أبدلني الله حورية

الفصل الواحد والعشرين

*لا بد للحقيقة أن تظهر ولا بد للغامض ان يُعرف رُبما الأسباب هُيئت ، والجبر قريب"☺💛

هاشم : انا اسف جداا انا هقوم اشوف فيه اي
عبدالله : لا عادي ولا يهمك اكيد حصل سوء تفاهم
هاشم : عن اذنكم
عبدالله : اتفضل
احمد : اتفضل

" وذهب هاشم ورائها"
احمد : يبني انت تعرفها ولا اي دي ولا كأنها شافت عفريت
عبدالله : معرفهاش اصلا
احمد : متأكد
عبدالله : ايوة متأكد
احمد : مش فاهم مالها دي
عبدالله : هنعرف دلوقتي

" بعد دقائق دخل هاشم ومعه فاطمة"
هاشم : معلش يجماعة
عبدالله : حصل اي
فاطمة : يعني انت مش عارف حصل اي
هاشم : يبنتي فهمينا طيب اي حصل
فاطمة : الاستاذ ده هو اللي أهانني ف نص الشارع وقالي اي الخيمة اللي انتي لبساها دي وجاي دلوقتي يعمل اي جاي تهينني تاني
عبدالله : اسمحلي يعمي ارد
هاشم : اتفضل يبني
عبدالله : انت البنت اللي شوفتها كانت راكنة العربية ف نص الشارع
فاطمة : انا كنت بدورها بس هي مش شغالة
هاشم : بس بس انتو هتتخانقوا
عبدالله : انا ف اليوم ده مكنتش شايف قدامي حرفيا وهي جات فيكي انتي حقك عليا متزعليش مني مكنش قصدي ولما اتريقت علي النقاب كنت جاهل ومكنتش ملتزم كفاية ولولا التزامي دلوقتي مكنتش جيت قعدت قدامك ووالدك وافق بيا كده ونا اسف مرة تانية
هاشم : خلاص ي ابني حصل خير انا فهمتها بس هي بتحب تكبر المواضيع
عبدالله : لا ي عمي ده مش تكبير مواضيع ولا حاجة ده حقها
فاطمة : كويس انك عارف
عبدالله : ايوة عارف اي اللي يرضيكي دلوقتي
فاطمة : لا خلاص اعتذارك كفاية
هاشم : طيب هنسيبكم شوية يارب منسمعش كراسي متتخبط والبيت يفضل سليم

" خرج احمد مع هاشم بعد ان ربّت علي كتفه قائلًا : ربنا يعينك شكلك هتروح برجل واحده ههههه"

عبدالله : نتكلم في المهم
فاطمة : اه نتكلم ف المهم
عبدالله : عندك اي سؤال
فاطمة : عندي كتير
عبدالله : اتفضلي
فاطمة : بص بقا اولا كده نقاب مش هقلعه، سلام مبسلمش ، تليفزيون أغاني مبسمعش ، فرح إسلامي معرفش غيره ،اماكن مختلطة ممنوع ، بنات عمك وبنات خالك لا زي اخواتك ياحبيبي ولا انتوا متربين سوى نو نو الكلام دا مينفعش معايا خالص تمام الصلاة ف مواعيدها ف المسجد شيء أساسي مفيش داعي اتكلم ف النقطة دي ، حفظ القرآن وطلب العلم طبعااا طبعا شئ معروف جدا يعني ،تضيف او تقبل بنات ع النت همحي اسمك من وجود البشرية وشكراً
اي دا اي دا انت بتبصلي كدا لية شكل الكلام مش عجبك طب سلام بقا انا مش موافقة
عبدالله : يستي اي ده هو انا اتكلمت ولا انتي بتتلككي اهدي خليني اعرف اتكلم
فاطمة : اتفضل
عبدالله : لو ع النقاب حتى الرؤية الشرعية انا مش عايز اشوفك
فاطمة : نعم!!
عبدالله : اقصد يعني موافق انك مترفعيش النقاب لحد كتب الكتاب ده يرضيكي
فاطمة بإبتسامة: تمام حلو الكلام
عبدالله : ولو علي السلام ف لا انا ولا انتي هنسلم علي حد مش محارمنا والاغاني مش بتتسمع وموافق جدا علي الافراح الاسلامية وهنعين بعض علي الطاعة يستي
فاطمة : طيب كويس خالص
عبدالله : راضية يستي ؟
فاطمة : اه شوية