله وأجّرنا الشقة دي عشان نسكن فيها، وبعدها جه محمود، وبعده عامر .. ضحكت لما افتكر عامر كان عامِل فينا ايه أول ما جه، بصتله وقُلتله:

- مصطفى: فاكر يَلا يا عامر اول ما جيت تسكن معانا هنا؟ ماكنتِش طايقَك ولا بطيق كلامَك

'' ضحك، وقال:

= عامر: قال يعني انتَ اللي كنت تنطاق اوي
- محمود: مانتَ كمان كنت صعب جدًا يا أخي، مربّي دقنَك، وكنت كل ما نفتح التليفزيون تقوم تقفله وتقولّنا هذاكر، نشغّل اغاني تقولّنا اصلي مش بسمع اغاني، تطردني من الاوضة رغم انها اوضتي انا كمان وانا بنذاكر عشان انتَ عايز تصلّي، لا برده كنت صعب يا عامر ومتشدد
- عبدالله: بصراحة كنت مزوّدها حبّتين، احنا اصلًا كنا بنتفق مع بعض ازاي نطردَك من الشقة
- مصطفى: كنت متشدد متشدد يعني

'' ضحك عامر وشاور على دقني، وقال:

= عيب على دقنك لما تقول عليا انا اللي متشدد
- مصطفى: اعمل ايه بقا .. من عاشر القوم اربعين يوم، ودول مش اربعين يوم، دول خمس سنين
= طب كمّلوا مذاكرة بقا عشان مايبقوش خمس سنين ومادة

'' احنا دايمًا بنحب نهزر مع عامر ونقول عليه متشدد، لكن هو ماكنش متشدد ولا حاجة، هو كان دايمًا صح .. وطبيعي في البداية ماكنّاش بنطيقه، لان اسلوب حياته كان مختلف عن اسلوب حياتنا تمامًا، لكن زيّ مابيقولوا .. مصاحبة الصالحين تُصلحك، ومصاحبتنا لعامر صلّحت فينا كلنا عيوب كتير، ماكنّاش واخدين بالنا انها موجودة .. على رأسهم الصلاة، الفضل لعامر مع ربنا اننا ننتظم على الصلاة في وقتها.

انا وعبدالله نعرف بعض من زمان، معرفة من ايام المدرسة .. لكن ماكناش صحاب خالص، لكن نعرف بعض، بعد الثانوية لما اكتشفنا ان احنا الاتنين جاتلِنا صيدلة ونفس الجامعة بدأنا نتكلم ونتواصل، واتفقنا ان احنا هنشوف لينا شقة نسكن فيها جمب الجامعة.