فجر اليوم الثاني
تقابلوا الفجر بالمسجد وطلعوا سوا للبقاله الي كانت مقفله طوال الايام الي فاتت:يوووه يالغبار اتركها بامانتك وتخليها كذا
سياف واقف على الباب:قلت لك بمسكها كم يوم تحسبني فاضي لك
حمد سحب الكرسي لبرا البقاله وجلس عليه يراقب شروق الشمس:ماودكم بكشته من زمان ماكشتنا
نواف عيونه مركزه بمكان معين:اكيد ودنا
وقف جنبه ايمن:وش تناظر
نواف همس له:كاننا مراقبين
ايمن يتلفت بسرعه يعرف نواف مايفوته شي:وين
نواف ماوده يخوفه:شكلي اتوهم
التفت عليهم:شرايكم هالمره نكشت عوائل
سياف على طول فكر فيها:مااقدر
نواف:وش وراك عاد فاضي ماعندك شي
سسياف:امور خاصه
حمد بسخريه للان مومعجبه الي سواه:بنطول لين تخلص امورك الخاصه
ابتسم من لمح نبرته الساخره مارد عليه
ايمن بحماس:قرروا وانا معاكم والله اني مشتاق للبر
نواف ابتسم:ايوالله شرايك نروح انا وانت بحريمنا ونترك هالاثنين
شكل ماودهم
حمد رفع حاجب:ماشاءالله إذا هو ماوده يروح انا انا الي مقترح
ايمن اعتدل من دخلن حريم للبقاله:اجل شاوروا اهلكم نطلع بكره
سياف تضايق من حمد ورميه بالكلام وزعله عليه مايحب يشوفه كذا وهو متعود عليه بشكل غير وقف:استأذنكم
ايمن بعد ماحاسب للحريم جلس بمكان سياف:شبلاكم متهاوشين
حمد بقهر وانظار لسياف:مالك دخل
ايمن اسند ظهره: الشرهه على الي يسأل مهتم فيكم وانت ياويلك تمشي مادفعت حق الي بيدك
نواف وهو يأكل الشبس:يمه منك يالبخيل بدفع بدفع
ايمن:موبخل وراي بيت اجمع الريال قبل الخمسه
نواف:ابوطبيع
ضيق عيونه:شقصدك
نواف بضحكه:ابد سلامتك
وقف حمد ومشى تاركهم يتناقرون كان متجهه لسياف لكنه غير وجهته لبيته تاركه وده يحس بالغلط الي سواه شافه واقف على باب بيته مسكه من ذراعه من طنشه يفتح الباب:صدك يتعبني يااخوي
حمد نزل المفتاح تكتف يطالعه
سياف:معترف بغلطتي لكن ماقدرت اخليها وانا اسمع انه يضربها لوانت مكاني كان سويت الي سويته واكثر
حمد برفعت حاجب:انت فتحت ابواب كثيره عليك من دخلتها بيتك وبيت عمها واختها موجود ، قال بقهر وهو يأشر على الفراغ حوله:تحسبني مبسوط وانا اسمع همسهم عليك والله اني اضيق من اشوف نظراتهم المشككه لك و
من القهر الي تراكم بحلقه من كل مامر من عند احد يتكلمون عن سياف والي سواه ولاقدر يكمل كلامه وكيف يصيغه ضربه بقبضة يده على كتفه بقوه
ماابتعد من قدامه هذا هو حمد إذا ماعرف يقول الي بخاطره يضربه وبعده يسامح ويرجعون مثل ماكانوا وهالشي قوى صداقتهم ماصد ولاضربه من ضربات حمد المقهوره عليه اخذ نفس:والحين وش السوات
سياف وعينه بعين حمد:اول ماتولد بعقد عليها
حمدماعجبه هالشي لكن مايلومه:تروح معنا للبر وان ماجيت
صدقني بيطول الزعل
مارد عليه فتح الباب ودخل تارك سياف يبتسم براحه
:
اول ماطلع استقبلته اشعة الشمس البارده غطى عينه
وهو يزفر وقفت قدامه سيارة:طالع من الشر يالخوي
ميل فمه وهو يقول بداخله(الا والله انتوا الشر بعينه)
مارد ركب السيارة وغطى وجهه بالشماغ:لاتصحيني لين نوصل
مد له الجوال:ابشر بس لازم تبلغه انك طلعت
تعدل بتأفف:هاتتت
شاف الابراج ضعيفه انتظر لين وصلوا حدود الابراج
واتصل سمعه يرحب فيه:ياهلا ومرحبا ماصدقنا تطلبنا خدمه
:اكيد ماتصدقون عشان تمسكونها علي الس
قاطعه:إن كان ودك نهد حيلهم ترانا جاهزين
:والله لويطول اذاكم ديرتي لااكون اول من يحرقكم تسمعني
ضحك بخبث:حقييير مالك صاحب ياخالد
قطع الاتصال بوجهه مااحقر من الي جنبه الا هو
وصلوا للمستودع نزل تمنى ترجع سنينه ولايدخل هالمستنقع النجس ويسلم منهم حتى السلام مايعترفون فيه تحيتهم كم بعت وكم وزعت
اول ماشافه التفت وراه:الشنطه وين؟
خالد بإستفزاز :صح ما عطيتكم خبر انحرق بيتي بالي فيه
مسكه مع ياقته بعصبيه:وانت صاحي تحطها ببيتك
خالد ببرود:اصحى منك العبها على المكشوف
لكمه على وجهه بقهر مسك فكه وهو يناظره بحده:قد هالضربه ياجبر
جبر بعصبيه:ايه قدها وشبتسوي
اعتدل وهو يبتسم بسخريه:لاابد موانا الي بسوي
التفتوا كلهم على صوت سطام الي جاء اول مابلغوه ان خالد موجود بالمستودع :شصاير هنا
خالد ضحك من سمع جبر يشكيه وهالشي خلى جبر يولع غضب سطام التفت لخالد:نسمع ياخالد
خالد:ابد هذا جبر وهذي حركاته مضيع الشنطه وحاطها براسي
وسع عيونه جبر:كذاب هو الي استلمها من...
رفع يده يسكته:القصه كامل ياخالد
خالد بخبث من زمان غاثه وموقف طريقه هالجبر:اول ماسلمتنا الشنطة حطيتها عنده وبعدها بيومين جيت اتأكد منها واكدنا تسليمها للموزع لكن التاريخ الي اتفقنا عليه ماجاء لاهو ولاالشنطه
التفت بشر لجبر:الشنطه وين
جبر بلع ريقه بخوف ولاتكلم فز من صرخ سطام:الشنطه فين ياجبر
جبر:والله مااعرف عنها شي وخالد يكذب
مااعطاه اي فرصه اشر للي وراه يجرونه وياخذ نصيبه
ابتسم لخالد:ياحي بطلنا
:
أنت تقرأ
كل مخلص في الهوى واعزتي له...لوتروح سنين عمره ينتظرها
Randomرواية كل مخلص بالهواء واعزتي له ... لو تروح سنين عمره ينتظرها الكاتبة: آمان القلب الرواية كتبتها سنة 2019 لكن مانشرتها وقررت انشرها الان تم التعديل على فصولها وبعض الأحداث ** نزول البارتات حسب الوقت الي اكون فاضيه فيه اتمنى تدعموني بتعليقاتكم وات...
