❤️غلطه حب ❤️

تفهم.... الحياه

فتحت عيوني على كلام امي وهي تحجي لابويه
أن يجيب خواتي ب١٢:٣٠الضهر من المدرسه وما يتأخر عليهن لأن يخافن وخاصه الصغيره لأن بعدها اول ابتدائي
متطابقه وياها بيبيتي بالكلام
كايله
اي
يمه حيدر
تره يظل بالي عليهن يمه
لا تتأخر كود انته بال١٢:١٥ بالمدرسه
وواكفلهن بباب المدرسه حتى اول ما يطلعن يشوفنك كبالهن خوش يمه مو تنسى
ودربالك عليهن...
.
حيدر
اي يمه شبيج من البارحه وانتي تنكين عليه دربالك على بناتك ودربالك على بناتك
ادري مو بناتي هنَ
اكيد اخاف عليهن وادير بالي
اذا مو عليهن اخاف عليمن اخاف لعد ...
يلا بابا
راح احمي السياره مابين تلبسن احذيتجن..خوش
يلا
.
ورجعت نمت مره لخ
لأن جنت حيل نعسانه بس أصواتهم جانت عاليه فكعدت من وراها...
وراودني حلم كلش حلو
بحيث هسه من اكتبه الكم جاي أحداثه اتخيلها براسي
شفت اني واكفه بحديقه كلش
جبيره ومليانه زرع وورد
وأشجار
والهواء الي جان يداعبهن للورد الي جان يطلع ريحه كلش طيبه تفتح النفس
وجان اشوف مراه ما اعرفها منو هي بس جانت حلوه
يعني جانت لابسه لباس القديسه واجت وكالتلي
زوجتك تنتضرك
باللهجه الاجنبيه (your wife whetting you)
واني جنت دا افتهم كلامها
وبالحلم
اكول ببالي
أن هذا عرسي باوعت على نفسي جنت لابسه بدله عرس نسائيه جميله الشكل
رايحه ويه المراه القديسه
لحد ما وصلت لمكان كلش حلو بيت جبير
مع حديقه كلش حلوه وواسعه وبيها ناس اجانب
ما جنت اعرفهم واغلبهم نساء الاكثريه
وجان تسحبني المراه لحد المكان الي يتواجد بي العرسان
وشفت زينه من بعيد وهي تمر بين كل الناس على البساط الأحمر
وكدامها بنات صغار مثل الملائكه يطشن الورد بالكاع
متقدمه وراهن زينه الي طلت بهيئتها الجميله وهي لابسه بدله العرس نفس مالتي
وجانت مسرحه شعرها بتسريحه غير مخليتها احلا واجمل
متقدمه مني واني ما مصدكه وكلت
زينه ...هاي شنو
راح نتزوج
.
راده عليه وهي تلزم ايديه
اي حبيبي
راح نتزوج
وراح احلف الج بوعدي الي وعدته الج
شوفي هاي الناس كلها
جايه حتى تبارك النا بزواجنا
مثلنا
معضمهم
عندهم نفس الميول
وبعضهم
يدعمونه...ويحبونا
شكرا لانج بقيتي لآخر نفس وياي
وتخطينا كلشي
وهسه راح نتزوج ...
.
هنا ...هنا ...هنا يمه كعدي
الساعه ١١ الضهر حيصير
يله وبعدج نايمه
كومي
ورانا روحه للدكتور ابوج بعد ربع ساعه زمان ويجي
يله كومي
.
هذا جان صوت امي الي سمعته والي خلاني اكعد من حلمي واكول بعقلي
جان حلم ...مو حقيقي
شكلي راح أظل احلم بس ...ما اعتقد راح هل الحلم يتحول للصدك...اوف...بس اوف
.
كمت وتريكت وراها أبويه اجا
وبدلت طبعا
ورحنا للمستشفى حتى نوخر الخياط مال عمليتي
دخلت للدكتور الي جان عنده زياره صباحيه لمرضاه
وكله
حيدر
دكتور
صباح الخير...شلونك
شلون الأحوال
جبتلك هَنا حتى تفك خياطاتها مال العمليه
أنته كلت بعد ١٠ ايام وتعالوا للمستشفى واني اوخر الها
خياطاتها
.
وليد :
(اسم دكتوري بالحقيقه وليد 😁)
اهلا وسهلا
شلونج هَنا
ها شلون الأوضاع المعنويات
عاليه مو ...
.
رديت
الحمد لله دكتور بخير
اي طبعا عاليه
عال العال...همين
(بضحكه)
.
رد
اي خوش
بس اني ما كلتلكم تعالوا بالمستشفى
تعالي العصر بالعياده...
واني اوخرهن هناك
وأشوف ...اوضاعها..مو هنا يا ابو هنا
.
حيدر
لا والله
لعد نسيت مدري توهمت زين ما يصير هنا
؟
هي شغله ربع ساعه ما اطول
دسويها مادامنا هنا كدامك..فدوه لعيونك اغاتي..
.
وليد
لا والله ما اكدر حاليا لأن عندي عمليات
بعد شي ربع ساعه ادخل صاله العمليات
عندي مرضى
العصر اني بالعياده حتى هذا الكارت مالي
خابر السكرتيره واحجز رقم ..تمام ..عيوني
اعذرني والله حبيبي...
.
لقاء
جاي يكلك الرجال ما يكدر حيدر لا تلح
لعد خوش دكتور احنا العصر أن شاء لله يمك بحدود ال٣:٣٠ ال٤:٠٠
.
وليد
اهلا وسهلا بيكم
بكل وكت تشرفوني
.
حيدر
شكرا دكتور مع السلامه
رحمه الله والديك
.
وليد
ووالديك الف سلامه وياكم
.
.
طلعنا من المستشفى واسمع أبويه يحجي بصوت عالي
ويكول
ابن النعال
يكولي مااكدر عبالي اني غبي ما افتهم هو شيريد
اني اكلج ماكو من انروح العصر اله..للعياده راح ننطي كشفيه.. وشكد كشفيته
٢٥ الف
كفر
ومحمد
وشكد توسلت بي
ومصر لا
الا بالعياده ... ابن الخرى
ولا يكول خطيه لا
..ما عنده هيج حجي ..لازم ادفعلي احييك ما تدفع روح موت موتت الجلب...
.
وهنا امي
ضلت الطريق كله تحاول تسكت بي
وتهدي
لا يروح واحد يسمعهم و يشتكي علينا
.
امي
هسه هو غير يسكت
مداشوف احنه بنص المستشفى
وكلها هنا دكاتره وممرضات يروحون يوصلون حجي ياعيني
دسكت
ناقصنا انوب ننسجن أو يشدون ويانا عداوه
دمشي امشي
هسه
احنا يوميه جايين قابل
هي بس هل المره والله ومحمد وعلي وياه
وان شاء الله ما انشوف وجه مره لخ...
.
.
.
رجعنا للبيت
بعد ما نزلنا للسياره أبويه وراح كوبل لخواتي
حتى يرجعهن للبيت من المدرسه
دخلت اني لغرفتي
وفتحت جهازي
وكبل على زينه
استغربت ما شفت اي اتصال منها أو حتى رساله
قلقت هاي شبيها ...خاف صاير الها شي
رحت دكيت على الرصيد
وبديت انتضر لحد ما جاوبني ابنها
(زين العابدين)
.
الو
راده عليه
.
متلبكه وكايله
ا....ا.....الو
الو
وين امك (كات /اعرف اعرف شنو وين امك ادري سوالي غبي بس والله جنت متوتره اوك المهم نكمل😑😒)
قصدي زينه وين زينه ...
.
زين
امي يم أبويه
كاعد تسويله المغذي...
انتي منو؟
.
أهنا حسيت بشعور حيل مؤذي حسيت أن اني جاي اخرب علاقه اسره كامله
حسيت
اني الطرف الثالث كاعده اعيش هل الشخصيه وهل اللحضات الي جنت خايفه من زمان اعيشها وفعلا
اجا اليوم والوكت الي عشتها وحسيت بهل الشعور الي ابد مو حلو ....حيل مؤذي للنفس
.
قفلت الخط بعد ما كلت للولد
زين ماشي لعد اني بعدين اتصل بيها
الضاهر مشغوله
مع السلامه
.
.
.
اتنهدت وطلعت كل النفس الي بداخلي
وزفرته ليبره
حسيت نفسي ضايجه
أريد
اتصل بيها وبنفس الوكت لا...
اكول ما اريد أخرب عليها اللمه مال عائلتها...
.
أهنا حسيت اريد احد يسمعلي وافضفض اله
منو
منو هل الشخص الي راح يسمعني بدون لا يقاطعني
وبدون لا يأذيني بكلامه أو حتى ما يبقي هل الكلام الي احجي اله بداخله يروح ينشره بكل مكان ...منو هو
.
وهنا اجت عيني على القرآن وعلى منضده الصلاه مال بيبيتي...
ابتسمت وحسيت دموعي تريد تطلع اخذتني العبره
ردت أتوجه لربي
واصلي
وادعي
بلكت هو يخفف ولو شويه من الي جاي اعيشه
تقدمت
وبخطواتي
وأخذت اتوضى والبس حجاب الصلاه
وكعدت على منضده الصلاه
وبديت اقول الشهاده
واكبر
واصلي
ودموعي بدت تنزل بديت احس بالغصه واني اصلي
خشعت وخضعت لله عز وجل
وبديت ادعي وبكل قريح كلبي
.
يارب
انت ربي
والي خلقني وكوني وحطيتني وزرعتني برحم امي بعد ما صبرت واستعانت بيك حتى تحصل على ذريه ..وانته ما خيبتها وانطيتها اني
ياربي
أنته
القادر على كل شئ
أنته الي خلقت وكونت
أنته الرحيم والغفور
أنته جبار الخواطر
يارب
اجيت أستعين بيك
لأن أنته الي تعرف مصلحتي
كلش زين وتعرف شنو الي يفيدني وشنوالي يضرني
يارب استشيرك وادعي واتنجى اليك
خاضعه
وطالبه منك
يارب
اريدك تنطيني اشاره ياربي
هل الي جاي أسويه صح لو لا
ضميري جاي يأنبني ياربي
ما احس بالراحه احس اكو غلط وكلش جبير
جاي اقترفه
يارب أنته الي خلقت ميولي
واذا أنته رافض مني أن اعيش ويه امراه واحبها
فياريت تغير ميولي أو توخر وتنزع حبها من كلبي
مع أن صعب بالنسبه الي بس الك لا
ياربي
اني
اريدها
وبنفس الوكت
ما اريدها
اني حتاريت
شسوي
شنو الحل
أتوكلت اليك وارجوا أن لا تتركني ..واني واثقه مراح تدير وجهك الكريم عني وتتركني بهل الحيره ...
امين...
.
.
.
خلصت صلاتي وفعلا حسيت بشويه راحه
لأن طلعت كل القهر الي جوايه بس مع ذالك ظليت حزينه...وافكر بنفسي والي جاي اسوي
من ظلم
الها..
.
صار وكت الغداء والكل اجتمع على الطاوله
وبدت خواتي يحجن شلون جان يومهن وقصه الدكتور الي ما نزل من لسان بيبيتي وابويه وشلون جان يدعون عليه
ويقذفوا بكلام غير مقبول
أن ينحجي كدام طفل
بينما جنت اني بغير عالم بحيث كل الي فكرت بي
هو شلون راح تجيني ايام
وشلون راح تراويني وشلون راح اعيشها وياها
اتركها
بس اني احبها
بس هي متزوجه
عادي تتطلك
وولدها شلون بيهم
زين شنو نهايتي وياها
شلون حكضي حياتي الباقيه وياها
كلها اسئله تدور براسي
جاي تضغط عليه
اوف...اوف...اوف...راح اطك
.
كمت من السفره مال الأكل
ورحت لغرفتي
متجاهله نضرات اهلي المستغربه لأن ما اكلت مثل كل مره ...
.
اتجهت لجهازي
وفتحته وشفتها بعدها ما راسله أو مخابره
عليه...
ادك عليها مره لخ
خاف يطلع ابنها مره لخ وما اعرف شرد وشكول.؟
زين
لعد شلون ابقى هيج
كاعده واتكرظم وكلبي جمره مال نار...
اوف......ياربي.....
خلي اروح اشوف شنو بالتلفزيون بلكت فد فيلم بي خير
أو شي انميشن
.
واول ما اطلعت ودا افتح الباب
صارت بوجهي زهراء
وهي تجرني حتى
اتكلي على تصرفاتي الغريبه الي لاحضتها
.
زهراء
شبيج هنا
شو احسج مو على بعضج صاير شي
زينه بيها شي ...اشو ما اكلتي بالغدا ولا حتى ضحكت وسولفت مثل عادتج كل يوم ...بس ضليت ظاربه صفنات وتباعين على الاكل
.
رديت والغصه بكلبي
والدموع تجمعت بعيوني...
وما اعرفت شحجي أو منين ابدي
كل الي سويته هو حضنتها وبديت ابجي واشكيلها بكل الي صار إليه والي جوايه من حجي..
وهي اكتفت بالطبطبه على ضهري وجانت حيل مستاءه لوضعي..
.
اني وجاي ابجي كلت
زهراء
زهراء..اني جاي احس بتأنيب كلش قوي ضميري مامرتاح
يعني تصوري اتصلت عليها والي رفع الخط ابنها الصغير
وكلي ماما يم بابا
لمن سألته..
وتدرين شصار بيه
ادمرت نفسيتي مدمره حرفيا ما بقى كلام سلبي براسي ما كلته...
كل الي فكرت بي اني
اني الطرف الثالث الي جنت خايفه اكون بهل العلاقه
وصار صدك صرت العشيقه السريه الها
.
راده عليه بعد ما جانت تستمعلي وتشوفني شلون منهاره بالبجي...وبين كل كلمه اغص بيها واشهك..
اوك
اوك
بس حاولي تهدئين وما تفكرين بهيج طريقه سلبيه
حاولي
تتصلين مره لخ بيها
وشوفي شنو عذرها ياعيني..
.
رديت
مو ...مو ...مو خاف يطلع ابنها مره لخ أو رجلها شريد اكول أو احجي
.
ردت
تمام ...انتي اتصلي بالاول
واول ما تسمعين صوتها ضلي احجي وياها أما اذا شفتي رجلها أو واحد من ولدها فأنطي إليه اني اعرف اتصرف ...اوك ..
.
أهنا فكرت بالموضوع
وترددت بداخلي بالاول بعدين جريت الموبايل من الفراش واول ما جاي افتحه صاح الجهاز بوجهي
يدك واسمها ضهر على الشاشه
أهنا كلت لزهراء
(هذي هي اتصلت )
.
ردي عليها شمنتضره
راده عليه زهراء والفرحه ماليه وجها..
.
رديت
بعد ما فتحت الخط
وكلت
الو...
.
زينه
الو حبيبي هَنا
اني أسفه لأن اختفيت عنج هلكد
شكد مشتاقتلج لو تدرين
بس ميخالف راح اعوضج اعوض نفسي بشوفتج..
اليوم راح نتشاوف حبيبي
ببيتي
لأن حيل اشتاقيتلج
بس لو تدرين شصار بيه
.
رديت بصوت مبحوح
شصار ؟
.
ردت هي بصوت مستغرب
هناوي حبيبي شبي صوتج ليش احسج باجيه
انتي باجيه شي..
.
رديت
بعد تبلعمت
وكلت
اي بجيت
وبسببج همين
(بنتره صوت وبعصبيه)
.
ردت
بسرعه
اني
ليش
شسويت
وبعدين اني الي احبج وما اكدر اتركج ولا لحضه
اسوي شي الج يأذي
؟
.
رديت
اي
انتي
وين جنتي من الصبح لحد هسه
وليش من اتصلت عليج ما رديتي عليه
ورد عليه ابنج الصغير زين
ها؟
.
ردت
انتي دكيتي عليه ؟
ما جنت ادري انتي داكه عليه
اصلا من البارحه لحد هسه واني بالمستشفى
.
قاطعتها
اي
ادري بالمستشفى الخره
جنتي
لمن سألت ابنج الافندي
كلي امي يم أبويه ولا ما كالها هيج
كال ماما يم البابا بطريقه الدلع ..(وهي تقلده )
وتدرين من كالي هيج
شفكرت وشلون انقهرت حسيت بإحساس زباله مثلج
لأن حسيت اني العشيقه السريه مالتج
انتي مو كلتي احبج الج وبس وما احبه
ولا اتقبله
لعد شلون حضرتج كاعده يمه (بصفه)
ها
بصياح مغضب يليه البجي والغصات بالكلام متقاطعه
بالحجي...
.
ردت بهدوء
هنا
اسمعيني شويه قبل أن تتهميني
أو تشككين بحبي الج
اي فعلا اني احبج وما احبه ..
.
قاطعتها
لعد ليش ما رديتي على اتصالاتي أو حتى راسلتيني
بيش جنتي مشغوله غير برجلج..
.
صاحت هي هنا
عليه وكالت
هَنا ...رجلي وولدي مسويين حادث
مال سير...
لمن جانوا راجعين للبيت من محافضه كربلاء
وصار حادث سير الهم ونقلوهم بالمستشفى
علي انكسرت رجله وصار عنده ضيق بالنفس ودكات كلبه سريعه لأن عنده خفقان الا شويه وراد يتوفى بس الحمد لله تلاحكوله الاطباء
أما جهالي فأحمد الله على اي حال
لمن ابني حسين رأسه مفتوح ودخلوا صاله عمليات
وزين العابدين مرضوضه ايده ..فالهذا السبب اني جنت غايبه عنج..
لأن جنت مصدومه وبعدين اني مو بالحله اني بكربلاء
حاليا ...واذا ما صدكيني راح افتحلج كاميرا حتى اثبتلج صح كلامي...
.
ضليت ساكته وبس عيوني ادير
فاتحه وراها الكاميرا
وكايله وهي تأشر على رجلها وولدها الي جانوا نايمين بنفس الغرفه
وجان راسه مخيط ابنها حسوني
ونايم والمغذي محطوطله وراسه مشدود
أما زين
فجانت أيده مجبره من الطول للطول
وكاعد على السرير وبأيده موبايله
ورجلها
علي
فجان
مكسوره رجله وحاطيله تنفس بخشمه...
.
وراها طلعت من الغرفه
وطفت الكاميرا وكالتلي
ها ...شفتي
الي صار
صدكتي كلامي هسه
تدرين هسه اني شنو حالتي مدمره
شلون كلبي نار عليهم
ومحتاجتج بصفي
وتدرين هسه من اتصلت بيج بعد ما كملت اجرآت الدخول للمستشفى
واطمنت على حالتهم وكلساع جيبي هيج نوع ابره
وهيج نوع دوا
وسوي لكل واحد طبله
وشويه فكيت عن صدمتي
شلون فكرت أن لازم اتصل بيج لأن اريدج يمي
واريد اسمع صوتج حتى ارتاح
واشكيلج همي...
تاليها تحجين حجي يأذيني وتشككين بي
يعني انتي ما تثقين بي
هنا
الى متى راح أظل اركض وراج واكولج اني احبج الج وبس
الى متى راح تظلين ما تصدكيني ولا تثقين بي...
.
أهنا طبعا اني ما حجيت اي
شي
وحسيت بتأنيب ضمير لأن اذيتها بكلامي
واستعجلت هواي بحكمي عليها واذيتها وما سمعت منها
وما سَمعتها الا الكلمه الشينه..
وحسستها أن اني ما واثقه بيها وان هي ما تحبني
...
اني أسفه
كل الي بدر مني
هو الاعتذار
والله مجان قصدي ائذيج بكلامي أو احسسج أن انتي ما تحبيني أو جاي تلعبين بمشاعري
بس تدرين اني جنت حيل متوتره وخايفه وقلقه عليج
يعني انتي عودتيني عليج وخليتيني اتعلق بيج وما أريد غير اسمع صوتج وغزلج بيه الي كلما اتصل بيج
أو تتصلين تتغزلين بكلام حلو
ويخلي كلبي يحبج اكثر وروحي وعقلي يتعلقون بيج
واريدج أكثر ...
هذا الي خلاني احس ان انتي ...
.
ردت عليه بعد ما سمعت كلامي والي مصاحبه البجي
أن اني
شنو
هممممم
اني جاي اضحك عليج لو مثلا
حاطتج احتياط
لا
انتي حبيبتي
انتي نصفي الثاني والي راح اتمسك بيج وبحبج لآخر العمر
اني وياج راح نظل سوه
انتي إليه واني الج
صدكيني وثقي بي
محد بكلبي غيرج تمام ...
بلا الكلام الفاضي الي تفكرين بي
احساس انتي مجرد علاقه عابره أو حاطتج احتياط وبلا بلا بلا...
لا
اني لمن كتلج احبج معناها اني داخله وياج بعلاقه
ونهايتها زواج
يكون بعلمج
انتي ما تعرفين هسه شظامتلج
من مفاجئه جبيره
وكلش حلوه هم....
انتي بس انطيني مجال حتى اتخلص من المصيبه الي اني بيها هسه
وبعدين راح أتفرغ للشي الي راح يكون السبب بجمعتنا سويه
ببيت واحد وبفراش واحد
وروح وحده ماشي
يا كلب زينه
ماريدج بعد تبجين وتفكرين بهل التفكير السلبي الي اصلا ما راح يصير
تمام
وعديني انج مراح تشكين بهل الطول بي
أو بحبي ألج وبعلاقتنا الحلوه
يول ما صدكت كلتي اي ووافقتي
تجيني تكوليلي انتي معتبرتيني العشيقه السريه مدري ياهو..
؟
.
سمعت ضحكتي الخفيفه لمن حاجتها بطريقه طريفه
والي خلتها تغازلني مثل كل مره
لحد
ما قفلنا الخط بعد ما وحده ودعت الثانيه
وطبعا وحده كالت للثانيه
أن تدير بالها على نفسها
واني
كلت الها
أن تدير بالها على حسين وزين
وحتى رجلها
وان شاء الله يصيرون زينين
ويتحسنون
وهمين هي
سألتني عن عمليتي وكالت المفروض اليوم توخرين الخياط مدري السيامه (ازرار العمليه)
وكلتلها
على الي صار وياي الصبح
وحست أن هواي بخاطرها تكون وياي بهاي اللحضه وهي الي تريد تروح للدكتور وياي
بس جان القدر ضاملها حفره من حفر الحياه ...المتعبه...
.
.
.
.
.
يتبع