كل مخلص في الهوى واعزتي له...لوتروح سنين عمره ينتظرها

بارت 27

صلى العصر بالمسجد مع ابوه :حمد وينه ماشفته
ابوحمد والمسواك بفمه:صحى حرارته مرتفعه وشكله بيزكم
ايمن: الله يعين
ابوحمد:امش للبيت امك موصيتني لاشفتك اجيبك معي
ايمن ابتسم:ياحبي لها اشتاقت
ضحك ابوه:من الصباح ماسكها لاتروح يمكم
وصلوا للبيت ودخل ابوه قبله ودخل من سمع ابوه :تعال مافيه احد
اسرع لامه وهو يضحك على شكلها المتحمس بشوفته
:شلونتس يالغاليه بعد العرس عسى ماتعبتي
ابتسمت:ابد مافيه تعب وين عروستك
ايمن وقف : بروح اجيبها لتس
ضحكت بفرحه :الله يحيها
دخل بيته وعلى طول اتجهه للغرفه الصغيره فتح بابها ماشافها فيه فتح باب غرفة النوم شافها واقفه على الشباك ابتسم
:السلام عليكم
سحاب بدون نفس:وعليكم السلام
جلس على طرف السرير بجهتها:اتجهزي بنروح لاهلي
مشت ماتكلمت مسكها بسرعه من ذراعها من مرت جنبه
نفضت يدها بقرف وضمتها لصدرها وقف بنرفزه:شبلاتس انتِ
تقوس فمها وامتلت عيونها دموع وهي تسب وتشتم ضعفها بداخلها شصار لها ماكانت كذا
لانت ملامحه وهو يقرب منها:سحاب علامتس خايفه مني هالكثر
نزلت عينها للارض بتردد :ماابيك
انصدم وتغيرت ملامح وجهه وقال بتأكيد وهو يتمنى انه سمع غلط :ماتبيني
رفعت عينها له:ايه ماابيك وماني راضيه بهالزواج كله
مسكها من ذراعها بقوه وكلمة ماابيك تضرب عرق العصبيه عنده:مغصوبه علي ياسحاب
سحاب مسكت يده الي على ذراعها بألم:عورتني
ايمن بعصبيه يهزها:جعلها الكسر ردي علي مغصوبه
سحاب ماقدرت ماتبكي:ايه مغصوبه ولولا حلف امي ماطبيت بيتك مااحبك مااحبك
انكسرت فرحته فيها والضيق ملئ صدره وقال وهو يصر على اسنانه ويضغط على يدها اكثر:جعلتس ماتحبيني الحين تجهزين نطلع لامي وياويلتس يطلع هالحكي برا هالغرفه سامعه
ثم دفها عنه بقوه طالع للحوش يمشي فيه بسرعه يحاول يخفف الحره الي بقلبه انضحك عليه ماتحبه ولاتبيه وهو يموت عليها من كثر فرحته امس يحس انه طايربالسمار وبكلمتها ضربت فيه قاع الارض كيف بيهدى وهالكلمة تكسره
شافته مع الشباك بنظره خاطفه صدره يعلى وينخفض بشكل واضح ووجهه اسود من غضبه تنهدت وجهزت واضطرت تحت مكياج شوي ثقيل يخفي ملامحها الباكيه لبست عباتها وتغطت وطلعت له من شافها على طول توجهه للباب انقهر وهو يشوف تراحيب امه فيهم وكلهم مايدرون بالي بقلبها عليه
مدت لها القهوه:تقهوي ياعيوني
ايمن يهمس لها:ابتسمي
تغصبت البسمه وهي تتقهوى وساكته تسمع سوالفهم
وقف ايمن مايقدر يجلس اكثر بينفجر :بروح اشوف نواف وراجع
امه:الله يحفظك
طلع ايمن وجاتهم هبوب على طول سلمت على سحاب وجلست جنبها :شلونتس يالعروس
التفتت لها سحاب:حالي من حالتس
ابتسمت:اجل انتس بخير
كشرت وصدت عنها تتقهوى وتحس بمكان مسكته ينبض يألمها و دموعها معلقه باطراف عينها لكنها تحاول ماتنزل قدامهم دام نطقت بوجهه هالكلام لازم تثبت انها قده طول الجلسه كانت ساكته وماتنطق الا جواب سؤال فقط
:
ايمن بعد ماخفف على نفسه دخل البقاله:الله يعطيك العافيه ياسياف تعبتك
سياف وقف يسلم عليه:ياحيه بالعكس انا فاضي اشغل وقتي
اخذ له عصير بارد لعله يبرد النار الي بصدره وجلس على كرسي يهز رجله بقوه وواضح لاي شخص يشوفه انه متضايق
سياف حط يده على كتفه بطبطبه بدون لايحكي
رفع عيونه له وابتسم :مافيني شي كنت معها عند امي وتركتهم عشان اختك تجلس معهم
هز راسه سياف عرف ان فيه شي من تبريره الغبي الي فضحه
جلس قباله:عمي يقول حمد تعبان
ايمن:ماتعرفه كل بداية شتاء يمرض
سياف:الله يعين افكر اعتمر قبل تبرد الاجواء اكثر
فزوا اثنينهم من سمعوا اصوات الرجال ترتفع والي يركضون
ايمن وهو يطلع:الله يستر الله يستر
ارتفعت عيونهم للدخان الي دليل قوي لحريق مسك ايمن رجال من الي يركضون:شصاير
الرجال وهو مستعجل:بيت خالد يحترق
من سمع حكيه مر من جنبهم يركض مايفكر الا فيها بيتها يحترق
ركض ايمن وراه وصلوا للبيت الرجال حوله يتساعدون يطفون النار الي من كبرها دخانها الاسود غيم بجوهم اكثر
وقف قدام البيت بوجهه المخطوف موقادر يتحرك تيبس جسمه من النار الكبيره الي يشوفها يتنفس بقوه خوف ومن ركضه السريع وهو ينادي نفسه بداخله(تحرك ياسياف شبلاك تحرك بتموت بتموت وبتروح مثل امك )صدمة حريق امه للان متأثر فيها لف براسه لايمن الي يهزه بقوه:سيااف تكفى ياسياف
لكن سياف تفكيره انشل يناظر ايمن بضياع التفت لباب البيت الي الرجال يحاولون يدخلون ناظر رجله كان يترجاها تتحرك ارتفع راسه بسرعه من سمع الرجال يأكدون ان بالبيت احد
اسرع لاقرب واحد من الباب ودفعه بقوه عن طريقه ودخل
والكل يصيح فيه يرجع ايمن عصب عليهم واقفين حول الباب ولاواحد فيهم تحرك:الله ياخذكم وياخذ ضعفكم
نزع ثوبه عشان مايعرقله واخذ سطل ماء وهو يدخل ورا سياف
وصل الخبر لنواف الي طلع بسرعه يساعدهم افنان خافت قلبها يعورها والاصوات مومريحتها ابد وخروج زوجها بهالسرعه اكد لها ان فيه شي صاير قلبها دليلها بالاشياء السيئه لبست عباتها وطلعت تمشي بسرعه
اتسعت عينها من الدخان وركضت ورا الي يركضون وكل ماقربت من بيت اختها يخفق قلبها بخوف ويصدق حدسها الشين
شافت الكل متجمع حريم ورياجيل متجمعه قدام البيت الي طفت ناره لكن الدخان الاسود للان موجود حولهم برد جسمها رفعت الغطاء عن وجهها كل ماقربت يرتفع نفسها اكثر صرخت بكل صوتها لما سمعت حرمه تقول :الله يرحمهم
اول ماسمع الصرخه التفت يدورها بعيونه ثبتت عينه على الي تمشي يمهم ووجهها واضح للكل ماهي يم احد ولاتحس بالي تسويه اوجعه قلبه من انهارت جالسه تبكي وتصارخ باسم اختها عض على شفته وهو يجيها ويغطيها بسرعه بشماغه ويضمها بصدره يخبيها عن الي يطالعونها:افنان اذكري الله
قربت جدة سياف والعمه لهم:هاتها يمنا
رفع عيونه لها مايدري كيف يتصرف ضاع من شاف حالتها
نزل عينه عليها من حسها ترتخي بحضنه طبطب على خدها:افنان الله يخليتس صحصحي افنان
الجده:ياوليدي انا جدة سياف والبنيه اغمى عليها هاتها
رفعها وهو يمشي وراهن دخل من فتحت له الباب وركضت العمه تبعد الطاوله الارضيه:نزلها هنا
نزلها على الارض بشويش وفك غطاها ورجع يطبطب عليها يصحيها التفت بقلة حيله على العمه:ماصحت
العمه هبوب:بتصحى لاتخاف
الجده:انت نواف خوي ايمن
هز راسه ووقف يحس مكانه غلط ببيت سياف وبين اهله:بروح اشوف الاوضاع انتبهوا لها تكفون
العمه هبوب:تطمن بتكون بخير
اخذ نظره لها وطلع نزلت عباتها بشويش وهو تمسح على وجهه افنان:الله يكون بعونكم هبوب يمه هاتي كوب ماء وقربي هالمناديل
:
سياف اول مادخل يدورها مثل المجنون شاف مصدر النار المطبخ لف لايمن الي رش كل الماء بجههة النار وقف والخوف متملكه دخل الغرفه الي قدامه واسرع يدورها بعيونه الي بتطلع من خوفه عليها ماشافها طلع وهو يضيق عيونها من شاف الي بالزاويه اسرع جلس قبالها مسك راسها الي مختفي بين شعرها يناظرها:فاتن تسمعيني
فتحت عيونها بشويش تشوفه لكن ماطولت الا وطاحت بين يديه مغمى عليها على طول رفعها وهو يرمي عليها بشماغه الي كان ملفوف على راسه يركض فيها من طلع تعالت الاصوات يدعون لها مومهتم لاحد بهاللحظه الا بها سدحها بسيارته من ورى لان المسافه بين بيتها والمستشفى بعيده اسرع وقلبه ينبض بقوه وقف قدام المستشفى ونزل وهو ينادي عليهم اسرعوا بالسرير حطوها فيه ولحقهم حتى سيارته تركها شغاله وابوابها فاتحه وقف من ابعده الممرض يمنعه من الدخول صار يشد على شعره لورى وهو يدعيلها ومنظره يلفت كل الي بالمستشفى ثوبه الي مربوط على خصره تحول للون الاسود ووجهه كذلك فجاءه داهمته دوخه قويه استند على الجدار ويده على عيونه وماهي الا ثواني طاح بطوله على الارض
:
ام حمد وهي تقرأ على افنان الي من صحت وهي تبكي وعيونها مثبته على الفراغ جات هبوب بصحن فيه رز وكاسة ماء حطته عن عمتها :افنان
ماردت عليها التفتت على عمتها بحزن :لازم تأكل
ام حمد:خليها بتأكل بعدين
وقفت وعيونها على افنان تقطع القلب كانت هي واختها صحباتها ودوم يسهرن سوا تنهدت وطلعت جلست بين سحاب والجده :شلونها
هبوب بحزن:ماهي بخير
الجده:ماجاكم خبر عن اختها ورجلها
هزت راسها بلا ثم وقفت بخوف وهي يطري ببالها سياف
وطلعت للباب تفتحه بشويش عسى تلقى اي صغير ترسله يشوفلها سياف صكرت الباب وسحاب طلعت وراها
:شفيكِ قمتي فجاءهووجهك مخطوف
هبوب بخوف:إذا هذي حالة أختها كيف حالة سياف
رفعت حاجبها بعدم إعجاب:وايش بيكون حاله يعني
هبوب مقهوره منها من علمتها بالي قالته لايمن وانه اكيد ماراح تطول معه ورفعت يدها بتهديد:سياف بقليبه وحده وهالوحده فاتن ولاراح يبدلها بغيرها تسمعين برجع اقولتس شيلي سياف من راستس
لاتخربين حياتتس بتفكيرتس الغبي ذا
وتركتها تصارع تراكم مشاعر كثيير بصدرها اوجعها بالحييل كلام هبوب وشتسوي إذا توسط قلبها موبيدها
:
نواف وايمن يساعدون الشباب بالبيت الي ماسلم منه الا جزء من غرفه مسح وجهه بتعب:الله يكون بعونهم ويعوضهم
يدعيلهم ويشيل بقايا هالبيت ولاكأنه بعداوه قويه مع صاحب البيت زفر من شاف خالد يدخل للبيت بذهول وقف عند ايمن
والحسره بوجهه:وشصار
ايمن:صاربه حريقه وطفيناها باقل الخساير الله يعوضك
خالد حط يده على راسه الشي الوحيد الي بفلوس حلال هالبيت تعب لين رمم كل زاوية فيه:لاحول ولاقوة إلا باالله
اتسعت عينه من ذكرها صار يدور بالبيت عليها مهما وصلت فيه الخسه وكرهها الا انها بنت عمه ولايتمنى لها الموت
رجع لايمن الواقف يراقبه:تكفى تكفى قول انها ماكانت بالبيت
هز راسه بآسى:زوجتك إن شاءالله انها بخير اسعفوها للمستشفى
الي صاب خالد صاب ابوه الي جاء مسرع من اندق بابه ووصلوله الخبر

' سبحان الله وبحمده سبحان الله العظيم '