خير ما نبدا به الكلام هوا الصلاه على سيدنا محمد عليه الصلاه والسلام... ف حديث "ابن مسعود" ف الصحيحين قال النبي (ص)
"من استطاع منكم الباءة فليزوج"..
اللى يقدر على متطلبات الجواز يتوكل على الله ويعف نفسه.. والصلاه الحب كلاهما باطل بدون طهاره!.. فادخلوا البيوت من ابوابها يرحمنا ويرحمكم الله..
بسم الله مشاء الله... الله يوسع عليك ياسيدي ماحدش قدك.. كبرت وبقيت عريس، وربنا يسرلك بفضله الحال وبتدور على نصك التاني اللى يكملك.
وانتي بقيتي عروسه وربنا باذن الله يرزقك بابن الحلال اللى يصونك
فالبدايه بدور على ام ولادي.. تحبني.. تحترمني.. تحفظني فى مالى وعرضي، وتكون قريبه من ربنا، وطبعا مش شرط تكون حافظة القرآن قد ما هوا يكون شرط اساسي ف اخلاقها ولو ايه من القران.. انتي كمان من حقك تحتاجي الراجل اللى يقدرك.. يحترمك.. كريم عليكي.. رومانسي.. وسيم.. مايخونش ربنا فيكي... طموح.. لاكن للاسف معظم الاحيان بيبقي الجواز تقليدي، ومن حقك كراجل تختار الانسانه اللى تحس انها تستحق تشيل اسمك.. شخصيتها تنجذب لشخصيتك كانكم مغناطيس او بازل بتكملو بعض.. وانتي كبنت من لحم ودم من حقك تختاري الشخص اللى تحسي معاه بالطمأنينه والامان..
متوافقيش بأي حد حتي ولو اهلك غصبوا عليكي انك ترتبطي بشخص معين ماتوافقيش، واسالى عن الل بيتقدملك ولو حاسه انه مش مناسب ماتقابلهوش.. دا لا يعتبر عقوق والدين لانه حقك الشرعي اللى ربنا اعطاهولك.
عارف ان ف بنات كتير م حقهم يحبو ويتحبو فدايما ادعي ربنا يرزقك بالشخص اللى يملى عليكي حياتك وقلبك وخلي عشمك وظنك فى ربنا كبير.
قبل ما تتقدم لاي بنت لابد يكون مستواك الاجتماعي افضل منها او ف مستواها نفسه بحيث تعيشها الحياه نفسها اللى كانت عايشاها اهلها.. ده حقها ومش عنصريه قال تعالى(ورفع بعضكم فوق بعض درجاتٍ) اذا متحرجش نفسك او تحط روحك فى معادله مجرحه، وترجع تقول رفضوني..! لو البنت رفضتك مره خليك حسيس وما تتقدمش تاني.. الا لو هي عوزاك دا امر يختلف وكل انسان حر ف قراره.
خلاص نشنت وقررت تتوكل على الله تتقدم لبنت معينه؟.. استني هنا.. انت هتروح كد بلبسك ده؟!.. مايصحش يجدع.. انت محتاج تتلف لفه جاتوه.. لفه هديه اخر شياكه.
#مرحله اللبس..
_دي مناسبه غير رسميه.. بمعني انك مش رايح مؤتمر عالمي او فرح اخوك مثلا!. انت رايح مناسبه اسريه.. فخليك على طبيعتك وبسيط ما تتكلفش.. يعني بلاش بدله.
البس: قميص شيك لونه هادي، وابعد عن الاصفر الله يباركلك..
وبنطلون جينز من زارا مثلا وجزمه من ماسيمو دوتي.. اكيد بهزر معاك..
البس الماركه اللى تعجبك ولاكن المهم تكون مظبوطه عليك وارجوك متلبسش كوتش انت مش رايح عند عمتك.. البس جزمه.. بحيث هي تحس معاك بالبساطه وف الوقت نفسه الرقي ف احترام المناسبه وبكده هتوصل الارتياح لمظهرك.. ياريت تكون لابس ساعه نفس لون حزامك ونفس لون جزمتك
والبرفيوم لازم يكوم قيم وريحته حلوه ومش فاقعه.. سنانك كمان مغشوله زي ما اوصانا النبي.
التفاصيل بتفرق جدا خالى بالك عشان نبقي قفلنا عليها سكه شياكتك وتنسيق لبسك.
انتي بقا: متلبسيش مثلا فستان سواريه.. الراجل لسه ما تدبسش. الله يحبك.. البسي احسن طقم بتحبيه عندك.. لما بتحبي لبسك لبسك هيحبك وهيحليكي.. مكياجك لو حطيتي يكون خفيف لان انتي اللى روحك هي اللى هتحدد جمالك، واعتقد ان لو روحك لقت قبول من ناحيته اذا ضحكتك فى نظره هتبقي اجمل مكياج.
_ فك ايدك الست بتكره الشخص البخيل.. هات علبه شكولاته عليها القيمه وانت رايح اوعي تروح فاضي!. ... وصلت؟. حمدلله على سلامتك يسيدي.. عينك تكون محترمه.. متبقاش زايغه علشان هتفهمك وهتاخد عنك انطباع ومش ولا بد.. تدخل.. سلام عليكم.. راسي.. هادي... رزين وتقعد.. خليك طبيعي وعلى حريتك بس اكيد ماتربعش رجلك.
ايوا جايلك... مرتبكه.. متوتره.. جايبه العصير وداخله.. حاسبي يقع.. هتقعدوا سوا.. مفيش مانع تبصي له ويبص لك.. سيدنا "عمر ابن الخطاب" قال لعاصم ابنه وهوا رايح يخطب له: انظر اليها وانظري اليه.
مكشر ليه؟ خليك مبتسم الله يهديك!..
خليها ترتحلك وتوصل للقبول.. القبول ده هوا الكود والرفم السري اللى بيدخلك ببياطه لاي قلب.
اسالها بتحلمي ب ايه وطموحاتك ايه؟.. حسسها بقيمتها وتبقي من جوالك متاكد انها قيمه كبيره.. الانطباع الاول بيدوم.
قوليله احلامك كلها واتكلمي بطبيعتك من غير تزويق ولاكن متبقيش مدب.. متقوليش مثلا نفسي اسافر تركيا عشان اقابل بطل مسلسل حريم السلطان.. حرمه عليكي عيشتك ياشيخه هتطفشي الراجل!
_اسألها.: بتعرفي تطبخي؟.. خليكي صريحه!.. مابعرفش اعمل غير صنيه بطاطس وبحرقها!... اضح.. وقول لها هنبقي نطبخ سوا ان شاءلله ما تقلقيش.
_قوليله انت بتعرف تطبخ؟ قولها اومال... دا انا احسن واحد يعمل شاي!.. حسسها انك مرح.. بسيط تلقائي.. الست لما بتطمن بتحب ولما بتحب هتتقبلك على اي حال
عرفها على شغلك.. اهتماماتك.. سواء بتحب تقرا، تكتب، تلعب كوره او بلايستيشن.. هتلاقوا بينكم حاجات مشتركه زي مثلا حب السهر، القهوه، الشتا، اسكندريه، وهكذا"
اسالها عن اهتمامتها: بتحب تشمع لمين، تقرا لمين، بتحب تعمل اي فى اوقات فراغك وتروح فين؟.. اكتر اكله بتحبها... ايه اكتر اسماء اطفال بتحبها بنات وولاد نفسها تسميهم.
مهم جدا متبقاش رجعي بقي وتسالها. بتحبي؟. كنتي مرتبطه؟
هترفضك بالتلاته.. واوعي برضه تقولها فركشتي خطوبتك الاولى ليه؟.. كل دي اسئله مش فى محلها وده مش وقتها... خليها قعده تعارف تكلمها عن احلامك وهي كمان تكلمك عن طموحاتك وهكذا.
ان شاء الله هكمل بكرا تابعوني وتفاعلو هيفرحني جداا♥
أنت تقرأ
ليطمئن قلبك
Chick-Litاحيانا بتحتاج لشخص تفضفض معاه وتحكيلو كل احزانك واي حاجه سواء تجبر بخاطرك او حد تحكيله ف يخرجك م الاكتئاب الل انت فيه ويقدملك حلول وقعت ف ذنب يساعدك ازاى تتوب وتمسحه بأستيكه مريت بملل من الطاعه يعينك تتخطاه داخل ع امتحانات يجبلك افكار المذاكره ويسهل...
