كل مخلص في الهوى واعزتي له...لوتروح سنين عمره ينتظرها

بارت 35

لو ظروفك شقى بشقى معك لين نفرح سوا
ولو حبك يهد الحيل والله لاهد حيلي واحبك

-

فتحت الباب بهدوء ظلام ماحبت تفتح الانوار عشان ماتزعجها فتركت الباب مفتوح عشان تشوف وصلت للسرير ابتسمت وهي تشوفها نايمه بهدوء التفتت للعمه الي وقفت عندها:هذي هي طيبه اسري بيتتس وارتاحي
هزت راسها لها وقربت لاختها مسحت على شعرها بحب اتكت بيدها على السرير توازن روحها بتبوس راسها عقدت حواجبها وهي تحس شي رطب اسرعت لزر الانوار شغلتها تفاجئت و شهقت من شافت يدها
العمه حطت يدها على صدرها:دم
اسرعت للسريرشالت اللحاف عنها شافت بقعة الدم الكبيره :بسم الله عليتس فاتن تسمعيني فاتن
التفتت للي متيبسه عن الباب صرخت فيها:قولي لسياف يجهز السياره بسررعه
خافت خافت كثيير تقرب وتكون اختها فارقت الحياه تناظر بضياع لاختها ثم ليدها التفتت للعمه الي تصارخ عليها وافكارها سلبيه لابعد حد بتضيع لو اختها تموت رغم قوتها الي تبينها هي ضعيفه وتستقوي باختها كل شي بهت حولها تحس شوي وتطيح
اسرعت بخطواتها الغير متوازنها تحس الارض تميل بها وصلت للاثنين الي واقفين عن الباب ماقدرت تكمل مشيها لهم جلست عند الباب وهي تصرخ بالفكره الي احتوت كل خلاياها :الحقووني فاتن ماتت راحت فاتن ياوجع روحتس ياافنان ياوجعها

التفتوا اول ماسمعوها برد وجهه من كلامها انفاسه ارتفعت ركض للداخل وهو يدور بعقله(لالا تكذب اكييد ماراحت وتركتني لايافاتن تكفين يالرووح لاتتركيني لاتتركيني) وصل للغرفه توسعت عيونه من الدم ومن فاتن الي العمه تحاول ترفعها
اقترب من عمته والدهشه بعيونه ضربته بكل قوتها من خوفها وهي تدمع:بتموت تحرك
التفت لها وقال بهمس ذبحته الكلمه قبل يقولها:ماتت
العمه ماتدري شتسوي تلقاها من افنان ولاسياف ولامن الي بين يديها صاحت من قلة الحيله وهي ترجع تضربه وتبكي:بتموت ياسياف لو ماتحركت ودها المستشفى نزفت كثيير
بسرعة شالها والعمه بيدها الغطاء
باست راس امها الي تصيح عند الباب: انتبهي لروحتس يمه بروح معه ارسلوا للبنات يجن عندتس
لحقت سياف وبيدها لحاف يغطون فيه فاتن مرت من جنب افنان الي منهاره بحضن زوجها فارتاحت انه موجود معها
العمه وهي مثبته فاتن من حركت السياره السريعه وتخبطها
وصلوا واسعفها الاطباء الي موجودين نص ساعه قضوها بتعب وللان محد طمنهم عليها
العمه جالسه تنتظر وبيدها قران تقرأ وكل شوي تناظر بسياف الي يروح ويجي بالممر وهو يدعي لها بصوت مسموع ووجهه يدل على خوفه نادته يجلس يرتاح لكنه رفض
:
فز من نومته من سمع ضرب الباب القوي ناظر بالساعه ماصار له الاساعه نايم شافها تتحرك واضح منزعجه من الصوت
وقف بسرعه متجه للباب بيطين عيشت الي يدق بهالوقت بهالشكل فتح الباب بقوه هدأ من شافه:نوااف شبلاك
نواف ووجهه مايتفسر:ادق على حمد ماحد يفتح
عقد حواجبه:صاير شي وجهك مايطمن
نواف تنهد:روح صح حمد يلحق سياف للمستشفى
ايمن بعصبيه:اجر الحكي منك جر شبلاه سياف
نواف:فاتن بين الحيا والموت وبالبيت فيه الجده وحرمتي ف
ايمن وهو يدخل بإستعجال قاطعه:لاتروح مكان جايك
دخل بيت اهله الهادي الكل نايم توجهه لباب غرفة حمد دق الباب وبصوت شبه عالي ينادي عليه بعد دقايق فتح له حمد
ايمن عطاه ظهره:البس والحقني انتظرك على الباب
ماتركه يرد عليه بسرعه اختفى لبس بدله رياضيه وجكت وطلع شافه واقف مع نواف :صاير شي
خبره نواف عن الي صار محد بيهدي سياف الا حمد
حمد وقلبه يرجف:هات مفتاح سيارتك خبر زوجتك تروح مع هبوب للجده
دخل للغرفه شافها جالسه التفتت له بعصبيه:منهو قليل الحياء الي يدق هالوقت
ايمن بهدوء:قومي البسي وروحي لاخت سياف اخذيها معتس لبيتهم
وقفت بخوف على طول فكرت بأمها:ليييش أمي فيها شي
بسرعه قال:لامافيها الاالعافيه بس البنت الي عندهم تعبت ونقلوها المستشفى والجده بروحها بالبيت
اسرعت ل عباتها تلبسها ولو انه ازعجتها ريحة النار فيها
وصلت للباب الفاصل ورجعت له بسرعه :متأكد أمي مافيها شي
ابتسم يطمنها هز راسه بتأكييد دخلت للبيت صحت هبوب وبدفاشتها وخوفها خوفت هبوب الي دموعها طرفت بعينها
دخلن بالصاله جالسه الجده ويد تسبح ويدها الاخرى على راس افنان تقرأ عليها رفعت نظرها لهن:اذكرن الله وشهالدموع البنت إن شاءالله بخير
جلسن عندها ساكتات دقايق وقالت الجده:روحن بدلن لحف السرير بغرفة سياف