وضع يده بجيب المعطف وجد ورقة فأمسك بها بتساؤل وفتحها ليلقي نظرة على ما بداخلها
" قابلني الساعة 11 بليل في كوستا كافيه انا الراجل الي حذرتك "
اختنقت انفاسه فهو يكره تلك السيرة ومزق الورقة اربا بحيث لا تظهر منها معلومة ولا حرف واحد وذهب في المعاد المحدد وجده يجلس على طاولة فذهب اليه
" ايه شغل المخابرات ده بقى؟ " تحدث نادر بضيق
" اسمعني كويس انا عايز اساعدك "
" ما لما انت يا بني آدم انت عارف كل بلاويهم ما تفضحهم بتدبسني معاك ليه!..انا واحد مراته على وش ولادة ومش ناقص توتر وهم! "
" انا كل الي معايا ضاع واتسرق افهم!..ما انت لو تسمعني بس! "
" طب انت اسمك ايه!؟ "
" لما احتاج انك تعرفه هعرفهولك "
" طيب اتكلم " تحدث نادر
" كان فيه فلاشة متسجل عليها كل حاجة عايزك تطلعها هى موجودة في جيب ممدوح متعلقة في الدلاية بتاعت المفاتيح بتاعته عليها كل بلاويه الزرقا لغاية حوار كورونا ده "
" نعم يا اخويا!..وانا المفروض اجيبها ازاي دي!..وبعدين ما لما انت ابو العريف كدة ما تجبها بنفسك ولا خايف!! " تحدث بانفعال
" انا مش هينفع لأني كارت محروق انما انت محدش يعرفك ومحدش هيشك فيك..انت الي جيت بدالي عارف ليه؟ "
" ليه؟ "
" انا اتقفشت اياك تثق في الي اسمه اكرم انا وثقت فيه وعرفته كل حاجة وهو حاول يقتلني بس انا هربت ولسة بيدوروا عليا انا بعرض حياتي للخطر عشان اعرف أحذرك ونساعد بعض "
" طب فهمني قولي اجيبها ازاي! "
" اسمعني كويس.. الناس دي الي مقويهم الامريكان "
" لا دي كملت بقى!..والمفروض ان انا بجلالة قدري الي هفضحهم!..يا راجل حرام عليك احنا بنحارب في قضية خسرانة! "
" يا عم نادر استهدى بالله بقى..احنا هنفضح الشركة دي وبس لا لينا دعوة بالامريكان ولا غيره لأننا لو جبنا سيرتهم هنروح في ستين داهية"
" طيب..مقولتليش بردو هجيب الدلاية ازاي!؟ "
" دي حاجة تخصك انت بقى اتصرف اتشقلب وهاتها انا جمعت كل فضايجهم وتعبت وشقيت والمفروض انت تجيبها دي حاجة بسيطة قدام الي انا عملته "
نظر اليه نادر بغيظ كان يتمنى لو يستطيع لكمه في وجهه
" المهم قولي يا نادر عملت ايه في العينة الي اخدتها "
" وانت عرفت منين اني اخدت عينة! " تحدث بذهول
" عرفت زي ما عرفت قولي عملت ايه "
" دي حرفيا سم قاتل بتمحور الفايرس وبتخليه يتكاثر بصورة رهيبة في الجسم لغاية ما يفتك بالجهاز التنفسي ويقتل الانسان في خلال يومين " قص عليه التجربة بالتفصيل
